احمدوا ربي \\\\اول مره ادخل هالقسم\\\\ افهموني ولا تزعلون

بسم الله الرحمن الرحيم
السلام عليكم ورحمة الله وبركاته
مشكلتي ماعرف اقول مقدمات بس بادخل في الموظوع على طول
اول مره ادخل هذا القسم واسأل الله العلي العظيم انه يرزق كل مشتهيه الحمل بتوأم بكل صحتهم

لاتزعلون من كلامي وافهموا قصدي
انا عندي سبع بنات الكبيره ثاني متوسط والصغيره سنه تخيلوا الي انا فيه من سهر وتعب وقرف اقسم بالله حتى زوجي :arb:صار دايما برى ولما يكون في البيت معتزل في غرفته:mad:
بنات خالتي ثنتين خوات ماجالهم اطفال اقسم بالله اني استحي لما نتقابل هم في كامل اناقتهم ورايقييييين مره صحيح ان ازواجهم تزوجوا عليهم لكن البنات عاشوا حياتهم توظفوا في المستشفى وجابوا سواق ومدلعين امهم اخر دللللع وانا شايله معي حفاظات وحليب وتغييرات وزبادي وسيريلاك وكل شي والبس الصغار واحوس فيهم وابوهم يصارخ يالله ولا مشيت وخليتكم والله احيان مايمديني البس او احط على الاقل روج وطول ماني عند الناس احوس:09: في الصغار والمشكله لما يكون فيه اكل انواع الاحراج مره قلت لبنت خالتي يابختك انك جالسه من يوم جيتي اقسم بالله ماقصدي اجرحها قالت لي ماحد قالك خلفي والله حاسه فيها لاني اخذ على خاطري اذا احد جاب سيرة الاولاد والله ماعاد شبعت من اهلي افرح في الصيف علشان اسافر لهم والله ماقدر اقعد معهم ليله كامله من الاحراج ازعاج اطفالي مع ان اهلي طيبين لكن ماقدر استحمل استحي الحين قفلت بابي وجلست في البيت علشان بناتي مايخربون على احد او يزعجون احد حتى لما اسافر لأهلي استاجر لو اضطر اخرج اوصي الكبار ينتبهون لصغار لين ارجع لكن يتظاربون الله لايوريكم انا عارفه بعظكم تقول ابغى اخلف علشان زوجي لايتزوج انا نفس الحكايه اخاف زوجي يتزوج :icon28:علشان الولد هلكت نفسي وانا الان عمري 32 وربي ما اراد قلت ابرتاح على الاقل ثلاث سنوات وبعدها اسوي تلقيح يقولون اظمن شي اكيد بقولون توها تشكي والحين تبغى تخلف :icon33:>>>>>>> هههه احلفي
والله اني مقتنعه مررره بالقسمه والنصيب حتى اقول لزوجي والله اذا مت بالاقي الي:hahaha: يدفني ويدفنك لاتخاف لاكن تعرفون الرجال والي عندهم اولاد يقولون نبي بنات والي ماعندهم يبون اي شي الانسان طماع ويبي كل شي
بقولكم قصه بنت جارتنا والله العظيم صدق

تزوجت قبلي بسنه وفظلت تسع سنوات ولا خلت علاج خلت كل العلاجات وطفشت ودلعت نفسها على الاخر وتوظفت اقسم بالله يابنات دايما تجي عند اهلها لانها لما تزوجت سافرت الرياض مع زوجها واهلها هنا في الطايف وكنت اقول يابختها دايم تجي لاهلها وتجيب الهدايا وجابت لاهلها الشغاله والسواق وساعدت اخوها تزوج
المهم جاها حبوب في وجهها نزلت جده تبي تعالجها قالت لها الدكتوره ماقدر اعطيك العلاج لين تحللين حمل قالت لدكتوره انا ما احمل قالت الدكتوره مافيه دوا الا بعد التحليل راحت حللت علشان تسكت الدكتوره وطلعت حااامل ماصدقت راحت مستشفى ثاني وحللت طلعت حااامل قالت ابو البشره اثاري الحبوب من الحمل طبعا فرحت وربي تمم لها وجابت بنت طبعا بعد الولاده ما اخذت مانع حمل علشان تبي اطفال وفظلت ست او سبع سنوات وبعدها طلعت حامل بالصدفه وفرحت وفرحوا اهلها وجابت بنت الكل تمنى انها ولد حتى امها وجدتها ولا اخذت مانع شفتوا ابن ادم طمااااع وفجأه بعد خمس شهور الا وهي حامل زعلت ايه زعلت تخيلوا وجابت ولد الحمد لله وعى طول اخذت مانع طفشت من الصغار خاصه الاثنين الصغار ولا عاد اعتنت بنفسها ولا عاد جات عند اهلها كثير ابو التغيير الي صار
الي ابي اقوله ياااااااابخت الي ماعندهم عييييال والله مايمنعونك من الموت واذا تزوج زوجك خليه والله ثم والله اذا شاف الصغار والازعاج يرجع للهدوء عندك اكيد بيفرح اول مره لكن بعدها بيكره اليوم الي تزوج فيه ويرجع وهو رجال مابي لقول غيرها
بنات خالتي لما تزوج زوج الكبيره كان ابوه جابره وهو يبكي عند خالتي مايبي يتزوج يحب زوجته اكيد تأثرت لكن ماتركت بيتها واليوم الثاني راحت دوامها على طول تقول ابي اتسلى واعيش الوظع عادي ومتفقه هي وظرتها وسوت عماره ثلاث ادوار زوجها يحول فيها تعطيه الدور الاول ويقسط المبلغ ورفظت تقول خلك بعيد تبقى حبيب
واختها الصغيره تزوج زوجها ولا عرفت الا ثالث يوم وزعلت وراحت لابوها لان امها مطلقه وابوها رفظ تقعد عند امها الا مره في الشهر وعاد تعرفون زوجت الاب وزوجها رفظ يطلقها يقول يحبها مادري ذا الرجال الي يحب يجرح عندهم <<<<<<<<< الله يعين على عقولهم
المهم رجعت ودورت وظيفه ولقت في المستشفى والله مبسوطه والتفتت لعمرها وخلت كل شي وراها هي واختها وامها واخوهم من مكه الى المدينه الى ابها الى الرياض الى جده والله لوعندهم صغاران يكونون مثلي محبوسين ولا شبعوا من امهم امي قبل شهر سوت عملية مراره وصار مظاعفات حاولت في زوجي اروح ورفض علشان البنات ولا حتى زرتها تخيلوا

ادري طولت بس ***** الله الي ابغى اقوله بحسن نيه وصل لكم اخواني لما تزوجوا اقول امانه لاتستعجلون تجيبون اطفال عيشو العمر مره خلونا نعيشه صح الاطفال زينة الحياة الدنيا لاكنهم فتنه اقسم بالله تقول زوجة اخويه الكبير ماعاد يقدرون يتجمعون عند امهم علشان الصغار يسوون مشاكل بين الاخوات صاروا كل عطله وحده تروح طيب ليش الهم والنكد والدنيا سهله وانتوا تدورون النكد بابنات دلعوا انفسكم وعيشوا حياتكم وزوروا وانتوا مرتاحين البال خلي الرجال يتزوج هو الخسران بيتين واجارات ومصاريف من غير الظوه الي يجبر خاطرك فيها والله هو الخسران لت تحبين ولد الناس اكثر من نفسك ماقلك اكرهيه او طنشيه لا لا لا لا لكن حبي نفسك وااله العظيم انتوا في نعمه ماتحسون فيها امانه لاتزعلون من كلامي ولا تفهموني غلط :(