السلام عليكم
اخواتي في الله انا مسجله من فتره ولكن كنت متابعه معكن ويعلم الله كم احزن لما اشوف زوجات اوليات وثانيات متخاصمين من شان كذا قررت اكتب لكم قصتي واتمنى ان تاخذو منها العبره
قبل ان اطرح لكم القصه اقسم بالله لم اكذب في شي مما اقوله
قصتي
انا نشأت في بيت امي وابوي الحمدلله عائله مستقره كملت دراستي الجامعيه وكنت الوحيده من اخواتي جامعيه وباقي اخواتي تزوجن في اعمار مابين السابعه عشر والخامسه والعشرون بعضهن زوجات اوليات ووحده متزوج عليها زوجها ووحده وحيده
بعد ماخلصت الجامعه تقدم لي كثير ولكن كلهم ماعجبوني او لم يكتب الله نصيب وقبل خمس سنوات تقدم لي شاب من اهل الرياض موضوف في مطار الملك خالد مانعرف كيف تعرف علينا واحنا في منطقة حائل وكلم احد اواني على الجوال وواتفقو ولكن ماقال لاخوي كيف عرفنا وكان يتهرب من الاجابه
وجاني اخوي واميي وعلموني بامر الخطوبه وقلت افكر رغم ان عمري 31 وجانا يوم خميس وانا بس شفته انهبلت ماكان حريص على النظره الشرعيه وبادره اخوي وكنت اتمنى يوافق لكنه رفض وكان طلبه شي واحد انه مافيه عرس يجي لحايل يوم معين ونملك ونروح للرياض
طبعا انا لما شفته مع الشباك تعلقت فيه وقلت في نفسي ابيه بكامل عيوبه عرفت انه متزوج وعنده بنت وحده وولد توفي ولكن له شرط متمسك فيه بشكل فضيع لدرجة انه طلب مقابله امي من اجل هذا الشرط الي هو ان زوجته الاولى ما احد يأذيها ولا تلاقي اسأءه من احد
انا طبعا في نفسي وقتها قلت ابيه وبس لو يشرط اني امشي معاه من وقتها لما شفته فيه من رزه وجمال ماشفته في كل الي تقدمو لي وكان شياكه وواضح عليه انه ولد نعمه ويكفي انه قال بيسكني في الفله عند حرمته وقال ان فيه باب كبير بيني وبينها اذا انفك هذا الباب صارت فله كامله واذا سكرناه صارت شقه مسروقه اتمنى فهمتو كيف شكل البيت
حطيت في بالي اني انرفزها واسوي فيها تجاربي بس قلت بعدين بعد ما املك قلبه اول تزوجنا ومشينا للرياض فجرية الجمعه طول الليل وهو عندي معاها على الجوال وكنت مقهور على الاخر لدرجه يضحك ويسولف ماكاني جالسه عنده
واحنا في الطياره قلت له ليه مستعجل كذا ماخليتنا نجلس في حايل يومين ننبسط ؟ قال وزوجي وبنتي اتركهم؟ انا هنا انقهرت من كلمته قلت يعني مابنسافر شهر عسل؟ قال لا قلت ليه ؟ قال ماقدر اخلي بنتي وزوجتى ورب البيت وقتها بغيت اطير قهر احس دمي يجري في عروقي
قلت له وزوجتك وبنتك هذي بيجلسون لي عقده في حياتي؟ قال شوفي يابنت الناس بس نوصل البيت كلمي امك وشوفي وش قلت لها ان زوجتي ما ابغى شي يجيها فهمتي كلامي؟ والا انا مو مظطر على غيرهايالله هذا كلامه لوحده ليلة زواجها كان المطار مليااااااااااان لانه اجازه واشوف البنات كيف يطالعون في زوجي وانا مقهوره
وصلنا البيت واخذني طلعني مع درج جانبي وفتح لي الباب كانت الساعه 9 الصباح وقال هذا بيتك انا باروح اشوف زوجتي وبنتي وسكر الباب وبكيت من قلب ودعيت على زوجته ان الله ياخذها وياخذ بنتها معاها واتصلت على امه وعلمتها بكل شي قالت اسمعيني يابنتي زوجك تقدرين تغيرين فكره وتقدرين تسيطرين عليه خليه يحبك
وقتها هو بيسيبها وقفلت بس كمان ما اقتنعت كلمت اختي الي اكبر مني خلونا نسميها مشاعل من شان تفهمون القصه عدل قلت لها الي حصل قالت اسمعيني خليك معاي في كل كلمه وانا اوريك فيها الحين روحي خذي دش والبسي وانتظريه ولا كانك كلمتيني قلت لها طيب وسويت زي ماقالت
