يا صباح الخير و الفل على كل شيفات المطبخ من اول الشيف الكبيرة العزيزة الغالية ام العلاء الى الشيف نانى والشيف كهرمانة والله يا شيف ام العلاء انا بفرح جدا لزيارتك لينا وفعلا مهما شكرتينا فأنتى اللى تستحقى الشكر كلة ربنا يخليكى و منورنا دايما فى مطبخنا .كهرمانة على فكرة طريقتك حلوة فى الايس كريم انا الصراحة بعمله بطريقة واحدة اللى مكتوبة على علبة ماكينة الايس كريم لانى بستخدم الماكينة بتاعتة بس هى فيها عيب واحد بالرغم اننا شريا ها الحجم الكبير بس برضة بطلعة كمية صغيرة قوىنورنور زى ست الكل نانى ما قالتلك ان لسة فى حاجات كتير بتتعمل من الحمص يعنى انا بالتقريب كتبتلك مقتطفات مختلفة لكن لو عايزة لسة حاجات تانية حنكتبهالك برضة بس تابعينا يعنى ننوع فى حاجات تانية و بعدين نرجعلك تانى ماشى؟؟





تورتة الايس كريم

كيكة اسفنجية
ايس كريم فانيليا
ايس كريم فراولة
ايس كريم شيكولاتة
فواكه مسكرة (كريز - لارنج )
الطريقة :
نحضر طبق غويط مقعر (على هيئة نص دائرة )
افرش الطبق بورقة كبيرة فويل (يعنى ابطن الطبق بالفويل كويس قوى)
اقسم الكيكة الاسفنجية من النص بالسكينة
اجيب النص الاول واضعة على الفويل فى الطبق بحيث ياخد شكل الطبق و يكسية تماما
وممكن طريقة تانية للتقطيع بأنك تضعى امامك النص الاول بتاع الكيكة و بعدين تقطعية
شرائح عريضة و تبتدى تاخدى كل شريحة و تحطيها فى الطبق فوق اللى قبلها وهكزا لحد ما تكسى الطبق بدون فراغات بقدر الامكان
بالمعلقة ننزل اول طبقة ايس كريم ونفردها كويس ثم نضع بعض حبات من الفواكة المسكرة
ثم نضع طبقة من نوع تانى من الايس كريم و نفردها كويس و برضة بعض حبات من الفواكة المسكرة ثم نضع الطبقة الاخيرة من الايس كريم وتكون من النوع الثالث ونفرد كويس بظهر المعلقة
نجيب النص التانى بتاع الكيكة الاسفنجية و نقطعة بالسكينة على هيئة دائرة نغطى بيها الطبق كويس و نضغط عليها علشان تثبت كويس فى الايس كريم
ندخلها الفريزر لمدة 3 ساعات وعند التقديم نطلعها
ونقلبها على طبق او سرفيس وهى حتتقلب معاكى على طول ما تخافيش
نشيل من عليها الورق الفويل و يا اما تزوقيها بالكريم شانتية او ممكن تسيحى شيكولاتة خام ( مطبخ )
و تصبيها بالراحة حتنزل تغطى كل القالب بتاعك او ممكن تجيبى صوص الفراولة و صوص الشيكولاتة و تنزليهم على هيئة خطوط رفيعة و بالهنا و اللشفا







حمص بالمايونيز

حمص مسلوق ( حوالى كوب كبير )
معلقة كبيرة طحينة
2 معلقة كبيرة مايونيز
عصير نص ليمونة
2 فص ثوم
ملح – فلفل – عصير نص ليمونة - زيت زيتون – قليل من الكسبرة الخضراء المفرومة
الطريقة :
توضع كل المقادير المكتوبة فى الخلاط يادوب حتتخلط ببعض
نضعها فى طبق التقديم و نضع على الوش بعض نقط من زيت الزيتون و بعض حبات من الحمص








طريقة تحضير الطحينه فى البيت

المقادير:( بنفس الكوب )


1
كوب سمسم أبيض
نصف كوب دقيق أبيض
نصف كوب زيت ذره
الطريقة:
- اطحنى
السمسم كويس فى الكبة ثم يوضع فوقه الدقيق و يطحنان برضةمعا جيدا
وبعدين تحطيهم فى طبق
و بعدين تبدئى تضيفى الزيت بالتدريج يعنى سرسوب (زى ما بنعمل المايونيز )مع التقليب حتى يصبح الخليط ناعم و يشبه الكريمه .
كدة يبقى خلاص
-حطيها بقى فى برطمان بلاستيك
فى الثلاجه لحين الاستخدام و بالهنا و الشفا






ماشاءا لله
الصيف هل ومعاه التورتات والايس كريم كمان
انا كنت بعمل ايس كريم بس كنت بحسه دسم شويه عشان بحطبه لبن مكثف ومش بحطله بيض
هجرب الطريقة بتاعتك يا كهرمانه واقولك
انا جربت سويسرول الشيكولاته بتاعك يادون وحلوة قوى عجبتنى
انا مكونتش بحطلها بيض قبل كده بس حطيتلها بيضتين زى ماقلتى وطلعت احلى تسلم ايدك

الكوردون بلو انا بجيب الفراخ البانيه وبعد ما اتبلها عادى بجيب الراق وافرده كويس يعنى ادقه على خفيف عشان تبقى رقيقة واحط عليها شريحه جبنه رومى او شيدر وعليها روستو مدخن او اى حاجه من النوع ده والفها زى الكفته واقفلها بخلة واحمرها عادى بتبقى تحفة
وممكن مع اخر تقليبة فى الطاسة قبل ما اطلعها على طول ارش على واحده واحده رومى مبشور واطلعها على طول
هكتبلكم طريقة الايس كريم اللى كنت بعملها


الساعة الآن 11:36 .