البامية الويكة

كيلو بامية ( مغسولة و ناشفة و مقمعة يعنى شايلة راسها داير ما يدور و البوز الصغير اللى تحت)
نص كيلو لحم قطع (او حسب عدد القطع اللى انتى عوزاها)
2 ملعقة كبيرة سمن ملح- فلفل- ( شطة حسب الرغبة )
1بصلة كبيرة ممفرومة صغير _ كوب عصير طما طم (او 2 معلقة صلصة مزابة فى كوب ماء)

التقلية مثل تقلية الملوخية( ملعقة كبيرة كزبرة ناعمة _راس ثوم _ ملعقة سمن)

الطريقة

1 _قطعى البامية قطع صغيرة وحمريها في السمن وشيليها على جنب
2 _حمرى البصلة في السمن اللى انتى حمرتى فية البامية لحد ما تصفر بس 3 _حطى بقى اللحمة على البصل وقلبيها تقليبتين تلاتة لحد ما تنزل مايتها و تشربها و تظبطى بقى الطعم بالملح و الفلفل
4 _وكل شوية بقى تزودى ماء لحد ما تستوى 3/4 سوى
حطى بقى البامية على اللحمة و عصير الطماطم او الصلصة المذابة فى ماء 5 )وخليهم على نار متوسطة لحد ما كلة حيستوى
6_اعملى بقى التقلية وتحطيها على البامية وسيبيهم دقيقتين و تطفى النار و بالهنا و الشفا
طريقة التقلية:ضعى السمن فى مقلاية و الثوم المهروس لحد ما يصفر و نحط الكزبرة الناشفة لحد ما تتحمر بس مش تتحرق .
22-04-1426 هـ, 01:12 صباحاً
 
اقتباس مشاركة  (omhabeba2000)
السلام عليكم
دون مساء الفل بقولك هو انتى مش بتحطى الفريك داخل الحمامه او مثلا الارزبالخلطه نصف تسويه وبعدين نسلق الحمامه ولا دى طريقه اخرى
لا يا ام حبييبة الخلطة بتبقى نية و بنحشى بيها الحمام و بعدين نسلقها . اسئلى اللى انتى عوزاة
22-04-1426 هـ, 01:16 صباحاً
 
العزيزه don
يا تري مسموح إني أقول طريقتي في عمل الحمام بالفريك ؟
أعتقد مفيش مانع .. صح ؟
أقول لك .. مقاديري لكل زوج حمام أستعمل كوب فريك منقوع نص ساعه+ ملعقه كبيره بصل مبشورومتبل بالملح والفلفل والبهارات + بقدونس مفري ونعناع
الطريقه : أضع في حله ملعقة زيت ذره وأشوح فيها الفريك والبصل وبعد كده أحط نص كوب ميه وأسيبها تستوي نص سوا وأضيف البقدونس والنعناع
أتبل الحمام ببصله مبشوره وملح وفلفل ..
أحشي الحمام بالفريك وبين الجلد والرقبه ولا أترك فراغ لأن الفريك مش هيزيد
ألف بالفويل كل واحده لوحدهاوأقفل عليها كويس
أرص الحمام ملاصق لبعضه في صينيه فيها شوية ميه وأدخلها الفرن حرارته فوق المتوسط لمدة ساعه
النتيجه رائعه .. حمام متحمر ومستوي وفي نفس الوقت سهل وخفيف ومناسب في العزايم
منتظره رأيك يا don
22-04-1426 هـ, 01:18 صباحاً
 
اقتباس مشاركة  (ناني5)
العزيزه don
[frame="6 80"]يا تري مسموح إني أقول طريقتي في عمل الحمام بالفريك ؟
أعتقد مفيش مانع .. صح ؟[/frame] صح. أقول لك .. مقاديري لكل زوج حمام أستعمل كوب فريك منقوع نص ساعه+ ملعقه كبيره بصل مبشورومتبل بالملح والفلفل والبهارات + بقدونس مفري ونعناع
الطريقه : أضع في حله ملعقة زيت ذره وأشوح فيها الفريك والبصل وبعد كده أحط نص كوب ميه وأسيبها تستوي نص سوا وأضيف البقدونس والنعناع
أتبل الحمام ببصله مبشوره وملح وفلفل ..
أحشي الحمام بالفريك وبين الجلد والرقبه ولا أترك فراغ لأن الفريك مش هيزيد
ألف بالفويل كل واحده لوحدهاوأقفل عليها كويس
أرص الحمام ملاصق لبعضه في صينيه فيها شوية ميه وأدخلها الفرن حرارته فوق المتوسط لمدة ساعه
النتيجه رائعه .. حمام متحمر ومستوي وفي نفس الوقت سهل وخفيف ومناسب في العزايم
منتظره رأيك يا don
بصى يا نانى بالنسبة للحمام بتبقى نكهتة مميزة من الكمون (ملح وفلفل وكمون)بس احنا عادة مش بنحط نعناع و بقدونس .
طبعا الفريك مش حينفش لانك مسوياة لكن لو نى بنعمل حسابنا انة حينفش .
وبالنسبة لطريقة لفة وتسويتة زيك مضبوطة تماما بس احنا فى العزايم بنبقى محتاجين الشوربة علشان نعمل الرقاق و الكشك و الملوخية مية مية يا نانى
22-04-1426 هـ, 01:38 صباحاً
 
يانهاركم ابيض؟
اغيب يوم ارجع الاقى الناس زعلت من بعضها
انا مش هتكلم فى اللى حصل لان ببساطه كتر الكلام هو اللى بيكبر الموضوع
بس من غير زعل كده هبهوبة انتى اديتى الموضوع اكتر من حقه
وسووسة كتر خيرك وانتى شكلك يجنن وانتى بتحاولى توفقى الروس فى الحلال
دون احترمت جدا صمتك وبعد ين رجعتى تكملى اللى انتى اصلا جاية عشانه ولا كأن فى حاجه وانا لو مكانك كنت برضه عملت كده عشان الموضوع ميكبرش وكل واحده ترد بكلمة زى ما صاحباتنا عملو فى الموضوع بتاعنا وده اللى معجبنيش ابدا ومكونتش بتكلم فيه خالص عشان متزيدش
يا جماعه انا بعد اذن دون هفوض نفسى بالنيابة عنها واقول كلمتين
الصفحة تساع الكل واللى عندها حاجه حلوة ومتميزه فيها تقولها ومحدش بيزعل لان الصفحة معمولة اصلالافادة الجميع بس تكون متجربة عشان تكون اكيده لان لو واحده عايزه وصفة والسلام ماهى مالية الدنيا وبعدين احنا اصحاب من زمان يعنى ناس بقالهم اهو ست شهور واكتر وفى مننا كون صداقات شخصية من هنا
فياريت بلاش الحساسية دى بين البنات لان كلنا هنا واحد والكل داخل المنتدى اصلا بوجه عام عشان يستفيد او يكون عنده رد على سؤال اخت تانية يفيد بيه


يلا بقى مين هيقولنا وصفة جديده؟
انتو ناسيين الحلويات ليه كله حادق حادق ركزو شويه على الحلو
22-04-1426 هـ, 01:52 صباحاً
 


الساعة الآن 08:12 .