ثقافة الشراء + تعليمات صحيه = الحد بأذن الله من انتشار الامراض المستعصيه(مجهود شخصي)

المنزل والديكور




صلو ع النبي يابنات




عندي شوية نصايح وتعليمات وافكار حابه
اقولها بدون تكلف وبهرجه وتنميق كلام
عشان تطلع من قلبي لقلبكم
يعني حتلاقوني اتكلمت عن حاجه ونطيت
لحاجه تانيه وارجع للاولى وهكذا هههههههه
اتحملوني واسمعوني للاخر ترى مو موضوع والسلام
والله انا ح قولكم كلام ينشرى بفلوس
نفذو كلامي لانو اي اصلاح او نجاح يبدا من الام من ربة المنزل
من الاخت يعني الحرمه هيه الي تبني وتهدم
ولانو كل ادارة البيت بيدنا حابه اتكلم معاكم
وياريت تنشرو الموضوع ف الايميلات الدال على الخير كفاعلو
ومعليه اتحملوني هرجي كتير ومااعرف متى اخلص
بس يله كلو بأجرو لكم اجر القرايه وليا اجر النصح

دحين ندخل ف المهم

اول حاجه ح تكلم عن التبضع
والتسوق من سوق المواد الغذائيه
والخضره
من كل النواحي كيف تقتصدي
وكيف تعرفي الجوده تبع المنتج
وكيف تقارني بين منتج والتاني
وكيف تعرفي انو المنتج يستحق سعرو
وهكذا
اول حاجه قبل ماتخرجي من بيتك
روحي المطبخ وبيدك ورقه وقلم




الضروريات مش الكماليات
واذا لابد من الكماليات فجيبي الاهم منها
ترى قرشك الابيض ينفعك ف يومك ال:(
وعشان ربنا يطرح البركه ف رزقك
سيبي البعزقه والاسراف وعودي نفسك
ليش لازم السلطه فيها كل انواع
الورقيات!!
ليش الحلى فيه كل طلبات الدنيا
ليش السفره حقت الغدا ممتده وتكفي
اكتر من عيله
ليش كل دا ترى الحمدلله انا مرتاحه ماديا
بس مااسرف والله شوفو حلفاني الي مش مجبوره
عليه انو سبب الاقتصاد عندي هو دا السؤال
ومالك فيما انفقته
طيب نرجع لكلامنا
كتبتي احتياجات السوق
وتوجهتي للسوق وشفتي مالذ وطاب
وبضاعه جديده ومغريات ووووالخ
طنشي ولاكأنك شايفه حاجه
خليكي ماسكه العربه وعينك ف ورقتك



اول حاجه قبل ماتدخلي المتجر
مري على اعلانات التخفيضات والعروض
حتلاقيها عند البوابات في سلات معلقه


امسكي وحده بيدك وخودي نظره سريعه
يمكن يكونو عاملين تخفيض او عرض
على حاجه من الي موجوده ف الورقه
اتحداكي تشوفي اجنبي يتبضع مش ماسكها

اكيد بتقولو ايش دخل الكلام دا
في الامراض هههههه تابعوني وحتعرفو

دحين بديتي تتقضي
والخيارات قدامك كتيره
نفس طلبك اكتر من شركه ومصنع
هنا يااما انك حتاخدي الي
متعوده عليه ومرتاحتلو
او حتاخدي الارخص او يمكن الاغلى
لانو من وجهة نظر البعض الاغلى افضل
وانا حقولك كيف تختاري
مثلا القشطه طويلة الاجل
اذا كانت للحلى والطبيخ خودي الارخص
واذا كانت للاكل العادي خودي كوالتي عالي
اكيد الاغلى جودتها اعلى وطعمها احلى
دي المعلبات
طيب الجمدات تروحي تشوفي بلد الانتاج
اذا كانت دوله سمعتها طيبه
وزراعيه اكتر من غيرها اشتريه
زي مجمدات اسبانيا جدا ممتازه
بغض النظر عن اسم الشركه او المصنع
باخد من عندهم خضره مجمده اذا انزنقت
جدا ممتازه ونكهتهم طبيعيه
طبعا مابفضل المعلبات ولا المجمدات
الا للضروره والضروره بتحكم كتير
زي البسله الاولاد بيحبوها وهيه جدا مفيده
وبتكبر ومليانه بروتين ومافي طازجه
لازم مجمده
طيب كيف نعرف اذا الخضره والفاكهه
كويسه او مليانه مبيدات وهرمونات
ومجاري زي مابيحصل معانا بجده
ومكه والطايف والمدينه
الغربيه كلها مافيها خضره نظيفه
والفواكه بنشتري مستورد
طيب انتو يااهل الغربيه انا حليتلكم
الاشكال دا طبعا بعد تعب وجهد
بس الحمدلله طلعت بنتيجه ممتازه








يتبع...


بنوتات ردو براحتكم لاني حاجزه
لردودي:)
22
2K

يلزم عليك تسجيل الدخول أولًا لكتابة تعليق.

