السلام عليكم أخواتي

أنا متابعة قديمة للمنتدى بس يا دوب سجلت (بالاصح استرجعت كلمة المرور اللي كانت ضايعة مني ) ومو مصدقة إني قاعدة أكتب ليكم يا أخواتي و حبيباتي(ملحوظة للتوضيح: هادا الموضوع غير منقول واذا قريتيه في منتدى تاني اسمه فتكات فهادا لاني كتبته هناك اول)
حابة أوضح إني ماعندي أي هدف من مشاركاتي إلا احتساب الأجر عند الله بمساعدة أي أحد بأي طريقة أقدر عليها, حتى لو كانت بخصوص عناية بشعورنا, وكمان إن اللي ناوية أقوله إن شاء الله هو نتاج متابعة, بحث, وتجربة, يعني باختصار أنا مو مختصة في عالم الشعر أبداً فحبيت أوضح ليكم أخواتي.


اللي حابة أسويه هو إني أبغى أقترح برنامج عناية بالشعر اللي بدأت فيه من فترة وجاب نتيجة ماشاء الله مرررررة حلوة وماكنت متوقعة إن شعري ممكن يطول لقبل نص ظهري, إيش مو متوقعة, ماكنت أحلم بيه حتى وأنا نايمة وأنا اعني كلامي بس الحمدلله على كل حال صارت لي ظروف خاصة أهملت فيها شعري ولكن والحمدلله ماانتهى واتبهدل يعني كان فيه قوة خلته يتماسك بس اضطريت إني أقصه لآخر رقبتي, مع إنه كان ممكن ما أقصره قد كدة بس حبيت أبدأ من جديييييد مرة والله المستعان. الآن حابة أقترح البرنامج وحابة إنكم تشاركوني إذا عجبكم البرنامج واقتنعنوا بيه على الأقل شعورنا تتحسن للعيد شوية, وإن شاء الله برضو حنكمل مشوارنا لبعد العيد, والعناية هادي حتصير أسلوب حياة دائم بإذن الله.

قبل ما أبدأ حابة أوصف حالة شعري الحالية, أنا شعري صحته الحمدلله جيدة جدا من ناحية غزارة, مفرود كيميائيا (حنتكلم بعدين بالتفصيل), مقدمة الشعر خفيفة حاليا لأني في فترة بعد ولادة, طوله اخر الرقبة تماما.


البرنامج ينقسم لعدة أجزاء
1- برنامج شهري
2- برنامج أسبوعي
3- برنامج يومي


أولا: البرنامج الشهري

أنا عارفة حتقولوا إنها تنشف وم حلوة للشعر الجاف أو الشعر "الصعب" شوية بس صدقوني والله والله لو كانت تنشف كان أنا أول واحدة شعرها نشف منها, أكييييي عرفتوا أنا أتكلم عن إيش!! (الحنة)!!
مرة واحدة شهريا وفي نفس التاريخ من كل شهر ليا يوم محدد أحني فيه شعري, طيب ليش وأنا فاردة شعري؟!!! إنتوا عارفين إن الفرد الكيميائي بيفك الروابط اللي في الشعر المجعد أو الصعب عشان يصير سايح حبة, الحنة يا ستي بترجع للشعر اللي اتهرى القوة والصحة, مع ملاحظة إن القوة والصحة مو معناها "التجعيدة", طيب؟
المهم ياستي أنا بأجيب حنة سادة نقية من اللي بتستخدم للجسم في النقش, بس أتأكد تماما إنها طبيعية ونقية مية بالمية وإلا قولي يا رحمن يارحيم على شعرك أغلي 3 أكياس شاي عادي وكم حبة قرنفل في موية لفترة لغاية ما الموية تصير غامقة جدا يعني مرككككزة, أشيلها من على النار وأخليها تدفى شوية بس ماتبرد, أعجن بيها الحنة عادي لكثافة الزبادي تقريبا أو أتقل شوية, أغطيها بكيس وأحطها على جنب لصباح اليوم التاني, أنتبه إني أعجنها في صحن غير ستينلس ستيل وبملعقة أو شوكة بلاستيك! الصباح على خير اخد صفار بيضة وأعجنها مع الحنة, البيض حيخلي الحنة زي الكريمة وسهلة في الحط على الشعر, أحطها على شعري من الجذور للأطراف, أدعكها في الفروة كويس بس بنعومة اغطي راسي بكيس وفوق الكيس طرحة أو ايشارب تقيل عشان يخلي الراس دافي, وأترك الحنة على شعري 3 ساعات أشتغل أنظف أسوي ماسكات أي شيء, قصدي اشغلي نفسك مو تجلسي تستني ال3 ساعات يمروا لإنك حتطفشي, عن تجربة

