مرحبااا بنات حواء ..
الموضووع يمكن غريب شووي وجديد
لكن .. أتمنى تستفيدو منه
الموضوووووع يابنات كتبته لأني شفت بعض الحريم مهملآت وغافلآت وناسيآت نقاط مهمه وأساسيه بحيآتهن لاحظو أنا قلت بعض الحريم مو تجن هجوووم علي خخخخخ ..
المهم من حبي لكن وللخير قلت أنبهكن بهالشي وفيه ماشاء الله بعض الحريم مايحتاج هن حريصآت وواعيآت وفاهمآت ..
يلآ نبدأ بالمووضوووووووع !!
١أشوف بعض الحريم والبنات ماتهتم بشكلها عند الخرووج يعني تلبس عبايتها مغبره عآدي وعليها وصخ شووي عآدي ولآنقابها متسفط ولا هو مكوووي يعني أهمال فضيييييع ليه ؟
أنا ماأقووول تزيني أنا أبي كل وحده تكوون نظيفه ومرتبه وعدله حتى زوجك والله بينبسط من شكلك وأنتي مرتبه ياحلآت العبايه نظيفه وسوداء مافيهآ ولآغبره والنقاب مكووي والعباه لو تكووون مسكره من قدام ووسيعه أفضل وأرتب ..
أنا أشووف بالسووق والمستشفى أشكال وأنوآع من الحريم وياحلآت الوحده لآجت مرتبه ونظيفه وأهم شي عبآتك تكوون وآسعه ومسكره وربي تطلعين أنيقه بجد ..
٢عيالكم ياحريم هذووول أمانه بأرقابكم دلعي بنتك وولدك نظفيه ورتبيه لبسيه شورتات حلووه مع شرابات وجزم يطلع شكل الطفل يهههههبل بسم الله عليهم ..
وبالذات البنات أشوف بنيات شعورهم محيووسه وحالتهم حاله وربي شي يحزن قصيه قصه حلوووه ودلع ورتبيها هذي بنتك مرايتك ترا وربي الصغار يغارون من بعض لاتحسسيهم بنقص ..
واللي ماديتها ماتسمح ياحلو أبو عشششره فيه ملابس أطفال روووعه وناعمه زي (توب تن ) ترا كله ماركات عالميه بعد ماينتهووون من تصفياتهم شركة توب تن تشري منهم بضاعتهم .. وفيه كذآ محلآت رخيصه لبسهم حلووو ..
وأبو ريالين خوذي لعيالك منه شراريب مو شرآب وع كل لبس طقمي لهم والبكلات بعد خليها طقم أو نسقي من ذوقك ..
وترا كلش ناعم وهادي يزين الطفل سبحان الله ..
وياليت زي ماتهتمي بنظافتك أهتمي بعيآلك بالليل دهنيهم طبعا بالجلوسليد الاحمر وبالصباح روشيهم
ونظفيهم ومره بالاسبووع سوي لهم تنظيف كامل حكي رجووولهم ونظفي ركبهم زيتي شعووورهم ومن هالأمووور ..
والله أمي تقوووول حنا أسنع وأنظف من أمهآت هالجيل تقوول أنتن بس كسلآنات وميتتات .. وترا صدق حنا ذابحنا الكسسسل بقووه !! وربي أذكر أمي زمان كانت شايله شغل البيت ومع هذا كل ليله تدهنا أنا وأخواني وخواتي وبالصباح تروشنآ وخميس وجمعه تحني شعوورنا وتهتم ف أكلنااا وهي أميه لآتعرف تقرأ وتكتب الله يحفظها يارب ويقويها ..
وترا زمان المرأه كل شي عليها وكانن صبورات مو زينا الحين ننافخ ههههههههه ..
