اكتبي بقوقل شقق تمليك
يطلع لك كثير

يالعكس مرة روعه وصالحه للسكن

الله يرزقنا جميعا
انا باقول لكم تجربتي

واللي اكتبه هنا لوجه الله رغم اني عدة مرات اقول لنفسي الافضل احتفظ بمعلوماتي لنفسي لان البعض اذا نصحته من قلب يحسب بانك بتستفيد شئ منه

انا ((والعياذ بالله من انا)) موظفه حكوميه في وظيفه عاليه و براتب كبير
لي 14 سنه في الوظيفه ولا جمعت ولا قرش
كنت ساكنه بالايجار

وكل ما احاول اشتري سكن لي ولعيالي للاسف اللي حوالي ما يشجعون

اكلم اخوي اقول له عندي 250 الف وممكن اخذ قرض على راتبي,,,يقول لي خذي دبلكس بمليون ريال((في ذيك الايام كنت ساكنه بالشرقيه))
بصراحه ترددت كثير

فمعنى ذلك اني باقعد اسدد قروض لمدة 10 سنوات
وانا بصراحه اصرف كثير
وعندي 3 عيال يدرسون في امريكا واللي عندهم عيال في امريكا يعرفون كيف المصاريف هناك
صحيح هم على بعثات لكن كنت اخاف بانهم يوم يحتاجون فلوس واتورط لانه راتبي مرهون للبنك

نقلت للرياض بسبب عملي ودورت ولفيت السبع لفات

وكل اللي حصلته بيوت قديمه تتجاوز المليون,,كنت ابغى في السليمانيه او العليا او حي الوزارت لانها قريبه من مكان عملي

بصراحه البيوت جدا قديمه ودمرانه يعني سعرها بسعر الارض
وتتجاوز المليون وربع

او دبلكس في مناطق جديده اللي يسمونها شمال الشمال..مثل الصحافه او الياسمين
بعيده جدا ...
يعني لو احتجت شئ احتاج مسافه طويله وصعب ارجع الليل مع ليموزين


فجاه شفت مجمع يعرض فلل وشقق تمليك

مرافقي اقترح علي نشوفها

تفرجت عليها

اي سعوديه معاي في لعمل اسالها تقول وع وفي جنوب الرياض ومن هالكلام السخيف

لقيت شقه في هالمجمع بحوالي 450 الف ريال

كان عندي حوالي650 الف واحترت هل اشتري شقه كاش والباقي استفيد منه في عمل مشروع
ولا اشتري بيت قديم بمبلغ 1300,000ريال
ادفع ال650 الف كمقدم والباقي اقساط على البنك وساقوم بترميمه بحوالي 150 الف سعودي وبامكاني اسكن دور واجر الدور الثاني ب35 الف ريال

شاورت بنتي وهي تدرس ماليه في امريكا وعلى وشك التخرج

قالت لا اشتري الشقه افضل لانها احسن لك وامن واشرح

ونسيت اقول لكم بانه الشقه تبع شركه معروفه وكل عماره فيها فقط 16 شقه ولها 2 اصانصير وموقف للسياره تحت العماره يعني انزل من سيارتي ادخل الاسانسير مباشره

وكل عماره لها حارس يقوم باحضار المويه واي شئ احتاجه
كمان المجمع في منطقه حيويه ونشيطه جدا
وحواليها حدائق ممكن تنزلين تقعدين تتقهوين ((للاسف بانه فقط الاجانب ينزلون ويستفيدون من الحديقه وانا بعمري ما نزلت ولا طبيتها))

كذلك هناك شركه للامن ولا يسمح لغير الساكنين في منطقة التملييك بدخولها((لان المجمع فيه جهه تمليك وجهه تاجير))

الشركه ساعدتني في تسجيل الصك باسمي لاني ما عندي احد في الرياض وما احب اي احد يعرف باموري الماليه غير بناتي

