الكبيبة الشامى

1/2كيلو لحمة مفرومة حمراء
كيلو الا ربع برغل
بصلة متوسطة
ملح - فلفل
للحشو: لحمة مفرومة معصجة وحطى عليها مع التتبيلة رشة قرفة ناعمة و( شوية صنوبر محمرين ودة حسب الرغبة )
الطريقة
اغسلى البرغل كويس وخلى بالك علشان بيبقى فية حصى صغير و انقعية فى الماء حوالى 1/4 ساعة بس
صفى البرغل كويس قوى قوى من الماء
وحطية على فوطة مفرودة علشان تشرب الماء اللى فية
و بالضغط علية بين ايديكى كويس
افرمى البرغل الاول لوحدة فى المفرمة او الكبة مع البصلة
ضعى اللحمة المفرومة على البرغل و اخلطيهم كويس
وبعدين افرميهم تانى مع بعض و مع التوابل
كونى محضرة جانبك طبق فية ماء مثلج
و ابدئى فى عمل وحدات الكبيبة
خدى قطعة اما صغيرة قد البيضة لو انتى بتحبيها صغيرة او خدى قطعة من العجينة قد البرتقالة لو انتى بتحبيها كبيرة ( زى بتاعة ابو حيدر )
تبلى ايدك بالماء و تكوريها على شكل بيضاوى و ما تخليهاش تخينة من الداخل و بالمعلقة الصغيرة حطى داخلها الحشوة و بلى ايدك و لفى واقفلى لفى واقفلى وكدة بقيت جاهزة كملى باقى العجينة
رصصى كل الكبيبة فى صينية و حطيها فى الثلاجة شوية و بعدين يا تحمريها فى زيت غزير يا اما تحفظيها فى اطباق فل فى الفريزر و بالهنا و الشفا
ملحوظة ممكن تستخدمى المفرمة بتاعة الكبيبة بعد ما تخلصى العجينة تحطيها فى المفرمة وتحطى الوش المخصوص بتاع الكبيبة و هى حتنزلها لك مفتوحة على الحشو بس و تقفليها من الجانبين





الكبيبة الصينية

نفس الطريقة بعد ما تبقى عجينة الكبيبة جاهزة
ادهنى صينية بالزيت و ابدئى افردى جزء من العجينة فى الصينية برضة تبلى ايدك بالماء و تبططى لحد ما تغطى القاع
تجيبى اللحمة المعصجة و تفرشيها على الراقة الاولى
و بعدين تجيبى حتة حتة من العجينة و تبططيها بين ايديكى و تحطيها على اللحمة جنب بعض جنب بعض لحد ما تغطى اللحمة كويس و بعدين تقطعيها بطرف السكينة المبلول سمبوكسات و فى كل سمبوكسة واحدة صنوبر و قطع صغيرة على الوش من السمنة
ودخليها الفرن لحد ما تستوى و تتحمر و بالهنا و الشفا





والله العظيم النت بايظ و بكتبلكم من عند الجيران حاجة تكسف استحملونى شوية لحد ما يتعدل وحرد عليكم كلكم وعلى فكرة انا مش ببقى اون لاين دة الجهاز اللى مسجلنى اون لاين على طول ياريت لو حد يقولى اغيرة ازاى فى حالة عدم وجودى ؟؟





ghidaa من عنيا حاضر اول ما يخلص . تماتيا يا ريت تبعتية يساعدنى شوية يبقى كتر خيرك على الخاص او الميل
تماتيا بالنسبة للكبيبه حتلاقيلها مقادير كتيراما البرغل زى اللحمة او اكتر او اقل لكن انا دة مقدارى اللى بعمل بيه و بأزن الله مفيش ولا واحدة حتفتح منك فى التحمير خالص





mooty الخيار المخلل السريع بتاع الشاورمة وانتى واقفة بتعملى السندوتشات اعملية فى دقيقتين هاتى خيارتين وقطعيهم صوابع طويلة رفيعة وهاتى الكنكة الكبيرة و حطى فيها نص كوباية ماء +نص كوباية خل +فصين توم مهروسين و حطيهم على النار يغلوا دقيقة واحدة و حتلاقى الخيار لونة اتغير كدة خلاص بقى جاهز تشيلية من الكنكة فى طبق عشان يبرد بس







الساعة الآن 07:53 .