أم القموور @am_alkmoor

عضوة جديدة

الحل الامثل لمن أراد التخلص من القمممممل بإذن الله

السلام عليكم ورحمة الله وبركاته ..

حوائياتي الجميلات :33: << مدري الجمع يصح بهذي الطريقة او لا لكن يبدو أنه ضرب من ضروب المؤنث السالم وانتم ان شاء الله كلكم مؤنث سالم :buck:

مالكم بالطويلة انا بنت جميلة ربي بلاني بالقمل (( إيه القمل لاتضحكون لأني عرفت وعمر معرفتي بهالشي أسبوع بس إن القمل ماله دخل بالنظافة أبداً وإن كانت عامل مهم جداً في محاربته أقصد إنه قد ينتقل بالعدوى وهذا هو السائد للأسف وقريت كلام أطباء وأخصائيي شعر بهذا المجال وقد يكون ابتلاء من الله فإذا رأيت مصاباً فقولي الدعاء المشهور " الحمدلله الذي عافانا مما ابتلاه به وفضلنا على كثير ممن خلق تفضيلاً مع نزع الكبر والتقزز والاشمئزاز من نفسك فهو مرض حاله حال سائر الامراض التي تصيب الجسد )) << يعلم الله أني عقدت العزم أن أجعل لهجتي النجدية هي التي تحتوي موضوعي لكن الطبع يغلب التطبع وانا اختكم فتحملوا ماترون من الكلمات الفصيحة مخلوطة بالعامي ولاتدققون :biggrin:

أهم شي ان الله بلاني بالقمل مع اني :

1- إنسانة متزوووجة وهذي المصيبة الأعظم وانتم فاهمين وش أقصد :06: <<فكان علي معالجة الامر بسسرية تااامة..

2- حامل بالشهر الثامن أخطر الشهور وأكثرها عرضة للانجاب المبكر إذا اغفلنا الاخطار الاخرى:44:

3- إنسانة نظيفة حد الوسواس أقصد نظافتي الشخصية لدرجة إن شعري قد يغسل باليوم ثلاث مرات بعد زيارة هذا الضيف الثقيل واللي أتمنى ان الله يخفف وطيته ومرة يوميا قبل يجيني شي

4- عندي ولد عسووولي هو بكري عمره سنة وثلاث شهور وجاه ماجاني والحمدلله على كل حال لأن هو اللي خلان أكتشف إن عنده أولا ثم عندي لانه يبدو لي انتقلت له العدوى مني :icon36:

جان القمل قبل شهر تقريباً او اكثر وتحديداً بداية رمضان وكنت احك راسي دايماً ولاني نظيفة ابدا ماخطر ببالي انه قمل وقلت يمكن جفاف وقررت ازور دكتورة شعر تكشف ع شعري لكن ذيك اليوم جالسين انا واهل زوجي ووليدي حياتي بس يحك رااااسه قالت جدة زوجي والله ان ولدك هذا براسه بلا (( ماصرحت انه قمل )) لاني كنت عندهم ولله الحمد مضرب المثل بالنظافة وولدي يومياً مايروح لهم الا على سنقة عشرة زي مايقولون مع اننا ساكنين بنفس العمارة يعني اوقات يروح لهم باليوم مرتين ثلاث بس الحمدلله يوميا اروشه واحيانا باليوم مرتين وهذا شي حلو لان جونا حار نسبيا فخلي وليدي يتبرد :biggthump بس خالتي قالت مستحيييييل اذا كانت تروشه باليوم مرة واثنين << اكتشفت ان عندها علم مسبق بالموضوع يمكن من كثر مايجيهم شعره مبلل << ياااحبي للاستطرادات ترا منب اقرا للطنطاوي كثير هاليومين :icon20: الله يغفر له ويرحمه انا اشهد اني تعلمت منه كثيييير انصحكم تقرون له:33: << لاعاد هذا مب استطراد خطمة شنيعة بس قلت لكم من اول غمضضوا :icon35:

أهم شي وابتدت معاناتي ومعاركي وصولاتي وجولاتي ,, كل شي جررربته منها :

1- طريقة التايد المعروفة بالنت واللي تهد حيل بنت البنوت وش عاد حامل وبالشهر الثامن ,, وخففت كثيييير بس برضو

2- بخاخ بارانيكس بعدين خفت انه ممكن يؤثر علي لأني حامل فتركته يمكن مرة او مرتين استخدمته بس ..