تسجيل دخول

のrosyの
のrosyの
تصدقو كتبت وطار الرد
يقولي انتهت صلاحيت الصفحه:09:

نكمل ان شاءالله

بالنسبه للخضار والفاكهه
انا صرت اتوجه لرف المستورد بدون
لف ودوران
ماابغى اتكلم كتير عن خضرة الغربيه
الي تبغى تستفيض تبحث بيوتيوب وقوقل
حتلاقي كلامي من مصادر موثوقه
او تفتح حلقة ياهلا في موقعهم
طبعا المستورد الامريكي غالي
والمستور الاسيوي والافريقي لابأس
عموما اول حاجه اتوجه للارفف
واشوف المعلومات الي بتكون معلقه فوق
كل رف مكتوب عليها مستورد او محلي
والي ماالاقيه في الرفوف العاديه
اروح اخدو من البراده بتكون منتجات
امريكيه فخليها لاخر شي لانها غاليه موووت
وماباخد منهم الا الضروريات والاشياء
الي مابلاقيها غير عندهم
دي صورة الارفف





ودي البراده




كل ماكانت الفاكهه غاااامقه وريحتها نفاثه كل ماكانت طبيعيه اكتر
دا الكلام كلو لبنات الغربيه
اما القصيم والمدن التانيه
ماشاءالله ربنا يحميهم مزارعهم
تفتح النفس كل شي نظيف:(

يتبع...

のrosyの
のrosyの
في حاجه بس حابه اتكلم عنها
الي هيه الحبوب
من عدس وحمص وفول وفاصوليا
وغيرها
الغالب بتشتريها من الي متوفر
او الي قدامك
بس انا حقولكم طريقه حلوه ومفيده جدا
اتوجهو لقسم اسمو منتجات عضويه
حتلاقو جميع انواع الحبوب
وبعض انواع الارز وبعض المنتجات التانيه
زي الزبيب والملح والسكر الخ
كلها منتجات طبيعيه عضويه
يعني مافيها اي عوامل زراعيه
كل الحكايه مويه وتربه يعني بالعربي
مزروعه زي زراعة زمان
انتو حتقرو المكتوب على الكيس من ورى
حتنصدمو من المعلومات وتعرفو قد ايش
الفرق بينها وبين العاديه
حتى السكر والملح طبيعي
السكر غير مكرر
والملح طبيعي حتى ريحتو ولونو تحسي
انتي الي جمعتيه من الشاطي
طبعا مو اي شركه تقدر تكتب انو منتجاتها
عضويه خاصة الدول الكبرى زي فرنسا
وايطاليا اوربا بشكل عام
لانو علامة المنتجات العضويه ماتمنح الا
بعد الخضوع لتجارب واختبارات ومابتاخد الرخصه
والتعريف بمنتجها على اساس انو عضوي
غير بعد وجع راس
وبتلاحظو انها كلها دول كبيره ومهمه

طيب يابنات انا بس حابه اختم كلامي بكم
نصيحه ع الماشي
البهارات والاعشاب
لما تشتريهم لازم يكونو صحاح مش مطحونين
مهما كانت الشركه لاتاخدي مطحون
ولما ترجعي البيت لازم تغسليهم وتجففيهم وتطحني
بنفسك
وزيها اعشاب الشعر والشرب

اااااه اكتر حاجه بتزعجني
ونفسي اقول لكل الامهات بصوت عالي
ارحمو اطفالكم منها وهيه الوجبات السريعه
الي فيها سلطه وطحينه
ارجوكم كيف تاكلو اطفالكم خس مع الوجبه
انتو تعرفو انو الخس بالذات
يحتاج غسيل اكتر من غيرو ولازم بالخل
ودا كلام طبيب وتعرفو انو حشرات
الخس نفس لون الخس وشكلو مابتبان
الاتحت المجهر
وزيها زي شراب المكينه والله لو تعرفو
بلاوي الشراب الي بيطلع من المكينه
ماشربتوه ولااديتو لعيالكم

اقطعي المشروبات الملونه من بيتك تماما
عن الاطفال طبعا
تصدقي انو الغازيات زي البيبسي عندي اهون
من الشراب الملون زي الفيمتو والسنتوب
ودانون وغيرها
الحلويات الملونه المصنعه والمطاطه واللزجه
واستبدليها بالفشار الصحي اعمليه ف البيت
وبالكوكيز اعملي صينيه وحطيها بعلبه تكفيهم
كم اسبوع عوديهم على السناك الصحي
انا مااقولكم اني مثاليه لا والله وياما خبصت لكن
اجاااهد قد مااقدر وتعرفو مجتمعنا مايساعد
الكل بيتدخل في الاطفال فماتقدري تمنعي وتشددي
بس نحاول قد ماربنا يقدرنا
مفارش الاطفال الملايات والاغطيه لازم كل 4 ايام
تغسل واخر شطفه تكون في مويه سااااخنه
لمدة ماتقل عن 10 دقايق وتنشر وتهوى
لانو اغلب امراض الربو والصدر من الملايات
ملابس البنات الصغار الداخليه
بعمر تلاته واربعه لحد عمر 12 سنه
تغسل واخر شطفه تغسل في مويه مغليه
وتجفف تماما
وفوق ال12 تصير هيه بنفسها تهتم في غسيلهم
اخيرا ياريت تساحوني على العجله
كنت محضره موضوع طويل ومفصل وملون ومصور
بس للاسف المنتدى يخبص معايا
ومو راضي يطلع ردي الا مختصر حتى لما انسخ
والصق مايطلع شي
شكلو مل من هرجي الي مابيخلص
ادعولي بنات وارفعو الموضوع اعتبروه رياضه:hahaha::hahaha:
حوائية100مية
حوائية100مية
موضوعك قيم فعلاًيااختي
حسيت بالاستمتاع وانا أقرأه
جزاك الله خيرا وربي يعطيك اللي تتمنينه
نجدومجد
نجدومجد
يعطيكي العافيه موضوع مميز
new ritage
new ritage
مشكوره