٣ الضرب والتوبيخ والاستهزاء >> تكفن تكفن تكفن يأمهات لآتضربن عيالكن نهائيآ
والله الضرب يولد الكره والحقد .. تخيلي بكرا ولدك لآكبر يكرهك ويحقد عليك >أعوووذ بالله
وربي أعرف بنات يكرهن أمهآتهن بسبب الضرب تقووول البنت أمي كآنت تضربني وتكفخني كانت تكرهني أنا أكرهها وسبحان الله خلاص الحقد يندفن بقلب هالبنت ولاعاد فيه أمل تحب أمها تعقدت والله ثم والله هالبنت الحين تضرب عيالها تقوول غصب عني شفتو شلووون تعقدت وأثر عليها ..
وأمانه أحملها كل أمل لآتضربين بنتك أو ولدك مهمآ كآن أصبري وتحملي وأدعي لهم إذا أخطآ أو سوا غلط تفاهمي معاه بالحوار بالنقاش بالتهديد باللي هي بس بالضرب لا .. أنتي أم أرحم قلب شلون تضربين ضناك وفلذت كبدك:04: ..
طفلك أفهميه تحاوري معه تقربي منه ..
مو كله ضرب وضرب وضرب ..
كل الفاشلين بحياتهم كانو يعانون من الضرب والله العضيم مافيه شاب أو بنت صالحه وناجحه كانت تضرب بالعكس كلهم مدللين وأهلهم متفاهمين معهم ..
وبالذات البنت لاتضربيها البنت حساسه وتشيل بقلبها يالبى البنات بس يارب تحفظهن من كل شر ..
ومعلووومه ترا الصغير ماينسى مهمآ كان ..
والحل أيش .. ؟
شجعي عيآلك بكلآم حلو قولي لهم أنتم أملي أنتم حاجتي وغناتي بهالدنيا حسسيهم أنهم مهمين بحياتك ومن يووم هم صغار حسسيهم بأهمية الأم والأب ..
طفلك إذا صاح وبغى شي أنتي ماتبينه طنشيه لآتعطيه وجيه ألين يفهم أنه غلط ومايصلح وهو من نفسه بيسكت ..
ومن هو صغير عوديه مو لاصاح عطيتيه اللي يبي عشان يسكت لا هذا غلط خليه يصيح ويسكت من كيفه بيفهم ع شوي شووي خليك بنظره أنك قوويه لك هيبه بس مو بضرب بالتطنيش هذ ا طبعا لللي عمرهم سنه الي ٣سنوات .. اكبر من كذا يفهموون بالتحدث والحوار سولفي عليهم فهميهم والطفل ترا يتأثر بالقصص أنا معوده عيالي قبل ينامون أقص لهم قصه بس قصه حلووه مو تخووف .. لا قصص بريئه وفيهآ نكت والله حلاتها وأنتي بين عيالك وتقصي لهم شعووور جميل جدآ مثلآ أنا ولدي عبدالله يحب الجلكسي وأجيب له طاري الجلكسي بالقصه يكون بطل القصه يحب الجلكسي وعاد هو يستانس ههههههههههه ..
وبنتك من هي صغيره قولي لها انتي صديقتي واحكي لها سوالف لو اي شي ع الفاضي قولي لها بقولك سر ومن هالكلام قربيها لك كثير ولاكبرت بنتك وصارت بالمدرسه قربيها أكثر اجلسي انتي وهي بغرفتك جلسه خاصه وريها بلآيزك قولي لها شرايك ألبس ذي بحفلة فلآن وعلآن وكذا .... قولي لها سووي لي تسريحه ....الخ
خليها تجسر عليك يعني تتعوود ..
حاولي تحلين اخطائهم بالتفاهم فهميهم ان ذا خطأ وعيب اللي سوووه ..
وإذا عاد مره مافهم او عنيد ومصر ع فعله اخر شي تلجئين له التخووويف والعقاب .. العقاب يعني تحرميه من شي يحبه ..
وفعلآ احرميه من اي حاجه يحبها او اشتري لاخوانه لعب وهو لأ .. قوليله أنت سويت غلط او ماسمعت كلامي وهو من نفسه بيترك هالغلط أو مابيزعلك أبد ..
