اولا انا زعلانة ان نوودى مدخلتش ...(شوفتى انا واخدة بالى ازاى .....؟)
وثانيا ايرا ومووتى عمالين يبرطعوا فى الصفحة واهم حيضربوا بعض بالكراسى وواحدة حتدخل التانية الفرن والتانية حتاكلها الزبيب ....طيب ادى كدة اتنين خلصنا منهم لانهم حيخلصوا على بعض لوحدهم
وتسلم ايدك على التارت يا رانيا ..... وفين يا احلام سد الحنك ..؟ الحقينا بيه
ايرا ...كويس انك خرجتى من اوضتك
نور نور حاضر حكتبهالك من عنيا
loliah اهلا بيكى معانا وانتى تؤمرى ياست الكل
ام دندونة وايرا ...اللى انتوا ما تعرفوهوش ان انا الوحيدة انا واخواتى اللى من مصر لكن عيلتنا كلها من بورسعيد واحنا لينا بيت فى ميدان المنشية وبيت فى شارع صفية زغلول ولو عايزين اقولكم العائلات بتاعتنا مين .؟؟؟اقولكم يمكن تطلعوا من اقاريبى
عاشقة زوجها وابنها ...دى تانى مرة الفرن ينشفلك الاكل او كان حيحرقهولك ..يا اما تخلى بالك من ظبط درجة الحرارة ..ياأما دائما تحطى فى الرف السفلى صينية فيها ماء وتحطى اكلك فى الرف الوسط ..و باقى الاسئلة حنرد عليها
18-06-1426 هـ, 08:16 مساءً
 
[ تابع )بعض الطرق للاكل اللى بتحطية فى الفريزر

اللحمة المفرومة :نعمل العصاج عادى بدون الصلصة وبعد ما يبرد نحطة فى اكياس نايلون بس بكميات مش كبيرة يعنى على أد صينية واحدة بس (سواء رقاق .سواء بطاطس بيورية ...الخ)
2- عصاج عادى بالصلصة: وبعد ما يبرد يتحط فى علب بلاستيك
صينية اللازانيا : نفس طريقة المكرونة بالبشاميل
كفتة الفراخ : تتعمل عادى وتتصبع وتتحط عادى فى البيض والبقسماط وتترصص فى الاطباق الفل بجانب بعض
البصل : يقشر و يخرط او يفرم صغير ونضعة فى طبق فيبر ويجمد ولما تعوزى تستخدمية .تخدى بالسكينة الحته اللى انتى عوزاها وتسيبى الباقى مجمد زى ماهو
الثوم : تقشرية ولسهوله التقشير حطية فى طبق بة ماء حتلاقى القشرة طلعت بسهولة تروحى فرماة كلة فى الكبة و تحطية فى ورق فويل على هيئة رولات (يعنى زى الهوهوز )
الكرنب : يسلق ورق الكرنب عادى فى ماء وملح وكمون وتقطفية مربعات جاهزة للحشو و ترصصيهم فوق بعض فى كيس نايلون او طبق فيبر
الورق العنب :تشترية وتشيلية زى ما هو فى اكياس نايلون ولما تيجى تستخدمية تضعية فى الماء المغلى على طول
شوربة العدس : تسلقى العدس وتصفية بالمصفاة ولما يبرد تحطية فى اكياس نايلون ولما تيجى تستخدمية تفضى الكيس فى حلة وتزودية بماء مغلى و تتبلية وتعملى التقلية وبقيت شوربة عدس سريعة
الكوردن بلو : برضة بعد ما تحشية وتعملية بيض وبقسماط وترصصيهم فى طبق فايبر بجانب بعض
الشبت والبقدونس والكسبرة الخضراء : تخرطيهم بالسكينة زى ماهما ومن غير غسيل وتحطى كل نوع فى كيس لوحدة و تعقدية وتخلية تحت فى الثلاجة عادى
البطاطس المحشية : تجيبى البطاطس المدورة الصغيرة وتقشريها وتقوريها و تحمريها يعنى يا دوب تلفيها فى الزيت او السمن و تطلعيها من المقلاية وتحشيها بالعصاج وترصصيهم فى صينية المونيوم وعند الاستخدام بتطلعيها زى ماهى على الفرن على طول بس بتحطى الصلصة فى الصينية الاول
2- او بعد ما تحمريها تشيليها زى ما هى فى الاطباق بدون حشو
18-06-1426 هـ, 08:55 مساءً
 
(تابع)

الطماطم: اما تغسليها وتقطعيها وتضربيها فى الخلاط وتصفيها من القشر و تحطيها فى برطمانات
2- او بعد ما تصفيها تحطيها فى حلة كبيرة وتحطيها على النار وتسبيها على النار تتسبك (يعنى تتخن وتقل )بعد ماتبرد تعبيها فى البرطمانات
السمبوسك والسبرينج رول :بعد ما تحشيهم ترصصيهم فى الطبق الفيبر وتطلعيهم على التحمير
الكبيبة الشامى : بعد ما تكوريها ترصصيهم فى الطبق الفيبر وتحطيهم الاول لحد ما يجمدوا وبعدين ترصصيهم جنب بعض وتحطى الطبق فى كيس نايلون
الكبيبة الصينية : تعمليها فى صوانى المونيوم وتحطيها فى كيس وعلى الفريزر
الخرشوف: بعد ما تنضفية وتحشية اما تحطية فى صينية فويل بجانب بعض ولنا تيجى تستخدمية تحطى على وش كل واحدة ملعقة بشاميل
2- او تخلصيها للاخر وتحطيها الاول فى الفريزر لحد البشاميل ما يجمد وبعدين نغطيها بالفويل وندخلها الفريزر
البشاميل : اعملى البشاميل ولما يبرد تعبية فى علب بلاستيك وتحطية فى الفريزر
فراخ مسلوقة. اسلقى فرخة عادى ولما تبرد لفيها فى ورقة فويل وتطلعيها عالاستخدام على طول و تكونى حاطة الشوربة بتاعتها فى برطمان معاها
الحواوشى : بعد ما تحشى الرغيف تلفية فى ورقة الفويل ولما تستخدمية تطلعية على الفرن على طول
18-06-1426 هـ, 09:16 مساءً
 
اهلا بيكي يا دون وحشتينا النص يوم ده
بس ايه ده عماله ترمي سلامات على الناس كلهم واللي سال في الاول ملوش ولا حتى حته سلام صغيرة ولا عشان انا مبشاركش كتير لظروف الشغل ولا ايه
يلا معلش ما انا مقدرش اتكلم جمايلك مغرقانا يا ستي..
المهم انك وحشتينا وخلاص
18-06-1426 هـ, 09:18 مساءً
 
حمد لله على السلامه يا don عامله ايه اتمنى تكون رحله سعيده
وشكرا على الرد وان شاء الله هاعمل كده يا رب ربنا يسهل يا دون انا قرفاكى معايا خالص بس والله البيتزا كانت جمميليه بس هو الفرن
18-06-1426 هـ, 09:29 مساءً
 


الساعة الآن 08:10 .