السلام عليكم ورحمة الله وبركاته
البشرة اذا ما كانتش نظيفة ما عمر أي شي يظهر جذاب عليها تبقا دايما تبان متسخة و ما فيهاش البريق ديال النظافة و اللمعة ديال النضارة , لهذا تنزيد نأكد على كلامي بالنسبة للبنات اللي تيسعاو وراء بشرة جميلة النظااااااافة اولا ثم نشوفوا المشاكل الأخرى
اليوم جبت لكم اسراري فتنظيف بشرتي تنظيف عمييق و هو التنظيف الأسبوعي اللي كيعملوا خبراء التجميل و المراكز المعروفة , و الحمد لله كيخلي البشرة ما شاء الله دائما منورة و رطبة و موردة بلاااا ماكياج و نظييفة طبعا اذا استمرينا على التنظيف و المداومة
و باش النتيجة تظهر مزيان أولا لازم المستحضرات اللي كنستعملوا فالتنظيف نخليوها فقط للتنظيييف يعني ما تكونش ديال الاستعمال اليومي لالالا , لأنه بهاد الطريقة النتيجة تتظهر على البشرة اكثر فعالية و اكثر سرعة و البشرة تتعود على نظام معين و من الأحسن تكون مجموعة متكاملة من نفس الماركة و مصنعة من نفس المواد تقريبا
بالنسبة لي عندي بشرة مختلطة مائلة الى عادية , كانت فالأول مختلطة الى دهنية و لكن مع التنظيف طبعا نقصوا ليا الدهون , لهذا تنستعمل مجموعة شجرة الشاي Tea Tree و كيف سبق و قلت مخلياها فقط للتنظيف الأسبوعي
ملاحظات :
1 - يجب احترام الوقت للحصول على نتائج مضمونة لا افراط و لا تفريط
2 - من الأحسن ان التنظيف يكون فالصباح و يكون جنب النافذة باش يبان لأن الضوء ديال الله هو احسن 1000 مرة من الضوء ديال الكهرباء
3 - التنظيف لا يشمل الوجه فقط , لازم ضروري معاه العنق و الرقبة باش تبان النتيجة احسن
4 - الماء الدافي و المائل الى الحرارة هو اللي كيتستعمل فالتنظيف ممنوع الماء البارد حتى لآآآخر مرحلة
5 - احترام تسلسل المراحل مرحلة بعد اخرى و عدم الانشغال لوقت طويل يعني حاجة من بعد حاجة ما كاينش سطوب هههههه
6 - التركيز على المناطق المعرضة دائما للاتساخ بحال الأنف .. الخ
7 - من الأحسن النهار اللي نظفنا فيه الوجه ما نخرجوش برا نهائيا باش ترتاح البشرة مزياان
8 - ممنوع الماكياج منعا باتا فالنهار ديال التنظيف
نبدأ باسم الله
اولا غادي تديروا واحد الباندا على الجبهة و تجمعوا ليا دوك الشعور المسبسبة هههههههههه باش نشتغلوا على خاطرنا من دون أي ازعاج
من بعد ناخدوا wipes نمسحوا بيها الوجه و العنق مزياان
نحط قطيرات صغيرة على وجهي بالماء و ناخد الغسول المنظف , نحط بكمية كبيرة على وجهي و نبدا نعمل مساج بيه و نركز على مناطق الدهون اللي هما الأنف و الجبهة و طبعا ما ننساوش العنق فالتدليك لمدة 3 دقائق محسوبة
من بعد ناخد مقشر ناعم و مقشر آخر خشن شوية غالبا استعملوا اللي خاص بالجسم , من بعد ما استعملنا الغسول نبلل ايدي بالماء الكفين فقط و نمرر على وجهي مثل ما اذا بغيت نغسل الغسول و لكن ما نغسلوش تمريرة وحدة فقط و نحط شوية من المقشر الرطب ديال البشرة و نبدا نعمل مساج بحركات دائرية على وجهي لمدة 1 دقيقة وحدة , من بعد نبلل أصابعي يعني الأطراف فقط و ناخد شوية من المقشر ديال الجسم الخشن و نمرروا حتى هو مع التقشير الخفيف لمدة دقيقتين