وطفلك إذا أزعجك نصيحه طنشيه ولا كأنك منتبه له مثل .. بغى فلووس وقلتي له ماعندي وصاح طنشيه خليه يصيح لين يشبع روحي اشتغلي وسووي وهو بيلحقك وينشب لك بس برضوا طنشي وروقي قولي ياماما مافيه ريال بح من وين لي خلاص .. وهو بيسكت من حاله ..
او مثلآ يبي يطلع الحوش وانتي رافضه سكري الباب وشغلي له التلفزيوون وخليه يجلس وقولي تابع خليه غصب يسمع كلآمك ويجلس وبالتكرار راح يفهم ..
واهم شي تعودين طفلك لاقلتي لا يعني لا من هو صغير بيني له انك قوية شخصيه وكلمتك مسموووعه بأصرار وتكرار راح يمشي ع كلامك طوووول عمره ..
لاترخين لي مهمآ كان ..
وأوصيكم ع شي الضم >> بنتك ضميها لصدرك وولدك ضميه .. اشعريهم ببحنانك ووعطفك دفيهم أحميهم من كل شي ..
أدخلي لقلوبهم مو عيب أضم بنتي لو هي عجووز أضمها ..
الضمه ترد الروووووووح !!
شووفي كل الشعر والقصيد عن الضم والحنان كل منا محتاج لهالشي ..
وعيآلك الصباح وهم طالعين المدرسه فرفشيهم مو يقومون وجيهم معفوووسه نكتي عليهم داعبيهم علقي عليهم وبوسيهم
عطيهم دافع للحياه والمستقبل ..
والهدايا يابنات فاجئيهم فيها والله بتفرحيهم حيل ..
وأحكي لهم قصص معك وأنتي صغيره خليك بنظرهم بطله ومميزه ..
قولي كنت أساعد أمي وأسمع كلآمها وأصلي وأذاكر دروسي .....الخ
حسسيهم أنك كنتي مثلهم صغيره وكبرتي ..
وعودي عيالك ع أشياء رئيسيهواساسيه يمشوون عليها مثل >>
١يلبسوون نعووول قبل دخول الحمام وقبل يطلعون بالحووش .. إذا مالبس لاتتهاونين خليها جريمه وعاقبيه من منعه من شي يحبه أو أزعلي وروحي غرفتك وهو بيجي يتآسف .. وقولي ليش تدخل بدون نعوول هالحين يجي دوود برجولك ويدخل ف بطنك أو قولي بتصير زي الافريقين وريه صورهم الله يكون بعونهم ويرحمهم برحمته يارب ..
٢وعودي عيالك قبل وبعد كل وجبه يغسلوون يدينهم أشوف بعض الحريم متهاونات ..
خصصي لطفلك مشط وعطر خاص بعد والله ليستانس مررررره ..
٣الالفاظ الوصخه اللي نسمعها وتحرق القلب خلي عيالك يترفعون عنها من هم صغار عوديهم اي لفظ سئ قولي ياويلك من الله ترا كل انسان له ملف عند ربه يكتب به كل كلمه ينطقها اذا قلت كلمه وصخه يكتب بملفك اكس غلط ومن هالسوالف ياحريم والله يصدقوون ويخافوون ..
وقصي له قصة الرسول صلى الله عليه وسلم لما كانت قريش واليهود يأذووه وهو صابر ماتلفظ بلفظ سئ ..
وبصراحه فيه ناس هم يقولوا لعيالهم الفاظ سيئه .. يارب رحتمك ولطفك ..
4عوديهم ع الكشخه والرزه وعوديه ع الذووووق والتنسيق والعطر والنظافه ..
صدقووني الطفل ع ماعودتيه ويقلد ويحب التقليد اصلآ ..
5 العابهم خليه يحافظ عليهن لآكسر لعبته قولي ليه هذي بفلوس مو بلآش حسسيه بقيمة اللي شريتيه .. قولي غيرنا ماعندهم العاب غيرنا كذا وكذا خليه يحس من قلب
ولاتشري له لعبه ثانيه الا وانتي متاكده ان استوعب ..
او اشري لأخوه الثاني لعبه مكافأه ع انه حافظ ع لعبته الاؤلى ..
