السلام عليكم ورحمة الله وبركاته


والله اني احبكم في الله

ودي اقول لكم عن نصايح دوووووم امي الله يحفظها تقولي عنهم
هالنصايح مهميييييين وايد وايد

اول شي باقول لكم عن نماذج بعايلتنا امي دووووم تقولي شوفيهم واحكمي .. ومن ثم قرري تبين تصيرين مثل من ..



النموذج الاول :



وحده من قرايبي ربي يحفظها
ام وموظفه .. لها بنتين وطبعا حالها حال كثير من المواطنين زوجها عليه قرض "سلفيه"
هالبنت تموت في شي اسمه ماركااات
وهي طيبه زياده حبتين .. يعني ممكن انه ينضحك عليها
الفلوس مايبقون عندها 10 ايام من الشهر
وبناتها تاخذ لهم اشيا مرات ماتلزمهم بس لمجرد انها ماتقول لهم لا .. طبعا مع اختلال بميزانيتها
وازيدكم من الشعر بيت .. هالايام .. هابه في شغلة البيع
تشتري اشيا وتبيعهم وربعها مرات يشورون عليها بشور ماهو بزين ابد
شوي الا تشتري اشيا ومستحضرات على اساس انها " طبيعيه" وتبيع
وشوي تقرر انها بتروح شرق اسيا تشتري شنط تقليد ماركات درجه اولى وتبيعهم
وشوي الا تاخذ كاتلوج هالشركات اللي مالهم محل بس تشوفون الصور ويوصلونه لكم وتصير هي الوكيله

يعني ماتخلي شي والمشكله انها ماعندها حس وروح التجاره
يعني لو انها تقدر تربح 10% مثلا كربح
تقول لا انتوا من الاهل وانا عشانكم راح اعطيكم بسعر التكلفه << بجد مو بس كلام :ss:
وانتوا ربعي .. وانتوا قرايبي .. وانتوا بناتي .. وجذي

المهم .. انها ما ايي الاسبوع الثاني الا وهي مديونه من فلان وعلان ..
والراتب طااااااار
وتصفى على الحديده (n)




النموذج الثاني:



وحده ثانيه من المعارف موفره لدرجة مو طبيعيه .. هي ماتشتغل
يعني تشوف وتلف البلاد لف . . واخر شي ماتاخذ هالشي تستخسره
تقول يمكن احصل بسعر احسن
او شي افضل .. يمكن يصير عرض .. وبالاخير ماتاخذ اللي ببالها او تروح عليها الشغله وجذي
يعني ما اروح معاها السوق او المجمع تحط بسلتها من هني ومن هني
وقبل لا تحاسب اشوفها توقف مع نفسها
تقلب في الاشيا
وتفكر .. تشيل من هالاغراض
يعني لو هي حاطه مثلا 7 قطع . ماتصفى غير على 2 ..... ان كثر


فـ امي ربي يحفظها تقول لي شوفي فلانه وفلانه
تبين تصيرين مثل أي وحده منهم
اقول لها خير الامور الوسط لا جذي ولا جذي

قامت تنصحني .. وباعطيكم خلاصة قولها:



لازم اني احدد من اول راتب نسبة المصروفات اللي عندي لانها راح تحدد مصروفي طيلة عمري
يعني مثلا
لو من اول راتب حطيت احتياجاتي على اساس 80 او 90 بالميه من الراتب
راح اتعود على هالشي
واذا حاولت بعدين اني اوفر راح احس اني مقصره على روحي عشان اسوي لي حساب توفير
لكن لو من اول شي حطيت ببالي ان 50 بالميه مثلا انها للتوفير
راح اتأقلم على الباقي من الراتب .. وراح احسه هذا راتبي مو اكثر
وبما اني بنت لي الحين ماعندي التزامات
اوفر احسن لي واسوي اللي ببالي ..



