السلام عليكم يا بنات

إن شاء الله الكل بخير

بغيت أقولكم قصتي الطوييييييييييييييييييلة مع هالمنتدى الرائع اللي كنت أتمنى إني أكون عضوه فيه

والصراحة إن هالقسم خاصة كان واااايد يشدني وكنت دايماً متابعتنه طبعاً بعد قسم الفن والديكور ا( الله يجزيهن الخوات كل الخير ) والله إني استفدت منه وااااايد

المهم كنت دايماً أقرا عن المشاكل اللي تصير في هالقسم والصراحة تخوفت وايد من إني أشتري أي شي عن طريق المنتدى لأن الشايع إن كلها تكون عمليات نصب من قبل التاجرة أو إن العضوة تطلب أشياء وأشياء ولما التاجرة توفرها لها تبدأ عملية التطنيش من قبل المشتريه

المهم قلت شعلي من هالحوسه أروح السوق وأشتري اللي أبغيه وعلى عيني أحسن

في مرة من المرات قلت خلني أجازف وكان العرض قمصان نوم والصراحة وااايد عيبني لما طرشتلي صورهم الإخت " سحابة الليل " على الخاص 00 المهم قلت خل أخاطر وأطلب 00 طلبت منها موديلين وكانوا واايد حلوين والصراحه اتفاجأت لما قالت إن الأغراض بتوصل بعد بكره المهم استلمتهم وانا حاطه ايدي على قلبي كنت خايفه ان الخام يكون مب لين هناك وشفتهم وااااايد حلوين واتخبلت عليهم بعد

( هاي أول وحده )

الثانيه اللي تعاملت معاها كانت الإخت COMPLEX " أم عبدالله " واللي هي قمة في الذوق خذت عنها اول شي صندوقين هدايا ولما قالت لي وحده من اللي هديتها الصندوق ان الدخون والعطر ريحتهم حلوين سرت وخذيت لي انا بعد واحد 00 وخذيت عنها بعد كفرات ( 3 ) والحين طالبه منها كفرات لليهال بعدني ما استلمتهم

واحب اقولها شكرا على تعاملج الراقي واسلوبج الحلو وسعيده جداً بتعاملي معاج وان شاء الله ما بتكون آخر مره

الإخت الثالثة اللي تعاملت وياها هي الأخت ( حلا الإمارات ) خذت عنها اللعبة الزوجية والصراحة اللعبة حلوة وتعامل الاخت احلى واحلى لأنها طرشت اللعبة حتى قبل ما اطرش لها المبلغ واقولها بعد شكرا وربي يعطيج الف عافية

الاخت الرابعة كانت 000( ما انعطى ويه لا !!!!!)
كانت الاخت ( تناسيم ) وطلبت منها حجر السفيد اب وكانت بعد ذوق معاي وما شفت منها اي تقصير ولها جزيل الشكر

الاخت الخامسه 00 تراني اقولهم بالدور حسب طلبياتي
الاخت الخامسه كانت شوشو اللي تبيع العطورات والصراحة بعد كانت معاي قمة في الذوق وطرشت لي العطورات اللي طلبتهم ومعاهم عطرين هدية والحق يقال العطورات ما عليها كلام ووايد عيبتني وناويه ان شاء الله اطلب منها بعد
واحب اقولها مشكوره يا شوشو وربي يعطيج العافية

الاخت السادسة 00 ( ما شاء 00 وتقولين تخافين تشترين من المنتدى ؟؟!!!)