6 ويابنات فسحة عيالكم لاتتعدى ريالين نصيحه بكرا يطغوون عليكم عطيه ريالين مع ساندوتش .. وفطريه الصبح ..
حسسسيهم بقيمة الفلوس قولي لهم ابوك يشتغل ويعمل عشانكم يجيب لكم فلوس عشان تعيشون وتلبسون وتلعبون فهمي الطفل الواقع ..
وحاولي تخليه يجمع له كم مبلغ بسيط لاجمعه حسسيه انه سوا انجاز افرحي وقولي لأهلك وزوجك وجارتك .. ترا الاطفال يحبوون أن نمدحهم كثير عاد أنتي امدحي ورفعي فيه لين يحسه نفسه طاير بالسماء خخخخ .. لاصرتي عند امك وخواتك قولي ماشاء الله ولدي جاب بالقران ممتاز حفظ سورة كذا والمدرس اتصل علينا قال ولدكم شاطر ويقول ياحظكم بهالولد >>طبعآ صواريخ بس لعيووونهم نطلع صوآريخ ..
وقولي بنتي اليوم ساعدتني ورتبت غرفتها وفعلآ تكون هي رتبت غرفتها بنفسها مو تقولي مدح ع الفاضي لكن المدرس الطفل مابيدري انه اتصل او لا لآنه ف المدرسه أصلآ بس سوي أن المدرس اتصل ع ابوه ومدح ولدكم ..
وانتي وياه قولي له ماشاء الله عليك يافلآن كبرت وأنت نظيف ماتحب الوصاخه واساليه وش يبغى وش نفسه فيه وقوليله تراك غالي وانت ولدي الحلو انت ***** الله بتكبر وتصير كذا وكذا والبنت نفس الشي شجعيها ..
الطفل كل ماقلتي عنه كلآم حلو كل ماتشجع وابدع واعطى والله الطفل اذا مدحتيه وربي بيصدق وبيكون هادي وشاطر ومؤدب ..
7ويابنات اللي ولدها او بنتها ملآقيف صدقيني ناقصين حنان فيهم شي ناقصهم اما حنان او مدح او تشجيع او هديه تهديهم شووي أو ضمه حنووونه منك ومن أبووهم ..
ولاشفتيه بدأ يتليقف لآتهاوشيه خوذيه وضميه قولي لآحبيبي انت مؤدب ماتسوي كذآ وأشغليه عن القافه هاتي له كراسه والوان او كوره ولا قيم بوووي ولا خليه يسوي اي شغله ..
وفيه العاب تركيبات بخمسه ريال يموتون عليها الصغار جمعيها لهم وخليهم يركبو ويخترعواا .......الخ
واذا طفلك من النوع اللي يتفل (البسق) ويتكلم ع الحريم مثلآ نصيحه لاتزيدي الحمى دمى ..
روقي أول شي وخوذيه وقولي ليه هذا عيب وغلط وبأي لغه عاد هو يفهمها ..
!!لا تضرررررررررربيه أنتهي
وخلي نفس الشخص الي تفل أو تكلم عليه ولدك يقولك يؤ يؤ ولدك يتفل واعيبااااااه ومن هالكلآم عاد أنتي قووولي لا مستحيل ولدي مايسووي كذآ عاد شوفي ردت فعله كيف ..
وكل مابغى منك شي قولي لا ليش تتفل ع خاله او عمه او ليش تتكلم غلط ..
هدديه مره بعدين سووي نفسك نسيتي اللي صار ..
وكل مارجع للحركه انتي اشغليه بشي ثاني غيري الموضوووع ع طووول ..
وفيه بعض الامهات تسولف وتقرقر ولاتدري عن هواء عيالها .. مهما كنتي طلي وشوفي عيالك وش يسووون راقبيهم من بعيد لاتلهين بسوالف الحريم ..
8 عوديهم ينظفون البيت لو عندك شغاله ترا مصيرها تررووووح !!