وقرش ابيض ينفعك باليوم الاسود .. مثل مايقولون

امي ربي يحفظها من اول راتب خذته طبقت هالشي على وصية من يدي ربي يرحمه ويغمد روحه الجنه .. اللهم امين

وما شاء الله عليها ربي يخليها لنا ويحميها
حتى الحريم اللي معاها بالشغل يتعلمون منها شلون يوفرون
ومرات تقعد مع أي وحده منهم متوهقه وحايره وعليها ديون
تسوي لها جدول وتشوف شكثر تصرف وشكثر توفر
لين ما تنفك ازمتها وتتعود على التوفير .. باذن من الله طبعا



انا عجبتني هالفكره
واذا في احد شاف حلقات من فتره للمذيعه الامريكيه الشهيره اوبرا
كان مضمون كلامها جذي

PAY to yourself FIRST

ان الواحد منا لااااااااااازم يحسب حساب نفسه .. والزمن
ويوفر ولو جزء بسيط بالبدايه .. وبعدين يكبره حسب امكانياته

تم تصغير الصورة. إضغط هنا لمشاهدة الصورة بحجمها الطبيعي 819x1024.

وطريقتها كانت ان اول ماينزل الراتب
اوتوماتيكيا من البنك .. تخليهم يسحبون جزء او نسبه انتي متفقه معاهم عليها وينقلونه لحساب توفير ... او كوديعه
ولا تلمسينه ابد .. وتنسينه

وشوي شوي .. شهر بعد شهر راح يتجمع مبلغ لا باس فيه .. وانتي منتي بحاسه ..
بس بشرط انج تنسينــــــــــ ـــــــــــــــ ــــــــه ولا تعتمدين عليه وتحطينه ببالج

وحزة الضيق .. الضيق الكبير .. تسحبينه
احسن لج من الديون والسلف ..




مو الضيق انج بتشترين شنطه .. او ميك اب !! ..
هذا مو ضيق ... هذي رفاهيه .. ممكن تستغنين عنها
او ترسمين لج جدول لاحتياجاتج وتشوفين شكثر تقدرين توفرين بجد وشكثر تحتاجين بجد

وبجذي لا تعتازين او تحتاجين لاحد ولا شي .. الغني الله عن جميع الناس ..... سبحانه
........





" ونصيحه بعد نصحتني بها وحده ربي يحفظها .. ان اول ما استلم المهر اطلع لي صدقة منه .. لانه روي عنه أنه صلى الله عليه وسلم قال: ((إن صدقة السر تطفئ غضب الله وتدفع ميتة السوء)) .. وسبحان الله لا يرد القضاء الا الدعاء .. فعليكم بالصدقة والدعاء "



ولا تنسوووون بعد ... وهالشي مهم ياااابنااات اللي على وجه زواج
اني لاتزوجت .. مهري اخلي لي منه عزوه << جزء للزمن
ما اصرفه كله على ملابس وعطور .. شهرين او ثلاثه بمل منهم وبجيب غيرهم
اخلي لي مبلغ زين .. بحيث اني ما اقصر على نفسي .. ولا ابذر فيه بنفس الوقت

.....



وحتى لما بشتغل وانا متزوجه .. طبعا معروفه ان المصاريف على الزوج .. وراتب الزوجه لها
بس هي نصحتني ..
تقول لو في هالزمن تبين تبنين لج بيت ماراح تقدرين اذا تركضين ورا كل شي بنفسج .. لازم تتحكمين بها
مو معقوله تبين بيت وتبين كل اللي تطيح عينج عليه


هالمعادله ماراح تنفعج .. بالعكس راح تخسرج ..
وفلوسج وفلوس زوجج بالمستقبل راح تروح كلها للتجار
....


تقول لي هي شسوت ؟؟
خلت راتبها ينزل بالبنك ولااااااااا تلمسه ..
وهي وابوي ربي يحفظهم لي ويخليهم عزوه طول العمر .. اللهم امين
هي وابوي مصاريفهم يأقلمونها على راتب ابوي
وسنه بعد سنه يتجمع مبلغ حلو بالبنك ساعدهم كثير عشان يبنون بيتنا الحالي
طبعا لا مفر من قرض
ولكن الفرق ان الواحد عنده مبلغ يساعد نفسه فيه
مو بس كلها على القرض





وسبحان الله الواحد لازم يستغل كل نصيحه عنده وينصح بها اكثر قدر من الناس
ويبعد عنه الانانيه .. وحفظ كل معلومه لنفسه
عسى ان تكون في صالح اعماله .. وينفع المسلمين بها .. وتكون علم يستفاد منه
فيمكن يكون اجلي بكره .. على الاقل كلماتي محفوظه ويارب انكم تستفيدون منها

