عندي زيارة قريبة لمدينة حلب في سوريا .. فيا ليت أي واحدة من الاخوات زارتها وتعرف بخباياها والاشياء المميزة بأسواقها تفيدني أفادها الله ..

زعفران
نفسي التي لا تملك الأشياء ذاهبةً .. فكيف أبكي على شيء إذا ذهبَ
لا حــول ولا قـــوة إلا بالله العلـي العظيــم
السلام عليكم ورحمة الله وبركاته

جلست فترة انتظر أحد يفيدني بأسواق حلب .. وللأسف يظهر أنه ما في أحد راح لهناك .. ولكنني قبل اسبوع كنت هناك وجبت لكم الاسواق وبالاشياء اللي يتميزون فيها وهي كالتالي:

سوق المدينة القديم/ وهو عبارة عن سوق قديم قديم قديم طويل جدا مغطى يحتوى على كل شيء ولكن الشيء اللي عجبني فيه فقط الشالات (الباشمينا) اللي تنحط على الكتف أو على الرأس أو كديكور على الاثاث وفعلا عندهم قطع جميلة شريت لي اثنين حلوين جدا ..

سوق التـلل/ وهو عبارة عن سوق أيضا طويل على طول الطريق على الناحيتين محلات من كل شيء وأكثرها الجزم وماشابه وشنط في أشياء حلوه وبعض المحلات لديها أشياء مميزة. أسعاره معقوله ..

سوق العزيزية ومجمع العزيزية/ هذا احلى شيء بالنسبة للباقي وفيه محلات حلوه وأشياءها مميزة .. محلات الجزم حلوه والشنط هناك ورخيصة جدا وفيه محل مميز هناك للاحذية والشنط بكل حلب ما فيه مثله بالعزيزية اسمه (سيدار) رائعة تصاميمه مقارنه مع باقي المحلات .. يعني اللي ما تشتري من عنده كإنها ما شرت .. ارشحه ترشيح عالي جدا ذوقه حلو ويساير الموضه بشكل مناسب صاير مكانه بالشوارع الخلفية لمجمع العزيزية.

سوق الموقمبو/ عبارة عن محلات غير متراصة متفرقة في منطقة راقية بعض الشيء وأكثرها الماركات المعقولة السعر.. ما دخلته بس من بره شفته كانت أقدامي راح تتفكك من التعب والمشي والوقت كان يداهمنا ..

سوق باب الفرج/ هذا سوق شبه شعبي فيه العطارة والبهارات وشنط السفر ومحلات كثيرة متفرقة ..

خان الشونه/ عبارة عن منطقة مربعة بها من القديم والاثار الكثير وفيها محلات تشتغل السدو (اللي خاص بالقعدات والمجالس) شغل يدوي واسعارهم جدا معقوله وحلوه وأثواب وجلابيات شامية حلبية.

سوق سيف الدوله/ سوق شعبي فيه كل شيء واسعاره رخيصه

وفهي بعد سوق نسيت اسمه بس خاص بملابس الرجال ولوازمهم فقط رجال.

أفضل محل حلويات شامية هو محل (بولص) حسب ترشيح اهل المدينه .. انا الصراحة الوقت ما كفاني اروح كنت مزحومه ومعي ولدي الصغير فكان صعب اروح كل مكان.

بكل الاحوال هي مدينة قديمة قدم الزمان والعالم والتاريخ .. قديمة بكل المعاني .. ولا تغلطوا غلطتي وتلبسوا عباية طويله .. الله لا يوريكم صارت من تحت العبي لونها ابيض ابيض ولا كأنها سوده .. فاللي تحب تلبس العباية شويه اقصر من اللي نلبسها في بلادنا .. أو تشوف لها شيء مستور مناسب .. ترى العبي هلكان .. وخسارة للاسف خسرت ثلاث عبايات ..

هذا ما لدي اخبرتكم به واللي عندها اي استفسار .. انا حاضرة لكل شيء وارجو إني اكون ما نسيت شيء إن شاء الله.
نفسي التي لا تملك الأشياء ذاهبةً .. فكيف أبكي على شيء إذا ذهبَ
لا حــول ولا قـــوة إلا بالله العلـي العظيــم


الساعة الآن 05:53 .