خلي كل واحد يرتب سريره ويشيل نعووله برا وملابسه يرميها بسلة الغسيل وقولي لهم من الشطووور اللي بيرتب غرفة ماما وكذا
وإذا باقي أكل من الغداء او العشاء طالع برا السفره خليهم يلموووه قولي ذي نعمه من يرفعها ربي يرفع قدره ويحبه ..
9 اهم شي خصوصياتك مثل جوالك لاب توبك غرفتك دولابك مكياجك بوكك لاتخليهم يمدو يدنهم عليها الا بإذن .. قولي اسفه هذا حق ماما لاتلمسووه ذا بيخرب ومابشري غيره ..
انا عن نفسي اول ماشريت لاب تووب خليتهم يلعبون لين اشبعوا وملو بعد اسبووع شريت لهم قيم بووي وارتحت ...
10 واهم شي لاتسولفي او تتكلمي جوال وطفلك عندك لاتخليه يسمع سوالف كبار خليه بريئ لين يكبر من كيفه .. بنات جارتي جريئات مره ويفهمن كل شي بس اشووفه غلط شلون لاكبرت احسها تطلع حشريه وجريئه بزياده .. مااحب الصغار يفهموون كل شي بسوالف الكبار ..
11وأنتي حلي بينك وبين زوجك خصوصيات لاتتهاوشوا قدام عيالك لو تمثلوا قدامهم الحب والحنان عادي اهم شي لاتأثروا عليهم بمشاكلكم فهمي اولادك أن ذا زوجك واهم شي فحياتك ولو الله ثم هو ماعشنا وشرينا ولبسنا ولعبنا ..
واسرارك لايدري عنها ابن امه نصيحه حتى اختك بنت امك وابوك ..
وغيري من حياتك غيري شكلك كل يوم من الاسبوع سوي لزوجك مفاجئه حفله واكشخي له بلووك غريب حطي شمووع وحركات تجرئي شوووي ياشيخه خخخخ ..
لاصار عندكم ضيووف خاصين من طرف زوجك حسسيه بأهتمامك فيه بيضي وجهه عند ضيوووفه رتبي عيالك بخري البيت سوي حلى ضبطي كبسه متعوووب عليها هي ترا يووم وتنفرج خخخخ وبعدها شووفي اسلوب زوجك وقولي له هاه كيف عسى ماقصرت عسى بيضت وجهك ومن هالكلآم ..
لاجاء زوجك من الدوام وتغدا ويبي ينام خليه براحته لاتلزقي بخشته انتي وورعانك خخخخخ ترا من حقه يرتاح وينام نومه هنيه خوذي عيالك وروحي المجلس او غرفت عيالك ذاكري لهم سليهم او روشيهم او خليهم يلعبون وانتي نامي شوي عندهم اوي اي شي تسوووينه بس الي عيالها يدرسوون لاتنوميهم العصر خليهم يلعبون ويذاكرون لين يتعبون وبعد العشاء وهم دايخين عاد يحلآلك الجو مع ابو العيال .... او نظفي بيتك ع راحتك او تروشي وسنعي بنفسك .. عاد كل وحده ادرى بنفسها خخخخخ ..
12ياحريم الحرمه كل ماقل حديثها كل ماكثر حلاها يعني امسكي لسانك عن القيل والقال اتركي خلق الله بحالهم خليك هاديه جدا مو مزعجه وبس تدوري السوالف خلي كل من شافك قال ماشاء الله عقل وثقل ..
شي ماتعرفينه لاتتفلسفي فيه وجاوبي ع قد السؤال واعرضي ع الناس والله تعيشي بهناء وسعاده وراحة بال ..
13كل شهر ابهري الناس الي حولك بشي تجددي تشببي اصبغي قصي تعطري ....الخ
وتدلعي ايه وش ناقصك تدلعي وتغنجي الدلوعات موب احلى منك ترا ..
زيدي ثقافتك تطلعي ع اسرار فتيات الشعوب الجميلآت .. تعلمي طبخات جديده ..
تعلمي تسريحه جديده لوووك جديد ....الخ
تفتحي شووي بمجال الطب خلي عنك خبره مثلا تعقيم جرح ... او تضميد جرح ...
