Analysis Services
السلام عليكم وكل عام وانتم بخير
ترددت كثيرا في الكتابه هنا حيث اني زائر شبه يومي الى هذا المنتدى احيي القائمين عليه على هذا الجهد الطيب.

اخواتي
لاحظت الكثير من المواضيع هنا هي للبحث عن الوظائف اللي تقول انا حظي طايح واللي تقول ما عندي واسطه واللى ماذلك من الكلام اللي اعتبره نوع من انواع الانهزام وهذا لا يليق بكن
يعني وحده معاها شهاده تخصص حلو و معدلها ممتاز مالقت وظيفه او حصلت وظيفه لكن الراتب مجحف وجلست بالبيت وش تسوي؟ تروح تشتكي عند الناس وتبكي وتقول ما حصلت وظيفه؟ طيب حركي مخك شوي لايصيرتفكيرك محدود بأنك تلقين وظيفه وتاخذين راتب وبس وسعي خيالك شوي أسألي نفسك سؤال ليه ما أبدأ من الصفر؟!!
الله عطاني مخ صح؟ ليه ما افكر؟ليه ما ابدع؟ الله ما عطى المخ للراجحي ولا لبيل غيتس ولا للوليد بن طلال بس صح ولا لا؟
على سبيل المثال
اللى عندها شهاده في الكمبيوتر بدال ماتدور لها وظيفه كمهندسه كمبيوتر براتب قدره 3500 ريال ليه ماتبداء من الصفر وبعدين تفتح لها شركه كمبيوتر وبرمجيات تدخل عليها شهريا الوف الالوف ربما ملايين الريالات هل هذا الشي مستحيل؟ طبعا مو مستحيل اتحدى اي واحد هنا يقول مستحيل
ونفس الشي ينطبق على التخصصات الاخرى
وايضا للاتي ليس عندهم مؤهلات لكنهم يبون فلوس تغني نفسها واهلها
لذلك قررت اني اساعدكم واوريكم الطريق اللي تقدرون تكونون فيها راس مال يساعدكم على الوصول الى طموحاتكم
والموضوع هذا لم اكتبه للجامعيات فقط او للباحثين على وظيفه بل لكل من يبحث عن مصدر دخل يؤمن له حياه كريمه وهذه المشاريع الصغيره مضمونه بتوفيق من الله أن شاء الله لكن يجب عليكم التحلي بالحزم ومافيه شي يجي بالساهل والمشاريع هذي مفصله لبنات الخليج تقدر تدخل 500 ريال يوميا او ربما الف على حسب الشغل
وودي اقول لكم المشاريع على شكل قصه لكي اعيشكم جو الفلوس
لنبداء معى نوره
نوره هذي ما شاء الله عليها طباخه نفسها مره حلو بالطبخ كل من تعشى عندهم مدح طبخها ما يعوقها شي لا صياني لا ذبايح لا حلا كل من جا بيتهم مدح طبخها اذا جاهم ضيوف هي اللي تطبخ بالبيت ما يجيبون شي من مطاعم او مطابخ يعني توب في الطبخ وفهلويه ما شاء الله عليها
نوره تدري ان الديون ذابحه ابوها ودها تساعد ابوها لكنها ماتقدر لانها متخرجه من الجامعه ولا لقت وظيفه وجالسه بالبيت وقعدت تفكر وتفكر واخيرا لقتها وركضت للتيلفون ودقت على اخوها وسألته :محمد بسألك سؤال وش رايك بطبخي؟ محمد: ما شاء الله عليكم اخوياي ازعجوني يبون يتعشون عندي ثاني مره
نوره:طيب ابي سلف الفين عندك؟ محمد :ابشري وانا جاي بجيب معي واعطيك
جاء محمد وطلبت منه انه يوديها للسوق واشترت اغراض مطبخ ومواعين خلاط مولينكس قدور مختلفة الاحجام خرابيط مطبخ
رجعت للبيت راحت دايركت للمطبخ الخارجي المقفل من زمان
نظفته ولمعته تلميع ورتبته ترتيب
دقت على بنت خالتها المتزوجه وقالت لها بعد السلام
هيا انتي مو تقولين انك عازمه زميلاتك في العل بكره على العشاء ودقيتي علي تبيني اساعدك؟ هيا: الا الله يعافيك والله اني شايله هم عددهم كبير ومتوهقه وش اسوي لهم انا اساعدك بس بفلوس . هيا:ههههههه كم تبين؟ نوره: ميتين ريال هيا : ابشري ابيكي تسوين لي الخ الخ الخ الخ. انهبلوا على العشاء زميلاتها وعلمتهم هيا من اللي طابخ العشاء وعطتهم رقمها وانتشر بين المدرسات رقمها يدقون عليها وهي تطبخ لهم ويرسلون السائق يجيب العشاء
نوره اللحين عندها خدامتين وتدخل يومي من ميتين الى خمس مية ريال في الليوم بعد سته شهور سددت ديون ابوها وشرت لأخوها سياره والحمدلله مو ناقصها شي