3- الخل مع التمشيط اليومي (( خل مخفف بمويه )) لانه ينزع الصيبان ويمنع التصاقها بالشعر ..

4- زيت الزيتون قالوا انه مفيد بشرط انك تغرقين الشعر فيه وتكتمينه وماتتروشين الا من ثاني يوم لكن بحكم اني متزوجة وصعبة انام بالزيت فكنت احطه النهار وقت مايكون زوجي مب فيه ..

5- شامبو الديتول للاستخدام الشخصي تفركين الشعر فيه بعدين تمشطين بمشط القمل أو صابونه الديتول للبشرة الحساسة عشان ماتضر شعوركم (( وما اخفيكم اني ماكنت اهتم ضر شعري او لا اهم شي ينظف من هالشي

6- الحنا :kiss2: ودعووووني اقف وقفة اجلال وتحيييية لهذا الشي الجميل فهو اللي كان سبب من الاسباب بس باقي السبب الاعظم اصبروا ..

7- الدعااااااااااااااااء والله يابنات اسأل الله انكم ماتمرووون باللي مريت به بس بالفعل

" سهام الليل لاتخطي ولكن ** لها أمد وللأمد انقضاء "

صرررت ادعي ربي ليل نهار ان الله يخلصني من شره وكنت ادعي بالسجود وبالثلث الاخير من الليل ( لاتستغربون ترا الموضوع قرب يسبب لي عقدة نفسية :( لكن الالتجاء الى الله دايما يفك العقد ويشرح الصدر وهذا خلوه ديدنكم بحياتكم كلهااا

8- عرفت من قرائتي برضو ان القمل ممكن يكون عذاب يسلطه الله على احد من عباده لأنه عذب به بني إسرائيل " فأرسلنا عليهم الطوفان والجراد والقمل والضفادع والدم آيات مفصلات فاستكبروا وكانوا قوما مجرمين" وأي عذاب عذب به اقوام سابقون يكون مطلقاً لمن بعدهم كالطوفان والاعاصير والفيضانات وغيييرها ,, فحاولت قدر الامكان الاصلاح من نفسي واعدت النظر في جوانب عبادتي وحاولت اصلاح الكثيييير منها ..وأسأل الله ان يقبل توبتي ويغسل حوبتي :(

9- الرقية الشرعية يوميا ما انام الا انا قاريية الفاتحة سبع مرات وماسحة على شعري ,,, +" اللهم رب الناس أذهب الباس اشف وأنت الشافي لاشفاء الا شفاؤك شفاء لايغادر سقماً " ثلاث مرات ,,,+ " باسم الله (ثلاث مرات) أعوذ بالله وقدرته من شر ما أجد وأحاذر مع وضع اليد اليمنى على الشعر .. واليقيين بان الله هو الشافي وحدده لاسواه ..

10- اخيراً تغيير اكياس الوسائد ومفارش ولدي وفوطنا مرة يومياً وغسلها بديتول مع التااايد وتعقيم فرش الشعر بديتول + موية مغلية ,, وكنس الموكيت والكنبات اللي ممكن ينسدح عليها المصاب وهو بهالحالة وليدي حبيبي عشان نضمن انه ولى وهرب من البيت الى غير رجعة ان شاء الله

وبس تقريباً أقدر اقول ان شعري وشعر ولدي نظف الحمدلله والفضل لله وحده ومازلت مستمرة على الحنا للوقاية لانه شكله(القملة الموقرة) ماتطيق ريحة الحنا بالاضافة الى ان الحنا من اقدم علاجات مشاكل الشعر كالتقصف والجفاف ومحاربة الطفيليات والبكتيريا ..

