- اذا معزومين على عرس لازم بدله يديده حتى لو كان كبتنا متروووس بدل ويبي بنفجر من كثرهم(( غـــــــــلــــ ــــــــــط))


- واذا بنروح عرس لااااااازم مكياجنا باغلا الصالونات وتسريحه بعد مو اقل من 100 دينار انقطها بالصالون ونطلع مستانسيين على المكياج والتلطخ والمليون طبقه الي مسوينها فوق راسنا (( غـــــــــلــــ ــــــــــط))


- بالمدارس لازم انودي كيكه حق الصف والمدرسات والناظره بمناسبه عيد ميلاد الولد او البنت (( غـــــــــلــــ ــــــــــط))


- اي وحده من رفيجاتنا تطلب اي شي بالانترنت نروح ونقلدها (( غـــــــــلــــ ــــــــــط))

- اذا نزل موبايل او لاب توب او جنطه يديده نركظ انبدل ونشتري اليديد ونقول فشله موبايلنا صار قديم مع انه ماصارله سنه عندنا !!(( غـــــــــلــــ ــــــــــط))




شوفو حبيباتي كل هالاشياء مالها داعي اذا تدرين انها بتاثر على ميزانيتج مو ملزومه تدفعينها

ولو جمعتي اسعارهم راح يطلع لج مبلغ حلو حقج ينقذج من ازمه ماليه انتي بغنى عنها,
يعني الوالده تروحين لها مره وحده وتفكرين شنو بتاخذين لها شي يسوى وله قيمه وتستفيد منه ,

فكري مليون مره بالطرق البديله قبل لا يطلع الدينار من بوكج شنو الاحسن لج مو له

الهدف من زيارتنا للوالده هو انج تبينين لها التقدير والاهتمام فيها ..
انا عمري ما انطر هديه وحده عشان اشوف قيمتها ولا افكر ابدا ان الهديه هي تقدير لقيمتي عند هذي الانسانه .. لو تسوي حلو من شغل ايدها تكفي .. كافي عطتني من وقتها وفكرت تزورني .. هذا اكبر تقدير بالنسبه لي

.. الهديه ما تبين محبه الشخص فيج ..

ممكن وحده تييبلج هديه حلوة بس من داخلها حاقده عليج وما تحبج .. بس نفاق او مجبورة لصلة قرابه .. فهمتووو

واللي راح تحكم عليج من الهديه هذي انسانه سفيهه وتافهه وما تستحق التقدير ,, لان كل واحد يبي يعطي على قده ..

وانتي مو مجبورة تقصرين على نفسج وتعيشين بتقشف هالشهر عشان اهي تعجبها الهديه ,,, وغالباَ ماراح تعجبها !!!
بالدوام اذا كانو بيقطون قطيه بسيطه ممكن تدشين معاهم .. لكن لو حسيتي ان القطيه مبالغ فيه اعتذري بحجه انج مسويه ريجيم ..


او اي عذر مقنع و عودي نفسج والي حواليج ان الماي وريوقج تسوينه بالبيت وتاخذينه معاج الدوام حتا الجاي والقهوه مالتج اتيبينها معاج
انا دوامي قطيتهم 20 بالشهر .. اشوفها وااااااايد عشان جذي ما قطي بحجه اني ما احب ما اقدر آكل اي شي .. معدتي ما تحمل
والصبح بس اييب معاي كرواسن محشيه مرتديلا وخس او جبن وعصير ..



والشاي والقهوه اشرب معاهم لاني مرات اجيب معاي من البيت .. يعني مره علي ومره عليهم

لازم ندفع بالمعقول بكل شي اذا معزومه عرس طلعي كل بدلاتج الي عندج بالكبت وشوفي الزين والنظيف منها وقولي بصوت عالي البدله زينه ومحد شافها علي وكلها ليله وبتعدي ليش اقط فلوس

