وش بتسوين لو كنتي..........؟

السلام عليكم
وش اخباركم؟


والله مدري وش مصحيني من صبح مع ان دوامي متأخر...بس أتوقع كثر النوم::
كنت جالسه فحالي ولحالي..وذبحني الفراغ وقلت مالي ألا أخربطلي موضوع هنا
وش بتسوي لو كنت...

لو كنت نمله في حوش بيتكم..وبعد فرفرة نص ساعه...يالله لقيتلك فتات خبز((شغالتكم سنعه..ومقطعتها النظافه))..
وبعد ماحطيتها على ظهرك..والا بين ضروسك..ومشيت بسلااام وأنت ماسك خط لجحرك...
يطلعلك واحد غثيث تعرفينه يوم كنت انسان...جاا لبيتكم يدورك ولا لقاك..
المهم انه الحين جاي لجهتك...مادرى عنك ولا جاب خبرك..لاحظ ان مقاس جزمته 45!!!!يعني ممكن تتحول بقايا نمله تحتها...
خلااااص قرررب منك...باقي خطوه وحده وتلزق في جزمته..وتروح في خبر كان..
الحين وصلك...وجزمته تبعد عن راسك شبر..وش بتسوين؟!!؟!؟!؟


لو كنت وحده من سندويتشات يجنن شكلها وطعمها...كلها انأكلت الا انت...
لأنهم مخلينك لولدهم الدب اللي صاحي الصبح...وراح يدور 5 مرات على بيتهم ...
يقاله تمارين الصباح...كل هذا عشان يعطونه السندويتش اللي هو انت!!!
وتوه مخلص وداخل يدورك..بعدما هدت حيله التمارين..وشوي يطالع الطاوله الا انت قدامه...
تشقق من الوناسه...وجالك وهو فاتح فمه..مد يده بياخذك...
ياويلك ضروس الدب ماترحم...وش بتسوين؟!؟!؟!؟




لو كنت ريال في جيب واحد بخيل...مايطلع الريال الا بعدما يستخير ثلاث مرات..
كتب ربي لك الحريه من يد البخيل..اللي أعطاك لخباز يمني..يدينه كلها عجين...
خذاك وحطك في جيبه..بعدما سكر الخباز... مر على البقاله اللي جنبه واشتراله مويه وخذاك هندي البقاله وحطك في الدرج..بعد ساعه جاء ولد صغير واشترى من البقاله اللي انت فيها
ورجع له الهندي ريالات و انت واحد منها..رجع الولد للبيت..وكان ابوه عند الباب
قاله: هات الباقي...طلع الولد الريالات وبيعطيها ابوه...
لو كان ابوه هو البخيل اللي كنت عنده...وش بتسوي؟!؟!؟!؟!؟
(هذي وأنا أكتبها انقهرت...كيف لو كنت هذا الريال)




يكفي كذا...وبارجع ان شاء الله أكملها..بس أشوف وش بتسوون؟؟؟

شوفوا لا يطلع أحد ويقول أنا ماأتخيل نفسي حيوان والا حشره!!!!
قولوله تخيل والا ترا بافقع وجهك...الموضوع ليه حطيته في الترفيهي؟!!

......سلاااااااااام.....