فالمرحلة المقبلة نخلي جنبي علبة ديال كلينيكس مع اناء فيه الماء دافي الى ساخن طبعا
من بعد نبلل كلينيكس فالماء الدافي و نخرجوا بلا ما نعصروا و نسرحوا فوق وجهي لمدة 4 ثواني و نمسح و ناخد كلينيكس ثاني و نكرر نفس العملية لمدة 3 مرات من بعد ناخد كلينيكس أخير و نغطسوا فالماء الساخن و نسرحوا على وجهي و نخليه 20 ثانية من بعد نزيلوا و نمسح بكلينيكس جاف و نمر لمرحلة ازالة النقط السوداء
طبعا اللي كتنظف وجهها دائما و معتنية بيه غادي يكون عندها قليل جدا الى منعدم , و البنات اللي تتكون بشرتهم دهنية تيكونوا عندهم بزااف , فهاد الحالة يستعملوا مااء ساخن قدر المستطاع ماشي يشويوا وجوههم هههه لا القدر اللي تستحمليه و حطي كلينيكس على وجهك حتى يبرد و كرري العملية 3 مرات حتى يرطابو النقط السوداء و ما يألموك لما تبغي تزيليهوم
طريقة الازالة : اولا ممنوع انكم تستخدموا الأظافر مباشرة لأن هذا تيضر بالبشرة و 90 فالمية تتبقى البقعة فالمكان ديال الظفر , اولا لازم تتاكدوا بأن اليدين حتى هوما نظااف , و تاخدوا 2 كلينيكس واحد فاليد اليمنى و الآخر فاليد اليسرى و تلفوهوم على الابهام بالخصوص و من بعد تبداو تضغطوا على الجلد باش اخرجوهوم و لكن ما تضغطوش بزاف باش ما تبقاش البقعة , ممكن ايضا تستعملوا le tire comedon و هو اللي كنستعمل انا سريع رغم انه كيألم شوية و لكن نفس طريقة الأصابع الفرق أنه هو تيساعد فاستخراج النقطة السوداء و قد ما كانت البشرة مشبعة بالسخونية قد ما سهلت العملية, هادي صورتو
يتبع ....
من بعد ناخد آلة المساج ديال الوجه
و هادي مهمة لأنها تتساعد فتحريك الدورة الدموية فالوجه و ادخال الأوكسجين للبشرة , انا كنشوف أنهم رخاص يعني بامكان اي حد يشتريهم , و اللي ما عندهاش الألة ممكن تستعمل ايديها و تعمل مساج سريع لمدة 5 دقائق , و بالنسبة للي عندها الألة تاخد قطنة و تحط فيها نقطة كبيرة تاني من الغسول exfoliac او اي غسول استعملتوه بعد ازالة النقط السوداء
و نبللوها بالماء و نحطوها على راس الآلة ثم الى الوجه مباشرة , و استلقي على ظهرك و مرريها على وجهك و عينيك مغمضين على الوجه كااامل لمدة 5 دقائق
من بعد ناخد كلينيكس مغطوس فماء دافي و نسرحوا على الوجه باش نمسح ديك الرغوة و بقايا الغسول و نكرر كل مرة بكلينيكس نقي طبعا لمدة 4 مرات فقط و اخيرا نمسح بكلينيكس جاف و نمر لمرحلة الماسك
بالنسبة للماسك كل وحدة فينا عارفة شنو تيوافق بشرتها و شنو تيوالمها , يعني تعمل الماسك اللي تتشوفوا مناسب لبشرتها اللي بشرتها دهنية تعمل شي ماسك شوية تيجفف من الدهون و يعادل الـ PH فالجلد و اللي بشرتها جافة تعمل ماسك تيرطب ويغذي و هكذا , بالنسبة ليا تيوافقني ماسك : 1 ملعقة ديال دقيق القمح + 1 ملعقة حليب + 1 ملعقة عسل حر + قطرات ديال الحامض
ممكن تستعملوا ماسكات جاهزة و لكن اللي بشرتها حساسة بلاش تستعمل الطبيعي فقط , لأن الماسكات الاصطناعية فيهم نسبة كبيرة مين المواد الحافظة و اغلبهم معطرين يعني فيهم الكحول و البشرة فهاد الوقت فالتنظيف ما تتبغيش أي شيئ قوي
يتبع ...