أهلي أو الزواج من رجل أرمل ..بحاجة مشورتكم عسى ربي يجزي كل من دخلت جنات النعيم

الأسرة والمجتمع

السلام عليكم ورحمة الله وبركاتة ..
صباحكم أبتسامة جميلة أخواتي الغاليات ..
-
-
قبل البدء بما ساكتبة أشهد الله على صدق كلامي وأنني بحاجة ماسة لأفهم بعض ألامور ..
أنا فتاة أبلغ من العمر 22 عاماً تقدم لخطبتي رجل في الـ32 من عمرة , وهو أرمل , ولدية طفلة في الصف ألآول متوسط ..
الفرق بيننا 10 سنوات انا ماعندي أي مانع بهالنقطة ولا نقطة وجود بنته بالعكس يشهد ربي مو حاطة ببالي اذا وافقت إلا انه تكون مثل أختي الصغيرة ..
أستفساراتي كثيرة والله وأمور كثير خايفة منها أتمنى تتفهموا موقفي ..
-
-
هالانسان تبارك الرحمن من كبار التجار رجل أعمال ولة أسمة في المملكة يعيش حياة أسأل الله ان يبارك له فيها ويزيدة من خيرة حياة أي انسان يتمنى يعيشها سواء من سكن بقصر أو خدم أو أي أمر يخطر ببالنا , رغم انني أعلم كلنا عند خالقي سواسية لافرق بيننا إلا بالتقوى , ولكن لتوضيح الصورة هو من الطبقة المخملية وأنا فتاة حياتنا بسيطة تعودة على مجتمع بسيط اذا حصلت الموافقة سيتغير كل شيء سأخذ لقب زوجة رجل الاعمال أبو فلانة ..بيكون هنالك حفلات للوزير فلان ولحرم رجل ألاعمال فلان ومن هذا القبيل .. هذة الحياة ما اتخيل أنني سأتأقلم معها خايفة منها كثير والله ..
-
-
ألامر الثاني يمكن تقولوا ليش تفكيرك صغير أو تشغلي بألك بامور عادية بس أنا شفته نظرة شرعية أنا لو أحد بيشوفني معه والله بيقول بنته مو زوجتة اخاف أواجة مواقف أو أمور متعلقة بهالنقطة بنات أنا ملامحي بيبي فيس وغير كذا قصيرة طولي 150 والله اذا احد شافني يعطيني عمر 16 سنة او 17 بالنسبة له طولة 180 وغير كذا مبين علية أكبر من عمرة ماشاءالله ..
-
-
ألآمر الثالث والي والله ما اتعبني شيء مثله أفكر ببعدي عن أهلي راح أسكن بمدينة تبعد عنهم 1600 كم ..أنا تفكيري كلة محصور بأهلي اخواني أخواتي أنا البكر تدمع عيني لما أقول في امور باقي ماعشتها معهم باقي ماشبعت منها أبغى أسافر أكثر معهم أبغى أشبع منهم ..
بنات بتصير لي حياة مستقلة عن أهلي وناسي بيجي يوم اجيهم مثل الزاير أقضي معهم ساعات وأرجع لبيت زوجي كيف هالشيء بتقبلة كيف هالشيء بيصير؟؟؟
-
-
والله ان أفكاري ملخبطة وياارب ما اكون طفشتكم بكثرة كلامي بس حبيت أفهمكم الي بداخلي والي مخوفني وقالقني ..أعطوني رأيكم ومشورتكم طمنوا قلبي عسى ربي يطمن قلب كل من ترد علي , عسى ربي ييسر لكم اموركم من حيث لاتحتسبوا لكل من ردت أو حتى دعت لي بظهر الغيب بان ربي يكتب لي اللي فية خيرة ..
-
-
أستغفرالله العظيم الذي لا إله إلآ هو الحي القيوم وأتوب إليه ..
أللهم أغفر للمؤمنين والمؤمنات ألآحياء منهم وألاموات ..
سبحان الله وبحمدة , سبحان الله العظيم ..
أللهم صلى وسلم على سيدنا محمد ..
80
8K

يلزم عليك تسجيل الدخول أولًا لكتابة تعليق.

