زوجي وغطاء وجهي (غشوتي)...شو الحل؟؟

الأسرة والمجتمع

السلام عليكم ورحمة الله وبركاته

أكيد في البداية بتظنون إن زوجي يجبرني على إن أغطي وجهي وأنا مب راضية...بس السالفة معكوسه تماماً...يعني أنا اللي أغطي وجهي وزوجي مب عاجبنه هالشي...وهالشي يسبب مشاكل بينا أحياناً ومب عارفه كيف أتصرف وياه...

أولاً أحب أقولكم إني ولله الحمد والمنه ملتزمة بحجابي الشرعي الكامل يوم أطلع من البيت ولله الحمد....وبحكم بيئتي البدوية اللي تربيت عليها...تعودت إني أغطي وجهي عن كل ريال (رجل) غريب عني أو أجنبي بالنسبة لي...وعندنا الحريم يجلسون بروحن والرياييل بروحهم...وإذا لزم الأمر إنهم يجلسون مع بعض الحريم يتغشون يعني يغطون وجوهم...

وبيئة زوجي تختلف عن بيئتي في هذا الشي بس...يعني رياييلهم وحريمهم مع بعض...دق سوالف وضحك وأكل مع بعض...وأنا مب متعوده على هذا الشي...

في بداية زواجي وتحديداً في شهر العسل وكان معانا فيه أهله كلهم تقريباً أخوه ومرته وأخواته وأزواجهم...وقالي لا تغطين وجهج منهم وطاوعته ما أعرف كيف ( يمكن لأني بعدني ما إلتزمت بالحجاب الشرعي الكامل) بس والله كان وجهي يعورني وأستحي فتميت أتجنب الجلوس معاهم قد ما أقدر ولأني أحس بالذنب إني كاشفه وجهي...

بس بعدين مرة مده طويله ما شفتهم فيها ولا شافوني وانتهزت هالفرصة وقلت خلاص أنا لازم أغطي وجهي...وبالنسبة لي عادي إكون جالسة معاهم وأنا مغطيه وجهي لأني متعوده على هالشي...بس هم وزوجي وأهله مب متعودين على هالشي وكانوا يتضايقون مني وأولهم زوجي ولأنهم ما شافوا حد يغطي وجهه عندهم...وهالشي خلا زوجي ما ياخذني أزور أخواته والسبب على قولته إني أغطي وجهي منهم فيستحون مني وما يجلسون ويانا...فهمته إن هالشي هم يظنونه أما بالنسبة لي أنا ما عندي مشكله إني أكون متغطيه وهم جالسين...أنا مب في نيتي إني أفرق بينهم لا والله بس حرام إنهم يشوفون وجهي وهم أجانب عني...

نفس المشكلة تتكرر إذا بغينا نسافر..زوجي من النوع اللي ما يحب يسافر لوحده...يعني يحب الجمعة ( اللمة) خصوصاً إذا بغى ياخذني والعيال وياه لازم يكون حد ويانا يا ربعه وعوايلهم أو أخواته وأزواجهم وعيالهم...تصدقون إن مرات يكون في خاطره إنا نسافر بس يهون بسبب إني أغطي وجهي عن الرياييل...

زوجي بختصار يضايقة حجابي...ودايماً يقولي إن الوجهه والكفين مب حرام...قلت له إنا حرة في إلتزامي ولا أناقش حد فيه....وأهلك وأخواتك وإنته ما إلكم الحق إنكم تتضايقون من حجابي وتستهزؤون وتعيبون عليّ...حجابي لي أطيع ربي به...وما في يوم من الأيام أنا طلبت من أخواتك إنهم يغطون وجوهم...هم حرين وما أدخل في حريتهم...وأنا حريتي في حجابي ولا بحاسب حد على سترة وحجابه...

أخواتي لا تظنون إني متشدده في إلتزامي...لا والله وربي شاهد عليّ...بس كل المشكلة إنها تفاوت في مقدار إلتزام وفهم كل واحد لدينه...

شو تبغوني أسوي مع زوجي وعقليته هذي...ما أحبه يفهم إني أفشله وأحرجه جدام الناس كل ما أكون وياه...وإنه يمتنع من إنه يطلعني وياه لأنه ينحرج من حجابي...مرة كان ياي ياخذني من المستشفى كان عندي موعد...أول ما ركبت السيارة قالي بسم الله إنتي منو بيطالعج وإنتي مسويه فعمرج جذيه...قلت له الغرض من حجابي إن محد يطالعني غيرك..وإلا إنا ليش متغطيه...فسكت وتضايق وما رد...

ساعات بسبب زوجي ما أحب أسير مكان معاه على شان ما أحرجه ويتضايق مني...

ساعدوني خواتي وعطوني حل
65
7K

يلزم عليك تسجيل الدخول أولًا لكتابة تعليق.

تسجيل دخول

أزين البنات
أزين البنات
جزاكي الله خيرا موقفكي جدا رائع سيري على دربكي وأرفعي راسكي أنتي الصح وهم الغلط حبيبتي وضحيله أنكي ماتبين أحد يشوفك غيره وإن شاء الله يغير رايه يارب و تنحل مشكلتك يارب
boint
boint
لا يا أختي لا فيها إحراج ولا تشدد وتذكري أنه لا طاعة لمخلوق في معصية الخالق وهذا واجب عليك وعلى كل مسلمه وخليك على وضعك ولا تتنازلين في سبيل إرضائه أهم شي إنك ترضين ربك وإذا على زوجك وريه فتاوى من علماء ثقه زي بن باز وبن عثيمين الله يرحمهم وأسأل الله له الهداية ولك الثبات
مها الإمارات
مها الإمارات
شكراً أخواتي على مروركن الكريم...ردودكم أثلجت صدري...وزوجي الله يهديه

أختي أزين البنات..والله إني قلت له كم مرة إني ما أحب حد يشوفني غيرك بس ما يقتنع...

وبالنسبة لرأي العلماء...زوجي الله يهديه ويصلحه ما يقتنع برأي العلماء...وتعرفون الناس اللي مايقتنعون برأي العلماء شيقولون عنهم ..الله يهديهم جميعاً
ميعادنا
ميعادنا
جزاكي الله خيرا موقفكي جدا رائع سيري على دربكي وأرفعي راسكي أنتي الصح وهم الغلط حبيبتي وضحيله أنكي ماتبين أحد يشوفك غيره وإن شاء الله يغير رايه يارب و تنحل مشكلتك يارب
ريم الخالدي
ريم الخالدي
الله يوفقك ياااااااارب قسم بالله موقفك يرفع الراس يالغاليه
وتأكدي ان القابض على دينه في هذا الزمن كالقابض على الجمر
اتمنى من كل قلبي ان تظلين متمسكه بموقفك ولا تنزعين الحجاب مهما بلغت الظروف
وتأكدي انك مدامك على صح ان الله معك ,,
وزوجك مصيره عارف قيمة تمسكك بهالشيء

قسم بالله موقفك هذا نموذج رائع بزمن ماعاد نرى فيه احد مثلك متمسك بحجابه
ونعم التربيه يالغاليه

الله يوفقك يارب ويسهل امرك