جلست عند زوجته الين الساعه 1 الظهر وانا اغلي لانوم ولا غيره وهو عندها صح جاب لي فطور من بيتها بس ماقدرت اكله وبعد ماجاني نام على طوووووول وانا نمت كمان صحيت على اذان العشاء الا هو مو موجود في البيت وجلست ابكي مادري ليه بس مقهوره حسيت اني مقهوره من انسانه ماعرفتها ومن بنتها
كلمت مشاعل وقالت اسمعي دقي عليه وابكي قولي انا بطني يوجعني وابكي بقوه وسويت زي ماقالت قال انا شوي واجيك الحين مره مشغول وفعلا بعد ساعه جاني وجلس عندي الين من البكره ماطلع بس الجوال ماطاح من اذنه معاها
حملت من اول شهر وماحسيته فرح ذاك الفرح وطول فترة حملي وانا ما اشوفه الا ليلتي ومع ذالك الجوال بين يدينه بس هي تتصل ينط يجري لها وصلت الثامن ورحت عند امي من شان اولد صار كل يوم المغرب يكلمني وكذا بس كنت عند امي اخذ دروس من اخواتي وخليت حياتي لهم كتاب مفتوح كل وحده تعطيني من عندها
ولدت ولا جاني جبت ولد قالي لي باسميه نواف ورضيت وبعد الاربعين حجزو لي اخواني ورجعت للرياض وتوقعت بيكون ولهان علي وعلى ولدي وجاني هو وولد عمه صح شالو ولدي وسلمو عليه وزي كذا بس ماحسيته مره مهتم دخلت البيت لقيته لمبه بالنظافه اخذ الولد ووداه لزوجته وانا اقول في نفسي تلاقينها مقهوره ومغبونه من ولدي
وهي معندها غير بنت وبعد شهرين حملت حملي الثاني وكنت امووووت من المراره وياخذني للمستشفى واخذ ولدي معاي لان اخواتي قالو ممكن تقتله ومره مره تعبت وتنومت واخذه بالقوه عندهم وانا اتصل على امي واخواتي مقهورين مثلي بس لما رجعت البيت لقيتها شاريه له ملابس ورضاعات واغراض كامله لان ابوه ما اخذ له شي من البيت
سنتين ماشفت هالمخلوقه نهائي نهائي نهائي لو بالعبايه ماشفتها وشقتي في اخر البيت وشبابيك بيتي ماتفتح على الحوش وهذا شي كمان قاهرني كنت اتجسس عليها من بين درفتين الباب الي بيني وبينها ماعمري شفتها بس اسمع اهل زوجي لما يجونها وانا ماقد لمحتها ولا سمعت صوتها
توفى ابو زوجي وقلت له باروح اعزي امك قال تراك بتنصدمين لان الكل معارض زواجي وماتلاقين ترحيب قلت لا باروح وهو لغرض في نفسي ابغى اشووفها ابغى اشوف زوجته وامه واخواته وامي شجعتني اني اشوفها ووصتني اتزبط على الاخر حطيت ميك اب كامل ورحت لما دخلت الكل يطالع فيني مو عارفيني الا اخته لان زوجي اعطاها خبر على الجوال
امه ماقامت لي واخواته سلمو علي من غير نفس وكل مادخلت حرمه اقول هذي زوجته لما تروح اقول لا مو هي واشوف الكل يسأل عنها وبعد ساعتين ونص كلمني زوجي احس وقتها انه مره طووول علي وامي كل شوي تتصل هاه شفتيها؟ واقول مادري ماعرفتها كثير الناس
طلعت السياره مع زوجي واحنا نسولف قال اتصلي علي ام وسن الي هي ضرتي وهي بيت اختها تبغاني امرها من شان ترجع للبيت قلت ليه هي مو في العزاء؟ قال اختها تعبانه وراحت لاختها وهي مع امي تنام لمدة 3 ايام العزاء
انقهررررررررت كيف ماعرفت ولا قال لي انها تنام عندهم؟ ووينه ليلتها في الثلاثه الايام؟ المفروض ال3 ايام عندي
وصلنا بيت اختها وقال لي ام نايف اطلعي وراي قلت ليه ؟قال هذي سيارة ام وسن هديتي لها يالله كاني اول مره اطلع في السياره نزلت وطلعت ورا لانها سيارتها على قولته وجلست اطالع في السياره مو كانها السياره الي اطلع فيها كل يومين كانت سياره اسمها اكسبديشين كبيره روووووعه شكلها ونزل هو من السياره وجلس قدام بيت اختها وانا انتظر اللحظه الي تطلع فيها ابغى اشوفها
