السلام عليكم و رحمة الله و بركاته
عنوان موضوعي هو لكتاب قرأته الفترة الماضية و حبيت اشاركم بالأفكار اللي استفدتها و رح اشرحلكم بأسلوبي و اتمنى لكم قراءة ممتعة و مفيده :)
بالبداية لفت انتباهي عنوان الكتاب ..... مرات نحاول نحل مشكلة لكن نحط حالنا بمشكلة اكبر و الكاتب تطرق للأخطاء اللي ممكن نرتكبها اثناء معالجتنا للأخطاء
رح اكتب اهم الأخطاء اللي تتكرر بحياتنا
• النصيحة على الملأ:
قال الحكماء: "النصيحة على الملأ فضيحة"
ما في حدا بيحب يظهر بمظهر الجاهل او الغلطان و النصيحه قدام الناس تحرج الانسان المخطيء و ممكن حتى تزيد المشكلة و اكيد اغلبنا مرت عليهم هيك مواقف .... بالنسبة الي بشوف بعض الناس ينصحوا ببعض الأمور ممكن تكون دينية او غيرها لكن للأسف اسلوبهم بالنصيحه علني قدام الكل لدرجة انهم يحرجوا اللي قبالهم و ممكن يشيل بقلبه عليهم لطريقتهم بإحراجه
المفروض النصيحه تكون بينك و بين الشخص و تكون بأسلوب لبق ما في إساءة او تجريح .
• القسوة في التعامل مع المخطئ
مرات نتسرع و نحكم على الانسان المخطيء بأنه سيء لكن ... ممكن يكون جاهل او معذور
ديننا الإسلامي دين رفق ولنا في تعامل و اخلاق الرسول عليه الصلاة و السلام قدوة :
ففي حديث أبي هريرة في صحيح البخاري، قال: قام أعرابي فبال في المسجد، فتناوله الناس.
فقال لهم النبي صلى الله عليه وسلم: (دعوه وهريقوا على بوله سجلا من ماء، أو ذنوبا من ماء، فإنما بعثتم ميسرين، ولم تبعثوا معسرين).
• عدم إعطاء الخطأ حجمه الحقيقي :
يعني ما بنعطي الخطا حجمه الحقيقي يا اما نكبره او نصغره , ممكن يكون الخطا كبير و نتعامل معاه على انه صغير و هيك ممكن يكبر لانه ما عالجناه بالشكل الصحيح او ممكن يكون الخطا بسيط لكن نكبر الامور و نتعامل بشدة و قسوة
المفروض ننظر للأمور بشكل متزن و نعالج الأمور بوسطية .
قال تعالى :
(وَكَذَلِكَ جَعَلْنَاكُمْ أُمَّةً وَسَطاً لِتَكُونُوا شُهَدَاءَ عَلَى النَّاسِ وَيَكُونَ الرَّسُولُ عَلَيْكُمْ شَهِيداً) .
• عدم مراعاة عامل السن عند المعالجة للخطأ
كل فئة عمرية الها مميزاتها و اذا ما تعاملنا معها بالشكل الصحيح ممكن تصير المشكلة اكبر , يعني معاملتك مع الطفل تختلف عن المراهق و تختلف عن البالغ
مثلاً الطفل يحتاج للعطف و الحنان و في بعض الامور بنظر الكبار خطأ لكن بنظر الأطفال امور عاديه
و كمان المراهقين اذا تعاملنا معهم على انهم اطفال و بأسلوب الأمر و النهي ممكن يزيد تمردهم و هم بمرحلة تغير خطيرة و يشعروا انهم بالغين فإذا تعاملنا معهم بأسلوب السخرية و الإستهزاء نفقدهم الثقة بأنفسهم و ممكن نصطدم معهم بكثير من الأمور .... دورنا هو انه نتفهمهم و نمنحهم الثقة بالنفس .
• معالجة الأعراض دون معالجة الخطأ
من الأخطاء اللي نرتكبها اثناء معالجتنا للأخطاء هو معالجتنا للأعراض بدون ما نعالج الاسباب الأساسية للأخطاء
المؤلف ذكر مثال السرقة عند الأطفال و في حال اكتشف الاهل المشكلة يكون العقاب قاسي لكن المفروض انهم يبحثوا عن الأسباب الأساسية اللي خلته يتصرف بهالشكل ممكن يكون المصروف غير كافي او يقلد حدا شافه أو ممكن تكون المشكلة بالتربية أنهم أهله ما علموه يحترم حقوق الآخرين
و أكيد الأمثلة بحياتنا كثيرة ... و مشكلتنا انه نتسرع بإطلاق الأحكام على الآخرين بدون ما نعرف السبب الرئيسي اللي يخليهم يتصرفوا بشكل معين.