المهم 00 تراني يوم شفت تعامل الخوات تشجعت
الاخت السادسه كانت ( دانه المزيونه ) وطلبت منها كريم العروسه وما شاء الله بعد ما تأخرت علي فيه يعني وصلني بسرعة واعتقد بعد انها طرشته قبل ما ادخل المبلغ فحسابها
( ما اذكر من كثر الطلبيات اللي أطلبها )
لا وكل يوم قايلة حق بو الشباب سير البنك وتعال من البنك لين المسكين قال شو اللي خلاني أحطيلها انترنت وأتأذى من وراها
( الله يكون في عونه )

وعلى فكره ترى انا يوم اطلب شي ما اطلب حقي بروحي لا 00 اسوي دعايه في العايلة وما شاء الله اللي يبغي يطلب 00 وانا طلبت من دانه المزيونه 4 كريمات ويقولون زين لأني الصراحة لين الحين ما جربته لكن اللي جربوه امدحوه واطلبوا مرة ثانية بعد

وبعد اقول للاخت دانه المزيونه لج جزيل الشكر وسعيدة بالتعامل معاج وان شاء الله مب آخر مره ( بتقول إإإإيييهي عاده هاي بتحشرنا وبتأذينا !!! )

الاخت السابعة هي الاخت أم محمد الخلطات وبعد الصراحة ارتحت في التعامل معاها وهي حبوبه وفنانه واقولها مشكوره اختي ويزاج الله خير وان شاء الله لي تعامل وياج لأني أبغي أخوز هالكروشه الصغيرة اللي مضايجتني والله يعطيج ألف عافية

شكلي طولت عليكم
بس الصراحة حسيت إن من واجبي إني أقول على الأقل كلمة شكر في حق هالتاجرات اللي تعاملت وياهم واللي غيرن الفكره اللي كانت في راسي عن الشراء عبر الانترنت

الاخت الثامنه هي الاخت قوارير مندوبة الاخت امثال وكنت طالبة منها كريم ديرماكول لكن بعده ما وصل 00 الكل يعرف ان الاخت امثال مريضة ( ربي يشفيها ويخفف عنها مرضها ان شاء الله ) عشان جي الكريم اتاخر
وبعد اقول للاخت قوارير سعيده بمعرفتج وان شاء الله يستمر التعامل بيننا

الاخت التاسعة هي دموع الحيره 00 طلبت منها جلابيات كويتية بس طبعاً بعدني ما استلمتهم لأني طالبه من قريب والجلابيات مثل ما تعرفون تحتاج وقت عشان التفصيل لكن بعد حسيت من ردودها علي انها ذوق وكفاية انها قالت لي انها ما بتطرش الطلبة وبتترياني لين السبت عشان اقدر اطرش لها المبلغ

وبعد اقولها مشكوره اختي ويزاج الله خير وربي يعطيج العافية

من لاخوات اللي حابه اتعامل وياهم الاخت بنت - البنات ما ادري ليش احس هالانسانه حبوبة والاحظ من ردودها انها جداً مسالمة وما يخصها في شي يعني بعيد عن المشاحنات والخصومات اللي تستوي في المنتدى واقولها الله يعطيج العافية وان شاء الله نتعارف قريب

طبعاً هذا ما يمنع إن في أخوات في المنتدى واااايد ماشاء الله سمعتهم حلوة وما عليها كلام وانا هني مب في مجال تقويم لكن حبيت اقول رايي

والسموحة إذا كنت نسيت حد من اللي اشتريت منهم 00 واذا في يا ريت اتذكرني عشان ما اظلمها معاي

ولكم جميعاً تحياتي وسامحوني على الإطالة ( تراني لغاية شوي )
موضوع تشكرين عليه الغاليه
السلام عليكم
تسلمين حبيبتي على كلامج خجلتيني
انتي ام الذوق
وان شا الله تعيبج الجلابيات و يكون بينا تعاملات اكثر و اكثر
في حفظ الله فديتج
لا اله الا انت سبحانك اني كنت من الظالمين
استغفر الله العظيم و اتوب اليه

اراضي للبيع في ام القيوين و ساحل الباطنة
للايجار فيلا في المرور_ابوظبي
للبيع بنايات في الشارقة و عجمان
ماشاء الله كل هذولي وتخافين


ماشاء الله عليك


ماقصرتي كفيتي ووفيتي
في بنات يخافون ربهم وامينات ما ينخاف منهم
الله يسهل دربهم في الحلال


الساعة الآن 10:34 .