هذا وأسأل الله العلي القدير أن يجعل كلامي هذا وتجربتي نفعاً لكل من أراد أن ينتفع بها وأن يغفر لي زللي وتقصيري وأن يشفيني وولدي من هذا الدااااء ويشششفي ويعااافي كل مبتلاة به ويعصم كل من لم تبتل به ولا يجعله يعرج على بيتها يوما ولا يعكر صفو حياتها :heart:

حسيت اني مألفة كتاب :rolleyes: وعلى فكرة احلل نقل موضوعي بكافة الطرق والوسائل دون ذكر المصدر ان احببتم عل الله ان يرفعني بذلك عنده درجات او يضع عني اوزار او اكسب دعوة في ظهر الغيب تكون فيها سعادتي الابدية

وبنهااااية كلامي عندي سؤااااال ضروري ضروري ضروري تجاوبونن عليه زي ماعودتونا يا أحلى حوائيات :luvkiss::39::love:

الحين انا حنيت شعري مرات ومراااااات مع اني كنت صابغته قبل احمل بندقي والسبب محاربة القمل صحيح ان شعري رجعت له حيويته ولمعانه زي ماكان قبل الصبغة بس اني ارغب بخوض غمار الصبغة مرة اخرى مع كرررهي الشديد لها وحقدي الدفين عليها فهي السبب الاول لدمار شعري بس بحكم اني بولد بعد فترة وقالوا ان التغيير مطلوب بعد الولادة (( ومدري من سن هالسنة )) صحيح اني منب ملزمة بها بس برضو ودي فالسؤاااال هو :

هل ينفع اصبغ بعد الحنا ولو صبغت وشعري فيه اثار الحنا وش ممكن يصير وسمعت ان صبغة artecolor ممتازة وتجيب لك اللون اللي تبين حتى لو كنتي محنية قبل فترة بسيطة فوش رايكم ووش اللون الدارج هالسنة .؟؟؟؟

أحببكم في الله

22K

يلزم عليك تسجيل الدخول أولًا لكتابة تعليق.

تسجيل دخول

استالين • 10 سنوات

ماينفع تصبغي بعد الحناء ابدا حتى تمر سنة

القمل الناس الذين عندنا يتخلصون منه ب القطران يموته ويموت بيضه

الله يكفينا

متجر ضي القمر • 10 سنوات

مشكووره ويعطيك العافيه ع ذكر تجربتك

قلبي.الصغير • 10 سنوات

انا سمعت تستخدمين زبدة في شعرك 6 مرات قبل لا تصبغين عشان مايخرب الشعر ويطلع اللون مضبوط وما ادري كيف الطريقة بالضبط
بس للامانه ماعمري جربتها ان شاء الله في المستقبل
ومشكوووووره على المعلومات
والله معاكي

أم القموور • 10 سنوات

الله يرضى عليكم ياقمرات وششكراً عالردود
ليه ماينفع يااستالين ؟؟

يعني اللون مايضبط او يعدم شعري او ايش بالضبط ؟؟

قلبي الصغير ,, متجر ضي القمر الف شكر الله يرضى عليكم

هاي نت • 10 سنوات

الي سمعته ان اللون مايضبط وممكن يطلع برتقالي

لكن انا معاك يا ام قمور قلبا وقالبا توني محنية قبل اسبوع

وراح اصبغ والي يصير يصير :hahaha:

انا قرات هنا ان اذا بتصبغين بعد الحنا لازم تكون الصبغة غامقه من درجات البني

لوانا مفكرة اصبغ بالصبغات الطبيعية وقاعدة ادور كم اسم

بسال عنهم في صيدليات النهدي

والله الموفق