وهميات

الغالية مشكورة على مشاركتج... وصدقتي يوم قلتي ان الربح السريع هو هدف معظم الصالونات اللي تصف المنتجات اللي تفيد واللي ما تفيد وتحاول تقنع الزبون بفايدة هي اصلن وهمية وغيره...

وطبعا نتمنى ان بنات البلاد يمسكون صالوناتهم حتى لو اشراف و متابعة لو ما حبوا يوقفون في الصالون لان هم اللي بيراعون بنات بلادهم اكثر من غيرهم...

ويوم قلتي ان اموال الامارة تتحول للخارج.. انا اعارضج اختي الغالية لان الزبون يدور الشي الزين ****لله اخر الدنيا وما بيعق فلوسه على اي شي الا مضطر.. والفلوس في النهاية بتكون ملك صاحبة الصالون يعني ما بتفيد الامارة الا اذا كان هم مالك المشروع انه يطور نفسه يوم عن يوم ويخدم اهل الامارة.

بس نحن هدفنا كسيدات اعمال بشكل عام انا انوفر السلع والخدمات لامارة راس الخيمة بنفس الجودة الموجودة في الخارج.. لتسهيل حياة الناس بشكل العام ( اللي يتعنون لين دبي والا الشارجة).. ولان الامارة في طور النمو التجاري و نحنا لازم نساعد باللي نقدر عليه لجعلها امارة متكاملة من جميع النواحي.


اقتباس
(بخصووص الصالونات

صالون السيار

الى فى السوق الكويتي

اذا تبوون اي شى من استشارات في علم المكياج فى النظافه فى اي شى

استشيرووا بنت بلادكم


انا الصراحه اتعلمت شى بس

الا وهو حب العمل فى راس الخيمه وانا من اماره ثانيه

وارجوا المعذره)

ما فهمت شي!! هل انتي من امارة ثانية وتشتغلين في هاذا الصالون يعنيّ!! الله يوفق الجميع!
مرحبا

ميكب ارتست


مشاء الله على ردج اسلوب فيه حب العمل ما تحبه فى نفسك


الصالونات كنظره عامه فى راس الخيمه ممتازه كنظيرتها فى ابوظبي ودبي والشارقه وعجمان


ونحن ابناء الامارات نشجع العمل البروفشنال للمواطنين الفكره فى بالهم فى دبي والشارقه

والى التطور هنالك بسبب او بدوون سبب وبنفس الوقت نطلع لئن نكوون بمرتبه الوسط

من زرع حصد ومن سار على الدرب وصل

الله يقويهم الصالونات جميعا فى دبي الصالونات فى مستوى واحد بس الناس اذواق

وكذالك هنا

فكرة دبي فى راسهم حتى لو خسرتي ملايين لانهم اتعودو على سيرتهم

الا على المدى البعييد

فى دبي لو السعر اضعاف بيدفعوون حتى لو الشغل او الصالون عادى
اما في راس الخيمه

حتى لو يبتي خبيرة فرنسا بيقولون ليش غالي

راس الخيمه يدورون الشغل اوكي والسعر ارخييص وايد

بعطييج مثال غير عن التجميل الازياء

بتحصلين الوحده فى راس الخيمه اكثر عن الف ما بتفصل


لكن خلها تسيير دبي بتدفع حتى لو عشرة الاف

هكذا الحال فى راس الخيمه
وانصحج ان لما بتخسرين افتحي فى دبي والنصيحه بجمل

وهميات

كلامج صح... بصراحة انا كنت مترددة في البداية عسب هاذي السالفة..لاني ما كنت ادخل الصالونات اهنه...يعني متعودة على صالونات معينة في دبي و الشارجة... بس يوم دخلت اكتشفت ان الناس تدفع!!! وتدفع مبالغ تقدرين تقولين نفس دبي والشارجة ويمكن اكثر!! و الجودة ميييييييح ... هاذا اللي رفع ضغطي وقلت حرام اللي يستوي


