Analysis Services
  • «
  • <
  • 1
  • 2
  • 3
  • 4
  • >
  • »
شوربه الشوفان

خذيها جهازه مغلف من منتجات ماجي

بس تحطين ماي والمغلف وحبه ماجي

اسهل شي

انا مثلك ماعرف اسويها بس خذت المغلف اسهل شي
07-09-1434 هـ, 06:34 صباحاً
 
طريقة امي غير عن الكل احنا مانكشنها بالبصل والثوم لا بس نحط طماطم وبهار وورق غار وليمون اسود (لاتخلين الليمون يطول عشان مايطلع طعم بس ربع ساعه وخرجيه ) وفلفل رومي ولحم مقطع صغار حركيهم مع بعض الين يتسبكون معاك وبعدين ضيفي ٣ اكواب ونص مويا وخليها الين تستوي اللحمه نص استوى وبعدين ضيفي لها ثلاث ارباع كوب شوفان رشي خفيف وحركي وارجعي رشي خفيف وحركي عشان لايتكتل معاك الشوفا وملحي وخليه على نار هاديه تقريباً نص ساعه واذا حسيتيها ثقيله زيدي لها مويا شوي وبالعاافيه اذا ضبطت معاك بلغيني ع الخاص ياحلوه ♡♡
07-09-1434 هـ, 06:42 صباحاً
 
ياهلا فيك وعادي احنا قبلك الله يهنيك بحياتك ويوفقك كذا مانعرف بس اللي حاب يتعلم يتعلم ولازم نخطي علشان نتعلم مو من مره مرات ومحاولات لين تضبط الشغله

المهم شوربتي غير مافيها شئ صعب وبالمقدار
اول شئ تاخذين مقدار ثلاث فناجين قهوه من الشوفان وتنقعينها بكاس ونص ماء عادي لاحار ولابارد علشان يذوب الشوفان ولاياخذ وقت بالطبخ

وبعدين
تكشنين بصله متوسطه بملعقة وسط زيت مع فصين ثوم اذا انتي تحبينه اوبدون ثوم وحبتين طماط ناضجه حسب الرغبه تقطعينها صغار او تطحنينها المهم تكشنينها لين تذوب الطماط

بعدين نص صدر دجاج مكعبات او مقدار فنجان قهوه لحم مكعبات صغار او اكثر حسب الرغبه
ومكعب ونص ماجي ونص ملعقه وسط بهار مشكل وشوي فلفل اسود ونضيف ملعقه او ملعقه ونص صلصه

وبعدين نضع عليهم بعد ماتتسبك الدجاج ويذوب الطماط سبع اكواب ماء وتترك نص ساعه الى ان ينضج اللحم
وبعدين نحرك الشوفان اللي ذوبتيه بالماء في القدر ويحرك بسرعه ونخفف النار علشان مانفور

وعشر دقايق تكفي لطبخها

ملاحظه
ممكن اضافة حبة ليمون اسود صحيحه بس فتحه بالسكين

ممكن اضافة حبة كوسا وحبة جزر وسط مبشوره مع الطماط

اذا ثقيله تخفف بالماء ويعدل الملح حسب الرغبه وتقدم. مع الملاحه والفلفل الاسود والليمون الاخضر

وبالعافيه حبيبتي
07-09-1434 هـ, 07:18 صباحاً
 
افضل وأسهل طريقة وراح يمووووت زوجك عليها

حطي بقدر ماء ولحم وحطي هذي البهارات بشاش بهارات حب صحيحه مو مطحونه فلفل اسود كمون كزبره شيبه قرفه هيل حيصير حجم السرة أو الشاش قد البيضة
اطحني علبة طماطم أو طماطم طازجة مع ملعقه صلصل أما الطماطم العلب ما تحتاجين صلصل وخلي اللحم لين يستوي
وبهذا الوقت انقعي الشوفان عشرة ملاعق بمويه حارة ولما تستوي اللحمه حطي الشوفان وحطي الملح تحكمي بكثافة الشوربة حسب رغبتك

وبالعافيه
07-09-1434 هـ, 07:45 صباحاً
 
شوربتي لذيذة مره وكل من ذاقها يمدحها ومااكشن لها ابد!!
لان السر مو في الكشنة السر في الماجي والبهارات العدله مو المطحونه لا عدله وانا احط (ليمون اسود فلفل اسود كزبرة ناشفه كمون دارسين ورق غار اذا متوفر وحبة او ٢ مسمار وهيل)
واحطهم في زي هذا بااستثناء الليمون الاسود وورق الغار:



اما الطماط فالمخلوط الذ من الصلصلة ولو صلصله افضل شي صلصة كي دي دي لذيذة
وممكن تضيفين بصل وثوم مقطع صغار مع الشوربة وهي تطبخ انا احياناً اضيفهم واحيانا اضيف بس ثوم
وبالنسبة لكمية الشوفان ٤ او ٥ ملاعق تكفيكم كشخصين وراح يثقل مع الطبخ وممكن يحتاج اضافة مويه
اما المويه انتي توزنينها بالنظر
بالنسبة لطريقتي قريبه كثير من كذا رد هنا بذات اللي حطت طريقة امها اهم شي ماتضيفين الشوفان ع القدر مباشرة وهو يطبخ لانه راح يتكتل معك حطي جزء من المويه فالقدر يطبخ مع الماجي والبهارات والطماط واللحم وهو الالذ او الدجاج والجزء الثاني من المويه يكون بارد او عادي حطي فيه الشوفان وحركيه عشان تضيفينه بعدين للقدر.
07-09-1434 هـ, 07:55 صباحاً
 


الساعة الآن 06:32 .

تنبيه: كل ما يطرح من مشاركات في موقع عالم حواء يمثل رأي كاتبه فقط ولا يمثل رأي إدارة الموقع.
© 1998-2017 Hawaa Forum, Co.‏