مو لازم كل عرس تروحين له لاااازم بدله جديده .. فيه وحده من جماعتنا اشوفها دايم بالعروس ومتعودين عليها بدلين طووول السنه ..
بس هي تبارك الرحمن تهبل وهي اللي محليه البدلة لو تلبس خيشه ما يهم .. لان الوحده مو بدلتها اللي تبرز جمالها .. روحها
ياما بنات بالعروس تلاقونهم لابسين بدل تطير العقل ,,,
بس ما تلفت انتباهنا ..
ونلاقي وحده من الحضور هي اللي كل العيون عليها ..
مع ان بدلتها بسيطه .,,
وشعرها ستريت والميك اب ناعم ,, ما سألتو نفسكم ليش؟؟


اذا رحتي الصالون اختاري صالون ارخيص والمكياج اذا تعرفين حطي بروحج واذا عندج اخت او رفيجه تعرف اتمكيج خليها تحطلج مافيها شي والعرس لو تلاحظين كل البنات الي حاطه اب 100 و20 دينار كلهم نفس الشي محد يلاحظ الكل لاهي بالرقص والعروسه

والله نهيبه هالصوالين ... اذا كل عرس بتروحين وتقطين 100 دينار عز الله فلسنا
الحين ارتحححححححححححت
طحت على صالون يحط لي مكياجي مع كريم جسم وشعري يسوونه استشوار ب 10 دنانير
والحمد الله انا مرتاااااااحه وكل ما رحت عرس يسألوني الناس عن مكياجي
اهي شي يكون ناعم ويبرز ملامحج الحلوة .. مو يغيرج ويخليج جنج كاسبر

ااما بالنسبه للاعياد الميلاد ..هدايا عيد الحب والحج كلها بدع وحرام ما عندنا بالدين غير عيدين واذا احد قالج قوليله حرااااااااام مايجوز نحتفل مع المسيحيين
ولو كلش كلش .. كلمة مبروك كااافي

اعيالج بالمدارس محد يعرف عيد ميلادهم احتفلي معاه بروحج واخذي الكيكه بيت اهلج وجذي اتونسينهم وتونسين نفسج واعيالج الاقربين اولا بالمعروف وترا الياهل ما يدري وين الله قاطه لاتقولين حرام ابي يستانس ومابي احس اني مقصره ,
غلط هذا عقلج الباطن يتكلم ,
لازم تقنعين نفسج ان تربيتج لهم وان الفلس الي قاعده تجعينه راح يفيدهم لما يكبرون وهذي احسن هديه لهم اذا كبرو
واذا كلش كلش وولدج كان بخاطره .. سويله انتي كيكه
.. وخليه يكون معاج بالمطبخ ويساعدج عشان يستانس ويحس انه هو اللي مسويها
وانها انجازه وتعبه الشخصي ويكون فخور لما يوديها معاه


.. فهمي حبوبه

صرعات الموضه والاجهزه اليديده ما تخلص ابدا فكري وقولي اذا طاح مني بالغلط او انكسر او انباق شنو راح اسوي ؟
واذا نزل موديل يديد وين اودي الي عندي
حرام اتبيعينه اب 10 دنانير وانتي ماخذته ال 100 دينار
وفكري انها مجرد وسيله للاتصال فقط وليست للمظاهر ولا هي مقياس للتطور ومحاكات الموضه
اذا رفيجتج شرت شي يديد طالعيه ومتعي عينج فيه لما تشبعين منه وتخيلي انج شريتيه وبعدين ؟!
يمكن ميزانيه رفيجتج احسن منج وظوروفها تسمح وانتي لا ,
لاتخلين الرفيجات ياثرون عليج وغيرون رايج .."
خلي شخصيج قويه وما تهزج وتأثر فيج اشياء ماديه
لاتردين عليها اذا قالتلج روحي اشتري سكتي وقولي بينج وبين نفسج انا مو محتاجته وعندي وايد وراح اقط فلوس عالفاضي واقدر اكل باجي الشهر بدون ما اشتريه عادي ماراح اموت خليج اقوى من اهوائج

دايما قولي ماراح احد اخليه يتخذ قرار الصرف غيري واذا الفلس بيطلع من حسابي بالبنك لازم ينفعني انا مو غيري
الهدايا والكماليات بالمناسبات انا واهلي اولا فيهم اونس نفسي واهلي اولى من الغرب
التفكير باتزان مطلوب ولاتقولين فشله المجتمع الي انا فيه جذي لا خلج مميزه بين
رفيجاتج وخلي افكارج وتصرفاتج اهما يقتدون فيها وقلدونج

تعبت .. وراح اكمل بعد ما اشوف تجاوبكم مع افكاري ..
عاجبكم والا لا؟؟
اي وحده عندها اعتراض على اي نقطه تقول عشان نكمل الخطه صح ..
يلااا يابنات .. بشوف الاصرار
احنا اللي نعاني منه اكثر شي هو العادات الشخصية الخاطئة

وايد منا تبدي منه تصرفات غلط واهوا ما يدري مثل

- اروح السوق بحجه ان ظايق خلقي ولما اصرف ارتاح

- استخدام الاشياء الشخصيه بشكل عشوائي وعدم تريبها يخليج ما تعرفين شنو عندج وشنو ما عندج
[img]https://s3-eu-west-1.amazonaws.com/edgecast-upload/PE/2011/10/03/03/******box-1.jpg[/img]

- حب الوجبات السريعه والجلوس بالمطاعم والكافيهات

- جنون الموضه واخر الصرعات

طبعا اول نقطه كلنا نسويها لان نطلع بدون تفكير وحالتنا النفسيه السيئه تخلي تفكيرنا معظمه يكون سلبي في كل شي بما فيه السوق
, دايما قولي لا تحسين انج خلاص بتلبسين وبتطلعين ان انا تصرفي غلط ومو لازم اسوي جذي وبعدها تخيلي انج رحتي السوق وشريتي الي تبينه والي ما تبينه وبعدين رجعتي البيت بس المشكله الي كانت عندج والي كانت مأثره على تفكيرج بعدها موجوده يعني السوق ما كان الحل


تغير شي؟؟
عدلتي شي؟؟
حليتي المشكلة ؟؟
لا .. المشكلة موجوده للحين

فكري بطرق اخرى لحل الازمه النفسيه مثل الفضفضه لصديق او كتابه كل ما هو يزعجج بورقه وتخلصي منها بالحرق بس لا تحرقين دارج ديري بالج
استخدامج للاشياء الشخصيه ادري بتقولين اوله شدعوى مو ليهالدرجه بس صج تاثر مثل المكياج والشامبو والعطور
معظمنا يستخدمهم على قله سنع مثل الشامبو والبالسم انكته كت بايدنا مع ان نصه يفي بالغرض
اذا عندج جوتي اسود بالخزانه منه بكعب ومنه فلات ومنه وسط ومنه صندل بلاها مو الا تشترين بعد منه

نصيحه عشان معظمنا يروح السوق واذا شاف شي يبيه كله يقول ما عندي بس لما يرجع البيت يلقا عنده وناسي ,
خلي خزانة الملابس مالتج مفتوحه او بدون بيبان جذي راح تشوفين الي عندج على طول وبعد ترتبينهم عدل وبتقولين بينج وبين نفسج اوووووووووووله شدعوه كل هذا عندي وبعد اروح السوق

اذا عندج دهون للشعر وايد او عطور ومكياج لا تشترين شي بعد مقطع مثل حمره وحده او عطر واحد وتضيفينه للمجموعه المكوده الي عندج لا,
خليهم يخلصون وجريب النهايه روحي اشتري سيت كامل يعني طلعه حق عطور ومكياج لمده سنه جدام
واذا وزتج نفسج وشفتي شي يديد قولي بقلبج اخلص الي عندي واروح اشتري
بعدين
فكري وفكري الف مره قبل ما يطلع منج الدينار

رفيجتج بتروح السوق وتبيج معاها قولي لها روحي بروحج واذا خلصتي مريني انا ما عندي شي بالسوق
ترا طلعات البنات مع بعض اهي اللي تخلينا نصرف
رفيجتج شرت لها قميص حلو .. قعد تشيشج تشترين نفسه
تشوفون شغله ويقعدون يقولون لج هذي تناسبج ويطلع رووووووعه وخيااااااااال عليج
ووو

ديروا بالكم
اذا بغيتي تروحين السوق روحي بروحج مو مع رفيجاتج
مو مع قروب
بس هذا ما يمنع انج تطلعين معاهم وتقعدين بكافيه وتشربون شي او تغدين او تتعشين معاهم .. لالالا
عادي .. بس لا تفكرين تشترين شي وانتي معاهم ..


