حياتي كلها معناة @hyaty_klha_maana

عضوة جديدة

يا بنات أنا معاناتي لم اعرف لها حل أريد مساعدتكم وإرشادكم الله يجزاكم خير الجزاء

يا بنات أنا معاناتي لم اعرف لها حل أريد مساعدتكم وإرشادكم الله يجزاكم خير الجزاء

أنا كنت عايشه مع زوجي وكان يعترف دايم بأنه يحبني حب شديد لكن كثير الخطبيات ويبحث عن زوجة ثانيه

وكان يخبرني بكل مره يخطب فيها ويرفض مع العلم أن الكثير يريد تزواجه لكن الله لم يرد ذالك

ومرت السنين وأنجبت منه بنات وبنين وهو مستمر على ماهو عليه في البحث عن زوجه ثانيه

مع العلم أنني لم اقصر في حقه وكان شديد علي بعض الشي وكان عيبي الوحيد اللي أنا اذكره أني اكره النوم معاه وهذا كان غصب عني... بعد مرور عدة سنوات كان تفكيره في الزواج اقل من أول لكن قسم الله انه يتزوج بظروف غير مناسبة... فقد جاه مرض شديد جلس بيه قرابة السنة وكان هذا المرض قريبه اعرضه من السحر وربط عني وأحس انه كان مايطيقني لكن كان يجاملني فأشرة عليه انه يذهب للبحث عن علاج لأنه كان في حاله يرثا لها وراح يتعالج وتحسن

وجلس هناك فتره تقارب السنة وكان يعيد علي نفس الموال اللي خلاني اكرهه من يوم عرفته ويكرر أنا باتزوج ولكن لم اهتم بالموضع كثير لأني كنت متعودة عليه من عرفته ولكن هذه المرة كان جاد وأنا يا غافلين لكم الله

وتزوج بالفعل واخبرني بزواجه طبعا وهو في مكانه وطلبت منه انه يرضيني مثل مايجي العروس يجيني وكان مهر العروس 50 ألف ريال ووافق واتفقنا على هذا الشي بعد فتره قصير قبل العرس جانا وكان كل أموره طيبه تخيلوا جلس عنا قرابة السنة ويوم جانا لينه مالي شنطته هداياء حين لمحت الطوابيق قلت أكيد ذهب يبي يرضيني بيه وحين ماصد عني ناظرت ويش في الشنطه وكانت المفاجئة بعد هالمدة الطويلة جايب هداياء لزملائه في العمل لم يسأل عني أنا وأطفالي ولم يحضر لنا معاه أي شي وجيت الشنطه وأخذت منها واحده من الهدايا أبي أقدمها لأخوي الوحيد
وأصر وسبب لي مشكله حتى أخذها والله ماكنت متوقعه كل هذا يصير منه ... وبعدين تناقشنا في موضوع الشرط اللي بيننا انه يعطيني مثل مايجي العروس يعني 50 ألف ورفض بشده وقال لك 10 ألاف فقط ودي انه قال لي هالكلام من الأول وريحني وريح حاله لكن أحس انه ماعرف يتصرف ابد وكانت أموره كلها بربسه في بربسه وضيعني وضيع حاله
مع العلم انه في هذاك الوقت كان مقتدر وجاه مساعدات كثير وياليته يحفظ ويقتصد ألا كان يلعب بالفلوس لعب

وتركني انا ولم يسأل عني ولم يرضيني ابد وكان يجي اهو والعروس عند بعض أقاربه وقت عمله وحين ينتهي العمل يروح اهو وياها يعني على طول في سيارتهم رايحين جايين وإحنا الله اعلم بحالنا كنت صغيره بالسن وأطفالي صغار لأني تزوجت وأنا صغيره وفي دار غربه ليس لي فيها سوا الله سبحانه عانيت معناة شديده ومرضت وهو يعلم ولم يبالي ابد وبعد مده من الزمن أرضاني وشرط على أني أخلى زوجته تسكن معاي ووافقت في البداية لين أخذت اللي أبيه منه وبعدين رفضت طبعا لأني لم ارتاح لتصرفاته لأنه كان مايل معاه بشده ولا يفكر ألا في مصلحتها وتغير معاي أنا تغيير جذري إلي درجة أني صرت أفكر انه يكرهني كره شديد من تصرفاته اللي ترفع الضغط.... المهم الله سبحانه مايضيع عباده مشت حياتي أنا وأطفالي رغم والغربة والفقر... في السنة الماضية اصريت عليه لين طلقني لأني لم استفيد من جلوسي معاه وطلقني طلقه واحده وطلعت أنا وأطفالي وأخذت بيت وعشنا فيه ومشت أمورنا رغم الفقر والحاجة بعض الظروف اللي نمر فيها ألا أن الحياة ماشيه والحمد لله سبحانه وصار يجيني في بيتي ويدخل ويطلع كنه صاحب البيت وحاولت اسكت واصبر لان جياته قليله لكن الرجال يأمر علي وينها وكأني مازلت في ذمته بال أحيان يمد يده علي... وحين شفت الوضع كذا تكلمت عليه وقلت حدك المجلس إذا تبي تشوف أولادك...