تسجيل دخول

,, سهارى ,,
,, سهارى ,,
والله حبيبتي أهنيك أولاً على أسلوبك الراقي المهذب

ثانياً صعب احد يفيدك بهالقرار .. الحل الاستخارة فقط

الرجل من كلامك ما يعيبه شي .. وشي جميل ان تكونين اصغر منه عمرا وشكلا

لكن لو انا مكانك ما أخذته ,, لأن توي صغيرة والعمر قدامي ان شاء الله
انك تاخذين شاب أفضل بكثير من أرمل



رايي وانتي استخيري والله يكتبلك الخيره
ميراج222
ميراج222
راح ابدا بالنقطة الاخيرة بالنسبة لفراق الاهل اصلا كلنا مرينا منه صحيح صعب بس لما تتزوجي تتاقلمي وصدقيني مهما طولتي عند اهلك الفراق صعب صعب صعب يعني مرحلة راح تمرين منها غصبا عنك
بالنسبة لانه ارمل وعنده بنت مو مشكلة ان شاء الله تكون مثل اختك
اما انه رجل اعمال حبيبتي اهم شيء لا تنسي دينك واعمالك الصالحة مهما تدخل عليك فلوس
عيشي حياتك يمكن ربي سخر لك هذا العريس يكون من نصيبك يعني هذا الرجل ما يعرف يتزوج فيه بنات كثار يتمنوه
يا عمري لا تفكري اكيد بتتاقلمين مع المجتمع الجديد كلشي تتعلميه
اذا انتي مرتاحة وافقي
وبالنسبة للبعد المسافة عن اهلك ادا زوجك ميسور اكيد كل مرة يحجز لك تنزلي تشوفي اهلك
الله يسعدك ويهنيك ولا تنسي تطمنينا عليك
لغيرك اصبحت
لغيرك اصبحت
اسال الكريم المنان ان يهدي بالك وييسر امرك 

يا اختي انا بعمرك وانخطبت وكل شي تم ولكن كنت متخوفه من اشياء كثيره 
فلزمت الاستخاره عند كل صلاه وكذلك قيام الليل والدعاء باللي فيه الخير والصلاح لي 

وطال الموضوع شوي ولما ردينا ع اهل الخاطب اننا وافقنا 
قالوا الولد مايصلح لبنتكم وان مافيها اي شي يعيبها

وانتهى الموضوع والحمدلله وكلت امري لربي والله اختار لي الخيره الحسنه

نصيحتي لك الزمي الاستخاره ووكلي امرك لربك وريحي بالك

دعواتكم لي بالزوج الصالح اللي يعوضني خير بحياتي 
دموع في عيون جريئة
استخيري ربك و توكلي عليه و وافقي و الف مبروك مقدما
وليده
وليده
استخيري اختي وبعد الاستخاره واففقي ماشاء الله ماينرد واحسن انتس اصغر منه بتصيرين الدلوعه ومن يحصل والله يوفقكتس ويكتب لتس مافيه خير لاتنسين الاستخااااااااااااااااااره وصدقيني اذا فيه شي ماهو خير لتس بيرده الله سبحانه باي شي


ابقولتس شي صار معي انا جاني واحد كل الشروط اللي ابيها فيه ولا بعد ارمل من ضمن اللي شارطته وكل شي فيه يعني ماينقصه شي من اللي ابغاااه وقلت باقي الاستخاره اهم شي واستخرت ثلاث مرات وزود بعد والرجال قلت لهم كل شي عني يقولن له ووافق تخيلو على كل شي وعقب الاستخاره تخيلي تذكرت شي ماقلت لهم قلت يافلانه قلتو للرجال عن ها السالفه قلت لا قلت بالله قولو له لازم وشوفو رده وسبحان الله يوم قالو له السالفه ماصار نصيب شفتي الاستخاره كيف تدلتس للخير شوفي كلنا موافقين وكلن يمدحه بس سبحان الله يمكن مافيه خير لي انا


فانا ذكرت القصه عشان تستخيرين وتتحمسين اكثر وربي يوفقتس يارب