الزوااااااااااااااااااااج

بسم الله الرحمن الرحيم

السلام عليكم ورحمة الله وبركاته

الحمد لله الذي بنعمته تتم الصالحات ، والصلاة والسلام على محمد سيد المخلوقات ، وعلى آله الطاهرين ،وصحابته أجمعين .
وبعد ، انا حبيت اني أوضح أشياء مهمة لأمر يمر لكل انسان اذا شاء الله له هذا الأمر ،، انا حبيت اني اتكلم عن موضوع الزواج اللي هوسنة الحياة ،،
ادري انكم كلكم تعرفون وشو الزواج بس صراحة لقيت ناس ما يعرفون وشو الزواج بمعناه يعني :يعرفون الزواج بتفكيرهم فقط،، بس انا كتبت هالموضوع للفائده عموما


***نبدأ ***


اول شيء التعريف بالشرع :: النكاح أو الزواج ، عقد يحل لكل من الزوجين الاستمتاع بصاحبه .

بس ابقول لكم تعريفه عندنا في هالزمن وهو غلط Xغلط ::
الزواج عند البنات ::بيت خاص لها تملكه سفر وطلعات ومطاعم وروحات وجيات ولا مسؤليه ولا رجال ولا شغل بيت ولا هم يحزنزون أهم شي الوناسه وسعة الصدر والفشخره عند البنات والفلوس ...الخ

الزواج عند الشباب :: أهم شي انه ينقال عنه متزوج ويروح ويطلع على كيف كيفه مافيه ام ولا ابو يقولون وين سهرت وين رحت وراك تأخرت مع مين طالع ؟؟؟؟؟؟ ((وما كأن وحده تسنا في البيت )) طبعا هو يقول ان الزواج سجن بس وحده ولا اثنين يسجنونه تلاقونها 24 ساعه في بيت أهلها والا مثله طالعه توسع صدرها

((موالكل بس أغلب اللي اسمعهم و أشوفهم كذا الزواج عندهم ))

طبعا كلكم تعرفون حكم الزواج انه مشروع بس ابكتب الدليل عليه ،،قال تعالى: ""فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة أو ما ملكت أيمانكم ""

أكيد فهمتو من الآيه انه يجوز التعداد في الزواج طبعا هذي حكمة من الله انه أجاز التعداد صح يا بنات

ابرجع للتعداد مره ثانيه تحت ((تدرون اني بنت ))،، بس اني مرتبه فقرات الموضوع وما ابي اطلع عنها

نرجع للحكم :
1-فيه زواج يسمى بالمسيار وهذا الزواج جائز ولكن له شروط .
2-فيه شيء اشتهر في وقتنا الحالي ،، لكن ولله الحمد الى الآن ماسمعت انه صار في دولتنا وهوالزواج العرفي :( ،، وحكمه حرام لأن أركان الزواج ما اكتملت فيه

نأتي الآن لحكمة الزواج ::
من حكم الزواج ::

1- حتى لا يقع أي من الطرفين في الحرام .
2-حاجة كل من الزوجين الى صاحبه ((كلكم تعرفون وشي حاجتهم )).
3-تعاون كل من الزوجين على تربية النسل والمحافظة على حياته.
4-تنظيم العلاقه بين الرجل والمرأة على أساس من تبادل الحقوق والتعاون في دائرة المودة والمحبة ،،والاحترام والتقدير .


أما عن أركان الزواج فهي ::

ولي الأمر – الشاهدين – صيغة العقد – المهر ((هذا مــهــم ))


كل اللي فوق إن شاء الله انكم تعرفونه


بس الحين ابكتب عن الحقووووق الزوجيه

في وقتنا كثر الطلاق 7%((على حسب تقديري،،أقول انها نسبه ضئيلة بس ممكن انها تزيد
))منهم ما يعرفون الحقوق ((طبعا مو كل الطرفين ))

الحقوق:

أ_حقوق الزوجة على زوجها يعني اللي للزوجه::

1-النفقه : طعام-شراب-كسوه-سكن بالمعروف .
2-الاستمتاع : هذا انتم افهموه .
3- القسم لها بالعدل ان كان له زوجات أخريات لقوله صلى الله عليه وسلم : "من كانت له امرأتان يميل لإحداهما على الأخرى جاء يوم القيامه يجر أحد شقيه ساقطا أو مائلا ".
الحين رجعت للتعداد
أنا وأعوذ بالله من كلمة أنا أرضى بالتعداد
اذا كـــــان فيه عـــــدل أرضى انه يكون لي ضره
صح يبي يضيق صدري اني لي ضره تبي تاخذ الرجال مني وما اشوفه كل يوم وبيتكلمون الناس عني ووو ،،لكن رضيت والا ما رضيت ماهو بكيفي هو اللي يقرر وما فيه رجل متزوج ما يعرف الصح من الخطأ،، وأصلا اللي هويسويه مهب حرام يعني شي من شرع الله ما أقدر امنعه منه أو اني اتدخل فيه هذي الحياة اللي هو يبيها وهو أبخص بنفسه

بـــــــــس

ما فيه رجال بيتزوج على وحده ثانيه من فراغ أكيد كل رجال له مصلحه من الزواج من وحده ثانيه عاد الله أعلم بهالمصلحه .
عاد كل وحده ووجهة نظرها وانا هذه وجهة نظري وأفتخر بوجهة نظري هذه

وإن شاء الله انه محد يحتاج لزوجه ثانيه الله يخلي كل زوج لزوجته للحالها


بس يعني بالأخير اذا كان الرجل متزوج اثنتين
أهم شي انه يكون عادل بين زوجاته هو اللي تزوج يتحمل هالمسؤليه الكبييييييييرة .

4-اذا كان متزوج من نساء قبلها وهي مثلا الثالثه أو الرابعه ::
يقيم عندها يوم زواجه بها 7 ايام اذا كانت بكر و3 ايام اذا كانت ثيب
الدليل قوله صلى الله عليه وسلم :"للبكر سبعة أيام ، وللثيب ثلاث ، ثم يعود الى نسائه "
5-استحباب طلب رأيها في بعض الأمور .


ب- حقوق الزوج :

1-الطاعة في المعروف.
2-حفظ ماله وصون عرضه وأن لا تخرج من بيته الا بإذنه قال تعالى :"والحافظات للغيب بما حفظ الله ".
3-السفر معه اذا أراد ذلك .
4-تسليم نفسها له متى طلبها ... والا تلعنها الملائكة حتى تصبح .
5-استئذانه في الصوم اذا كان حاضر غير مسافر لقوله صلى الله عليه وسلم :"لا يحل للمرأة أن تصوم وزجها شاهد إلا بإذنه ".


انـــتـــــهـــى



أتمنى انه يعجبكم الموضوع وتكونون استفدتوا حتى لو شي بسيط وإن شاء الله المواضيع الجايه تكون أفضل من هذا الموضوع بكثير

سامحوني اني طولت عليكم بس ان شاء الله انكم قرأتوا الموضوع وإن شاء الله انها وصلت لكم المعلومات

دمتم سالمين أيها المتزوجون والمتزوجات والعزوبين والعزوبيات

تحياتي لكم :26: