السلام عليكم ورحمة الله وبركاته

أخواتي

من تعرف طريقة الرز البرياني بالدجاج على أصوله تدلني على الطريقة جزاها الله خير

وماهي نوع هذه الأكلة هل هي هندية ام خليجية أو إماراتية ؟

وهل البرياني هو نفسه ما يسمى رز زربيان ؟

مشكورا جدا جدا



غالي والطلب رخيص البرياني اكلة هندية شوفي ياقلبي انا كنت اسوي اشياء كنت اسميها برياني لحد ما اكلته بمطعم بلندن بعدها دخت من حلاوته وعرفت اني ماعمري ضبطت البرياني المهم اصريت على ابو الشباب الا يقردن القرسون لحد مايجيب الطريقه والحمدلله كلفتنا 500 ريال وجاب الطريقة..

شوفي ياقلبي جيبي:
دجاجة قطعيها 8 قطع بدون جلد واسلقيها بمويه وملح وماجي وهيل حبوب وبعدين اذا استوت خذيها واقليها بشوي زيت لحد ما تاخذ لون ذهبي

الخلطة والسر في طعمها:

جيبي بصله مقطعة قطع صغيرة تشوح في شوي زيت لحد ما تصفر وحطي عليها نصف ملعقه ثوم مدقوقوبعدين اضيفي عليها بهارات حبوب عدلة قرفة قرنفل فلفل اسود كزبرة ورق غار المهم قلبيها معاهم لحد ما تفوح ريحة البهارات وبعدين جيبي ملعقتين كزبرة خضراء مقطعة وحطيها عليها وقلبيها لحد ما تذبل وبعدين حطي عليها طماطمة صغيرة مقطعه قطع صغيرة مرة وقلبيها معاها لحد ما تذوووب الطماطم مرة وحطي عليها نصف كوب ماء وحطي عليها بهارات البرياني تلاقيها بالسوبرماركت وحطي عليها شوي كركم وشوي كزبرة ناشفه مطحونه وشوي فلفل وشوي ماجي ابيض وملح وبعدين اذا طبخت لها شوي جيبي قشطه الخفق وحطي منها نصف كاس وملعقتين زبادي وقلبي الخليط لحد ما يتجانس واذا بداء بالغليان اضيفي الدجاج الي طبخناه وقليناه وخليه يطبخ معاهم لحد ما يتسبك الخليط ويثقل بعدها اضيفي اليه ملعقة ثوم مهروسه وملعقه زنجبيل مبشورة بشر ناعم وقلبيها قلبتين وطفيهم خلال عمل هالصوص جيبي رز مزة هندية منقوع واطبخيه في موية الدجاج وخليه يستوي نصف استواء وبعدين صفيه من المويه وجيبيه وحطي منه نصف الكمية اسفل القدر وبعدين هاتي الخلطه حق الدجاج ووزعيها على الرز وبعدين هاتي باقي الرز واخر شئ رشي اعلى الرز بموية ورد منقوع فيها شوي زعفران واكتميها بالقصدير واتركيها لمدة ساعه الاربع واذا جيتي تغرفينه جهزي معاكي كزبرة خضراء مقطعة وبصل اخضر مقطع وبصل محمر بني مقرمش واغرفيه وداخلي الكزبرة والبصل فيه وبعدين رشي اعلاه بالبصل البني وزينيه بشرايح البيض المسلوق والليمون

واااااااااااااااااااااااه على الطعم يدووووووووووخ اذا سويتيه ادعي لي يالغالية عن جد بيجننهم ماعمري سويته لاحد وانا عموما طبخي حلو الا وينجنوا عليه


يا هلا ومرحبا بيك اختي وين راح اسمي الاول

فرحت فرحة ما تتصوريها على ردك علي وخاصة بمقدمتك الرقيقة والرائعة .. والزود ان الطبخة كلفتك ورغم ذلك تحطيها بين يدي تسلمي والله من اليوم ليوم ما أطبق الطبخة.. والجميل فيها انك ذقتيهخا بمطعم بلندن .. ما شاء الله عليك


بصراحة زعلت عليك اذا كنت فقدت اسمك الاول بالمنتدى وهذا شيء يزعل بصراحة لكن اوعدك اساعدك على ايجاده يا غالية ..

الطبخة عبارة عن تحدي بيني وبين طباخ ماهر في هذه الطبخة وأبشرك انا ما عندي شيء من المقادير غير البصل والثوم ولا عندي خبرة فيها غير إني ذقته مرة واحدة من يد عمتي الله يطول في عمرها ولكن صحتها على قدها وما اقدر اتصلي لفيها عشان اسالها عن الطبخة.

اسمحيلي بشوية أسئلة لا عدمتك:

ممكن استعمل دجاج مخلي او صدور ومالكمية بارك الله فيك ؟

وكم حبة هيل وقت السلق ؟ واكسر حبات الهيل ولا بكبرها ؟

ما حجم البصلة المستخدمة في التقطيع قطع صغيرة ؟ وكم كمية البهارات العدلة الضبط لا عدمتك. والكزبرة الخضراء افرمها ناعم ؟ ومعقتين طعام طبعا من الكزبرة بعد الفرم ؟ واذا ما لقيت بهارات البرياني البسوبر ماركت كيف اتصرف؟
ماهو الماجي الابيض بارك الله فيك ؟
كم كاسة الرز المزة الهندي ؟ ومالفرق بينه وبين رز تلدا بسمتي ؟ وكم دقيقة انقعه؟ وهل في ماء عادي ام مغلي ؟
وكم كمية موية الورد والزعفران وكم اتركها منقوعة ؟

