السلام عليكم
أخواتي أنا بقولكم مشكلة صديقتي وهي مو بس صديقتي هي أكثر من أخت والله من دريت وأنا حايسه مو قادره أفكر أحس أنه أنا اللي صار فيني قسم بالله أكتب لكم وأنا صدري ضايق مره عليها
أبيكم ترشدوني لحل أبي اساعدها بأي طريقة
بالبداية صديقتي هذي بنت ناس وخلوقة ومتربية ومتعلمه وموظفة انخطبت لواحد ووافقت عليه بعد اقناع من أهلها هو شخص عادي وموظف وتعليمه أقل منها بس هي رضيت بنصيبها ملكت وبعد ملكتها مايكلمها ابدا وكل مره تقولي كنت اقنعها باسباب يمكن ويمكن اصبري لين تعرفين شخصيته صبرت عليه وبعدها تزوجت ومن تزوجت ماتواصلت معها بحكم انها عروس ماابي اشغلها كلمتني بعد زواجها بشهر ونص وصدمتني تقولي بطلب الطلاق وشرحت لي الموضوع قالت ابي رايك بالموضوع والله يابنات ماقدرت اقولها شئ انصدمت كل اللي قلته لا تطلبين الطلاق ابدا بقولكم وش صار معها
هي ساكنه بنفس عمارة اهله بس هي لها شقه لحالها اهله امه ماعجبتني ابدا من شفتها بالزواج انسانه تحب نفسها وشايفه نفسها على العالم من الحريم اللي فيهم لعانه المهم تقولي اربع وعشرين ساعه مستحلين شقتها امه واخواته لدرجة ان الباب اللي بينهم مفتوح مايتقفل تقول فيه المجلس والمقلط هذا معتبرينه جزء من بيتهم تقول انام يقدرون يدخلون بالشقه بسبب الباب المفتوح بينهم تقول هو من تزوجنا يفرض اوامره من ثاني يوم جاب اغراض القهوه وقال سويها واطبخي مافيه اكل من المطعم واذا ماطبخت جاب اكل من عند امه تقول حتى طلعات مافيه كلام حلو مافيه وكل وقته عند ابوه يجلس مع ابوه وامه واخواته اربع وعشرين ساعه ظهر عصر ليل صبح طابين فوقها لدرجه ان امه تدخل مطبخها وتسوي اللي تبي وتاخذ اللي تبي من غير اذنها تخيلو مره طبخت وزودت الملح بالاكل تقول مفيه احد اكل الا انا وهو تقول اليوم الثاني تجي امه تقول ليش تكثرين الملح بالاكل تقول شكيت انه رايح مشتكي لامه سالته قال لا ماخبرت احد تقول اروح افتح الصينيه الا والاقي جزء مأخوذ منها الام دخلت واخذت وطلعت تقول هو تارك الباب مفتوح يروح دوامه مايحرص ابدا يقفل تقول اقوله اخاف حرامي يطب او شئ قال لا مافيه شئ انا صار لي كم سنه ماجانا شئ ايش معنا الحين بيجي الحرامي تقول مايهتم فيني ابدا احسه مايحبني مايخاف علي بيته تقول كل مااطلبه شئ يقول لا امور اساسيه يعارض تقول اناقشه يحاول يسكتني لا طلعها ولا راح شهر عسل ولا اي حاجه تقول احس اني مو عروس ولا يدلعها ولا شئ تقول اكشخ له مايتكلم قلت له انت ماتتكلم قال المعزه بالقلب تقول حتى افعال مافيه صار موقف وهاوشها وهي معها الحق لدرجه قالها انتي كذابه تكذبين على امي وتتبلين وهي والله ماكذبت ولا تبلت المشكله هالموقف قد سبق ناقشها فيه وانتهوا منه تقول تخيلي حتى ثاني يوم من زواجنا جا عندي مبوز وزعلان تقول احاول افهم وش فيه ماتكلم وبعد ين قالها هذي مشكله عائليه ماتخصك تقول انا فهمت بعدين انها مشكله بينه وبين اخته واخوه بس ايش ذنبي عروس بصباحيتها يبوز بوجهها وطول اليوم
