السلام عليكم
كيفكم ان شاء الله بخير
اخبار الكروشات يارب تهون عليكم يارب
وتشوفون اطفالكم بصحة وسلامة
المهم بدخل بالموضوع ع طول
انا والدة لي حول الشهرين
بالبداية من الشهر الرابع من عرفت انها بنت وانا احمد ربي واشكرة ع نعمتة لان كان نفسي ببنت
والكل فرح معي اولهم زوجي
وما خليت ولا سوق الا فريتة وشريت ملابس منة وامي بس تهاوش تقول البنت تكبر بسرعة وبتكبرع ملابسها وانتي باقي ما لبستيها اللي شريتي من كثرررها
المهم كانت مراجعتي كل اربعاء بمستشفى الملك خالد عند الدكتورة اقبال تركستاني
الدكتورة مرة طيبة وحبوبة واهم شي ترتاحين لها نفسياً
كانت مراجعتي الاربعاء 6/12 ودكتورتي باجازة واللي ماخذة مكانها
عطتني موعد تنويم الخميس 7/12 مع العلم اني توني مالي في التاسع إلا اسبوعين
باقي ما خلصتة
بس خافو ع الجنين لان حجم بطنة كان صغير
تنومت يوم الخميس الساعة 7 الصباح في جناح ما قبل الولادة وع الساعة 9 ودوني جناح الولادة واعطوني التحاميل وركبو علي التخطيط وكل شي تمام كان الرحم فاتح 2 سانتي بس مافية طلق او بوادر ولادة
وخلوني ساعة وكل شوي يسالون فية طلق اقول لا
طلعوني ورجعت لجناح ما قبل الولادة وقالو لي امشي وكنت امشي بالاسياب عندهم وكان يجيني مغص ويروح وع الساعة 6 المغرب اخذوني لجناح الولادة ونفس الشي اعطوني التحميلة وخلوني ساعة وبرضوة ما حسيت باي شي
ورجعوني للجناح
صباح يوم الجمعة اخذوني نفس الشي ع الساعة 8 الصباح وكانو النيرسات في قسم ما قبل الولادة يقولون ان شاء الله ما ترجعين وخلاص ولادة وانا اقول ان شاء الله يارب
بس نفس الشي رجعت ما ولدت
وجلست الجمعة ويوم عرفة والعيد
وانا كل يوم الساعة 8 الصباح اروح اخذ تحميلة والساعة 6 المغرب ارجع اخذ تحميلة اخذت 7 تحميلات وما ولدت بس تعبت كثيرررررررررر من الفحص وقت التحميلة والرحم جالس ع 3 سانتي مارضى يفتح اكثر والطلق مررررة باااارد
قالي الدكتور اللي يشرف ع حالتي بما ان دكتورتي باجازة
راح نعطيك 7 تحميلات اذا ولدتي حلو اذا استهلكتي السبع تحاميل ومافية ولادة نعطيك طلق صناعي بالمغذي واذا ما فتح الرحم ع طول عملية
من قال عملية وانا ابكي لان كل ولادتي السابقة طبيعي والله الحمد وكان الطلق يجيني من رب العالمين وينفضني ساعتين وكل شيء منتهي
الحمد الله ع كل حال
بس ما ياست مع العلم الني اخذت السبع تحاميل بس سبحانة رب العباد كل لليلة وانا ادعي اني اولد طبيعي
ثاني العيد 11/12
دخلوني الساعو 7 الصباح وتروشت ولبست لبسهم حق العملية وانا ادعي ربي انة مو عملية
فتحو علي الموية حقت الجنين وكان متبرز
واستغربت انة متبرز وانا باقي لي اسبوعين واخلص التاسع
بس الحمد الله ما شربت من الموية حقتها
ومن فتحت الموية بد الطلق معي بس الرحم 4 سانتي
قالت لي الدكتورة تبين ابرة ضهر قلت لا لاني رافضتها بكل ولاداتي
قالت لازم مع الطلق الصناعي عشان ما تتعبين وتولدين بسررررعة