بعد ال3 ساعات ادخلي الدش حطي راسك تحت دش دافي وخلي الحنة تنزل لوحدها وبعد كدة اغسلي شعرك ببلسم عادي مو بشامبو (الشامبو بيخلي غسل الحنة من الشعر صعب جدا لأنه بينشف الشعر فالأمور تتعقد حبة على عكس البلسم) اغسلي بالبلسم مرة واحدة مايحتاج تعيدي وتزيدي وتخلصي البلسم حقك لأن شعرك ماحينضف تمام في المرحلة هادي ماعليكي, خليكي معايا, شعرنا حينضف يعني حينضف

اطلعي من الحمام بعد ماحطيتي على راسك منشفة, خليها شوية (منشفة قديمة أو لونها غامق عشان حتتبهدل حبيبتي) بعدين شيليها وخلي شعرك ينشف شوية في الهوا على راحته (لاتتفجعي هو في المرحلة دي حيكون ناشف ويخوف حبة

خلال ماشعرك قاعد ينشف, جيبي الزيوت هادي (هادي المفضلة عندي من بعد بحث وتنقيب, جيبي أي زيوت طبيعية بتناسب شعرك) زيت السمسم, الخروع, جوزالهند, زيت الزيتون (اتاكدي انها طبيعية نقية ماعليها اي اضافات), خدي ملعقو أكل من كل زيت, اخلطي الزيوت في كاسة وحطي الكاسة في حمام موية مغلية عشان الزيوت تدفى حبة

تعالي لشعرك وافرقي حبة حبة ابدي من عند رقبتك, افرقي, غمسي اصابعك في كاسة الزيوت, وافركي فروة راسك كويس زي مساج دائري, اتاكدي توصلي لكامل الفروة, بعدين تمسحي على كامل الشعر لغاية الاطراف بنعومة وتفرقي تاني وهكذا لغاية ماتخلصي شعرك كله

خلصتي حطيتي الزيت على كامل الفروة الجذور الشعر, اعملي مساج كويس للفترة اللي تقدري عليها, لفي كيس وطرحة ونامي بالزيوت لتاني يوم الصباح, احسن شي تنامي بيها خليها تاخد وقتها تمام

حبيت اذكركم مو الفكرة انك تغرقي راسك زيت ويقعد ينقط على ملابسك وبهدلة وحالة,لالالالالالالالالالالالا لا, الفكرة اتاكدي انك غطيتي كل الفروة والشعر وسويتي مساج, المفروض ان الزيت ماينزل عليكي حتى, لاتغرقي راسك بالزيت



جا الصبح, ويا صباح الخير, ادخلي على طول واغسلي شعرك عادي المرة هادي بالشامبو المخفف(جيبي علبة عبي نصها موية ونصها شامبو ورجيها وخدي منها واغسلي عادي), حطي الشامبو وادعكي الفروة بلطف, ابدي من الرقبة وانتي طالعة للجبهة, طبعا احسن لو تطوني فارقة شعرك من النص من جبهتك لرقبتك, فهمتيني ولا لخبطتك زيادة؟؟ المهم الفكرة ادعكي الفروة بنعومة ولاتفركي في كامل الشعر, مايحتااااج, مجرد ما الرغوة تنزل على كامل الشعر هو بينضف, مجرد مشي يدك على باقي شعرك, لاتفركي فيه وتهريه!

ماتعيدي بالشامبو اكتر من مرتين, لانه قوي مرررررة على الشعر

جيبي البلسم العادي وحطيه على كام الشعر بدون الجذور وخليه للفترة المكتوبة على العلبة, أنا بخليه مو اكتر من 15-30 دقيقة حسب ظروفي يعني

اشطفي البلسم بموية باردة وحطي المنشفة على شعرك شوية

خلي شعرك يتهوى شوية يعني ينشف لدرجة 50 بالمية, نص نص يعني فيه طراوة

جيبي كريم شعر (حاقولكم عليه بعدين ان شاءالله) وخدي شي بسيييييييط جدا زي دائرة صغيرة قد العملة وافركيها بين يدينك وامسحي بيها اطراف شعرك بداية وبعدين امشي على كامل شعرك بنعومة (الكمية بسيطة جدا فما راح تدهن شعرك وتزيته)

خدي نقطتين زيت جوزالهند او اي زيت طبيعي يناسبك (زيت جوزالهند من اكتر الزيوت اللي الشعر يقدر يمتصه لان جزيئات الزيت صغييييرة جدا عشان كدا انا احبه) وبنفس طريقة الكريم, الاطراف وبعدين كامل الشعر (انا حاطة الزيت في علبة بخاخ وباخد بختين لكامل شعري) صدقيني شعرك ماحيدهن, بس انا شعري الحمدلله غزير, اذا شعرك خفيف بشكل ملحوظ قللي الكميات اللي اقترحتها

دحين خلي شعرك ينشف على مهله لغاية مايصير تقريبا 80 بالمية ناشف

انا شخصيا افرق شعري 4 واعمل كل واحد كعكة (ماتشدي على شعرك سوي كعكة بنعومة بس مو كمان كعكة راخية مرررة!)
ممكن تلفيه باللفافات (المكر), ممكن تضفريه ضفيرتين يطلعلك مموج رووووعة لما تفتحيه, انتي وابداعك

خليه لغاية ماينشف مية بالمية وافتحيه وشوفي ان شاء الله كيف حيكون!!!!

لما تفتحيه دحين خدي كريم ونفس اللي قلناه فوق (راعي الكمية بسييييييطة واكترها للاطراف ولاتنسي الشعر عند مقدمة الراس كمان), ثم زيت (انا هنا ولان شعري ناشف تمام اخد نققققققققطة زيت خروع للاطراف, رهيييييييييييب للتقصف) وكملي تسريح شعرك عادي بطريقتك

ممكن يشبه ان الحكاية صعبة حبة بس الكتابة طبعا تشبه طويلة وتانيا هادا الكلام مرة شهريا وفوايد الحنة بالطريقة هادي شي خيااااااااااااااااال باذن الله


حابة اتكلم شوية عن ايش سويت الحنة لشعري (و شعر بنتي اللي عمرها 7 سنوات كمان)

شعري صحيح مفرود وناعم بس مو ميت ومطاط الحمدلله, الشعرة نفسها فيها صحة, قوة, شعري اسود بس مو غاااامق مرررة, مع الحنة صار فيه لمعة عودي او عنابي مررررة عاجبني ماشاء الله, الحنة مخليتني مااخاف من الفرد على شعري
ممكن في البداية تفجع الحنة لان تحسي شعرك ناااااشف كدة بس مع حمام الزيت الحار اللي سويناه بعد ماغسلنا الحنة, يطلع جنان
و حاجة تانية, الحنة بتحلي الشعر اكتر واكتر بالاستمرار, يعني فوايدها واثرها بيبان على الشعر كل مرة اكتر من اللي قبلها
اتوكلي على الله وماراح تندمي

هادا برنامجي الشهري


البرنامج الاسبوعي
سهل جدا وهو عبارة عن نفس حمام الزيت اللي سويناه بعد الحنة وكملي نفس الخطوات
انا بعمل حمام الزيت مرتين اسبوعيا (نفس الايام خليه يصير روتين انتي وشعرك تتعودوا عليه), احط الزيت على شعري السبت بالليل واغسلوه صباح الاحد
وتاني مرة احط الزيت الاربعاء الليل واغسله الخميس الصباح

غسلي شعرك وكملي الخطوات زي اللي قلناها فوق بالكريم والزيت....الخ


البرنامج اليومي

انا باعمل كدة في الصباح اول مااصحى بالليل قبل ماانام
تذكري حركة الكريم وحبة الزيت على الاطراف اللي قلناها فوق؟؟ هادا اللي انا اسويه بس انبببببببببببببببببه عليكي مرررررررة تانية
الكريم حببببببببببببببببببة صغيرة
الزيت بخة الى بختين حسب طول وكثافة شعرك

لاتغرقي شعرك وتخليه يصير مدهن وجااااامد مررررررة بايخ شكله بيصير,صح ولالا؟؟؟

اذا ماحابة تسوي الحركة دي مرتين يوميا, سويها في الليل قبل النوم, واذا تقدري (ماادري اشك المتزوجات حيقدروا لفي راسك بمنديل حرير او ساتان وانتي نايمة (القطن والمخدات بتزيد من التقصف وتتعب الشعر)
اذا ماتقدري, خلي غطا مخدتك ساتان او حرير, فكرة حلوة صح؟؟؟



دحين حابة اتكلم عن المنتجات اللي ارتحت عليها, وشوفوا اللي يناسبكم, واكيييييد مجرد اقتراح


1- حنة نقية (خالية من اي اضافات)
2- زيت خروع, سمسم, نارجيل (جوز الهند), زيت الزيتون
3- شامبو وبلسم Gliss بزبدة الشيا والكشمير

http://t1.gstatic.com/images?q=tbn:A...iHHd6gFGFT-H3Q
4- كريم Organic Root Stimulator (olive oil) لترطيب الشعر

http://t2.gstatic.com/images?q=tbn:A...edvL5h_HyhgGs w

5- لفرد شعري (افرد كل 3 - 4 شهور و افرد فقط واشدد على فقط الجذور النامية الجديدة) استخدم olive oil relaxer
organic root stimulator

http://t3.gstatic.com/images?q=tbn:A...X0KE91udiQ39i Q



هااااادي هي بس المنتجات اللي باستخدمها, ياما دفعت وخسرت واتكلفت على حاجات بس الحمدلله رسيت على هادول بس وارتحت عليهم مررررة ماشاءالله