طلعت وتقدم لها مسكها من ايدها ويمشي معاها وفتح لها باب السياره وساعدها انها طلعت وسكر الباب كانت نحيفه مره وعبيتها كشخه مره صح فوق الراس بس عليها روعه وشفت يدينها تقول قطن وبياض مو طبيعي وقالت السلام عليكم ورديت عليها بصوت خافت وسكتت وطلع هو وجلست يسولف جانا فلان وراح فلان ويسولف معاها كانه اول مره يشوفها وهي ماتهرج معاه كثير اكثر وقتها تسمع له وسألته عن امه قال لها طيبه والله تسلم عليك وتقول يعطيك العافيه تعبناك معانا ردت وقالت الله يطول بعمرك ويجبر مصيبتها ماسوينا شي
شوي قالت ابغى نواف بالعب معاه شوي والتفتت علي قالت اعطيني نواف يام نواف قبلها سالتي كيفك وكيفهم اهلك وقام هو لف جسمه كله واخذ نواف مني وحطه في حضنها وانا اغلي في داخلي احس بنار قويه تشتعل فيني مايبغى يتعبها مره وانا طول اليوم كرف وغسيل وحامل وحالتي حاله
شوي قالت ابو نايف ابغى اغراض من البقاله قال من عيوني بس ننزل ام نايف ونروح انا وناتي نقضي الي تبين والله والله والله وقتها صرت ابكي بكى هستيري ولا احد حس فيني لانه بدون صووت وصلنا البيت نزل ولدي لانه كان بحضنها واخذته منه وقلت له تعبانه بطني يوجعني وانا كذابه ابغاك تطلع ولدي للشقه فوق ولقط الولد من على الارض وبسرعه يحطه قدام باب الشقه وينزل
دخلت بيتي واتصلت على امي وعلمتها وقامت تدعي على زوجته ان الله ياخذها وينتقم منها ويصيبها بمصيبه ولدت في بداية التاسع كنت مخططه اروح عند امي في نص التاسع بس ولدت قبل ما اروح ولا علم امي الا لما طلعت من المستشفى ولا شحن لي جوالي من شان ما اعلمهم يقول حرام امك تحزن وتشيل هم
لما عرفت امي بوللادتي جاتني هي واخوي بالبر وتعبو في الطريق وصلوني الظهر وزوجي في العمل قلت باجيب لهم ذبيحه لانهم تعبو بصراحه امي قالت لا باسوي غدا هنا بس جات في بالي خطه منها اجيب غداء اهلي ومنها اشوف زوجته قلت لامي باروح لها اقول لها تكلم مطعم لاني ما اعرف وش رايك يمه ؟ وامي معاها اختي الكبيره كلهم وافقو على الخطه وقالو روحي وتعالي عليمينا وش تشوفين
طبعا مامعي فلوس اخذت من فلوس لزوجي مخليها للطواري ورحت دقيت الباب عليها الي بيني وبينها وامي واختي ورا باب غرفة الحريم يبغون يشوفون وياشرون علي دقي بقوه وما احد فتح الباب
قلت بانزل ادق باب الشارع ورحت فتحت لي الباب بنتها اول مره اشوفه فلقة قمر سبحان اللي خلقها تشبه ابوها ما الومه يوم يحبها كذا قالت مين انتي قلت انا زوجة ابوك وين امك قالت امي مع ابوي طلعت من بدري وللحين مارجعو هاااااااااااااااااااااااااااااااااااااه كيف مع ابوك؟ قالت مادري ورجعت للبيت وانا محطمه على الاخر يومي وشايلها يمشيها؟
وقتها امي لما شافت حالتي قالت مابسكت عليه بس يجي اتفاهم معاه بس جاء للبيت رحب في اهلي وجلس مع اخوي وامي
شوي قلت له وين كنت قال في العمل قلت شكلك مره تعبت في العمل قاليعني سوينا عشاء لاهلي ولاحظره احد من اهله الا الرجال بس ولا احد من الحريم وقبل مايدخل الاكل اول شي ودى صحن لزوجته وصحن لامه وخواته ورب البيت كنت اغلي من تصرفاته رغم انه مو مقر معاي
بعد اسبوعين من جية اهلي بقيت عندي امي بس واخوي واختي رجعو لحايل قالت له امي بازور حرمتك الاولى وامي غرضها تشوفها مو شي ثاني وقال لحظه اشوفها اول يوم هي اعتذرت او هو اعتذر عنها وثاني يوم جانا وقال امي وسن مسويه القهوه والشاي وتنتظركم وعندها امي واخواتي هنا انا فرحت قلت اشوفهم كلهم مره وحده واسحب عليهم