ربي يبارك في اعماركم ومن يعزون عليكم جميعا



اذا اصبت فمن الله و اذا أخطأت فمني و من الشيطان

سبْحانَك اللَّهُمّ وبحَمْدكَ أشْهدُ أنْ لا إله إلا أنْت أسْتغْفِركَ وَأتَوبُ إليْك

لا تنسوني من صالح دعائكم
كل الحب







واذا شفت تجاوب راح ابلش احط لكم الطرق اللي تساعد على التوفير .. اللي جربتها شخصياَ واللي ان شاء الله بجربها



الحين بذكر الطرق اللي جربها واللي ما جربتها

واتمنى انها تفيدكم




الطريقة الاولى

لاااااااااا للفيزا والماستر كارد
تم تصغير الصورة. إضغط هنا لمشاهدة الصورة بحجمها الطبيعي 892x293.


... غلط واكبر غلط الفيزا او الماستر كارد .. والله يا بنات يصير الراتب ما فيه بركه ..
لو كنتي للحين مو موظفة ورحتي بتفتحين حساب واكييييييييد الموظفة راح تعرض عليج الفيزا .. ارفضي
ولو قالت لج انها بدون فوايد ومجانيه اول سنه وووو>> مثل اللي صار معاي ... ارفضي
وحتى لو قالت لج انها تجي مع البطاقة من غير ما تطلبينها >> قوليلها ما ابيها واذا لازم قولي خلاص بشوف لي بنك ثاني


واذا بتقولون شلون نطلب من النت ووووغيره .. فيه البطاقة اللي تحطين فيها مبلغ معين انتي تحددينه وحلوووووووووووو وة هالبطاقة ... عندي وحده منها ..


الطريقة الثانية ...

... طبقتها من اول راتب نزل لي اول ما توظفت
اللي هي .. خشيت نص راتبي والنص الثاني خليته لمصاريفي
كيفت نفسي عليه .

يعني مثلا كان رابج 800 دينار .. خشي 400واصرفي 400

لا تقولوووون ما تكفي .. والله تكفي وزيد اذا كيفتي نفسج عليها
افتحي لج حساب من غير بطاقة .. وكل البنوك يسوونها ..عشان تحطين فيها وما تسحبين منها

.. وخلي البطاقة عند امج او احد تثقين فيه .. واذا متزوجه ديرررررري بالج .. لا يدري زوجج بفلوسج .. حاولي خلين هالشي خاص فيج .. وحتى لو سألج لفي ودور ودوخيه وخليه يتحسف اللي سالج لوووووووووووووو وووول

تخيلي ان راتبج هو اصلن 400 مو 800 والله راح تمشي امورج
والباجي خليه للتوفير .. ولا تصرفينه كللللش ملش

الا للضرورة القصوى ..>> ترا الجنطه الماركة مو ضرورة قصوى ولا الخاتم الالماس ضروورة

حتى السوق اذا صار فيه تنزيلات وصارت عروض على قولتكم ما تتطوف هذااا هم مو ضرورة

.. فهمتووووو

خل اقولكم شي ..


رفيجاتي 2 .. وحده موظفة بالبنك التجاري وراتبها تقريبا الف والثانيه موظفة سكرتاريه بشؤؤن الطلبه وراتبها اعتقد 600 اذا ماني غلطانه
الاولى راتبها كلللللللللله رايح عالكشخه والطلعات



والثانية راتبها مقسم بين اقساط سيارة + قرض خذه بوقت ضيق + مصاريف جامعة لانها قاعده تكمل بجامعه خاصه + مصاريفها من لبس و مصروف يومي وبانزين و طلعات ووووو

ومع هذا يلبسون نفس الشي ونفس الستايل قريبا .. ماكو فرق (( انا اعتبر المسألة مسألة ذوق)) الوحده بذوقها الخاص تقدر تخلي القطعه اللي تلبسها لو ****لله بنص دينار شكلها كشخه ورزه عليها .. .. اللهم ان اللي شغل بالبنك كل شهر تجدد بس الثانية لا .. كل بدايه شتا وبدايه صيف جدد
واثنينهم يطلعووون سينمات وووو


ومطاعم وووو

وكافيهات ..

