هبهوبة انا قريت اللينكات اللى حاطاها وعجبنى كام حاجه هجربهم
تسلم ايديكى باين عليكى طباخه بريمو وحتى الحاجت اللى ناقلاها ومش انتى اللى عاملاها كاتبة كده برافو عليكى عشان لو عملنا حاجه ومعتمدين انها منك وعن تجربة وباظت مننا انتى حرة هنيجى نمسك فى رقبتك انتى
السلام عليكم

هبهوبه انت هايله وموضوعاتك حلوة جدا
دون وحشتينى اوى ازيك ماشاء الله اكلاتك زكيه
انا اعرف ان من عوامل نجاح الباشميل ان الزبده قد الدقيق يعنى مثلا لو ملعقتين زبده يبقى ملعقتين دقيق كمان الحليب يكون ساخن جدا وده بيخليه يلف بسرعه معاكى ويكون ازكى لو حطينا طرنشه بصل وحبتين فلفل اسود صحيح فى اللبن اثناءتسخينه ايه ريك يا قمر
البسبوسه بتاعتك حلوة اوىوممكن نحط القشطه فى النص كحشو بتكون هايله
الملوخيه
علشان متكونش صايصه نضع فى الشربه اثناء غليانها فصين ثوم ناعم وسنه كربوناتوعلى طرف الملعقه قبل وضع الملوخيه مستنيه رايك
اللهم انك عفو كريم تحب العفو فاعفو عنا
السلام عليكم
وسوسة تسلمى لى ....
la rosa ......شكلك شقية مرة خلتينى مسكت رقبتى لا إن شاء الله جربى على ضمانتى بس ياريت تقرأى الموضوع لأخره لأن فى عجينة العيش باللحم أنا كتبه نصف كيلو لبن رايب وده صح بس لما واحدة سألتنى الكيلو كام كوب كتبت كوبين وأنا قصدى على النصف كيلو كوبين ولما جئت أصلحها منفعش عشان المنتدى لم يكن يسمح بأن الواحد يغير أقواله أنما الأن أتحلت المشكلة.. وكمان التشكين رول الأفضل أن المكونات اللى تحشى بيها تقطع صغير بالسكين عشان طعمها يبان أكثر رغم أن الطريقة الأصلية زى ما أنا كتبها ومجرباها كله مفروم أنما دائما الواحد يحب يطور نفسه للأحسن مش كده ولا أيه !!! وكمان أحلى عشاء لأحلى ضيوف أنا عملته بالضبط مثل ما قلتلكم وطلع حلوجدا بس لما جربت أضع نفس كمية الدقيق مثلها قشدة( يعنى كيلو دقيق عليه كيلو قشدة ) طلعت فطاير طعمها رهيب جدا ولا يقاووووووووم.....
وبالنسبة لزبدة الفول السودانى خذى يا ستى كل اللى عندى

مشروب وأيس وكيك وتوفى كله بزبدة الفول السودانى لعيون larosa>
أختكم هبهوبة
السلام عليكم و رحمة الله و بركاته

أختي العزيزة دون

جيت زي ما وعدت و جايبة لكم معايا طريقة المكرونة اللي قلتلكم عليها و كمان كام وصفة تانيين باحب اعملهم و يا رب يعجبوكم

طبق مكرونة اسباجتي
=============

المقادير:

كيس مكرونة اسباجتي مقطع 3 اقسام <<<<< عشان المكرونة متكونش طويلة اوي و تبقى اسهل في الاكل

4 او 5 بصلات كبار

5 شرايح هامبورجر أو فرانكفورتر أو هوت دوج

4 وحدات فلفل اخضر (رومي)

ملح و فلفل اسود و كاري و رشة بهارات

3 ملاعق كبيرة خل

3 فصوص توم كبار

سمن او اي نوع زيت تفضلوه

نيجي للطريقة:

