السلام عليكم ورحمة الله وبركاته
اسعد المولى حياتكم بكل خير
احبتي
لا املك التعبير القوي ولا املك القلم المبدع..
هي كلمات من قلبي ابثها بين ايديكم
لديهم مشاعر وابصم بالعشر كمان ..
لديهم احساس وقد يكون اقوى من احساسنا
حتى اذا لم يكون مسلمات !
الاسلام ربانا وعلمنا الاخلاق والتعامل لكن للاسف نكون مسلمات ونفقد احيانا الاخلاق >> انا لا اعم بكلامي لكن اخص
وكل واحد يعرف نفسه وتعامله مع الاخرين.
اقصد بكلامي الممرضات والعاملات في المستشفى..
قدر الله اني ادخل المستشفى لمده اسبوع ودخولي بعد الله كان سبب في كتابه هالموضوع
تعامل المرافقات وبعض المرضى مع الممرضات والله انه يدمي القلب
تناديها بصراخ وتتافف في وجهها واحيانا تدعي عليها اذا تالمت من الابره او التحليل او مالقيت وريد عشان تحلل بعضهم عروقهم صغيره طيب تحملي الالم شوي هي ليش تسحب مو عشان صحتك..؟
الي خلاني اكتب هالموضوع موقف مرافقه الله يهديها مع ممرضه
كانت الممرضه بالغرفه الي كنت فيها
شنو كانت تسوي تسولف معنا ؟؟
كانت تنظف العجايز الي مايقدرون يمشون لك ان تتخيلي
دخلت اخذت الضغط والحراره ونسبة الاكسجين لأربع
مريضات واعطتهم العلاج
ورجعت تنظف العجايز وتغير لهم اسرتهم تقريبا اخذ منها الوقت ساعه الا ربع
والله عيونها حمراء من التعب والارهاق من الساعه 7 الصباح وهي تشتغل حتى 3 الليل وقت الحدث
ويوم طلعت الا ومرافقه تصارخ عليها امي المغذي منتهي وانتي وينك بسرعه روحي شوفيها ياويلك لو يجي امي شي
هذا اسلوب من بعض الاساليب الي نشوفها
بالله الممرضه هذي شنو بيكون ردة فعلها وشنو بتكون نظرتها للاسلام
باكمل لكم سالفه الممرضه راحت للام وخلصت منها
رجعت للملفات وكتبت اوراقها وجهزت كل شي للصباح
طلعت امشي الا وهي تسالني
عندك حليب ؟ ظنيت ان فيه مريض ومحتاجه حليب وخصوصا الي يصوم عشان العمليه ويكون تعبان محتاج علاج ضغط سكر يعطونه شوي حليب
قلت لها شوفي بالثلاجه ورحت معها الغرفه قالت مافي
صادفت مرافقه تمشي سالتها عندك حليب بدون نكهه؟
قالت ايه عندي واعطني واحد واعطيت الممرضه
راحت للممرضه الثانيه فرحانه
ارقبهم من بعيد ياقلبي كانو جيعانات ويبون حليب معهم خبز وجبن وفطاير ويبون ياكلون
تخيلي 12 ساعه شغلهم وراحتهم ساعه فيها اكلهم وشربهم وجلستهم وصلاتهم الي مسلمين
و11 ساعه في خدمة المريض
ليه نعاملهم بقسوه وجفاء؟؟
ليه نصارخ عليهم ومانرعي مشاعرهم؟؟
لهم احساس يكفي انهم في غربه بعيدين عن عيالهم واهلهم
اذا ماتبين تدعين للاسلام بالكتب والنصيحه كوني داعيه باخلاقك
عامليهم باحسان
واحمدي ربي على النعمه الي انتي فيها عيالك امك ابوك عندك
اكبر نعمه انك في بلدك مو في غربه والي جرب الغربه يعرف معناها المر
انا ماانكر ان فيه ممرضات شوي شديدات كوني احسن منها في التعامل بس والله ماالومهم من التعب الي يلاقونه والشغل تلاقيهم اخر الليل عيونهم حمرااء ترحمينهم
لا تحسبون شغلهم هين لا والله شفتهم بعيني
تخيلي كل صباح تجي رئيسه القسم وتتابع مع الممرضات شغل الممرضه المسئولة عنك اسمك علاجك ضغطك وحرارتك ووو... كل شي صار لك باليوم لو فيه غلط تحاسب الممرضه
الممرضه الوحده تكون مسئوله عن اكثر من مريض وبعضهم يكون مريض ومحتاج عنايه واهتمام
الصباح لابد يكون المريض والمرافق صاحين من النوم عشان يكملون اجراءات ويفطرون وبعدها تجي رئيسه القسم والممرضات وبعدهم الدكاتره
احيانا المرافقه تزعل ليش يصحونها من نومها وليش يفتحون الانوار
يااختي شغلهم اذا دخلت رئيسه القسم وانتي نايمه كل شي تتحمله الممرضه المسؤله عنك وفي هالنقطه يتعبون كثير الممرضات
ايش ينقصك لو تكلمتي بادب معهم
اضحكي معهم مازحيهم باسلوب اذا عندك اكل عصيرات
اعطيهم حسسيهم ان فيه احد يحس بتعبهم
اذا دخلت تسوي لك تحليل او تاخذ منك شي اشكريها على تعاملها وانها مااتعبتك
كوني لينه ..
