السلام عليكم حوائيات

صباح الخيرات

ابي منكم خدمه الله يسعدكم
وهي اني بستشيركم بعزيمتي وابيكم تشورون علي

هذا ياطويلات العمر ناوية اعزم رجال وحريم في رمضان ان شاءالله
الرجال عددهم حول عشره
والحريم اكثر شوي
(انا حاسبتهم مع الاطفال الكبار)
ويمكن يزيد او ينقص الله اعلم

المهم انا محتاره بالاطباق....اقصد اطباق العشاء
طبعا معروفه اطباق رمضان

وهذي القائمة اللي سويتها للاطباق
شوربة كويكر
سلطه (نوعين او نوع محتاره وافكر بسلطة خضراء او سلطة الزهرة)
سمبوسه/سبرنغ رول/كبة او كفته
ورق عنب
رز او مكرونه باشميل
صينية خضار (مسقعه او غيره)
حلى عشاء (افكر بتشيز كيك بارد بصحون فردية بس ماقد جربت قبل طريقة مضمونة)
فاكهة (واحس مالها داعي مدري تفكيري صح ولا غلط )

طبعا اللي محيرني هو الطبق الرئيسي
اذا فكرت بالرز فـ لازم احط ذبيحه واخاف ماتوكل
والمكرونه خايفه الوزنية تخونني (يعني خايفة تصير اقل من المقدار المطلوب)
عشان كذا عافاكم ربي شورو علي
وش احط ووش الافضل والاوجه؟
واذا فكرت بغير الرز فـ وش هي الاطباق اللي المفروض احطها غير المكرونه والمسقعه بحيث تكون السفره عامره ومليانه وتبيض الوجه

وعلى فكره الرز موب طبق رئيسي في عشاء رمضان عندنا بس مدري محتاره
عادة يكون للسحور

والله يبلغنا واياكم رمضان وحنا باحسن حال
واله يوفقنا لصيامه وقيامه على الوجه الذي يرضيه عنا

بانتظاركم يالغوالي

26-08-1432 هـ, 06:08 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
انا اشوف الرز تخليه للعشاء افضل وخذيلك كم صينيه في صواني روعه ف المنتدي يعني حاولي تسوي شي غريب و مكرونه نوعين مع فطاير او بيتزا
26-08-1432 هـ, 06:30 صباحاً
 
الله يكون بعونك
اطباقك حلوه بس حطي من كل نوع بالنسبة للصواني اثنين ومعجنات وكيكه والسلطه نوعين وعلى البركه
26-08-1432 هـ, 06:34 صباحاً
 
اقتباس مشاركة  (ميمي ام الحلوات)
انا اشوف الرز تخليه للعشاء افضل وخذيلك كم صينيه في صواني روعه ف المنتدي يعني حاولي تسوي شي غريب و مكرونه نوعين مع فطاير او بيتزا
حياك الله ميمي ام الحلوات
فعلا الرز اوجه بس ما افضل بجنب الرز صواني لانه ماراح ينوكل
فهمتي علي
انا اشوف اذا بحط رز تكفي صينية وحده وتكون خضار والباقي مقبلات وسلطات
ويعطيك العافية ع الرد ماقصرتي
26-08-1432 هـ, 07:29 مساءً
 
اقتباس مشاركة  (السنيوره 44)
الله يكون بعونك
اطباقك حلوه بس حطي من كل نوع بالنسبة للصواني اثنين ومعجنات وكيكه والسلطه نوعين وعلى البركه
هلا وغلا السنيوره
فكرتك حلوه بعد وعلى كذا بيصير الفرن زحمه
يعطيك العافية ع المرور والتعليق


وياسالكم سؤال
متى ابدا الطبخ في يوم العزيمه؟
يعني من الصبح ولا الظهر ولا متى؟
26-08-1432 هـ, 09:44 مساءً
 


الساعة الآن 03:27 .