الفيشار
كوب زرة صفراء
زيت
ملح
الطريقة
ضعى الزرة فى طبق و رشرشيها بزيت لحد ما تلاقى الزرة كلة بيلمع يعنى كله الزيت طاله
ضعى حلة على النار وأمسحيها بالفرشاة بالزيت
وضعى فيها الزرة و غطى الحلة تمام يعنى لازم يكون الغطاء محكم
استنى شوية و أوعى تشيلى الغطاء لحسن الزرة تنط فى وشك
حتبتدى تسمعى طرقعة جوة الحلة (دة صوت الزرة كل ما واحدة تتحول لفشار تطرقع وتعمل الصوت دة )
يا دوب دقيقة واحدة وحتلاقى الصوت ابتدى يقل و شبه اختفى دة معناة ان الفيشار بقى جاهز
اطفى النار و استنى ثانية و شيلى الغطاء و فضى الفيشار و رشرشية بشوية ملح و بالهنا و الشفا
ملحوظة
دى طريقة بيتى سريعة للمعندهاش ألة صنع الفيشار اللى بتتباع فى الاسواق
خلى بالك ان كمية الزرة الصغيرين بيعملوا كمية فيشار حلوة
ياريت لو عندك اولاد صغيرين و تخليهم يشوفوكى وانتى بتعملية حيتبسطوا قوى لما يسمعوا الفرقعة جوة الحلة و لما تشيلى الغطاء و يشوفوا شكل الفيشار ابيض وجميل
08-06-1426 هـ, 01:28 مساءً
 
اية الجمال ده شيف دون على فكرة دى اول مشركة لية فى المنتدى ومعلش لية سؤال مش سهل بس انا شايفة ان مافيش طريقة صعب عليكى ما شاء الله وهو طريقة عمل المش البلدى
08-06-1426 هـ, 02:54 مساءً
 
السلام عليكم اولا مبروك على الجزء الثانى وعقبال الالف شيف دون انا كتبتلك اليوم على الجزاء الاول ومكنتش عرفة بالجزء الثانى فاسفة على تكرار السؤال بمناسبة الفطير المشلتت نفسى اكل معه مش بلدى اصيل اصل انا حامل وبتوحم وكمان جوزى بيموت فيه وانتى عارفة الغربة مفهاش وممنوع دخول الاجبان والحوم من الخارج وعلى فكرة عملت الجبن القريش وطلعت مظبوطة والحمد لله وناقص المش اذا ممكن
08-06-1426 هـ, 03:50 مساءً
 
المش البلدى
بتاعنا انا ححاول بقدر الامكان طريقة مظبوطة و سهلة وربنا يقدرك وتعرفى وتعمليها وبأضعف الايمان حيطلع طعمة مش ..
. جمعى القشطة بتاعة اللبن لما تبقى عندك شوية كويسين و تدعكيها بأيدك تفضلى تدعكيها كويس قوى قوى (حتاخد منك وقت ومجهود ) لحد ما تلاحظى ان القشطة اتكومت لوحدها و خرجت مياة لوحدها ..
احنا كدة حنستعمل المياة دى و حنسميها شرش (وهما فى البلد بيسموها لبن رايب ) تجيبى قرون فلفل خضراء شطة بس يكون لونها أحمر و نفرمهم و نضيفهم للشرش وبعدين تحطيهم فى الزلعة الفلاحى ( عارفاها؟)وممكن نستعين عنها بأناء خزف .
.تجيبى بقى جبنة قريش (اللى بتبقى مخططة عشان بيعملوها على الحصير (عارفاها طبعا) وتجيبى شطة ناشفة و شوية ملح كويسين مش قليلين (أمال هما سموه مش لية؟) وبأيدك كدة ترشى الملح والشطة على قطع الجبنة بس خلى بالك عشان تفضل قطع زى ما هيا وبعدين تحطيها فى طبق عادى برة لكن لو الدنيا حر ممكن تحطيها فى الثلاجة حتلاقيها نزلت مايتها لمدة يومين
و بعدين ترمى المياة دى و تاخدى الجبنة و تحطيها فى الزلعة اللى فيها الشرش بالشطة وتبقى ترجى الزلعة بكل الخليط لمدة من اسبوع لاسبوعين حسب ما تشوفية وكدة طريقة تقريبية للمش لكن طبعا دى وصفة من مامتى و بالهنا و الشفا
08-06-1426 هـ, 05:31 مساءً
 
على فكلرة يا بنت لولة القشطة بعد ما تاخدى مايتها ما ترميهاش ممكن تسيحيها وتعمليها سمنة بلدى ..
(الله يسامحها اللى فى بالى .........؟اللى سابتنى اعمل المش بدل ما تعمله هي ماشى يالى فى بالى خليكى فكراها
08-06-1426 هـ, 05:37 مساءً
 


الساعة الآن 10:24 .