الملوخية الخضراء (ملف 1)

نص كيلو ملوخية تقطفيها من العيدان ثم تحطيها فى مصفاة و تغسليها كويس جدا لحد ما الطين كله ينزل و تبقى المياة نضيفة افرشى جرنال فى الهواء و افرشيها علية لحد ماتنشف بس ابقى قلبيها بايدك و بعدين تخرطيها بالمخرطة ناعم .
2 كوب شوربة اى نوع عندك ارانب او فراخ او حتى ماجى (2مكعب) ثوم مهروس _ كزبرة ناعمه_ ملح
الطريقة:
اغلى الشوربة كويس جدا (ابقى اظبطى الملح)
ثم خدى منها ملعقتين فى طبق صغير و الملوخية المخرطة و قلبيهم جامد لحد ما الملوخية تفك
ثم حطيها مع باقى الشوربة على النار
والنار مش عالية فى طاسة صغيرة حطى ملعقة سمن اما تسيح حطى الثوم المهروس حوالى ملعقة كبيرة لما يصفر حطى الكزبرة حوالى نص ملعقة كبيرة مليانة يادوب تقليبة و روحى طشاهم على الملوخية تقليبة واحدة و اطفى النار و غطيها و بالهنا و الشفا
24-04-1426 هـ, 05:59 مساءً
 
اقتباس مشاركة  (pelican)
انا جيت يا بنوتة كان عندى مشاكل فالكمبيوتر والنت والحمد لله المسألة اتحلت

مسقعة الباذنجان على طريقتى

المقادير:
2 كيلو باذنجان رومى- 5 فصوص توم - نصف كيلو طماطم - نصف كيلو لحمة مفرومة - 2 ورقة لاورا - ملح فلفل - 2 بصلة- قرون فلفل اخضر (حسب الرغبة)

الطريقة:
يقشر الباذنجان ويقطع حلقات سميكة
يحمر فالزيت ويرفع منه ويوضع على ورقة تتشرب الزيت الزائد
عصجى اللحمة بتشويح الصلة ثم اضيفى الثوم واللحمة والتوابل وقلبى جيدا حتى يجف الماء
نضع عصير الطماطم حتى يتسبك جيدا ثم نضع طبقة باذنجان ثم طبقة لحم وهذا حتى نصل الى نهاية الخليط ويزين بقرون الفلفل الاخضر على الوجه ثم ادخليه الفرن حتى ينضج و يقدم مع سلطة طحينة.
يعطيكي الف الف الف عافية
جبتي لي غلطتي فين
اصل انا اقولك جربت المصقعة المصرية في ابو شقرة ودخت علييييييييييها
وصار ماعندي شغلة في مصر غير رايحة ابو شقرة راجعة من ابو شقرة
بسببها

بس لما جيت اعملها في البيت عملتها كأنها مصقعة من بتاعتنا فما طلعت تمام
عارفة سبكت بصل وطماطم وثوم وفلفل رومي
وبعدين رميت حطيت اللحمة ولما تعصجت وذبلت واستوت حطيت الباذنجان
فما نفعتش
بس خلاص بكرا بإذن الله حأجرب طريقتك وارد لك خبر
مشكووووووووووورة ما قصرتي
24-04-1426 هـ, 07:14 مساءً
 
don:_

ازيك ومبروك الصفحة الجديدة,بس على فكرة ملهاش لازوم تنقلى الاكلات القديمة لان اللينك موجود فى توقيعك كدة كدة فبلاش عدد الصفحات تكتر على حاجات مكررة دة رايى يعنى

المهم............................


ليا كام سوال كدة لانى نفسى اعمل بسبوسة وشفت طريقتك فى الملف الاول بس لاحظت انك مش بتحطى زبادى وكاتبة قشطة دة بديل للزبادى يعنى؟؟؟؟؟؟؟؟؟؟؟؟؟

واهم حاجة انى مش بحب القشطة لكن لو طعمها مش باسن مش مشكلة هل طعمها بيبان فى البسبوسة يعنى؟؟

وكمان السميد دة بيتجاب منين انا معرفش؟؟مش هو دة الاكياس الجاهزة بتاعت البسبوسة ولاغيرة؟؟؟؟؟؟؟؟؟؟؟ وكمان انتى كاتبة فى وصفة البسبوسة معلقتين بس سميد وباقى الوصفات كاتبين كوبيتان؟؟ هل انتى غلطانة ولا معلقتين كفاية ولا اية؟معلهش اصلى لخمة ومش فاهمة

وكمان انا بعمل حاجة فى الفراخ واللحمة يعنى لو ححمر اللحمة او الفراخ بحب اكون سلقهم الاول مش بحمرهم نيين علطول اختصارا فى الوقت بس مش عارفة كدة صح ولا غلط ولا اية؟؟؟؟؟؟؟؟؟؟؟؟؟

ويعنى اية صينة حمام كوبلست ال انتى كاتبة فى الصفحة الاولى؟؟؟؟؟؟؟؟؟معلهش اسئلتى متاخرة بس لسة بنقل فى الملف الاول

كمان كنتى مرة قولتى عن بسكويت بالشكولاتة سريع ممكن تشرحهولى؟؟؟؟؟؟؟؟؟؟

ميرسى وطولت عليكى

باى يا جميل


ويا جماعة حد يبعتلى التلخيص تانى لان لاروز مطنشانى وانا زعلانة منك يا لاروز
24-04-1426 هـ, 09:29 مساءً
 
معلهش نسيت اقولك عن البامية الويكة انا بعملها حلو اوى بس اول مرة لسمع عن عصير الطماطم ال قولتى علية بس هيكون اية الفرق بينها وبين التانية ام دمعة ؟؟

انا بجيب الويكا بتكون كبيرة وطويلة عن العادية طبعا وبحطها فى شوربة وازبط الملح ولما تتطرى شوية بخدها من شوربتها وبضربها ضربتين بالخلاط مش تتعجن وبعدين بارجعها تانى ف شوربتها

او وهى فى شوربتها افضل اخفقها بشوكة لحد ما تفك خالص وبعدين اعمل الطاشة ثوم وسمن بس واطشها عليها وبتبقى تحفة والبامية بتكون بقت حتت صغننة خالص

دى طريقة حماتى صعيدى بس جربيها وحلوة مووووووووووووووووووووت
24-04-1426 هـ, 09:36 مساءً
 
اسراء .................... اتبعى الصفحات معايا و انا اوعدك انى حروح لك مخصوص ابو شقرة و اجيب لك الطريقة بتاعته بدل ما تعذبى نفسك اول ما اروح له حكتبهالك على طول
24-04-1426 هـ, 09:38 مساءً
 


الساعة الآن 10:48 .