نسلق المكرونة و نخليها على جنب

نقطع البصل اربع ارباع و بعدين شرايح عريضة و نقلبها في المادة الدهنية اللي عندنا. و بعدين نقطع الفلفل الاخضر اربع ارباع و بعدين شرايح عريضة و نقلبه مع البصل و بعدين التوم نقطعه شرايح رفيعة جدا جدا و نقلب معاهم و بعدين البرجر او الهوت دوج يقطع مكعبات و يتقلب معاهم و بعدين نضيف التوابل و الخل و نضيف شوية ماء و نقلب و كل شوية نضيف شوية ماء صغيرين اوي بس عشان البرجر يستوي، و لما يستوي تماما و برضه يكون فيه شوية ماء على خفيف نضيف له المكرونة و نقلبها كويس و لما تسخن نطفي عليها. و نقدمها مع الكاتشب و المستردة و المايونيز. صدقوني اكلة تحفة!!! و خفيفة جدا على المعدة و ممكن تكون عشاء او غدا او حتى فطار متأخر، لانها مش تقيلة على المعدة ابدا

الكبدة الاسكندراني
===========

المقادير

1\2 ك كبدة (طبعا الكميات ترجع لكل واحد)

3 بصلات وسط

3 حبات فلفل رومي (بارد)

2 حبة طماطم

ملح و فلفل أسود و بهارات

فصين ثوم مدقوقين

ملعتين كبار صلصة طماطم

1\2 ملعقة خل

زيت ذرة

الطريقة:

تقطع الكبدة مكعبات صغيرة. يقطع البصل كالاتي: كل بصلة تقطع أربع إرباع و بعدين تقطعيها شرايح رقيقة نوعا. الفلفل برضه يقطع نصفين و بعدين شرايح رقيقة. الطماطم برضه نقطعها اربع ارباع و تقطع شرايح رقيقة.

نجيب الطاسة التيفال و نضع فيها الزيت لكن مش كتير ممكن ملعقة طعام أو اتنين. نضع البصل و نقلب حتى يذبل و لكن لا يصفر ثم نضيف الفلفل و نقلب حتى يذبل الفلفل كمان ثم نضيف الطماطم مع التقليب حتى تختلط بالباقي. ثم نضيف الكبدة و نقلب و نتبلها بالتوابل المذكورة. أما الخل و الصلصة و الثوم الدقوق نخلطهم مع ذرة سكر و نقلبهم كويس لحد ميبقى عامل زي الكاتشب و نضيفهم الى الكبدة بعد نضجها و لو محتاجة نقطة ميه ممكن نضيف شوية لكن الأفضل نسويها على نار هادية تقوم الكبدة تنزل المية اللي فيها و لا نحتاج مية من برة. و تقلب ثم تطفي النار. و تؤكل مع الخبز و سلطة الطحينة و السلطة الخضراء.

الدجاج البروست
==========

المقادير:

دجاجة

بصل- ملح و قلقل و بهارات- ليمون- خل

دقيق

زيت للقلي

الطريقة:

نقطع الدجاجة 8 قطع و نعمل شقوق بالسكينة في كل قطعة

نضرب البصل في الخلاط و نضيف له التوابل و الليمون و الخل ثم نتبل الدجاج و نحاول نضع التتبيلة في الشقوق اللي عملناها.

نترك الدجاج المتبل في الثلاجة يوم كامل (كل ما تركت أطول كل ما شربت من التتبيلة اكتر و أنا مرة تبلتها و تركتها في الديب فريزر اسبوع و بعدين عملتها و كانت روعة!!)

نضع الزيت الغزير على النار حتى يسخن و بعدين نغمس كل قطعة دجاج في الدقيق (بدون بيض) ثم نقلي القطع على نار متوسطة (لأنها لو حامية الدجاج يستوي من الخارج و ميستويش حلو من جوة و لو هادية حتاخد وقت كتير قوي انتي اتحكمي في النار احسن)

تخرج ذهبية اللون و نضعها على مناديل ورقية لتمتص الزيت ثم تقدم مع السلطات و الخبز او المكرونة

المحشي بأنواعه للمبتدئات في عالم المحشي
=========================

أولا: مقادير الخلطة:

2 ربطة بقدونس و 1 ربطة شبت مخرطين رفيع جدا (بالسكينة مش بالمفرمة)

2 كوب صلصة طماطم أو أكثر حسب حجم الكوب لديك (أنا بصراحة أعاير بالنظر)