(( وراح نتكلم عن هالنقطه .. ونعرف شنو اللي نشتريه وشنو اللي ما نشتريه وشلون نطلع ونستانس ونعيش احلى عيشه بمبلغ بسيط ان شاء الله بعدين ))
اللي بالتربيه كيفت نفسها ان اللي يصفالها من راتبها 250 بسسسسسسسسسس ومصرفها ومشترياتها طول الشهر يكون على هالاساس

يعني هي تقدر وانتووو ما تقدرووون ؟؟؟


انزين سؤال واتمنى تجاوبون عليه .. لو صار عندج ظرف طارئ ومفاجئ ..

لنفرض الله لا يقوله صارلج حادث وسيارتج راحت فيها ..

.. والحل يا انج تشترين سيارة ثانيه او انج تصلحينها تصليحها يوصل 800 او 900 دينار .. شنو راح تسوين ؟؟
عندج هالمبلغ ؟؟
واذا ما عندج من وين راح تجيبينه ؟؟ تبوقين مثلن ؟؟

لااااااازم تحطين بحسابج انج توفرين مبلغ حق الطوارئ .. على الاقل 1000 دينار


يمكن الحين راح تقرون كلامي وبعضكم يقولون ما نقدر نوفر .. اذا خشيناه لازم نصرفه على طووول ما نمسك ايدنااا

انا بقولكم الحل ...

وهو الطريقة الثالثة ...

الجمعيات .. دشي جمعيات مع ناس ثقه .. وخلي جمعياتج بمبالغ كبيرة .. يعني دشي جمعيه ب 400 ديتار او 500 دينار

عشان تستلمين مبلغ 5 الاف او 4 الاف>>>واااااااا اااااااااااو مبلغ حلووو ومش بطال

وخلي استلامج يكون بنفس الشهر او يكون باوقات قريبه .. يعني شهرين ورا بعض

صدقوووني الجمعيات حلووووووة للناس اللي ما قدر تمسك نفسها ... تجبرج انج تلتزمين
والمبلغ اللي تستلمينه على طووووول خشيه ولما تشوفين صار عندج مبلغ كبير راح سانسين ويكون حافز انج توفرين اكثر ...

اللي عمرها ما وفرت ما جربت احساس لما يكون برصيدها مبلغ كبير .. بس لما تجربه راح يخليها حاول تحافظ على هالمبلغ


واذا ما تبين تخشينها خلي المبلغ اللي راح تسنلمينه بدايه حق مشروع او هدف كنت تحلمين انج تحققينه وما قدرتي ..

حطي لج هدف .. ويصير توفيرج اسهل واسرع

نكمل باجي الطرق بعدين
بالرد اللي قبل قلنا عن 3 طرق
1- نكنسل الفيزا
2- تخشين نص الراتب بحساب توفير تكونين حاطته من غير بطاقه
2- الجمعيات .. للي ما يقدرون يتحكمون كلللللش لانها راح تجبرهم يلزمون مع الناس .. بس اول ما تستلمين الفلوس

ترووووحين ركــــــــــض .. عـــــــلــــــ ــــــى طوووووول للبنك وتحطينهم وديعه ..>>اذا كانو اكثر من الف

والحين بكمل باجي طرق التوفير ..

الطريقة الرابعه ..

الحــــصـــــــ ـــــالــــــــ ـــــــــه


هذي طريقة انا قريتها بالمنتدى اذا ماني غلطانه

حطيت حصاله عندي
وكل يووووم احط فيها دينار >> اقل شي
ما احط فيها الخرده الحديد .. لا .. كله ورق
مرات 5 .. ومرات 10
ومرات 20 ..
على حسب الموجود بالبوك
بس اهم شي انج تحطين فيها يومياَ
سويت هالطريقة
وكسرت الحصاله بعد 6 شهور لقيت فيها 400 دينار وكسور
مبلغ حلوووووو



الطريقة الخامسه

طريقة الاظرف

وهذي انا اشوفها احسسسسسسسسسسسن طريقه
لانها تعلمج بالضبط وين تروح فلوسج .. وتخليج تقدرين تحدين من صرفج

