السلام عليكم بنات
بكره ان شاءالله نويت لاول مره بحياتي اسوي غداء جريش بس بقدر الضغط لان وقتي ضيق
بس ماااااااااااااا ا اعرف كيف اسوي جريش ولا قد سويت
وبكره عندنا ضيوف وابي اضبطها
الله يووووووفقكم ابي طرررريقته بالتفصيل حبه حبه لاني ما اعرف خصوصا بقدر الضغط
والي ترد علي لها دعوه من خالص القلب الله يوفقها ويسعدها ويحقق الي في بالها ويدخلها جناته بلا حساب او عقاب والمسلمين اجمعين
وتصبحون ع خير

السلام عليكم
حبيبتي انا ماقد جربته بقدر الضغط بس حبيت افيدك بقاعدة عامه لقدر الضغط تقللين المويه بمقدار الثلث او النصف
ووقت الطبخ يقل بمقدار النصف مثلاً الطبخة تاخذ منك ساعة بقدر الضغط احسبي لها نص ساعة وتكون جاهزة

ويارب اكون افدتك بس ماحبيت اطلع بدون لا ارد ولو بشي بسيط
أبشري يالغاليه
بس لازم تعرفين يلعب في السالفه نوعية الكاتم ( الكواتم الجديده أقوى من القديمه) + نوعية الجريش (إذا كان حب وتركي يبي وقت أطول أما إذا كان مجروش زي الوطنيه مويه أقل وطبخ أقل)


في البدايه
راح أشرح لك بالكوب الواحد وأنتي دبلي على حسب ضيوفك

كوب جريش اغسليه وانقعيه في مويه (ممكن تضيفين عليه ربع كوب رز مصري مع حذف ربع الكوب جريش راح يعطي لك بياض ونعومه في الجريش >> حشا صار خشه هع
مرق لحم أو دجاج خالي من اللون الأحمر
بصل
كمون
ملح
علبة زبادي ولو حابه لبن


أول شي احمسي البصل مع شوية زيت
في زبديه أخلطي الزبادي مع المرق ثم قيسي بالكاس خمس كاسات من الخليط وحطيها على البصل مع كمون وملح
ولو حابه فلفل حار للريحه
وسكري القدر وخليه لما يصفر ثم اقصري النار من تحت لمدة نص ساعه ثم اقصريها لين حول ما تطفي نص ساعه ثانيه ولو عندك حاجه تحطيها فوق العين تخفف من الحراره يكون أفضل
بعدها افتحيه لو مويته خالصه كويس خذي الملعقة وشوفي إذا حبته ذابت أو لا
لو ما ذابت صبي عليه من خليط اللبن اللي سويتيه بشويش ولا تحركين وارجعي قفلي عليه نص ساعه على نار ضعيفه جداً عشان ماحرق ولا يلصق بالقدر
بالأخير طفيه واعصري عليه نص ليمونه مع ملعقة كمون مطحون ولو حابه علبة قشطه وحركيه بحاجه اسمها معضاد اضربيه فوق تحت كأنه عجين

وبس

بقي لك الكشنه
بصل وزيت وفلفل أسود وكمون ولومي أسود مطحون ومشيوله بذوره (لاتشترينه جاهز سويه أنتي أحسن ) وملعقة من بهار البيت وفيه ناس تضيف ملح
حمسيهم مع بعض ثم حطيهم على الجريش
ممكن تستبدلين الزيت بعلبه زبده (للي يحبون الجريش بالسمن )
" ربي لا تذرني فرداً وأنت خير الوارثين "

بسم الله الرحمن الرحيم
شوفي يالغاليه. 1تحمسين بصل بنص اصبع زبده
2تحطين 2كاس جريش التركي و نص رز مصري(ابو بنت)
مع لتر لبن ونص لتر ماء وتحطينهم في قدر الظغط على البصل وتحركينهم
حتى تغلي بعد كذا تحطين ملح وكمون واذا حبيتي ماجي ابيض وتكتمين
القدر وتقصرين على النار جدا وبعد نص ساعه ارفعي الصفاره شوي شوي
وافتحيه وشوفي اذا كان يبغاله ملح زياده اوماء ودقيه دق لين تطلع روحه
لاتنسين تحطين معه فلفل احمر في البدايه واذا انتهى حطي عليه زبده او
كشنه تجمله
ملاحظه. افضل انواع الجريش التركي
الافضل تخمرين الجريش والرزحتى يكون اسرع واقل ماء
وبالعافيه على قلبك
بنات والله مافهمت وهل انقع الجريش؟؟ومافهمت الطريقه في البدايه الله يوفق ويسعد كل من ردت


الساعة الآن 09:52 .