فهمتو
اقلمو نفسكم على هالكلام
وخلوه دايما جدام عيونكم
مدام انتي برااا البيت لاااااازم تصرفين
يا مطعم ...
يا قهوة
يا سينما
واذا شفتي شي حلوو لازم تشترينه وانتي شاقه الضحكه وما تخلينه بخاطرج
حتى لو ما كنتي محتاجته

طلعات المطاعم والاكل اهوا البلوه تاكلين تاكلين
وبعدين منها خساره فلوس وتمتنين
وتروحين تسجلين بشركات الرجيم والنوادي

حلي المشكله من الاساس ولا تاكلين بره كل يوووم قولي البطن اي شي يشبعه ويترسه عادي
خلي طلعاتج للمطاعم بس بالويك اند
مو كل يووووم

نرجع حق الموضه

طبعا الانترنت والدعايات شغاله اذا شفتي شي بمجله بس طالعيها وتخيليها عندج ولبستيها وبعدين؟
الموضه ما تخلص كل شوي نازلين لنا بشي يديد
شلون يعني بقعد اصرف كل شهر ماراح اخلص .
اخذي الشي الكلاسيك حق دوامج الي مافيه نقوش والوان وايد
عشان تلبسينه وتكررينه بدون محد يلاحظ
مثل لبس اوبرا بالضبط

يصلح لكل وقت وموضته ما تروح و بعد 10 سنين
انيق ولبس يصلح للدوام
لان احنا الكويتيات معظم وقتنا بالدوام
ولبس الطلعات الرسميه مثل مع زوجج او رفيجاتج خلي لبس ثقيل وعليه القيمه ما ينقط وموضته ماتروح وكشخه
وانتي شخصيا ما تملين منه لانه شوي غالي

وآخر شي الترتيييييييييي يييييب
يا بنات رتبووو اغراضكم عشان تعرفون شنو عندكم
لما تكون ملابسكم حايسه ما راح تعرفون شنو اللي عندج وشنو اللي ما عندج

كل شهر .. اول ما ينزل المعاش سوي جرد حق ملابسج
وطلعي كل شي عندج واللي ما تبينه حطيه بكيس وبرعي فيه للجان الخيريه
وشوفي شنو عندج
من ملابس
وجواتي
[IMG]http://www.*****.cc/forum/imgcache/53616.png[/IMG]
وملافع
وبجاماات
ومكياج


ووكل شي
راح تنصدموووون من اللي عندكم
سوي هالحركة كل شهر
عشان قبل ما تروحين السوق وتشوفين شي وتبين تشترينه تتذكرين ان عندج كوووووود ملابس بالبيت
اللي غرفتها مو مرتبه ما تدري عن شي .. عندها بلااووي بغرفتها ولا تدري
رتبو التسريحه .. وادراجها وكب الملابس والارفف وكل شي ..
اعتمدي الترتيب كطريقة لج

وعقب جم سنه لما تكتشف شغله موجوده تقول يوووووووووه .. حسااافه .. هذا عندي وانا رحت السوق وتعنيت وشريت نفسه
جم وحده صارلها هالموقف ..
لو صار لج هالموقف .. لازم تعرفين انج لاااازم تبدين معانا بهالخطوة
خطوة (( الترتيب ))


ها بنات تعبتو من قرقتي والا اكمل ابي تشجيع
انا جدا سعيده ان في بنات فعلا كلامي قاعد اييب نتيجه معاكم
تدرون شنو مشكلتنا
مشكلتنا ان الكل عارف ان لازم يقتصد ويمتنع عن التبذير
ويقول .. شلون ... ولازم
بس ما يطبق لان خصوصا باهالموضوع انا لا حظت ان عشان يطبق لازم يسمعه بشكل مكثف ومتكرر عشان يبدي بالتطبيق
الوحده فينا بس محتاجه احد يسمعها هالكلام بشكل مكرر ويومي عشان اهيا بعدين اتردده على نفسها لما تحس انها بتسوي شي غلط
ويمكن في أسر الاب وام بعيدين عن هالنقطه
يعني بس يقول حق بنته عن التفسفس او يقول حق ولده لا تلعب بالفلوس ترا ماراح اعطيك بس مره بالشهر ..
لازم نعلمهم قيمة الفلوس وشلون يتصرفون فيها وهم صغار ..