5 بصلات كبار مبشورين

توابل: ملح و فلفل و بهارات و نعناع أخضر مطحون

سمن أو زيت ذرة حسب الرغبة


طريقة الخلطة:

نخلط الكونات ببعضها جيدا في طبق عميق ثم نضيف عليه 3 أو 4 أكواب من الأرز بعد تنقيته و غسله جيدا و نقلبه في الخلطة جيدا


بالنسبة للكرنب

نفصل أوراق الكرنب عن بعضها ثم نسلقها واحدة واحدة لمدة 2 أو 3 دقيقة في مياه تغلي بها كمون. ثم نصفي الاوراق في المصفة ثم نقسم الاوراق إلى اوراق اصغر في حجم نصف الكف تقريبا. نضع في كل ورقة جزء من الحشوة ثم نلفها جيدا بحيث لا يتساقط منها الارز عند رصها في إناء الطهي. نرص الاوراق فوق بعضها و عند انتهاء الكمية نضعها على النار و نضيف لها كمية من المرق المضاف اليه القليل من الملح و صلصة الطماطم و السمن أو الزيت و لا يلزم ان تغطيه المرقة تماما. و عندما يغلي و تشعرين انه بدأ يتشرب المرقة خفضي النار له و اتركيه حتي ينضج الارز و الكرنب نفسه.

ورق العنب:

نحضر الاوراق و نمسك الورقة بالجزء الناعم ملاصق للكف أي الى اسفل و الجزء الخشن للداخل و نضع عليها جزء من الحشوة و نلفها و نتبع نفس الخطوات السابقة مع الكرنب مع اضافة عصير ليمون للمرقة و نسويه بنفس الطريقة.

الباذنجان:

ننزع قلبه بعد أن نضغط عليه بكفنا قليلا لتطريته ثم نحشيه بالحشوة و لكن لا نحشيه حتي النهاية و لازم نترك فراغ عشان الارز يستوي براحته. و نرصه في الاناء و نضع له المرقة حتى ثلثي الاناء و نسويه عادي زي الكرنب و و رق العنب.

الكوسة:

"نحكها" (مش عارفة بديل للكلمة دي) ثم ننزع قلبها و بعدين نحشيها و نسويها بنفس طريقة الباذنجان لكنها تاخذ وقت اقل منه في الطهي. و ممكن تحشى بدل الخلطة دي بلحم مفروم معصج و ترص في صينية ثم يوضع وقها بشاميل و تدخل الفرن. يعني ممكن بالطريقتين.

الفلفل الاخضر:

ينزع قلبه (البذور) و نحشيه و نترك مسافة بدون حشو و نسويه بالطريقة السابقة كالباذنجان.

الطماطم:

ننزع قلبها و لكن نترك جدارها سميك و نحشيها و نتبع نفس الخطوات في الطهي.

البصل:

نقشره و نغسله و ننزع جزءا من قلبه و نترك جدار سميك و نحشوه و نسويه بنفس الخطوات.


بالهنا و الشفل و يا رب تكون الوصفات عجبتكم

و لنا عودة ان شاء الله
يا رب لك الحمد كما ينبغي لجلال وجهك و عظيم سلطانك

اللهم اغفر لي و لوالدي و للمؤمنين و المؤمنات يوم يقوم الحساب

اللهم احفظني و زوجي وولدي من كل سوء

وسوسة، انا مش عارفة انتي عاوزة المسقعة المصري العادية و الا عاوزة اللي باللحمة المفرومة، و عموما جبتلك اللي باللحمة المفرومة

المقادير:

ا ك باذنجان رومي

1/2 ك لحمة مفرومة

3 بصلات متوسطة

2 كوب عصير طماطم

2 ملعة صلصة طماطم

ملح و فلفل اسود و بهارات

زيت للقلي

2 ملعقة زيت

الطريقة:

الاول نجهز اللحمة المفرومة (العصاج)

نبشر بصلة و نضيف لها شوية ملح و فلفل اسود و بهارات و نقلبها كويس ثم نضيف اللحم و نخلطه جيدا و نضيف كمية بسيطة من الزيت، حوالي نصف ملعقة و نضعها على النار لتنضج على نار هادية، مع التقليب من فترة لأخرى.

