السلام عليكم
الله حيهم وشلونكم ؟؟؟
حياكم على قصتي القميله :42:
أنا عندي ولد عمره 3سنوات ومغتربه مع زوجي في كندا وقدر الله علي أني احمل :( وانا ماودي عشان الغرين وصعبه اخلي زوجي وارجع السعوديه المهم نزلنا زياره ومن رحت لهم وامي وابوي يقنعوني اجلس عندهم تعرفون قلبهم معي وانا اصريت أني اكون زوجه سنعه ومااخلي زوجي لوحده وان شاء الله ماعلي الا العافيه
:(
وجاء يوم الرحله طبعا كنت بنهاية السادس وامي الله يعظم أجرها جهزت لي كل شي حتى المطازيز والقرصان كل شي الله يجزاها الجنه
شوي الروح أصيح واجي >>>>> خخخخخ اصلا مابقى فيني دموع
المهم وادعتهم بصياح ونياح وخواتي يصيحن من غير شعور ويصارخن وامي تبوسني مع كل مكان لا جد الحين أنا صحت ............
وطلعت من عندهم وانا نفسيتي زززززززفت وولدي تخيلو طول الطريق وهو ساكت ماتكلم ولا شي بس يفكر قطع قلبي
وصلنا المطار وجاء وقت الرحله واقلعناااا
ماتلاحضون أني ماحلت طاري الولاده للحين خخخخخخخ تحملوني متضايقه
المهم مرت الايام والأسابيع ويوم دخلت الثامن بطني نزل مرررررره ويوم صار لي اسبوع بالثامن نزل مني ماء قد كاسة الشاي ويوم جاء زوجي من الكليه وانا اقوله ويختبص ويدق على دكتورتي قالت الحين روحة للمستشفى أنا أبجي وراكم
رحت المستشفى واول مادخلت جوني يركضون قالو انتي توتو قلت إيه وعلى طول يسون لي اجرائات دخول
الدكتوره مكلمتهم ومعطتهم خبر
حطو تخطيط عشان الجنين وقاسو الضغط وخلوني بالملاحظه وجت الدكتوره وكشفت علي من تحت قالت ماهي موية جنين هاذي من التهاب عندك وتقدرين تطلعين وعطتني ورق لونه بيج قالت اذا نزل منك مويه امسحي فيها واذا صار لون الورق ازرق تجين على طول
وطلعت وانا طالع من عندهم احس شي ينزل مني بس سكت ويوم وصلت البيت مسحت وصار لونه ازرق بس قلت ماعلي الا العافيه ماراح اروح لهم لأني شايله هم ولدي مدري وين اوديه
وهالكلام يوم الجمعه وعندي موعد يوم الاثنين واستمر الماء ينزل صرت أحط فوطه من كثره ويزيد اذا صليت خاصه بالسجود
ويوم جاء يوم موعدي قبل اروح مسحت بالورق ولفيته بمنديل قلت عشان تشوفه
ويوم دخلت سألت حسيني بشي بعد ماطلعتي قلت المويه زادت و وريتها الورقه وهي يتغير وجهها وتقعد ترطن مع زوجي وانا زي الأطرش بالزفه
وزوجي ضاق صدره قلت وش السالفة قال لازم ولاده قلت وشلون توي بالثامن قال لازم خطر ع الجنين تقول الحين روحو للمستشفى وانا اخلص شغلي وأجيكم
قلت ابروح للبيت اخلص أشغال عندي واروح بكرا للمستشفى قال لها قالت لا ضروري تروح للمستشفى
أنا ودي اروح للبيت وآرتبه واجهز لي مكان اذا جيت وأخذ اغراضي وأشوف ولدي وين اصرفه فيه مابيه يشوفني وانا أولد
بس الشكوى لله
المهم ركبت السياره وقلت لزوجي ابي البيت وانت واقف بس اباخذ اغراض خفيفه وانت تروح تكمل اغراض البيبي>>>>> كان عندي امل انه يطلع معي
ورحت للبيت وجلست أرتبه وكلمت وحده من البنات قلت ابجيب سوسو عندك بس الليله لأني تعبانه وابجلس بالملاحظه بس الليله هاذي أنا ماقلت لها مابيه ينشغل بالها علي
وماقصرت رايتها بيضاء قالت روحي ولا تشيلون همه
وراح عندها ياقلبي عليه وانا رحت للمستشفى وعلى طول دخلوني للملاحظه وأخذوا مني مسحه بس تجلس ساعه وتطلع النتيجه
وجتني الدكتوره وكشفت من تحت وأخذوا تخطيط عالجنين وقالت كل شي تمام المويه نقصت بس مو مره يعني مافيه خطر ع الجنين
بس ننتظر التحليل كانه سليم تقدرين تطلعين
وجلست ساعه وجت عندنا دكتوره ثانيه حنوووووووونه مررره وجابت معها كرسي وجلست قلت شكل السالفه مطوله
قالت ان معي نوعين بكتيريا وأنها خطره ع الجنين احتمال تعمى عيونه وأشياء ثانيه
الام ماعليها خطر بس الخطر ع الجنين اذا تبين تولدين الحين تدخلين ونعطيك طلق صناعي واذا ماتبين وقعي على مسؤليتك