المهم والخلاصة الرجل الحين مريض والزوجة الثانية زي قلتها والرجل ناشب لي يبيني ارجع له وأنا كثر ماكنت أبي لاماه أول أبي فرقاه الحين صح أني مابي يجيه ولا يضره شي لكن أني أعيش معاه مره ثانيه أمر مستحيل وهو مزعجني وان رفضت ضاق خاطره وتعب زيادة وان سكتت تحمس وتأمل يفكرني برجع دلوني على الحل الله يخليكم أنا معاااااد أبيه لكن
ماودي شي يضايقه ابد للمعلوميه الثانيه زوجته عنده وعليه منها أطفال لكن حين يحس بالضعف مايذكر ألا أنا وآنا خلاص طابت نفسي

محتاجة نصحكم وإرشادكم تكفووون اعتبروني أختكم

يلزم عليك تسجيل الدخول أولًا لكتابة تعليق.

تسجيل دخول

قررت أفضفض • 12 سنة

شوفي كنزك هم أطفالك هم اللي بيشلونك في كبرك أحسني تربيتهم و لا تعرضينهم للمشاكل أما الرجال أذا أنت ما انت طايقته و انت مكتفيه ماليا فرقاه ابرك بس خذي الامور بالحيله أنا اتفهم كيف الوحده تعيش مع واحد ما تحبه وغيرذا قهر و ضرب الزم ما عليك عيالك ونفسيتك و الباقي بالطقاق

بوتيك جلنار السيالي • 12 سنة

ربنا ييسر امرك ويحفظ لك اولادك

موضوعك مشربك مااعرف ايه اقولك لكن انت ادرى بوضعك معاه يعني احتمال لو رجعتي بترتاحي او بترجعي لحياة التعب تاني
ولو بقيتي بعيده عنه بتشوفي دا بيريحك ويريح اولادك

الامر باايديك لك منا الدعاء ان يكتب لك الله الخير

نعيمي في جنتي • 12 سنة

يامرحبا نورتينا في المنتدى
اختي الحبيبة : في البداية لابد ان تعلمين ان الحياة طبعت على كدر . وايضا من يرد الله به خيرا يصب منه .
انصحك بان تبدئين من الان بقرائة سورة البقرة + الاكثار من قول حسبي الله ونعم الوكيل + والاستمرار على قول اللهم اجعل همي الاخرة.
والله لترين الفرج القريب وهذا امر مجرب .
اما رجوعك فاكثري من الاستخاااارة . ولو اطلعنا على الغيب لخترنا ما اختاره الله لنا لانه اعلم والطف واحكم سبحااانه.
وثقي ان الفرج قريب . اعانك الله

dolai • 12 سنة

الله يعينك يارب ويفرج همك ويبدل ماقدرأيتيه من احزان الى سعاده وهناء ادعى ربك واستخيريه ولو قررتى ترجعيله حاولى يكون عندك شى يظمن حقك وحق اولادك .الله يصلح حالك يارب

حياتي كلها معناة • 12 سنة

ألف شكر لكل من رد وتفاعل....

لكن افهموني يا أخوات أنا ماعاد أفكر في الرجوع أبدا ولكن في نفس الوقت ماودبي شي يضيق صدره وهو تعبان

ولا الرجوع شي مستحيل لأنني صرت اكره عشرته ولو عطاني الدنيا وما عليها لن ارجع