تجيبين 4 ظروف
وتكتبين على الاول 1 والثاني 2 والثالث 3 والرابع 4
وتخلين ظرف حق كل اسبوع
وتحطين بكل ظرف مبلغ معين انتي تحددينه يكفيج لمده اسبوع .. وهالمبلغ شامل (( اغراض الجمعيه + البانزين + كروت التلفون + طلعاتج بالويك اند + الصدقه وتكون دينار+ ...احتياجات شخصية ))
وتجيبين ظرف خامس وتكتبين عليه ( السوق) وتحطين فيه مبلغ للسوق ما يعدى 200 دينار
وكل بدايه اسبوع (( يوم الاحد )) تبطلين ظرف
واذا خلصت الفلوس قبل نهايه الاسبوع ممنوووووووع تفتحين الظرف اللي وراه .. الا لما يجي يوم الاحد
وبعد ما عرفتي كم تقريبا تحتاجين...خلي بالج لا تزيدين في اي شهر عن القيمة اللي تحطينها في كل ظرف....
ولما يوصل نهاية الشهر...شوفي كل الاظرف..اللي باقي منهم...انقليهم الى حساب التوفير...
وابيج على كل ظرف تكتبين شنو صرفتي فلوسج عليه بالضبط ..وشنو استخداماتج..
وفي النهاية مبلغ التوفير اللي طلع كل اسبوع

وممكن تضيفين ظرف للعيدين..يعني تحطين كل اسبوع فيه مبلغ معين عشان التسوق للعيد عشان لا ترهقين ميزانيتج قبل العيد

هذي الطريقه رووووووعه وانا شخصياَ مجربتها
والحين انصح اختي توها متوظفة عشان تطبقها


هذي الطرق كلها (( اللي انا جربها)) و****لله تطبقونها

والله التوفير حلووو بس احنا مشكلتنا العادات الشخصيه و العادات الاجتماعيه الخاطئة

وصلتني رسايل شكثر بالخاص .. يبون احل لهم بعض المشاكل الماليه

والصدمه ان الغالبيه يا عندهم قروض او ان الفيزا لاعبه فيهم لعب

حبيباتي
الي ماخذه قرض وفيزا
الهدف الاول لتصحيح مسارج اهوا انج تتخلصين من جميع القروض والخصومات الي تنزل على حسابج بالبنك
وبجذي بتوفرين مبلغ لا يقل عم 400-200 دينار ما اعتقد هين اذا معاشج بين 1000-700 دينار شي حلو يرجع ينزل بمعاشج صح؟
بتساليني شلون

اول شي تتخلصين من بطاقه الفيزا مهما كنتي بحاجه لها .. صدقوني ضررها اكثر من نفعها وبعدين تقعدين بينج وبين نفسج وتفكرين شنو شريت بالفيزا ؟
هل هو مهم؟
هل الي شريته بيغنيني؟
هل استفدت منه ؟
انا متاكده ان الجواب لا
وانج تقدرين تكملين حياتج بدونها عادي وان الاشياء الي بتشترينها عن طريقها مو بذات اهميه قصوى

تاخذين الكرت وتكسرينه


وتقررين قرار نهائي انج ماراح ترجعين اطلعين وحده بديله

ثانيا ازاله اي فكره تحوم على القرض

حتى لو كان القرض لسياره او سفر

الي ماخذه من قبل قرض حاول تسدده باقرب وقت ممكن وليس النظر الى الاشهر المتبقيه وحساب ما تبقى من قيمه القرض فقط والانتظار
لانج مليون بالميه بتجددينه بعد انتهاء القرض الاول

يتم تجميع مبلغ معين كل 3 شهور تدفع دفعه لسداد القرض للتخلص منه او تدشين جمعيه والمبلغ اللي تستلمينه تقطينه على قرضج

مخاطبه البنك لخصم مبلغ قرضين في الشهر نفسه لتقليص مده القرض وتقليص الفوائد

دائما ضعي في بالك ان الفلوس رايحه رايحه فخل تروح على شي يسوى وله قيمه , يعني احسن ما اقطه على عطور
ومكياج وصالون اتحمل جم شهر عشان يخلص قرضي واتصرف براتبي مثل ما ابي بعدين
بنات ادري والله انها صعبه بس يبيلها اراده