تعليق:
مبلغ بسيط واستفادت من شي تملكه وهي انها تعرف تطبخ
تدخل فلوس كثير وهي امنه وجالسه ببيتها لا هي اللي اختلطت معى رجال ولاهي تعدت باب بيتها
بالنسبه لي كنت ساكن في مدينه في المنطقه الشرقيه وكنت معزوم عند الاخوه على عشاء تعشيت عنده مفطح في حياتي ماذقت الذ منه قلت له ما شاء الله ام العيال تطبخ ذبايح؟ لان الطبخ واضح انه طبخ بيت قال لي لا هذي وحده ساكنه في قريه قريبه من المدينه اللي ساكنين فيها تطبخ الذبيحه الواحده بخمسمية ريال ولا زم تحجز وتعطيها الفلوس قبل العزيمه بكم يوم
اترك لكم التعليق
ويتبع لمشاريع اخرى في الغد
شكرا
06-09-1426 هـ, 03:56 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
السلام عليكم

اقتباس مشاركة
حيث اني زائر شبه يومي الى هذا المنتدى
اذاً انت رجل

ماقلته صحيح وكلام لا غبار عليه طريق الألف ميل يبدأ بخطوه
ولا بد من المثابره حتى نصل للقمة !!

فأنا تخرجت من الثانويه بنسبة جيد جداً ولم يظهر اسمي في نتائج القبول فأنا مضطره للجلوس في المنزل حتى الفصل الدراسي الثاني

تعلمت الكثير في الأجازه واهمها شيئين

الأولى اني اريد استخدام الأسهم وبما انني لم اكتتب فلم تفتح لي محفظه التداول والمبلغ الذي في حسابي بسيط
فقراري ان اراقب الأسهم واعطي اختي المبلغ المطلوب وبعد ان يرتفع اطلب منها ان تبيعه وتنزل الربح في حسااااااااابي

الفكره الثانيه
بدأت بمهارات قليله بكاميرة الفيديو واحاول تطويرها الى الأفضل حتى اقوم بتصوير اطفال الروضه كل عاااااااااااااام

ان تكن هذا همه تصل للقمه
بارك الله فيك
06-09-1426 هـ, 04:19 صباحاً
 
السلام عليكم
لان الوقت ضيق يا اختي اباروح اصلي اذن الفجر عندنا
لا لا تعطين احد فلوسك يستثمر لك الاسهم انا عندي لك فكره اذا الله وفقك راح تدخلين الملايين اصبري ابعرضها هنا الليوم ان الله احيانا على خير وهي تراها عن الاسهم برضو

سلام عليكم
06-09-1426 هـ, 04:28 صباحاً
 
فعلا كلامك واقعي بس الصراحه صعب شوي ......
انا بعد متخرجه ومالقيت وظيفه بس الحمد لله متزوجه وعندي اطفال ..يعني ما اجتمع علي المصيبتين
ودي ياخوي تساعدني انا عندي مبلغ بسيط من المال ودي انميه مانيب عارفه وشلون وكيف ؟
...ودي احطه بالاسهم بس ما اعرف شيء بها ..
ودي اشتغل وانتج شيء واعبي وقتي بس مادري وشلون ابدا...ودي ....ودي....ودي....بس !!!!!
.......انتظر باقي الافكاروالمشاريع
06-09-1426 هـ, 04:40 صباحاً
 