هذا الموضوع محتاج للنجاح والتطبيق بشكل اساسي على التكرار والحوار
يمكن اقدر افيدكم عشان تبدون تبلشون مع عيالكم من صغرتهم وهالشي بعد راح اعلمكم اياه بالتفصيل في الايام اليايه ان كنا من العايشين

انا اللي اكتشفته اللي معاشها 1000 يطير واللي معاشها بوزاره 500 يطير استغفر الله صج المعاش ماااااعاااااااش انا ينزل يعني اسبوعين يتم شي بسيط اخر الشهر
بس ما سالتي نفسج ليش؟؟؟؟؟؟؟

لان طبيعه الانسان انه يستطيع ان يؤقلم نفسه بالظروف والبيئه المحيطه فيه
فشي طبيعي بتعطيني 100 دينار لي اخر الشهر باقلم وماراح اموت من الجوع وبتكفيني
ابتعطيني 50 الف هم بصرفها كلها وباقلم نفسي عليها لي اخر الشهر
ابتعطيني 10 الف بعد اقدر اصرفهم على 30 يوم
والكل عايش الفقير والغني والكل يصرف
زين ليش ما ناقلم نفسنا جنه راتبنا الي ينزل نصه اهوا الحقيقي والباجي مزور او ورق فقط
شرايكم؟؟
واقلمو نفسكم على نص الراتب ..
والي ارادتها قويه تاقلم نفسها على ربع الراتب وتتخيل ان الباجي مجرد اوراق مزوره
شرايكم بهالفكره ؟؟
يمكن تخليكم تقللون المصاريف شوي
يلااا يابنااات
ابي اراده
قوه
عزيمه
لا للصرف
نعم للتوفير والاستثمار
خلج اقوى من شهواتج
ودايما كلمي نفسج بصوت عالي
انا غنيه
انا كل شي عندي
السوق ما يخلص
الاعلانات كلها خداع
الموضه ما تخلص
القناعه حلوه
باجر اصير غنيه واشتري الي ابيه
باجر افتح بدل البطاقه 3 بطاقات بنكيه
راح ابني روحي بروحي
ماراح احتاج او انتظر رجل يصرف علي
انا اقوى من الرجال
انا سعيده بما املك حاليا
رددو هالعبارات دايما او كتبوها بورقه صغيره
ولما تكونون بحاله نفسيه صعبه اقروها بصوت عالي >> هذا كلللله عبارة عن رسالة نحاول نوصلها للعقل الباطن الغرض منها تعديل السلوك يابنات
صدقوني جربوها
سحر وتعطي باور للروح

والحين نكمل الخطة

خطه التسوق الذكيه
-عندما تحتاجين الى التسوق يجب ان يكون الهدف الاساسي له الحاجه وليس التسليه , وتحت مود ومزاج مستقر, يعني مو متخانقه مع احد وطالعه , او مجرد وحده شرت بتقلدينها



-يجب ان تكونين قد قررتي للذهاب للتسوق قبلها بيومين على الاقل, مثل بعض البنات ( ياله خل نروح الافنيو الحين ..ياله ياله )
هذا مرفوووووض رفضا باتا , طريقه انج اتحددين وقت للتسوق قبلها بفتره يجعلك تكتفين من التسوق بمجرد التفكير فيه
يعني اذا اليوم السبت وقلتي بروح السوق الاربعاء مثلا تلقين نفسج تذكرين وتعددين شنو اللي بتاخذينه



وتفكرين هل هالشي احتاجه ؟؟
شنو راح يضيف للي عندي ؟؟
هل عندي واحد يشبه ؟؟ او موديل قريب من موديله ؟؟
ووووو
(( يعني تراجعين نفسج ))

-قبل التسوق او اول ما ينزل لمعاش تقومين بالتالي :
*تيبين اظرف فارغه الطويله ملوت البنوك ( بالمكتبات لونهم بني )



