اقتباس مشاركة  (****** Artist)
السلام عليكم ورحمة الله وبركاته

موضوع جدا جدا رائع

عن نفسي... مبتدئة (يارب توفقني)

بس اتعلمت شي مهم جدا

وابغي اشارككم فيه

قبل فترة بديت مشروع المكياج.. وعقب بفترة بسيطة بديت مشروع الملابس البناتية

بعد ما بعثت مسجات حق معارفي اخبرهم عن بداية المشروع طحت مريضة

ياني مرضين في نفس الوقت (الحمد الله على كل حال)

المرض الاول خذ 10 ايام والحمدالله شفيت منه
المرض الثاني كان الاصعب والاقوى تعبت منه تعب فظيع استمر اسبوعين ولين الحين تارك لي اثار في رقبتي وجزء من وجهي بس الدكتور والحمدالله طمني وقال على مر الايام انشالله بيروح

طبعا واضح جدا انها عين وحسد من الناس اللي عينهم بس على غيرهم.. والتجارة اي حد يقدر يبدأ فيها لو براس مال متواضع حسب نوعية التجارة..

بس في فئة من الناس اتحب تتفكر في غيرها وتحسدهم على طموحاتهم والاشياء اللي ايسونها..لانهم في الحقيقة يحسدونهم على عزيمتهم..

المهم لازم التاجر او صاحب الاعمال دائما يستحيط على نفسه بقراءة الرقية الشرعية... عشان يبعد العين عنه وعن تجارته.. الناس ما تعرف الصعوبات اللي تواجه التاجر ولا المشاكل ... يعتقدون كل شي عسل في عسل وان التاجر من اول يوم تدخل الفلوس جيبه... ما يدرون ان الفلوس اللي يبدأ يحصلها من تجارته ثلالثة ارباعها او كلها ترجع لتغطية نفقات المشروع الاساسية..

الحمدلله الذي لايحمد على مكروه سواه..

السلام عليكم..

الله يكافينا الشررر ويبعدنا انا وياج وباقي الخوات عن الحسد ..ناس قلوبها سوده ماتحب الخير لغيرها ..وربي ان فيه ناس تحسد حتى على الضحكة .. واسأليني انا

بس بقول لج شي عزيزتي اذا انتي خايفه من ذالشي فنصيحتي لج لاتعلمين حد عن اللي راح تسوينه .. خططي وادرسي واشتغلي بكتمان ولاتنسين قول رسولنا الحبيب اللهم صلي عليه (( واستعينوا على قضاء حوائجكم بالكتمان))

واهم شي تتوكلين على الله وتشوفين قدامج .. لاتلتفتين وراج ابدا لانهم اما بيسحبونج معهم لوراا او انج بتتعثرين في خطوتج للأمام .. سوي اللي انتي مقتنعة فيه .. ادرسي وخططي زين واستعيني بالله واستخيري .. وتوكلي عليه .. وكل واحد على نيته ربه يعطيه

اتمنى لج التوفيق من كل قلبي

تحياتي
21-06-1426 هـ, 05:40 مساءً
 
اقتباس مشاركة  (Dream22)
ماشاء الله تبارك الله
تفاعل ممتاز مع الموضوع جزاكم الله كل خير اخواتي الغاليات
وبالفعل استفدت كثير من نقاشاتكم واتمنى ان تدوم ونتناقش بالي يفيدنا ونذكر المواقف الي تصير لنا لنقوي بعضنا وياليت تذكرون لنا عن دورات تفيدنا في مجال التجارة او مجال تطوير الذات واكون لكم من الشاكرين
السلام عليكم ..

عزيزتي دريم .. حنا اللي ممنونين لك اكثررر على هالموضوع الرائع واللي عطانا الفرصة لمناقشة امورنا التجارية والاستفادة من تجارب الاخرين..

اما عن دورات في مجال التجارة وتطوير الذات .. فيوجد هناك العديد منها .. لكني للأسف الشديد مااعرف اي دورات محلية .. بالاضافة الى دراستي الاكاديمية الاساسية مااخذت دورات الا من براا .. اللهم بس دورة واحدة اخذتها في البحرين وكانت لمدة ثلاث ايام وكانت عبارة عن تعريف لوعي الزبون او ادراك متطلبات الزبون
Customer awareness
وللأمانة فادتني كثير في مجال عملي

وهناك دورات اخرى تساعدج وتوسع مداركج في مجال عملج او تجارتج وترفع من مهاراتج في هالمجال .. وانا اخذتها من برا واضفتها الى بكالريوسي في الادارة والاقتصاد وحصلت على دبلومات مختلفة ..

تقدرين تجربينها وراح تستفيدين منها كثير .. مثلا..