تعلمي الاتكيت الذرابه ....... اهم شي لاتنغرين ههههههههاي وتشوفي نفسك علينا ..
خلي لك خصوصياتك وهيبتك عند الناس لاتكوني همجيه ولاتدري وين هواى دارك ومتشتته .. خليك قوية شخصيه محد يتدخل فيك ولابيتك ولابعيالك وزوجك خليك ع الحق دايم ومع الحق .. لاتصيري مع وضد اي احد مالك الا نفسك وبس ..
أشووف بعض الحريم ع نياتهن بزياده والله يكسرن الخاطر الطيبه الزايده ماتصلح وخصوصآ بهالزززمن ..
كم من وحده طيبه غدرت بها صديقتها وأنا من ضمن اللي غدروا بي بس صحيت وتعلمت لكن وش عقبه ؟؟؟
تجيك الوحده تسوي نفسها طيبه وتتمسكن وهي نيتها تخرب بيوت الغافلات او تشوووه سمعة بنت الناس .... أنتبهن ياحريم مو كل وحده صديقه أسرارك ثم اسرارك لحد يدري بها ابد ابد ابد ترى الصديق مصيره يتغير .. لاتقولي مستحييييييييييييييييل ..
أنا أنصدمت بأعز صديقه كانت بتخرب حياتي ؟؟
وانا ياما ساعدتها وقدمت لها خدمات ياما فتحت لها بيتي وضيفتها ياما كبسات راحت عليها :cook:خخخخخخخ بجد وربي ماتلقين احد بهالزمن يضيفك ويسوي لك حلى ومعجنات وكبسات وانواع الاكلآت ويهتم بك ويستقبلك كل اسبوع ف بيته وربي يابنات حتى شغالتي ارسلها لها تساعدها ارحمها من زوووود ماهي كانت متصنعه الطيبه والحنيه وحبها لي وخوفها علي وياما وياما وياما امي نصحتني منها قالت ذي راعت خراب مو صلآح بس قلت لا يمه حرام نظلمها ..
ونصيحه اي شي تنصحكم فيه امهاتكم هو العقل وهو الصواب
ترا امهاتنا فاهمات وحكيمات وادرى منا بهالسوالف والله حريم اووول صدق حريم سنعات وذكيات وتقيات الله يطوول بأعمار امهاتنا ويجزاهن الجنه .. يارب
وربي يابنات ماكتبت ذا الموضوووع إلا أني شفت حريم الله لآيبلآكم بس مهملآت حيل ورفلآت وقلوبهن ميته !!
وهذا الي كان ودي أطرحه لكم وتقبلو مروري ...
عسى الموضوووع عجبكم ..
عــــذرا لان الطـــــــرح مو مرتب كتبت موضوووعي وانا مستعجله والوقت ضيــــــــــــــــق
تحيآتي ....
معانقة الغيم @maaank_alghym_1
عضوة نشيطة
أهــــــــــــــدأ مني لكل أم .. وزوجـــــه .. وبنت .. لكل النســـــــاء !!
302
23K
يلزم عليك تسجيل الدخول أولًا لكتابة تعليق.
& حرم سلطان &
•
ياشيخه رووووحي ربي يفتحها بوجهك بالخير والسعادة ويسدد دربك على هذي الدرر
والله انك صادقة في كل كلمة قلتيها ويارب الكل يستفيد من الموضوع ومو عيب ان الانسان يغير من نفسه ومن طبعه للافضل والاحسن
الله يجزاك خير وييسر امرك ويوفقك يارب
الله يجزاك خير وييسر امرك ويوفقك يارب
حرم سلطان
عبير الورد
ام ليان
تسلموون حبيباتي اي والله خلونا نغير من حياتنا ونتفائل ونعيش براحه وكل ذا بيدنا واستطاعتنا مافي شي سهل
عبير الورد
ام ليان
تسلموون حبيباتي اي والله خلونا نغير من حياتنا ونتفائل ونعيش براحه وكل ذا بيدنا واستطاعتنا مافي شي سهل
الصفحة الأخيرة