6- مشط خشبي واسع الاسنان
http://t2.gstatic.com/images?q=tbn:A...0GS0rwgaEknSo w


7- فرشاة شعر (تنفع تعمل مساج للفروة مو تقطع شعري) شبه الفرشاة هادي

http://t0.gstatic.com/images?q=tbn:A...STB45caTKgrGV l


8- فرشاة تنعيمية (استخدمها احيانا لمقدمة الشعر وقت التسريحات والحركات شبه هادي

http://t2.gstatic.com/images?q=tbn:A...0NJKlQ8_0Q39j g



9- ربطات شعر او بكلات (مافيها قطع معدنية لانها بتؤذي الشعر وتقطعه) شبه هادي

http://t1.gstatic.com/images?q=tbn:A...kATwxqD40efPY A


10- لفافات شعر (مااستشور شعري ابدا اصلا مابحب شعري وهو مستشور احسه صناعي, احب شكله ملفلف فيه صحة كثافة تلقائية, واكيد شيك.واكيد مجرد راي مع احترامي للي بيحبوا الاستشوار) زي هادي

http://t1.gstatic.com/images?q=tbn:A...0NdVdgk6Ns-PXg

وبسسسسسسسسسسسسسسسسسسسسسسسسسس!! !!!!

هي بس 10 اشياء اللي احتاجها لشعري
عندي نوتة مسجلة فيها برنامجي والاشياء هادي


للعناية بشعرك

1- خليكي ناعمة في تعاملك مع شعرك, لما تسرحيه ويكون معقد ابدي من الاطراف بالمشط شوية شوية واطلعي لفوق لغاية ماتوصلي للجذور, كدة ماتقطعي فيه, يعني لما "تسلكي" شعرك لاتبدي من الجذور للاطراف بل العكس, عاملي شعرك كانك بتعاملي فستان حرير غاااالي عليكي

2- اتذكري وحطيها قاعدة, مع الشامبو ركزي على الفروة والجذور, مع البلسم ركزي على كامل الشعر واطرافه مو الفروة والجذور

3- الحكمة مو في كمية المنتج اللي بتحطيه على شعرك, بل في طريقة وضعه وتوزيعه (انا زمان كنت اغرق شعري باي شيء, على بالي اني كدة جبيت العييييد سواء زيت كريم بلسم...الخ حطي شوية ووزعيه تمام

4- ماتستعجلي النتايج الحلوة, شعرك ماخرب بين يوم وليلة ونفس الشيء ماراح يتصلح من اسبوع اسبوعين

5- اهم شيء للشعر عشان يقوى هو الترطيب (كريمات وزيوت) والبروتين (ماسكات وبيض وغيره).
الترطيب اليومي (كريم وتبعه زيت) يحفظ شعرك من الجفاف التقصف التكسر
البروتين الشهري (ماسك الحنة بالبيض) يدي شعرك القوة ويعادل الترطيب اليومي والاسبوعي,
زيادة ترطيب+ قلة بروتين= شعر مطاطي ضعيف!
قلة ترطيب+ زيادة يروتين= شعر جاف متقصف زي القش!

6- خلي برناج عنايتك بشعرك بسيط مناسب لاسلوب حياتك وغير مرهق جسديا او ماديا عشان تضمني باذن الله انك تلتزمي بيه

والله مادري بس هادي الاشياء اللي تحضرني رغم ان عندي معلومات كتيرة
بس بالله اي واحدة فيكم اخواتي عندها سؤال, ترى مايردها الا لسانها!! يعني لا تستحي ابدا
هادي محاولة متواضعة جددددددا مني للمساعدة حتى لو اقتنعتي بواحد بالمية من كلامي, احتسب بيها الاجر عند الله


طلبي الوحيييييييد, دعوة صادقة منك يااختي ان الله ينولني اللي في مرادي واسمع اخبار حلوة قرييييب تدمع لها عيناي

انا عندي بنتين الله يحفظهم منهم نونو عمرها 8 شهور فان شاءالله تعذروني شوية في تواجدي اللي مااقدر اتحكم فيه كتير
بس اي اسئلة ان ان شاءالله حاااااضرة قد مااقدر


أحبكم في الله

مشكوره موضوعك قيم ومفيد بس لما احني شعري واغسله يتساقط كثير كمان البلسم يساقط شعري بكثره
استغفر الله واتوب اليه
ماشاء الله حلو برنامجك
طيب ليش يقولون لو كنت تحطين حناء لا تفردين شعرك لانو بيتساقط ويطيح
وانا اشوفك ما شاء الله تبارك الرحمن عااادي
مره حلو
ممكن اعرف منتجاتك من وين اول مره اسمع فيها
الله ينولك إلي في بالك قريب يارب


الساعة الآن 11:21 .