ولما احط الطبقة الثانية من الرز ما احط ماء عشان يستوي وكيف يستوي على الناشف كدة؟
ولما اكتمها بالقصدير احطها في الفرن ولا على النار ؟ وكيف درجة الحرارة ؟

والكزبرة الخضراء الاخيرة مفرومة ناعم ؟ وكم كميتها ؟ وكمية البصل الاخضر ؟ وهل لازم بصل اخضر ؟ واقطعه صغير جدا؟ والبصل المحمر البني يكون شرائح ولا انصاف شرائح ولا مفروم ؟ وعند الغرف اخلط البصل والكزبة واقلبهم مع الرز لا كيف ؟

وما هي كيفية الغرف ؟ اخلط طبقتي الرز مع الخلطة في المنتصف ام احافظ عليها من فضلك دليني ؟


شوفي يا بنت الحلال

انا على قد ما دخلت عالم حواء من سنين .. إلا أنني لم أر اسئلة من شخص واحد في موضوع واحد مرة واحدة أطول من طريقة الطبخة نفسها .. فساميحيني يا كريمة .. ومشكلتي إني أعرف اطبخ .. لكن تفصيلية وأميل لفهم الدقائق حتى لا اتورط وقت الطبخ


جزاك الله خيرا وسأدعو لك دوما

افا عليك يالغالية انتي مو تسئلي انتي تدللي شوفي ياقلبي..

اول شئ حلاوة الطبخة بدجاج مع العظم بس لوحابه دجاج مخلي مايضر.. وبالنسبه للهيل الي بالسلق حبة او حبتين مو اكثر بس علشان يشيل ريحة الدجاج.. وبدون ماتكسريها حطيها عدلة زي ماهي..

البصلة متوسطة والقطع تقطع بالسكين باليد وليس بالمكينه وترى هالشئ يؤثر في الطعم وتكون قطع صغيرة طيب..

ملعقة صغيرة بهارات البرياني متوفرة في سوبرماكت او اي محل بهار.. ربع ملعقه صغيرة فلفل اسود نصف ملعقة كركم نصف ملعقة صغيرة كزبرة ناشفة رشه كمون لو حابه.. الماجي الابيض هو الاجيناموتو او الملح الصيني..

الرز تقريبا كاستين ونص ويفرق يالغالية انو الرز المزة انو يتنقع اما البسمتي فمايتنقع والمزة مايحتاج مويه كثيرة في الطبخ لكن البسمتي يحتاج زيت ومويه اكثر من المزة وبعدين البسمتي ريحته قوية وطعمة خفيف لكن في الطبخات الي فيها خلطات المزة يجي احلى ولا يتلبد لكن البسمتي حساس واحسن شئ له الرز الابيض ..

وتغسلين الرز المزه الهندي بماء عادي من الحنفيه قبل الطبخ بساعه او ساعتين وتتركينه منقوع حتى وقت الطبخ ..

بالنسبة لماء الورد كميته تقريبا نصف فنجان القهوة العربي والزعفران شوي مو كثير وتنقينه قبل البداء بالتحضيرات علشان ياخذ وقته ويطلع اللون..


وبعدين ياعمري الرز مو قلنا نسلقه نصف سلق يعني يكون باقي عليه شوي ويستوي انتي ذوقي الحبة حقت الرز اذا شفتيها تنكس فمعناتو لسه بدري خليها شوي تنسلق في مويه الدجاج وبعدين تصفي الرز من مويه السلق وتقسميه وتحطي خلطة الدجاج وبعدها تكتميه بالقصديرة وتخلي على النار مش في الفرن اول خمس دقايق خلي النار موطيه بس مش كثير وبعدها وطي النار مررررررة وخليه يمخمخ على نار هاديه والصوص الدجاج والقصدير راح يسوي بخار وهو الي بيكمل استواي الرز..

شوفي بالنسبةالكزبرة كميتها شوي بس لنكهه مش اكثر يعني يمكن ملعقه طعام والبصل قطعية حلقات صغيرة نحيفه ونفس كمية الكزبرة واخلطيهم اسهل لك وبعدين لما تجي تغرفي في صحن التقديم حاولي تخلطي الرز بحيث راح يكون ثلاث اللوان اصفر واحمر مصفر وابيض وانتي تغرفيه بين كل غرفه وغرفه رشي من الكزبرة والبصل الاخضر والبصل الاخضر يعطي نكهه حلوة بس لو مش حابتو لاتحطيه..
وبالنسبة للبصل المحمر شرايح طويله مقرمشة وتحط ساعه التقديم علشان تكون مقرمشه وتشهي..


واي سؤال انا حاضرة...ماابغى منك الا كل مرة تجي تسويه تدعي لي دعوة حلوة منك اختي العزيزة..


الله يعطيك العاااافيه يا غادة الغيد وبالعافيه يا ماما سيتا

وينقل من الساخنه لاطباق حواء


اسألك يارب باسمك الأعظم .. وبصفاتك العلى .. أن تفرش لهذه الغالية دربا من .. نور
وتجعل وجهها دائما مسرور .. وتملأ قلبها بذكرك يا غفور ..
وتجعل لها الصراط سهلا للعبور .. وتجعلها في الجنة أجمل من الحور . .

ولك بالمثل يالغاليه ...







الساعة الآن 08:57 .