بعدين نحضر طبق فيه ماء بملح، و نقشر الباذنجان و نقطعه حلقات سمك الحلقة حوالي 1 سم و نضعها في الماء بالملح حتى لا يسود لون الباذنجان بسبب الحديد و تعرضه للجو. بعدين نقلي الحلقات في زيت غزيرثم نضعها على ورق ليمتص الزيت الزائد.


في صينية فرن نضع مبعقة و نصف زيت و نقطع بصلتين قطع صغيرة و نصفرها في الزيت الى ان تذبل، ثم نضيف عصير الطماطم و الملح و الفلف و البهارات و نضيف ملعقة سكر (للتخفيف من الطعم اللاذع للطماطم). و نتركها تتسبك (تتقل و تغلظ في السمك). نضيف للصلصة العصاج اللي عملناه و نضيف كمية معقولة من الماء ثم نضيف حلقات الباذنجان المقلية و نظبط الملح. نتركها تغلي قليلا ثم ندخلها الفرن بعض الوقت ليحمر الوجه و يتشرب الباذنجان الصلصة جيدا.

صينيه الرقاق باللحمة المفرومة
===================

المقادير:

1/2 كيلو رقاق

سمن سايح أو زيت حسب الرغبة

مرق لحم أو دجاج أو بط حسب نوع اللحم اللي حيقدم الى جانب الرقاق

1/2 كيلو لحم مفروم

بصلة كبيرة مبشورة

مقدار من السمن او الزيت لعمل العصاج

ملح- فلفل أسود- بهارات


الطريقة:

- نحضر صينية فرن و ندهنها بالسمن او الزيت.

- نقوم بغمس ورقة ورقة من الرقاق في وعاء به المرق قبل رصه في الصينية. و عند رص الورقة في الصينية نقوم بدهن سطحها بالسمن او الزيت. و عندما ننتهي من نصف كمية الرقاق، نفرد العصاج على السطح ثم نقوم برص الجزاء المتبقي من الرقاق بعد نفس الخطوات السابقة (غمسه في المرق ورقة ورقة و مسحه بالزيت او السمن). و عندما تنتهي الكمية نقوم برش القليل من المرق على الوجه باليد بحيث لا تكون كمية كبيرة و لكن كمية تكفي لتطرية الوجه، ثم نقوم بتقطيع الرقاق بالسكين مربعات. ثم نقوم بدهن السطه بالسمن او الزيت.

- تجهيز العصاج يتم عن طريق بشر البصلة ثم وضع الملح و الفلفل و البهارات عليها و اضافة القليل من السمن او الزيت ثم اضافة اللحم المفروم و التقليب على نار هادية حتى ينضج اللحم.

- توضع صينية الرقاق بالفرن و عندما يحمر الرقاق من اسفل، نشغل الشواية من فوق لتحمير السطح مع الانتباه حتى لا يحترق السطح. بعد خروج الصينية من الفرن نقوم بتغطيتها بغطاء حتى "تعرق" أي يتصاعد بخار الماء بها فيساعد على تطرية الرقاق.

- تقدم قطع الرقاق و الى جانبها لحم محمر، دجاج محمر، بط محمر، شرائح ديك رومي، بفتيك، دجاج بروست، كفتة لحم او دجاج، او اي نوع اخر من اللحوم او الدجاج، مع السلطات الشهية مثل السلطة الخضراء و سلطة الفاصولياء الخضراء و بابا غنوج و الطحينة و الحمص و غيرها

حلقات البصل (مقبلات)
=============


المقادير:
=======

3 بصلات حجم كبير

نصف كوب لبن

نصف كوب دقيق

1 بيضة

ملح و فلفل اسود و زعتر مطحون ناعم

بقسماط

زيت غزير للقلي

الطريقة:
=======

يقطع البصل حلقات بسمك 1 سم تقريبا للحلقة و تفصل الحلقات عن بعضها

نخلط الدقيق و اللبن و البيضة و التوابل جيدا و نغمس فيها الحلقات ثم نغلفها بالبقسماط و نتركها في الثلاجة 3 أو 4 ساعات