1-
"مهارات الحزم والجرأة" Assertiveness skills
وهذي تطور من مهاراتج لحزمج وجرأتج وثقتج بنفسج واعتقد هالعناصر مطلوبة في التاجر او في مجال البيع والشراء وتساعد في الدخول في اي مجال او نقاش او اجتماع بقوة وجرأة وثقة بالنفس.
الدورة لمدة شهرالى شهرين

2- Telesales " التسويق او الترويج عن طريق الهاتف"

يعزز من مهارتج في ترويج لمنتج او بضاعة عن طريق التسويق عبر الهاتف كما ان في الدورة يعلمونج كيف تنتقين عبارات معينة لها تأثير على سمع الزبون وجذبه للشراء
الدورة تقريبا لأسبوع

3- keys to successful marketing "مفاتيح نجاح عملية التسويق"

وطبعا الاسم يفسر نفسه

4- وهذا الاهم - Stress Managing Skills "مهارات السيطرة على الضغوط وضبط الاعصاب "

وهذا من اقوي الدراسات اللي ممكن ياخذها ويستفيد منها الانسان مب بس في مجال التجارة انما في كل مجالات الحياة سواء العملية او الشخصية .. تساعدج في السيطرة على اعصابج وضغوط العمل بحيث ماتتأثرين كثيرا بالصدمات او المشاكل اللي تواجهج مع القدرة على احتوائها وتفهمها والنهوض بسرعة لمعالجتها بالاضافة الى القدرة على التعامل مع مختلف نوعيات والشرائح في المجتمع بهدوء اعصاب .. الدورة هذي مهمة جدا سواء لحياتج العملية او حتى الشخصية .. انا تحصلت على دبلوم متقدم من جامعة فلوريدا .. وهي اكثر شي فادني ياخوات

5- Presentation Skills " مهارات التقديم "

وهذي المادة تتصل بـ وتندرج ايضا تحت مادة مهارات الاتصال البشري "Human Communication Skills

هذي الدورة صحيح ان اكثر مستخدميها في التقديم المرئي اللي يصير في الاجتماعات والمحاضرات عبر شاشات عرض خاصة .. بس هي فعلا تفيد في مجال التجارة خصوصا البائعات لان بها يعلمونج كيف تقنعين الزبون او العميل في ايصال فكرتج او تسويقج لمنتج .. وفيها يكون التدريب على:-

-الصوت :
كيفية انتقاء الكلمات القوية والمعبرة عن مابداخلج بالضبط بدون تشتيت ذهن الزبون في عبارات غير مجدية ومضيعة للوقت .. وتقوية مخارج الالفاظ والحروف .. وتدريبج كيف تكون نبرة صوتج مناسبة لكل موضوع تطريحينه .. سواء كان ابهار او تأكيد للي تقولينه .. او تأييد .. الخ

- المظهر الخارجي :

وهذا له تأثير في عملية اقناع الزبون وجذبه للاستماع لج والاقتناع بما تطرحينه من افكار وعرض للمنتج وهو يعطي الانطباع الاول لج ولشخصيتي وللمؤسسة اللي تمثلينها او التجارة اللي تملكينها فيعلمونج كيف تنتقين ملابس معينه او اكسسورارت لكل مناسبة في مجال التجارة ولكل اجتماع .. سواء اجتماع في المكاتب او على طاولة المجتمعات او في مؤتمر او لقاء مع زبونة في بيتها او على مكتبج او غداء\عشاء عمل

- لغة الجسد او مايعرف بـ Body language

وهي كيفية ايصال فكرتج بطريقة اشارات الجسم .. اليد, العيون, اللفتات .. كما ان رصد ومراقبة حركات واشارات جسد الزبون تساعدج في معرفة نوع الزبون اللي امامج وماهي شخصيته ونفسيته وبالتالي يكون هالشي مفتاح للدخول الي عقله واقناعه.. طبعا في هالدورة راح يعلمونج نبذة لابأس بها عن هالمادة واللي تخص مجال التسويق .. لأن المادة هذي كبيرة وتشعباتها واسعة والغوص في بحرها يحتاج الى دورات ودراسات تمتد لسنوات .. فنصيحتي .. ادرسيها كمادة منفصلة ..


