السلام عليكم

كيفكم يا حلووووات


اليوم سويت دغابيس على الغدا وقلت انزل لكم الطريقة وما قدرت اصور الخطوات لاني كنت مستعجلة بس هي سهلة باشرحها لكم

طبعا انا سويتها مكشنة وبالعدس بعضهم ما يحط عدس والبعض ما يحبه مكشنة وكل واحد وذوقه


اول شي جيبي دجاجة وقطعيها كانك بتسوي ايدام وبعدين جيبي بصلة كبيرة وافرميها وحطيها في القدر انا استخدمت قدر الضغط لانه اسرع واسهل والذ بس لازم يكون كبير شوي عشان الدغابيس تاخذ راحتها ههههي

حطي في القدر شوي زيت وقلقلي البصل وحطي الدجاج وقلبي لما ينشف الدجاج ويبيض بعدين حطي حبتين طماطم مفرومه مع فصين ثوم مفروم ايضا وقلبي بعدين حطي نص كاسة كبيرة عدس اسود غسليه بمويه وحطيه وقلبي وحطي ملعقة كبيرة كمون وملعقة كبيرة بهارات مشكله انا استخدم (اسناد) حلوة مررررة وحطي مكعبين ماجي وحبتين ليمون اسود وشوي فلفل احمر مطحون وقلبي شوي ثم حطي ملعقتين معجون طماطم قلبي وبعدين حطي المويه تقريبا لتر ونص وقفلي القدر وخليه لين يصفر واحسبيله عشر دقايق على نار عاليه طبعا ان استخدمت قدر الضغط الاصلي (تربو) بس الي بتستخدم النوع الثاني تخليه ثلث ساعة

دحين نسوي عجينة الدغابيس وهي عبارة عن اربعة كاسات دقيق استرالي وممكن استبداله بكاستين اسمر وكاستين ابيض بس الاسترالي احسن بكثير ويطلع الدغبوس ليييين وحطي ملعقة صغيرة ملح وعجني بالماء لما تسير العجينة متماسكة ولينة نوعا ما وخليها ترتاح عشر دقايق

لما يستوي الدجاج فكي القدر وانتبهي خلي البخار كله يطلع بعدين فكيه وارجعي شغلي عليه النار وجيبي العجينة وخذي زبدية فيها موية عشان تبلي يدك وتفردي العجينة عشان ما تلصق في يدك

وطريقة الفرد انك تاخذي قطعة من العجينة بحجم الليمونة وتحطيها في راحة يدك اليسار وتفردي بيدك اليمين على قد الراحة لا تسير دبيه ولا رقيقة وسط يعني واهم شي تكون يدك مبلولة مويه عشان يسهل الفرد وعشان ما تلصق العجينة بيدك وبعدين تسقطيها في القدر وهكذا حتى تنتهي العجينة اهم شي انك كل ما حطيتي دغبوس لازم تغمره المرقة تمام بعدين تحطي الثاني عشان لا تلتصق الدغابيس مع بعض

بعدين اقفلي القدر واستني لما يصفر واحسبي عشر دقائق اخرى وبرضو على نار عاااالية

بعدين قفلي القدر وشيلي الصفيرة وتاكدي من الملح انا صراحة ما ازود اكتفي بملح الماجي

واستمتعي باحلى دغابيس ههههههي

وهذي صور الطبق معليش الصور مو زينة عشان العيال الله يصلحهم مستعجلين يبون ياكلووووون






وهنا اقرررررب شوفو كيف لييييينة مع المرق



دوبي اتعرف عليها ماشاء الله عليك نجرب لانه شكلها حلو
تسلم الايادي
اللهم احمي اخواننا في البحرين و ليبيا واليمن وسوريا والعراق وجميع بلدان المسلمين
روووووووووووووووووووعه
يارب اكتب لي الخير بالامور كلها واجمعني بزوجى يارب
نافدااااا خشمك وانا دفعك
تسلم يمينك
شهيتيني لها
طبعا طبق شهي ولذيذ وانصح الكل يجربها
وهذي الذ اكله بالنسبه لي
مشكوووره
سبحان الله وبحمده سبحان الله العظيم


الساعة الآن 03:23 .