سبحان الله ممرضه ربي سخرها لي يومين
جتني بتسوي لي تحليل وقلت لها اتعب من الدم
مسكت يدي وحللت لي بهدوء وركبت لي ابره المغذي حسيت بشوي الم
لكن شكرتها على انها مااتعبني سحبها للدم
طلعت شوي ورجعت تطمن علي الليل تجي تتطمن
الصباح كان موعد عمليتي ولازم اسوي كشف عند طبيب ثاني قبل العمليه رفضت امشي تقول انتي صايمه ويمكن تتعبي جابت لي كرسي وتدفني وتمازحني وتالمت يوم شافتني تعبانه
شوفي كيف عاملتني عشاني شكرتها
بعضهم اذا قلتي لهم ليشه التعامل تقول مو مسلمه
ابي افهم المسلم ماله قلب ماله احساس ماله مشاعر
احيانا الممرضه تقول مرافق مافي كويس من تعاملها واسلوبها
العاملات الي ينظفون
تلاقي الوحده ترمي بالارض العصير مناديل وتروح تنادي العامله تنظف
ليش ماجمعتي اغراضك ووالسله قريبه منك ورميتي فيها
تقول لك ليش وهي حضرتها شنو وظيفتها ؟
شي عجيب وظيفتها تجمع اوساخك حتى لو مو وقت شغلها
بعضهم يقول لهم انتي وسخه مافي اعرف نظف > قلبت هندي
ويتلفظون عليهم بالفاظ مالها داعي والله انهم ينرحمون
يكنسون وينظفون الحمامات يمسحون الغرف والممرات
وتدرون وين يجلسون مع ادوات التنظيف المطهرات والكلور ووو
والله عورني قلبي عليهم
لا تكوني انتي والتعب والدنيا عليهم
كوني سمحه لينه بتعاملك ولك في المصطفى صلى الله وعليه وسلم اسوة حسنه
ماحبيت اجيب احاديث وقصص عن حسن الخلق واطول الموضوع
ولعلمي ويقيني اغلبنا قراء او درس عن اخلاق الرسول صلى الله وعليه وسلم
ومواقفه مع الكفار والمشركين
واخيرا
اتنمى ان نرتقي باخلاقنا وتعاملنا حتى لو مع الاجنبي كوني سفيره خير للاسلام
والسموحه على الاطاله
استودعتكم الله
الشذا الفواح @alshtha_alfoah
كبيرة محررات
يلزم عليك تسجيل الدخول أولًا لكتابة تعليق.
الشذا الفواح
•
لا اله الا لله
يعطيك العافيه على هذا الموضوع وما يحتوي من عدة احداث من واقعنا المحزن
(ارحموا من في الارض يرحمكم من في السماء)
والحمدلله ع السلامة يا الغلااااا ما تشوفين شر ان شاء الله
(ارحموا من في الارض يرحمكم من في السماء)
والحمدلله ع السلامة يا الغلااااا ما تشوفين شر ان شاء الله
موضوع رائع قيم غاليتي
الدين المعاملة
الابتسامة صدقة
الكلمة الطيبة صدقة
الدعوة الطيبة
فهم يعملون ليل نهار لاجل خدمتنا ..
ومن تقول يتقاضوا راتبهم فهل بمعتقدك ان الراتب يستاهل مقابل تعبها الشاق ؟؟
عملها الانساني قبل الدنيوي
يحتاج الامر للتفكير بصدق .....
فكل اناء بما ينضح فيه
كل وحدة وعلى حسب تربيتها نظافتها اخلاقها معاملتها
كفيتي ووفيتي لا استطيع ان ازيد اكثر ...
دمتِ بسعادة وهناك وصحة وعافية ..
وطهور ان شاء الله
الدين المعاملة
الابتسامة صدقة
الكلمة الطيبة صدقة
الدعوة الطيبة
فهم يعملون ليل نهار لاجل خدمتنا ..
ومن تقول يتقاضوا راتبهم فهل بمعتقدك ان الراتب يستاهل مقابل تعبها الشاق ؟؟
عملها الانساني قبل الدنيوي
يحتاج الامر للتفكير بصدق .....
فكل اناء بما ينضح فيه
كل وحدة وعلى حسب تربيتها نظافتها اخلاقها معاملتها
كفيتي ووفيتي لا استطيع ان ازيد اكثر ...
دمتِ بسعادة وهناك وصحة وعافية ..
وطهور ان شاء الله
الصفحة الأخيرة