ودايما حطو في بالكم ان الناس المليارديريه بدو حياتهم بهالطريقه
ماكو احد صار غني الا صبر وجمع فلوسه بالبدايه فقط واعيد على كلمه فقط مليون مره
تعب اول شي وارتاح بالنهايه

هم دايما انج ترددين مابي اصير نفس باجي البنات الي بخاطرها شي ثمين ومدخولها قوي بس ما تقدر تشتري الي بخاطرها
دايما رددي انا لازم اتصرف بحكمه واعرف وين كل فلس يروح
حطي في بالج راح اتعب اول شي بس بعدين راح اشتري كل الي بخاطري
وترا الكماليات ما تخلص والمديلات كل اسبوع شكل والموضه مجنونه ماراح امشي وراها .. انتي اقوى من هالشي

شوفي

في برنـامج أوبرا وينفري(( الكل عارفها اكيد ))

..كانت عارضه حلقة عن التوفيـر و الطريقة الامثل لصرف المال والـخ...
وكانت مستضيفة عوائل كانوا غرقانين بالديون قالوا خلاص احنا راح نبيع بيوتنا وماندري وين نعيش عقب..
لأنهم يبون يسددون ديونهم...
عاد قامت اوبرا وجابت لهم خبير مالي..قلب حياتهم فوووووووووق تحت..
قال لهم في بطاقات ائتمانية لازم تتكنسل عشان ماتصير عليهم ديون..
فواتير التلفون لازم تكون محدوده..
التموين المنزلي لازم يكون له دخل معين لا يزيد ولا يقل..
هذاا طبعاا كله + راتبهم....
وخلال سنه او سنه ونص راح يقدرون يسددون ديونهم ومايبقى عليهم حتى دولار واحد..
وعقبها يقدرون يجمعون قد الفلوس اللي سددوها وزياده....


المهم بالموضوع هو الجـديــــه...أن ادري ان احنا سـاعات نميل أن نرضي رغباتنا ونمتع نفسنـا..اذا شفت سـاعه وعندج ثمنهـا..مع ان عندج ساعات اشكثر..لكن بعد نقول يووو عندنا فلوس خل نستانس فيـهم لمنو بنخشهم.....!!!!!!!!!!!

انا قبل كنت افكر وايـــد دام ان عندي اشياء معينه ليش اروح واشتري منها بعد...في حين اني اقدر استغني عنه.!!!!!!!!

السالفه تحتاج الى جـدية وعـزم..هذا اليوم واحنا خالين من مرتاحين مادياَ ومو قادرين نسوي لنفسنـا شي..عيل باجر اذا صارت علينا مسؤوليات اشبنسوي؟؟

ترا وضعنا المادي بالكويت ما يقارن بوضعهم بامريكا .. ولا حتى اي دولة ثانيه ..
احنا بخير ونعمه
بس شووووفووو شنو سوو ووين وصلو .. وشوووفوو شنو سوينا ..

تدرون ليش ؟؟ لانهم حاطين هدف ..حطي لج هدف محدد بتلاقين نفسج تجمعين وتخشين
شوفو المليارديريه .. ومنهم اوبرا .. ترا بدو من الصفر ..
كانو عايشين بفقر وانتو شوفو شلون بخير ونعمه .. وفلوسنا طايره على خرابيط وووو

حطولكم هدف ..
حتى لو مستحيل .. راح يصير مع الوقت ومع ارادتج سهل وطريقتج الصحيحه بالتوفير والتعامل مع فلوسج >> اكيد سعتوا بقانون الجذب ..

بالرد الجاي ان شاء الله راح اتكلم عن شلون نغير العادات الغلط اللي فينا
وشلون نتسوق
وشنو الاشياء الضروريه اللي نشتريها بالسوق؟؟ وشنو الاشياء اللي ما لازم نشتريها
وحتى بقولكم شلون نستثمر الفلوس مو بس نحطها بالبنك ونخليها



اذا عجبكم الموضوع قولو عشان اكمل
وارفعوا الموضوع عشان غيركم يستفيد
الحمد الله اني قدرت اغير ولو جزء بسيط من الافكار السلبيه

احنا مشكلتنا ((الكشخه )) + (( التفلسف الزايد ))
فلان شرا سيارة .. انا لازم اشري سيارة اكشخ منه واغلى بعد

فلان عنده بلاك بيري .. انا لازم اشتري اي فون واكسر خشمه ..