دخلت واستقبلتنا ام وسن وهو وراها ماسكها من يدها ورب البيت قد ماكان فيني من ثقه تحطمت لما شفته معاها ومبتسم ما اشوفه عندي مبتسم كذا طبعا بيتها استقبال تحت وغرف نوم فووق بيت ياخذ العقل وريحة البخور شي مو معقول وشغال وهي عندها بنت بس وانا ماعندي لاشغاله ولا غيره وهي سبحان من خلقها
ملكة جمال جسم وبشره تهبل بس لابسه طرحه هذا الي استغربته وسلمنا انا وامي وجلسنا جات وجلست عندي وجلست تلاعب ولدي الصغير قالت هذا الكبير تدخلنا في اسمه بس الصغير مالنا دخل فيه يالله يعني هي مسميتها ؟
وجات بنتها وتاخذ اخوانها وتلاعب نايف وتاخذه غرتها ولا حسيت انها خامس او سادس حسيتها كبيره طبعا هي ماتقوم بس يشوفها تقوم يجري وراها زوجي وياخذ منها الصحون وكل شي سوت لنا ذبيحه امه واخته مشيو من بدري وبقينا انا وهي وامي وزوجي
قامت امي يوم شافت الفرق فقدت اعصابها وتكلمت على زوجي وقالت بيتها غير بيت بنتي وعندها شغاله وعندها واعندها وو ووووووو
كلام كثير وهو ساكت وسمع لامي لاخر كلمه وهي جالسه وساكته كمان قال بس فيه شي عند ام وسن وبنتك مو عندها ولازم تطالبين فيه قالت ايشششششش قال هي عندها سرطان الدم من 4 سنوات وبنتك ماعندها يالله تصدقون عرفت ليه الجوال في يده 24 ساعه عرفت ليه من نص نومه يقوم عرفة ليه لابسه طرحه
امي سكتت ماعرفت ترد ومع ذالك قال بنتك بتاخذ كل حقوقها لاتشيلين همها تراها عند رجال تدخلت ام وسن وقالت ابو نايف رجال لو غيره مافكر فييني وتزوج ورماني في بيت ابوي بس من اصالته ماتخلى عني هذا هو شايني وعمره ماحسسني باني عاجزه عن شي في عز مرضي انا ساكته وهو يبكي عني
ياربي هذي الانسانه الي عاديتها وانا ماعرفتها اسأت الظن ودعيت عليها وهي مو ناقصه طالعت فيني وابتسمت وقالت الحمدلله الحين عندي امي بدل امي الي توفت وعندي اخت لي الي هي ام نايف من يومها وانا وهي ماتفارقنا كل يوم يطلع زوجي للعمل وانا وهي نفطر سوا وهي الي بادرت سوت الفطور وكلمتني وتقول لاتجيني مع الشارع ادخلي من الباب الي فوق واعطتني مفتاح له
الحين لي سنتين او سنتين ونص معاها واحنا اكثر من اخوات نبكي اذا وحده فينا جاتها هموم ونضحك مع بعض والحمدلله الحين صحتها كويسه وتتمنى انها تحمل يارب تتم لها وتحمل صح صحتها ماتساعد على الحمل بس اتمنى لها الخير
احبها واحبها واحبها الله لايخليني منها ياليت تقرون قصتي وتعتبرون منها ليه مانعيش اخوات ومتصافين
بكره او بعده رمضان اليوم تضحك وتقول لي اول سمبوسه لي ياويلكم لو اخذتوها قبلي
ياحياتي يام وسن عمرك 28 بس احسك العقل والزين كله ياست البنات هذا انا كتبت قصتنا زي ماوعدك ومن جهاز وسن لانها عندي الله يسعدها ويشهد علي ربي ماكذبت فيها في شي
وادعو لها لانها هي طلبت مني اكتب خاتمة قصتنا انكم تدعون لها وتقول لاتتخاصمون وخلوهم اخوات والي تزعل من الثانيه تتذكر انه بيجي يوم تحتاجون بعض صارحتها بكل مشاعري عنها وقامت تضحك تقول الله يعيننا على نفوسنا كنت ما احبك ههههههههههههه بس انا احبك والله لايحرمني منك
احبك يا وسونه
ليالي الشوق111 @lyaly_alshok111
عضوة جديدة
هذا الموضوع مغلق.
جنتي امي ثم زوجي
•
الله يخليكم لبعض من جد التسامح يخلي الحياة حلوه
اللهم اشفها شفاءنا من عندك ....والله يااختي قصتك مررررة ممؤثره الله يرزقكم السعاده يارب
الله يشفيها يارب وماتشوف شر ويكثر من امثالك يام نايف ياليت الزوجات الثانيات باخلاقك من جد الدنياماتسوى جناح بعوضه لازم نعيشها بحب وسلام
الصفحة الأخيرة