وانا سكنت الان لي حوالي 6 اشهر
وفقط قمت بعمل الاشياء الضروريه لاني جدا مشغوله...مثل تركيب المكيفات والاثاث الاساسي وغرفة نومي ومكتبي ولكني اتامل باني اجد الوقت الكافي لانهاء الكثير من امور الديكور

صدقوني باني الان معروض علي 500 الف وربما 520 عشان ابيع وانا رفضت

وما رح ابيع هالشقه لاني الان قدرت وجهة نظر بنتي



اولا الحمد لله لا علي قروض ولا ديون ولا احد يطلبني
واي بنك يتمني اطلب منه قرض لانه سجلي ممتاز

لانه الدين هم في النهار وهم في الليل

فرق المبلغ اعطيته بنتي واستخدمته في مشروع تجاري والحمدلله واضح بانه يبشر بالخير

الشقه فعلا ممتازه فانا اعيش لوحدي واحس بانها اكثر امان وتفي بحاجتي وتزيد

اذا رجعوا عيالي ممكن افكر ابني فيللا لكن في ذيك الساعه بنسكن سوا
اما اسكن لوحدي في لعنة وادرين فمستحيل
وفي ذاك الوقت باجر الشقه واعتبرها استثمار ثابت

سواقي هرب بعد استقراري هنا ب3 اشهر
والله ولا شلت همه لاني يوميا انزل الصباح واخذ ليموزين لمكان عملي وكلها 15 -20 ريال

للمعلوميه فيما سبق كنت ساكنه في حي السفارات وبايجار و قدره...خمس سنوات كل هالالوفات تبخرت وذهبت من غير رجعه


دوما انصح زميلاتي بتملك العقار لانه فعلا مثل الابن البار لكن للاسف الكثيرات لا يستمعن لهذه النصيحه

والكثير ممن استمعن للنصيحه دارت الايام وشكرتني


باعيد لكم الكلام اللي دائما اقوله

الانسان لازم يعرف هو ايش يبغى ويخطط وينفذ


وترى صحيح ما خاب من استشار لكننا للاسف شعب فقط يقلد بعض بدون ما نسال انفسنا نحن ايش نبي

نقطه اخيره احب اذكرها

الكثير من الاخوات في الرياض والخبر يتذكرون سكن الحكومه اللي في الرياض يسمونها اسكان المعذر
وفي الخبر يسمونها الاسكان

قبل ذلك انعرضت علينا الشقه ب160 الف ورفضنا وقلنا نبي فله

صدقوني بانه اختي رفضتها وهي شقق كبيره وواسعه
ودفعت اضعاف هالمبلغ كايجار للشق وترميم فيها وكل هالفلوس ذهبت بدون رجعه

والكثير منا قال بانها اسكان فاشل

واعرف الكثير اشتروها في عام 2000 ب250 الف ريال والكل قال بانها زباله وما تعرف مين جارك

روحوا شوفوا الان كم ايجارها وكم سعر بيعها وهي صار لها حوالي 30 سنه من بنوها

هذا مثل بسيط

اعتذر للاطاله لكن انا سدحت لكم هنا تجربتي من طقطق لسلام عليكم كل ما ارجوه منكم الدعاء بان الله يحفظ عيالي ويردهم سالمين غانمين ويجعلهم قرة عين لي

تحياتي
لا الله الا انت سبحانك اني كنت من الظالمين
عزيزتي بثينه جزاك الله كل خير ربي يخلي لكي عيالك ويجعلهم قرة عينك يااااااااارب
ياريت كمان ينورونا اللي ساكنين في شقق تمليك
الله يجزاك خير اخت بثينة تجربة رائعة ربي يعطيك ماتتمني
سـبـحـــــــان اللـه والـحـمـد للـه ولا الـه الا الله واللـه أكـبـر ولاحـول ولاقـوة الا بـاللـه وأسـتغـفـر اللـه , , , ,

سـبـحـان اللـه وبـحـمـده سـبـحـان اللـه العـظـيـم أسـتـغـفـراللـه
!


الساعة الآن 03:14 .