قلت لا اهم شي الجنين ودخلوني غرفة الولاده ع الساعه 12 باليل والطلق عطوني ياه 12:30
وبدا الألم الساعه 1
وانا ادعي وكل ماله يزيد صرت مقد أتحمل وبعد 3ساعات كشفت قالت تمام 3سانتي منفتح وانا أصيح وزوجي عندي يهديني ويصبرني والممرضة عندي ماخلتني ابد جالسه على كرسي وتراقب التخطيط
أنا رحمت زوجي قلت انت من الصبح وانت صاحي وتعبان نام لك ساعتين ريح فيهن
ونام وانا زاد الألم مرررررررررره
والممرضة تناظرني وتصيح وتواسيني وانا مررره مت ويوم جت الساعه 6 وتجي تقيس الا قالت 3 بس وزوجي صحى على صوتي وقالت له مسكينه كم لها وهي تطلق ولا انفتح الا 3 سانتي خلنا نضربها إبرة ظهر لان الطلق الصناعي اشد من الطبيعي ويوم قالي زوجي قلت اييييه اهم شي ارتاح
قالت بس اللي يضربها رجل لانها شافتني منقبه قلت عادي ان بغى يولدني بس ارتاح
وكلمة الدكتور حق التخدير وجاء
وعطاني الأبره تخيلو مطلعه له ظهري وحاطه المخده على وجهي عشان مايشوفني ههههههههههه
والممرضه حاضنتني وتمسح علي ولا طلع من عندي الا لما لدى مفعول الأبره
وانا أتكي واسولف واضحك وتقولي الممرضه تحسين بشي قلت لا قالت الطلقه تجيك كل دقيقتين وأقول لزوجي وناااااااااااسه
قالي نامي وريحي قلت لا أخاف أولد وانا مدري ههههههههههههه على بالي انها هينه
وبعد ساعه جت الممرضه وكشفت قالت6 سانتي
قلت قرب الفرج يأرق لك الحمد بس من طلعت يدها والالم بدا يزيد مفعول الأبره بس ساعه وانا أصيح واصارخ
والممرضه مستغربه تقول والابره ماستفدتي ويصحى زوجي ويشوفني بحاله بس اصارخ وأقول ابي أبره ثانيه
وكل شوي داخله علي وحده وتقول غريبه انتي ضاربه ابره
قالت شكلها الحين بتولد وراحو كلمو الدكتوره وجت ممرضه وكشفت قالت الحين ولاده بس لاتدفعي أستني وانا أصيح وزوجي يضمني ويسمي علي وأقوله لاتناظر ياويلك لو تناظر تحت
وهو يقول ماراح أناظر بس انتي لا تصيحين وجت الدكتوره ويوم فتحت رجولي قالت ادفعي والغرفه تمتلي ممرضات ومتجمعين علي ويشجعوني وادفع وزوجي ضامني و وجهه لي ويدعي لي
وادفع وتقولي الدكتوره انتي بذلتي مجهود عظيم بس نبي دفعه وحده قويه ويطلع
وانا ادفع بكل قوه ويطلع ولدي يارب لك الحمد
وأطالع زوجي ماني مصدقه وأقول طلع طلع
وهو يقولي الحمد لله ع السلامه
ويأخذونه مدري وين ودوه والدكتوره تطلع المشيمه وتخيطني
ونادو زوجي يقولون تعال صور ولدك وراح لهم وصوره وجاني على طول فديته وجابو الولد لي وحطوه على صدري وانا أصيح ويصورني زوجي
قلت له علم اهلي وارسل لهم بس ماصدقو على بالهم مقلب لان توي بالثامن
وكلموني وامي ماسكه نفسها بس تدعي لي وابوي نفس الشي بس جدتي تصيح وصيحتني معها
والحمد لله على كل حال
طولت عليكم بس ابيكم تعيشون الجو معي وصراحه الولاده بالخارج ممتعه فرق عن السعوديه معاملت الدكتوره والممرضات قمه بالروعه يخففون عنك باهتماهم كل شوي وهم مغطيني مفارش دافيه ويجيبو لي كمادات دافيه
و حده منهم تبكي معي ولا خلوني ولا لحظه مو زي عندنا ينطلونك لين تموتين
وآسفه ع الاطاله والله يهون على كل حامل
والله يرزق كل محرومه
:26::26:
(
يلزم عليك تسجيل الدخول أولًا لكتابة تعليق.
توتو سوسو فوفو
•
سوري ع الأخطاء الإملائية داخله من الايباد
ماشاء الله الف مبروك ويتربى البيبي بعزكم بس ماقلتي البيبي احتاج حاضنة لانه بالتامن ولا لأ؟؟
وربي اندمجت معك خخخخخخ ضحكتيني وبكيتيني الف الحمد الله ع السلااااامه فديتك ومبررررروك ماجاااك
بس بسال عادي الطفل يطلع بالثامن وطلع معك للبيت ولاضل >>لازم احقق
بس بسال عادي الطفل يطلع بالثامن وطلع معك للبيت ولاضل >>لازم احقق
الله يسلمكم
لا ضل بالحضانه ١٦ يوم
الحمد لله خيره لحد ماخفيت وقدرت اقوم بشغل البيت ربي راحمني
لا ضل بالحضانه ١٦ يوم
الحمد لله خيره لحد ماخفيت وقدرت اقوم بشغل البيت ربي راحمني
الصفحة الأخيرة