مع التنويه انه التماس العذر يكون في حالة الاخطاء غير المقصودة اما بحالة الاخطاء الغير اخلاقية لازم نبحث عن اسباب المشكلة و نعالجها لانه التهاون فيها يؤدي الى ضياع الفرد و المجتمع .
• رشوة الطفل
طبعا هاي اهم نقطة و كلنا نوقع فيها ... ما شاء الله جيل هالايام ما بيعمل شي الا بمقابل ما عندهم شي بلاش ههههههه
مثلا الام تحكي لابنها اذا كنت مؤدب رح اعطيك شوكولاته .... مشكلة هالاسلوب اذا استعملناه بشكل مستمر رح يتعود الطفل عليه طبعا هيك اسلوب مريح للوالدين بالبداية لكن المشكلة الاكبر اذا الطفل تعود انه ما رح يتصرف بشكل صحيح الا اذا كان في مكافأة و المفروض الاهل يعلموا ابناؤهم انهم يتصرفوا بشكل صحيح حتى يكون الهم دور بالمجتمع و يكونوا افراد صالحين .
و كمان نقطة مهمه اذا الاهل وعدوا اولادهم بوعد و ما قدروا يوفوه بسبب ظروف معينة او حتى انهم يكونوا نسيوا الوعد.... الابناء يفهموا هالتصرف على انه كذب و خديعه و يعتبروه امر عادي بحياتهم .
• التأثر بالماضي عند معالجة أخطاء الطفل
انا متأكدة انه اغلبنا عانى من هالامر أثناء تربيته .... يعني اذا كانوا الاباء تربوا باسلوب قاسي و جاف ممكن يعاملوا اولادهم بنفس الطريقة او ممكن يتعاملوا معهم العكس
في آباء عانوا من اسلوب اهلهم القاسي و الصارم فحبوا انهم يتعاملوا مع اولادهم باللين و اللطف لكن بشكل مبالغ فيه ... دلال زيادة عن اللزوم .... عدم معاقبتهم عالأخطاء مهما كبرت ..... كل طلباتهم مجابة
لدرجة يكبر فيها الابناء و ما عندهم القدرة على تحمل المسؤولية و عند اول مشكلة تواجههم و يكون حلها صعب يشعروا بالاحباط و ممكن ينهاروا !!
بالمقابل في اباء كمان عانوا من قسوة اهلهم و مثل ما اهلهم قسوا عليهم هم كمان يقسوا على اولادهم
رح احكيلكم عن موقف لوحده اعرفها .... ابوها كان وضعه المادي صعب و بالرغم من هيك كان دايما يحاول يلبي كل شي لاولاده لكن هي كانت علاقاتها مع ناس اغنياء فطبعا كانت تقارن حياتها بحياتهم و تشوف انه هي اقل منهم ..... لما تزوجت و جابت اولاد دايما تعطيهم مصروف اقل من اللي هم يحتاجوه بالرغم من انه وضعها المادي ممتاز لكن هي بدها يحسوا بالمعاناة مثلها !! و ما بتتخيلوا قديه معاناة اولادها من هالموضوع و قديه اثر على حياتهم
هي ابوها كان مجبر و كان يحاول على قد ما يقدر انه يأمن الهم اللي يحتاجوه لكن هي ما في شي يجبرها انها تتصرف بهالطريقة !!
اكتفي بهذا القدر و اتمنى انه الموضوع كان خفيف لطيف و انكم استفدتوا منه
اذا الموضوع عجبكم و حابين اكمل ممكن اكتب جزء ثاني :icon31:
و اللي حابه تستفيد اكثر تقرأ الكتاب :
أخطاؤنا في معالجة الأخطاء
المؤلف : عادل فتحي عبدالله
لا تنسوني من دعواتكم الطيبة :26:
searose @searose
محررة
يلزم عليك تسجيل الدخول أولًا لكتابة تعليق.
searose
•
كلام جميل جدآ يعطيك العافيه عالنقلكلام جميل جدآ يعطيك العافيه عالنقل
و اياكم
فعلا هو مفيد لتربية الابناء .... أسأل الله ان يرزقك الذرية الصالحة الطيبة المباركة اللهم آآآآآآآمين
الله يعافيكي ياااااااااارب
تعليقك الجميل
شكرا اخواتي لردودكم ... نورتوا الموضوع
فعلا هو مفيد لتربية الابناء .... أسأل الله ان يرزقك الذرية الصالحة الطيبة المباركة اللهم آآآآآآآمين
الله يعافيكي ياااااااااارب
تعليقك الجميل
شكرا اخواتي لردودكم ... نورتوا الموضوع
الصفحة الأخيرة
الموضوع يحتاج تركيز شوية و النصايح الي يتضمنها مفيدة جداً لتربية الأبناء ....