فلان سافر اوربا .. انا بروح استراليا او امريكا واشق ويهه ..

ليييييييييييييي ش هذا كله ؟؟

تلاقوننا نصرف اكثر من نصف المعاش واتسلف من فلان وعلان
ويصيرون الناس يتصددون عني لانهم يعرفون من يشوفون ويهي اني ابي سلف ..
شنو اللي وصلك لهالحاله ؟؟


الحين انا مابي منكم شي .. ابيكم تجيبون ورقة وقلم ..
وتقعدون بهـــــــــــــ ـــــــــــدوء
جلســـــــــه بينج وبيــــــــــن نفســـــــــــج

واكتبي بهالورقة فـــــــــــوق

(( حياتي تستاهل خطه ))

وقرري بجديه انج تتغيرين للافضل ..


وتتحكمين بطريقة صرفج

وتمشين بالدرب الصح ..
اللي يخليج مليونيرة في وقت الناس ما يقعد عندها فلس

والمليون ما يجينا بالساهل ..

يبيله خطوة خطوة


يبيله تضغطين على نفسج شوي

يبيله همه واصرار وصبر

يبيله ناس جاده تمشي عالخطه صح .. مو شهر وشهرين وبعدين خلاص .. تملووون

الشخصيات العصامية ما بلشو الا جذي >>ى وراح احط لكم نماذج على اكبر الشخصيات العصامية وشلون بلشوا وشلون وصلو للخير اللي هم فيه

الحين عندج ورقتج والقلم وسجلي

وبعدها احسبي شنو شريتي هالشهر ..


كل دينـــــــار ..

كل فلـــــــــــس


حسبي كل شي

خلج دقيقه
المغريات شيليها
بس االاشياء الضرورية
حلو لم تبدين بداية صح

معظم الخوات الحين .. اللي قاعدين يراسلوني بالخاص .. قاعدين يصلحون اخطائهم السابقه مثل قروض فيزا وديون وغيرها عشان يبدون من اول

الحين بعطيكم امثلة لبعض الاشياء اللي تستنزفنا .. وتخلينا عالحديده


- اذا وحده والده لازم انروح لها بالمستشفى وقبل مانروح ادز وبوكيه ورد كبييير ..



واذا رحنا لااااااازم ناخذ معانا اكشخ واغلى كاكاو من باتشي او من هالمحلات الكشخه


- واذا سوت استقبال بالبيت هم ناخذ هديه للمولود او الوالده بقيمه مو هينه ... (( غـــــــــلــــ ــــــــــط))

- الدوام , لازم نحط قطيه للريوق ولازم اذا وحده بتنتقل او تقاعدت انحط لها وحتى اذا ادخلت عمليه لو لحميه زايده هم نحط لها والعامله بعد اذا بتسافر نحط لها (( غـــــــــلــــ ــــــــــط))

- بالسفر لازم يكون معانا صوايغ الام وخواتنا و ام الريل وخواته وووو حق جيرانا بعد ويا خال ابوي حك ظهري (( غـــــــــــلــ ـــــــــــط))

- اذا رحنا مطعم يمعه بنات وعقب ما طلبنا السلطات و الشوربه والمقبلات والحلويات وعقب ما شربنا الكوفي والكابتشينو و الموكا لاااااااااازم وحده تدفع حساب الكل يعني كريمه (( غـــــــــلــــ ــــــــــط))


- اذا وحده تزوجت لازم هديه لها فشله (( غـــــــــلــــ ــــــــــط))


- الحين بعد الي راجعين من العمره الهديه جدامنا تركظ (( غـــــــــلــــ ــــــــــط))

-عيد الحب بعد بالطريق ., هم يبيله ميزانيه وهدايا وديكورات وبلاوي (( غـــــــــلــــ ــــــــــط))


- اذا توظفنا لازم انسوي عشا حق العايله بمناسبه اول معاش هذا اذا ما عطيناه حق الوالده او الوالد عشان الله بارك فيه(( غـــــــــلــــ ــــــــــط))


الساعة الآن 08:43 .