مثلا سويت تنظيف بشرة قلت بجرب في احد الصالونات المعروفة في راس الخيمة .. اونه عميق قالو 300 درهم قلت اوكي ماشي مشكلة..سرت عند اخصائية تجميل لبنانية وحدة متمرسة واعرفها من زمان في الشارجة قتلها شو رايج في بشرتي؟؟ قالت !!! انتي من متى مب مسوية تنظيف بشرة!!!!!! قتلها الاسبوع اللي طاف مسوية تنظيف عميق... يابت المنظرة المكبرة ةراوتني الزوان وغيره!!!! قلت حسبي الله ونعم الوكيل.. وللعلم انا متعودة اسوي عندها تنظيف عميق تحسين فعلا انه تنظيف ب 250 درهم والحين صار ب200 درهم... وهاذي الحرمة معروفة يسوون عندها عائلات معروفة من دبي كانت في دبي من سنين والحين يت الشارجة... واسعارها اقل من اسعارهم!!!

انزين صدمة ثانية استوت لي ويا نفس الصالون... انا متعودة اصبغ شعري كل فترة عند وحدة فرنسية في دبي... الاخت مسافرة.. وانا ما احب اسوي عند حد غيرها.. بس شعري استوى بشع يعني لازم ينصبغ.. سألت اللي اعرفهم في راس الخيمة نعتوني على الصالون وقالوا خلى فلانة الboss تسويليج... قلت اوكي سرت هاذاك اليوم انلطعت ساعتين اتريا الbig boss كانت اتمكيج عروس... قتلها بصبغ نفس اللون شوي افتح... طالعت شعري نظرة شريعة وسارت خلطت اللون اي كلام وحطته بدفاشة... اسبوعين او اقل و نزل اللون... وسعر الصبغة نفس سعر الصبغة اللي اسويها عند الفرنسية اللي هي في فندق في دبي!!! هاذيج عاد تحترم الشعر!!! بكل ما تعنيه هاذي الكلمة من معنى..حتى تمشيطها بطريقة محترفة... شو بقولج بس!

ومن هاذاك اليوم تبت قلت ما اسوي شي في صالونات رأس الخيمة!!!!! ماشي جودة لا ونفس لالاسعار

شفتي اختي التجربة خير برهان!!! والمكياج!!! وما ادراك ما المكياج!! خليها على الله

عشان جذه قلت حرام انا بنت البلاد اللي اشوفه زين ومجربتنه برع في دبي والشارجة بيبه من منتجات وغيره.. وحتى اللي يشتغلن في الصالون لازم تكون عندهن الخبرة الكافية مب اي كلام يعني

والاسعار بتم نفس سعر السوق اهنه لان الاسعار وحدة حبيبتي والجودة والاخلاص في العمل هي اللي بتجذب الزباين باذن الله

الله يقدرني و يعطيني على قد نيتي...
ترى هذ الحال ومثل ما قلت قبل انه في مراكز تنظر الى الربح السريع وما تدري انه هذا الشي غلط وراح يكون في غير صالحهم

اهم شي اللي يخلي الزبون مرتاح مع اشخاص يكون شغلهم مضبوط واسعارهم حلوه وخدمتهم زينه

لكن يوم بتشوفين شغل تعبان ومو من نفسهم هذيج الساعه بتقولين احسن لي اسير اخسر بيزاتي في مكان يستاهل ولا اني اتبهدل....

فكرة انج تفتحين مركز كبير...وايد اوكي...بس يبغي دراسه اكثر..بالنسبه لحال السوق...وحتى المكان اللي بتختارينه يكون موقع مناسب ومطل على الشارع عسب ما تخسرين وايد في الدعايه...

الله يعينج....السالفه تبا لها صبر وتفكير طويل عند كل خطوه والله المستعان

وهميات

مب شرط يكون كبير!!! ممكن يكون صغير بس متكامل

والموقع!! هاذا هو العقبةّّ لاني مب محصلة مكان اصلن

انا اتمنى احصل مكان على الشارع بس حاليا مب محصلة لا على الشارع ولا داخل



الساعة الآن 07:43 .