مكشر ولا يقولها مالك دخل كذا على بلاطه يقولها سوق مافيه الا مرتين بالشهر مقاضي ماتطلعين انا اجيبها تقول بلعتها ماقلت له شئ تقول كل مااطلب شئ مايهتم واجلس اقنع فيه اسبوع وهو يماطل تقول مرات لما نزعل صح هو اللي يراضيني بس بعدها مايتغير يظل زي ماهو
تقول ضاقت فيني الدنيا تناقشت معه بموضوع كان حول موقف مع امه وسبق تناقشوا وفيه وقفلوا الموضوع ورجع هو فتح النقاش وجلس يعاتب ويحط اللوم فيني قالي كذابه وتقول انفجرت فيه قلت له اصلا انت مو داخل مزاجي ولاتهمني وبدق على اخوي يجي يآخذني اصلا امي اللي انت تقول انها تعبي راسي كلام هي اللي اقنعتني فيك وهي اللي خلتني اوافق عليك تقول هو قال مايحتاج تدقين على اخوك انا اوديك لهم تقول زي اللي مو هامه ولا فارقه معه تقول انا قلت له لا اخوي بيجي يآخذني وجا اخوها واخذها تقول ومن بعدها ولا رفع التلفون لاهو ولا امه ولا حس ولاخبر تقول هذا اللي قاهرني وحاز بخاطري تقول والله لو طلقني ماراح احزن الا على حظي وبس
تقول الحين اهلي قالوا القرار بيدك تبينه او ماتبينه براحتك وابوها قال لو جا راح احط له شروط نفذها ولا طلاق طبعا الشروط بيت شرعي مستقل زي ماهو مكتوب بالعقد
هي تقول لي ماحبني ولا هميته وانا بعد حسيت كذا ماحبها ولا يبيها بس ماقلت لها حاولت اهديها ولا ايش معنى تصرفاته هذي واحد توه متزوج يعامل زوجته كذا على الاقل يجامل شوي قلت لها المشكله كلها من اهله وعدم احترامهم لخصوصيتكم كيف يطبون على معاريس اربع وعشرين ساعه وباب شقتك مفتوح طول اليوم اللي هو الباب اللي بينهم هذول ماينفع معهم الطيب تقول ماقدرت جلست اجامل وماابيه يزعل يقول ماتبين اهلي من بدايتها تقول ابيه هو يحس ويتصرف تقول كل نقاش نجلس طول اليوم زعلانين لدرجة مره امه دخلت وهو جالس بالصاله وهم متزاعلين تقول وانا مب عنده تقول قامت قالت له زعلان وضحكت وطلعت بيتها تقول مافهمت حركتها هذي تقول معي مسويه نفسها طيبه وماقدرت افهمها تقول احسه يدور مشاكل معي حتى امور البيت تقول مره نظفت المغسله بكلوريكس تقول جا يقولي ليش انتي ماتنظفين مثل امي وطبخك مو مثل طبخ امي تقول بدت ثقتي بنفسي تهتز صرت اكره اطبخ واخاف لا يخرب مع انها ماشاء الله عليها طباخه وراعية سنع تقول دايم ينتقد ومو عاجبه شئ هي ببيت اهلها لها كلمتها ويحترم رأيها ابوها مثقف واخوانها معها على طول الحمد لله اسرتها مترابطه وكانت عايشه احلى عيشه مع اهلها
اآسفه طولت عليكم ابي مشورتكم يالمتزوجات واللي عندها زوج من هالنوعية وشلون تتصرف الحين وهل تصرفها لما راحت لاهلها سليم ؟
وهل ترجع له ولا تطلب الطلاق وتنهي معاناتها مافيه امل من رجعتها معه
قطف الندى @ktf_alnd
عضوة جديدة
يلزم عليك تسجيل الدخول أولًا لكتابة تعليق.
عاشقة الدراهم
•
الله يعينها ويساعدها
ادعو لها يابنات والله كانت عايشه عند أهلها أحلى عيشه ومرتاحه تقول أحس شخصيتي انهزت منه وابوها مساعد اهله كثير ووقف معهم وله جمايل عليهم كثير حتى هو يقول لها أنا احترم ابوك كثير اتمنى اني وضحت لكم الصوره هي فيها عناد بس عمري ماشفتها تقدم تنازلات هالكثر
الصفحة الأخيرة