الداقوس؟؟؟؟؟؟؟؟؟

اهلين اختي

طريقة الداقوس حنا اللي نسويها بالبحرين تهبل وايد وتقريبا كل مكان يسوونها بنفس الطريقه لكن تختلف البهارات شوي بس اللي حنا نسويها بعد كشخه

هاج المقادير
4 طماطم كبيره حمراء
كزبره شوي مفرومه،، اناا زيد الكزبره لاني احبها وايد
قرن فلفل اخضر حار
ملح
ملعقة معجون طماطم ،، تقدرين تستغنين عنه مو شرط
نص بصله
ثوم حبه
عصير نص ليمونه
الطريقة :
اسلقي الطماطم في ماء حار شوي لين تشوفين القشر ينفصل عن الطماطم بعدين قشريه وحطيه في وعاء وضيفي عليه المقادير الباقيه المذكوره ،، بعدين اخلطيهم وافرميهم بفرامة اليدويه اسمها بروان .. واذا تحبين تحطين فلفل احمر بودره عشان يعطي مذاق حار ،، انتي بكيفك

جربيها وردي علي

حبوبة حلوة مربربة

هل هذا نفسه اللي يجي مع طبق المشكل؟؟ ((حمص+متبل+سلطة زيتون+تبولة+دقوس حار))

واذا هذا غير ، ممكن تعلميني طريقة هذا الصلصة الحارة اللي تجي مع طبق المشكل؟؟

الله يعطيك العافيه حلوه مربربه راح أجربها بس المشكله زوجي صعبه يأكل الحار أقدر أزيل الفلفل الحار؟

ايه تقدرين تشيلين الفلفل الحار ،،،

ام بيان لاوالله ماعرف طريقة الصلصلة الحاره اللي تجي مع المتبل ،،، انا بروحي ودي اتعلمها ،، بس هالصلصله الداقوس دايم نسويها بالبيت واليوم سويناها بعد ودايم تنوكل مع الكبسات والسمك المقلي

السلام عليكم :)

جزاج الله خير يا حلوة مربربة

سويت دقوسج و طلع وااايد حلو


بس احنا الكويتيين طريقة دقوسنا غير..
دقوسنا عبارة عن طماط و ثوم .. و بعض البيوت تضيف معجون الطماط علشان يعطي اللون الأحمر .

و هذه طريقته :
ضعي 4 طماطات بالخلاط البلندر أو بالطحانة الكهربائية حتى يتكون لديك عصير طماطم.
احمسي فصين ثوم مدقوق أو أكثر في زيت بسرعة حتى يصبح أشقر ----> لاتتركيه يحترق..
ثم أضيفي عصير الطماط و ملعقة أو ملعقتان من معجون الطماطم.. و اتركيه على النار لمدة 15 دقيقة حتى ينضج الطماط..

و يؤكل مع المجابيس و المطبق و غالبيه أطباق الرز