نقلي الحلقات في زيت غزير حتى يصبح لونها ذهبي و نضعها على مناديل ورقية لامتصاص الزيت الزائد

سلطه بابا غنوج:
==========


المقادير:
=======

ربع كليو باذنجان أسود كبير

نصف كوب طحينه و مقدونس مفرى

ثلاثه ملاعق زيت

أربعه ملاعق كبيره من الخل

ثلاثه فصوص ثوم و ملح وكمون و شطه حسب الرغبه


الطريقة:
=======

يشوى البذنجان و يدق ناعما

يدق الثوم مع الملح و الكمون و يضاف إلى الطحينه و يقلب

يضاف الباذنجان و قليل من الشطه و يقلب جيدا و يزين بالمقدونس

المقلوبة بالقرنبيط (و ممكن بدله الباذنجان) و الدجاج (و ممكن بدله لحم)
=========================================
و على فكرة دي أكلة فلسطينية مش مصرية، بس حلوة جدا و انا باموت فيها و حتعجبكم ان شاء الله بس جربوها

المقادير:
=======

واحدة قرنبيط صغيرة تقسم إلى زهرات و تقلي بعد غمسها في خليط من الدقيق و البيض و الملح و الفلفل الأسود

2 كوب أرز منقى و مغسول

1 دجاجة متوسطة الحجم مسلوقة نصف سلق و مقطعة أربع إرباع

2 كوب مرق دجاج

3 بصلات كبار

3 طماطم كبيرة مقطعة حلقات

2 ملعقة كبيرة سمن

كركم، ملح، فلفل أسود، بهارات

الطريقة:
======

نقطع البصل قطع صغيرة و نصفره في السمن ثم نضيف له المرق و التوابل (الملح و الفلفل و البهارات و الكركم الذي يعطي الوجبة اللون الأصفر و الطعم المميز لها).

نحضر إناء الطهي و نرص فيه حلقات الطماطم ثم فوقها نرص القرنبيط المقلي ثم فوقها نرص الدجاج ثم نضع الأرز المغسول و نضيف المرق الذي أعددناه بعد أن يغلي.

عندا يبدأ الأرز في تشرب المرق نخفض النار و نتركه على النار لمدة 30 إلى 4- دقيقة. و عن التقديم يتم وضع صينية تقديم واسعة فوق الإناء ثم يقلب بحرص فيصبح الترتيب كالآتي: الطماطم على الوجه ثم القرنبيط ثم الدجاج فالأرز.


طاجن البامية باللحم الضأن في الفرن:
======================

المقادير:
=======

1 كيلو لحم ضأن

1 كيلو بامية

2 كوب عصير طماطم + 3 ملاعق كبيرة صلصة طماطم

2 ملعقة كبيرة سمن

2 بصلة كبيرة مقطعة قطع صغيرة جدا

4 فصوص ثوم كبار مدقوقين بالقليل من الملح

فلفل أسود و بهارات

1 كوب مرق

الطريقة:
=======

نحضر طاجن الفرن (يكون فخار و لو بايركس مش مشكلة) و نضع فيه السمن و نضيف البصل و نقلب حتى يصفر لونه قليلا ثم نضيف اللحم و نقلبه حتى يتغير لونه (نشوحه) ثم نضيف عصير الطماطم و التوابل و نقلب جيدا و نتركه على النار حتى يغلظ القوام ثم نشيف الصلصة و الثوم المدقوق و المرق و نتأكد من الملح و اذا احتاجنا نزوده نضيف القليل.

نضيف البامية إلى الخليط السابق و نقلب جيدا ثم ندخل الطاجن إلى الفرن و يطهى لمدة 1 ساعة الى ساعة و نصف

و بالهنا و الشفا

و كفاية كده النهارده احسن تعبت!!!
يا رب لك الحمد كما ينبغي لجلال وجهك و عظيم سلطانك

اللهم اغفر لي و لوالدي و للمؤمنين و المؤمنات يوم يقوم الحساب

اللهم احفظني و زوجي وولدي من كل سوء



الساعة الآن 04:42 .