Dr.s
ماشاء الله تبارك الله اخوي والله كلام ولا ارووووع وكلامك سليم 100%100 وانا معك والله
بانه الوحده لازم ماتحط يدها على خدها وتقعد تستنا الوظيفة وزي ماقلت دكتوري الفاضل مافيه شي يجي بالساهل صح اول ماراح تشتغل البنت بعمل خاص فيها بتتعب فالبداية ويمكن مافيه ربح من بداية عملها هذا اذا ماكان فيه خساير لين ماتوقف على رجولها والناس تعرفها وتعرف شغلها يعني مو زي الوظيفه من اول شهر راتب تستلمه على طول يعني لو زهيد بس بتقول على الاقل بدون تعب انا اشوف ان هذا كلام الناس اللي ماعندها طموح اللي عنده طموح لازم يثابر ويثابر واكيد بيواجه صعاب ومشاكل بس بالنهاية انشاء الله بيوصل والنجاح اللي بيذوقه بينسيه كل شي وبعدين زي ماقلت دكتوري الفاضل اللي ذكرت اساميهم مثل الراجحي مثلا لو القضية قضية عقل وانه عنده مخ كان قلنا معليه لانه ممكن تقول وحده انه هذا عنده عقليه ميب عندي المشكله والكلام موهنا الكلام انه الراجحي ماشاء الله عليه رجل عصامي يعني تعب لين ماوصل للي هو فيه واللي سمعت سيرته بتعرف انه اشتغل فبداية عمره صبي واشتغل بجمع الرماد من البيوت وكان يبيعه والشغل مب عيب ..
يعني انا بعطيكم مثال عن نفسي لا تتحمسون مثال عادي ههههههه مع اني ماكنت ودي اطرح هالشي بس فعلا تفاعلت مع موظوعك اني عملت كمعلمة في مدرسة اهليه تخيلو كم الراتب 1200 ريال ونصاب الحصص 24 *** تخيلو لا والوسائل علي وكل شي انا اسويه حتى المنهج وعلى حسابي الخاص يعني الراتب رايح عليهم هذا كاني ماحطيت من جيبي بصراحة انا باليالله تحملت اني اكمل عندهم ترم و اقنعوني اهلي عشان الخبرة يعني انا والله مافكرت بالراتب بس تعبت من ضغط العمل ولما جا الترم الثاني قالولي اهلي يا بنت الناس كملي خبرة سنة بصراحة ضحكت قلتلهم ومن قالكم اني افكر اشتغل بمدرسة اهلية مرة ثانية ولو اقولكم اني الى الان يمكن فكرت بلا يقل عن 5 مشاريع فهي شوية بس يعني كل مشروع يطلعلي فيه علة شكل بجد كل ماجيت اوصل للنهاية القا مشكلة بس انشاء الله اني ماراح ايأس يعني دايم احاول احفز نفسي بنفسي والواحد لو يفكر مثلا بالنملة اللي جت تصعد الجبل 9 مرات وكل مرة تسقط وبالعاشرة نجحت وقدرت تصعد يعني الاولى احنا يالبشر اللي ربي ميزنا بالعقل نحاول نجاهد انفسنا بالصبر ونتسلح بالايمان بالله ثم بقدراتنا ونثق بانفسنا وهذا اهم شي
بس والله لو اقولكم انه كل مشروع فكرت فيه وماقدرلي ربي اني انجح فيه انه عطاني خبرة كبيرة يعني صرت اعرف اسعار اجار المحلات مثلا اللي بالمجمعات اعرف البضايع والجملة و محلات تصنيع الاكياس وعرفت مثلا لمين الجأ بعد الله لو فكرت مثلا بمحل ولا بمشغل ولا ..
وكل يوم تنط براسي فكرة شكل والله بالاخير لقيتلي فكرة حلوه مره انشاء الله تزبط مافيها خسارة مادية علي وفيها ربح يعني عصرت مخي على هالشغلة بس ماراح اطرح الفكرة لاني مابعد انهيتها وش ثاني ماقبضت ولا ريال منها يعني احب اذا قلت شي اكون صادقة فيه
مايسعني اخوي Dr.S وفعلا انك دكتور الا اني اشكرك لطرحك الجميل والاكثر من رائع
واللي احس اني تفاعلت معه بقوة لدرجة اني اطلت عليكم العذر والسموحة ويمكن اللي خلاني اتفاعل معك ان اللي طرحت اسمها بالقصة سميتي هههههههه والله بصراحة تفاعلت معها وعشت معها ..
تقبلو تحياتي
06-09-1426 هـ, 04:44 صباحاً
 


الساعة الآن 09:04 .

تنبيه: كل ما يطرح من مشاركات في موقع عالم حواء يمثل رأي كاتبه فقط ولا يمثل رأي إدارة الموقع.
© 1998-2017 Hawaa Forum, Co.‏