*تكتبين على كل ظرف من ورا بالخط الكبير حق شنو هالظرف يعني ظرف تكتبين عليه صالون والثاني الجمعيه والثالث الطبيب, بدله, ساعات , مطاعم , فواتير التليفون .......الخ
* تظعين مبلغ معين بكل ظرف مثلا الجمعيه 150 دينار الصالون 30 دينار الخدم 100 دينار الاطفال 50 دينار يعني تقسمين معاشج كلللللللللله عالاظرف

بعدين اذا بتروحين الجمعيه تاخذين ظرف الجمعيه وتصرفين منه بس بشرط مو تاخذين ظرف الجمعيه وتصعدين فوق تشترين لج عطور !
ديريبالج , الخردا حتى ال100 فلس ترجعينها بالظرف وتحطين بعد الفاتوره معاها بالظرف على مدى الشهور راح تلاحظين بعد ما جمعتي الفواتير احنا شكثر نصرف بالجمعيه وما نحس
وبجذي راح توقفين شوي وتفكرين انج لازم تقتصدين ,
طبعا نفس الشى تسوينه لباقي الاظرف , اخر الشهر تشيلين الي باجي من الاظرف وتحطينهم بظرف تكتبين عليه ظرف (الفائض) ,
بس لا تقترفين غلط فادح ولا جنج ما سويتي شي الا وهو انج تاخذين من ظرف الجمعيه وتشترين مثلا عطور لان خلص ظرف العطوور ,
ديري بالج جذي تكونين خربتي كل شي .
ظرف الفائض تاخذينه كل شهر وتفتحين حساب توفير جديد وتحطينه فيه بشرط ان لحساب ينفتح بدون بطاقه سحب الي
ظرف الجمعيه تكتبين عليه من الصوب الثاني كل اغراض الجمعيه الضروريه الي على طول تحتاجينها ,
سوي حصر وجرد للاغراض المنزليه راح تكتشفين وتنصعقين بان اللي تحتاجينه كميه قليله جدا,
نفس الشي لظرف العطور كتبي عليه لسته اغراضج الشخصيه كامله مثل عود الاذون منظف الاسنان معجون اسيتون كريم بشره دهن للشعر شموع ....



-قبل التسوق دخلي غرفتج او غرفه اعيالج او بيتج وسوي جررررررررررد كامل يعني كبتج نزلي كل الهدوم الي فيها والجواتي كلها طلعيها وصفيهم جدامج واجناطج بعد وساعاتج وخواتمج ومجوهراتج ,
كل شي كل شي , وحطي يمج صندوق او كيس كبير حطي فيه الي ما تلبسينه او ما تحتاجينه بالكيس بدون تردد شي ما تلبسينه حذفيه وانتي تظحكين ,

رتبي كبتج نفس المحلات القمصان بروح البلايز بروح الفساتين بروح البنطرونات بروح وبتدريج الالوان بعد عشان تعرفين شنو عندج,


بعدها رجعي حق الكيس الي حذفتي فيه كل الاغراض الزايده وطلي فيه ,
شوفي شنو الموديلات والالوان والماتيريال الي بس تشترينه وما تستخدمينه يعني خامه خايسه او قصه ماتلوق عليج او ماركه غير مريحه ,
طلي عدل وقولي بصوت عالي شنو هذا مو حرام الي انا اسويه بعد ماراح اشتري هالنوعيه من الملابس مره ثانيه طلي بالكيس عدل عشان تحفظين اخطائج ولما تروحين السوق ما تشترينهم مره ثانيه ,
الكيس هذا لا تعطينه حق احد لا لا ولا تتبرعين فيه لالالا , الكيس هذا عقاب لج تخلينه عند باب الغرفه لمده شهر بس علشان تشوفينه بالطلعه والدخله وتتحسفين كل مره وماتعودين الي صار مره ثانيه . >> عقب الشهر تقدرين تتبرعين فيه حق لجنه خيريه
نفس الشي تسوينه بالمطبخ والصاله , فتحي الكبتات وطلعي المنتهيه صلاحيته او مزهريه او شكل قديم او مكسور فتحي الجرارات قطي الاوراق والوايرات والبطاريات والاقلام الي فيها خلي البيئه المحيطه فيج مرتبه على طول لمها اهيا المسؤوله عن تشويش فكرج .