وهذي المادة بالذات انا درستها كمادة منفصلة ولي فيها شهادات لمراحل متقدمة فيها واسم العلم اللي تحتوي عليه مادة لغة الجسد هي "NLP " وهي من اقوى واغلى الدراسات في عصرنا الحالي .. واكثر منتسبيها من رجال السياسة وذوو النفوذ وعلماء النفس

6- Time Managing Skills "مهارات السيطرة وتقسيم الوقت"

وهذي الدورة تدربج على كيفية تقسيم وقتج وترتيبه حسب الاولية والاهمية بوضع جدول للوقت والاعمال علشان تستفيدين من كل دقيقة ومنعا لتشتيت تفكيرج ووقتج في امور اقل اهمية وفي النهاية تشوفين نفسج ماسويتي شي نافع في يومج .. وطبعا الكل يعرف قيمة كل دقيقة في التجارة .. والتاجر الشاطر عنده مبدأ معين يقول كل دقيقة بريال أو الدقايق تجيب فلوس ..

الدورة هذي مدتها 3 ايام الى اسبوع

ولاتنسين تطورين نفسج في مهارات الكمبيوتر كالفوتوشوب والانترنت الاكسس وذلك لاحتمال انج تحتاجين انج تدعمين تجارتج بتصميم كاتالوجات او بروشورات .. واذا كانت عندج هالمهارة راح توفرين ثمن الاستعانة بمصممين تدفعين لهم الالاف ..

بالاضافة الى دورات الكمبيوتر هذي حاولي تاخذين دورة اسمها
Computer use in Business " استعمالات الكمبيوتر في مجال التجارة"
راح يفيدج كثير في فهم ماحولج من التجارة الالكترونية وكيفية توسعة تجارتج عن طريق الكمبيوتر والمجال الالكتروني
الدورة هذي كانت جدا ممتعة ..

اتمنى تكونون استفدتوا وصدقوني هالدراسات راح تدعم شخصياتكم بالقوة والحزم والذكاء وسرعة البديهة .. واسمحولي عالقصور

وآسفه جدا على الاطالة

تحياتي
21-06-1426 هـ, 07:09 مساءً
 
السلام عليكم ...
الموضوع فعلا مميز .. يعطيكم العافية جميعا ..

بالنسبة لي ... طحت في أخطاء الى اآن أعاني منها ...
1- في بداية مشواري .. اشتريت بضايع كثيرة .. وما سجلت أنا بكم شريت .. بس كنت أذكر السعر ... ولما ييت ببيع بعت بعد فترة ... وما بعت بسعر التكلفه .. قسمت المبلغ الاجمالي
على البضاعه بدون ما احسب فايدتي .. يعني بعت بخسارة !
وصار الناس يطلبون مني بالسعر الأول .. ! مع اني كنت ذاكرة ان هذا سعر خاص ..

2- أول بضاعه بعتها .. بدون تصوير .. والحين الكل يطلب يشوف الصور والكتالوج لكن للأسف
مش متوفر عندي غير كمن صورة ..

3- كثير من البضاعه أهديتها هدية لناس من أهلي .. من انها كلفتني مال وجهد ! لكن ساعات استحي آخذ منهم بيزات خصوصا اذا كان اول مرة !!

4- حصلت عندي أزمه مالية فاضطريت أسحب راس المال كله !! بدون تفكير ... والحين مشروعي يمشي مثل السلحفاة

5- والمشكله العويصه اللي عندي هي التأجيل ....!!
مع اني كنت كاتبه خطه المشروع لكني كنت امشي فيه عالمزاج .. ومرت الايام ولا نفذت غير جزء بسيط!!


تقريبا هذي كانت كل المشكلات ...
وبالتوفيج للجميع ان شاء الله
21-06-1426 هـ, 07:50 مساءً
 
هلا اختي الغالية القلب الطاهر بالفعل مشاركتك اثرت الموضوع بجد ومعلوماتك رائعة اتمنى ان فيه جهة مسئولة تقدم لنا هذه الدورات بحيث تكون مثل الدبلوم لو بفلوس علشان نبدا بداية قوية ولا نخسر وقت وجهد ونخسر احبتنا الي وقفوا معنا ثم ينهدم كل شيء لاقدر الله
تمنياتي لك بدوام الصحة والعافية والمزيد من التقدم
22-06-1426 هـ, 05:03 مساءً
 
هلا اختيي ام احمداني
انا مثلك الامور عندي بعد عملية النصب الي صارت لي تخربطت كثير وكل اهدافي باعيد النظر فيها وخصوصا اني كنت مشغولة كثير بعملي وتجارتي واهملت بناتي وزوجي وهذا اثر كثير على علاقتي معهم ولكن احاول الان جمع شتات نفسي والعودة بقوة بإذن الله مع الكثير الكثير من نصائح اهلي الله لا يخليني منهم وقفوا معي وقفة رائعة جزاهم الله كل خير
تمنياتي لك بعودة قوية لعملك وبتنظيم اكثر
22-06-1426 هـ, 05:06 مساءً
 


الساعة الآن 11:39 .