توكلت ع الله ووقعت ع ابرة الضهر
دخلوني كشك الولادة وكانت معي قابلة هندية تنحط ع الجرح يبرى من طيبتها
جاني اخطائي التخدير ويتكلم عن ابرة الضهر ويعرفني ع مزياها وعيوبها
كان مرة محترم ومتفهم
واخذتها ويمكن ربع ساعة ولا حسيت بالجزء السفلي ابد
واعطوني الطلق الصناعي بمغذي
كانت الساعة 10 وشوي الصباح
المهم من التعب قبل لااخذ الابرة نمت ما صحيت الا الساعة 12 الضهر
واللي صحاني الم خفيييييف لا يذكر ولما فتحت عيوني لقيت القابلة مفجوعة تناضر فيني وتقول ما ما فية الالم فية طلق
وانا اقول لا
بس خفيف
نادت الدكتور حق الابرة وجا يسالني يقول تحيسن بالم اقول لة شي خفيف قال حلو طبيعي
اثاري القابلة توها هذي ثاني ولادة تحضرها وتشوف تخطيط الطلق مرة كان عالي وانا ما احس بشي
الحمد الله
وانا بس خايفة اقول ما حسيت بالم يعني مافية طلق شكلهم بيحولوني ع العملية وادعي ربي
المهم قاست الرحم فتح 10 سانتي ولله الحمد سالتها قلت كم فاتح قالت 10 يالله دفي
واقول لها كيف 10 وانا ما احس بشي ياعمري اول مرة اخذ الابرة
واحس اني ابي ادفع وادفع بس احس المنطقة متخدرة ما اقدر ادفع
المهم دفعت اربع خمس دفعات الا وعيووون امها تجي ع الدنياء ع الساعة 12,50 الضهر
واشكر ربي اني انا وبنتي بصحة وسلامة وما احتجت العملية وبنتي طيبة ولله الحمد
وخيطوني لان بنتي شقت من نفسها وخياطهم مرة حلو وعنايتهم حلوة بعد الطفل ما يجيبونة لك الا للرضاعة واذا انتي طلبتية ووقت الزيارة ممنوع يطلع حتى لو تطلبينة جلست عندهم يوم كامل وطلعت والغرفة مشتركة
وسالت دكتور الاطفال عن حجم بطنها قال عادي لان هي صغيرة وسليمة ما فيها شي
وطلعت لبيتي ولعيالي والحمد الله وهذي بنوتي جنبي ما خلتني اكتب زين كل شوي تصيح تعودت ع الحضن من الاربعين كل واحد يشيلهااا
ومن يد قوي الى اقوى منة
وحت الابو ما يسمع فيها بديت اغاررر منها صدق من يقول ان البنت هي الجاااارة
الله يبعد عنا الجااارة يارب
وسميتها نوض وكان الاسم غريب بس عاجبني وعجب الكل
ولاتنسون الاهتمام وقت النفاس واخت النفاس هي اهم من النفاس بكبرة
وطلعت من الاربعين احلى عروس والحمد الله
ودعواتك لي ولعيالي
واستودعتكم الله الذي لا تضيع ودائعة
هايدي12 @haydy12
محررة فضية
يلزم عليك تسجيل الدخول أولًا لكتابة تعليق.
تيمــا
•
الحمدالله على سلاااامتك ومبروووووووووك العروسة تتربى بعزكم يارب :) ~
الحمد لله على سلامتك
تطور الجامعي صار يعطي ابرة ظهر. فعلا المستشفى لايعلى عليه نظافه واهتمام وخبره
واعرف لك وحده11تحميله واخر حاجه يفكرون فيها العمليه الا اذا فعلا نبضات الجنين فيها حاجه خطيره مو مثل الخاص اكثر ولاداتهم قيصري
تطور الجامعي صار يعطي ابرة ظهر. فعلا المستشفى لايعلى عليه نظافه واهتمام وخبره
واعرف لك وحده11تحميله واخر حاجه يفكرون فيها العمليه الا اذا فعلا نبضات الجنين فيها حاجه خطيره مو مثل الخاص اكثر ولاداتهم قيصري
الصفحة الأخيرة