- التسوق على اصوله ..مثال: تروحين الجمعيه ما تشترين علبه كلينكس وحده وانتي عندج بيت 4 ادوار , لا لا تشترين كرتون او اثنين
لااا .. اشتري شي يكفيج شهرين وتحطين لج مخزن وقفل انتي تفتحينه مو الخدم عشان تعرفين شنو خلص الاشياء الي ما تخلص وايد مثل العيش , الشكر المعجون المكارونه الكلينكس المنظفات كلها الشاي القهوه اكياس القمامه الدهن الدجاج المجمد اللحم المجمد الخضار المجمده البصل الثوم .


..... هذي لازم بكميات مو كل يوم او كل اسبوع تروحين السوق تشترين لا لا لا

نفس الشي للاغراض الشخصيه مثل المناديل الشخصيه دهن الشعر الشامبو الشاوار جيل السبري المعجون الصابون ( انا بصراحه اخذ ملوت فكتوريا اكود 10 كريمات اب 10 سبراي جسم يقعدون عندي سنه كامله وكل ما اشوف شي بالسوق اذكر الي عندي بالكبت صافتهم جنهم مدرسه واتحسف وما اشتري اكيد كل وحده عندها شي ماتغيره ودايما ماشيه عليه حتى لو نزل شي يديد اجربه وترجع للقديم صح ؟

فليش المخاسير وتجربون وتقطون فلوس مو حرام , روحي اشتري كميات من الي متعوده عليه عشان ما تشترين شي ثاني اذا احد اغراج وتقولين لما اخلص الكميه الي عندي راح اشتري الحين انا مو بحاجه .

-عدم الذهاب للسوق بمجاميع وشلل بنات لان اذا وحده شرت شي حلو يناسبها يمكن بس ما يناسبج بتقولج اخذي نفسي يهبل يله بليز وبتاخذين وانتي مو محتاجه له

وبعدها بتقولج واااااااي تعبنا خل نقعد بالقهوه نشرب قهوه وبتقعدين وبتستحين وبتدفعين لها
شنوووو استفدتي من الطلعه ؟؟؟؟؟!!!!
شريتي اشياء مو لج ولا ذوقج ولا محتاجتها ودفعتي قهوه بعد اذا مو غدا
وماشالله الحين ستاربكس وكوستا قهوه وكيكه بس 7 دنانير شحقققققققه ؟؟



اروح البيت اشرب احسن وانظف .
- الزايد من المعاش بعد كل هذا تحطينه فوق الحساب الي فتحتيه بدون بطاقه سحب الي يعني يصير عندج حساب بس تودعين فيه المال .
-طبعا حبيباتي ادري شي صعب لكن بس تمشين فيه راح تتعلمين على النظام بحياتج واصلا راح تبدين تنتقدين الي كانو يسوون نفسج اول
-جذي راح تلتزمين فقط بالمهم والظروري الاساسي عندج بلا خرابيط وخلاجين بالوقت الحالي فقط لما يكبر عندنا حساب التوفير هذا عشان ابدي اعلمكم شلون تستثمرون مو توقفون عند التوفير وبس او توفرون وتسحبون من الي تم توفيره ترا جذي ما سويتي شي الاستثمار اهم نقطه بس يبيلها جرئه شوي وهذا الي بطرقله بالخطه اليايه .
بنات الي تبي توضيح تقول لا تستحي والي تبي بالتفصيل لها هم تراسلني عالخاص وانا اكتب واجزء ها الراتب بالاظرف عادي لا تستحي
ملاحظه * المستفيدين الاكثر في هذه المرحله الي مو متزوجه ولا تتحمل مسؤوليه احد وما عندها قروض او فيزا اوسلفه
مو معناته ان الباجي لا القصد ان حساب توفيرهم راح يكون اكثر وجمعون اكثر قياسا بالي عندها التزامات


منقول

لا تنسوني من الدعاء بالزوج الصالح الذي يجمع بين كل الصفات الي تمنيتها و بالرزق الكثير الحلال المبارك


جزاك الله كل خير والله يقدرني واخواتي والجميع اننا نتبع ونسدد اللي علينا


الساعة الآن 05:15 .