السلام عليكم

كيفكم حبيباتي

حابه استشيركم بموضوع

اناعندي مشروع صغير

استيراد ملابس وخلافه من الخارج كوريه صينيه امريكيه . . الخ

بديت المشروع قبل فتره قصيره لمجرد تضييع الوقت واستفاده خبره وطموحي يكون اكبر اني افتح بوتيك خاص فيني قريب بإذن الله

تعرفت على زبونات ينحطون ع الجرح يبرى ادب واخلاق وذوق وتربيه

تقرييا 99 % من زبوناتي استحي من ادبهم واخلاقهم

لكن فيه فئه ماادري كيف اتعامل معها

انا سياستي اوضح كل شي بالتفصيل الممل من صور متفرقه + تصوير شخصي + اوضح القياس لكل مقاس بالسانتي محيط الصدر كذا محيط الخصر كذا ... الخ

واي وحده تطلب تصوير اضافي اصور لها بكل رحابه صدر


مع ان هالشي ياخذ وقت وتعب لكن اقول بنفسي اهم شي تكونين راضيه عن شغلك

وقبل أكد طلب الزبونه اسألها القياس مناسب ؟ تأكدتي من القياس ؟ اعتمد الطلب ؟

الغالبيه ترد وتكون فعلا متأكده من كل شي وتطلب بثقه , وترجع تشكرني وتمدح

لكن فيه فئه مهما وضحتي لهم كل التفاصيل تطلب بدون اي تركيز وبااستعجال

واذا وصلها الطلب بدت ترسل وتلح برجع مانفع ماضبط طيب

وين تعبي وين مجهودي وين ردي على اسألتك وطلبي تتاكدين من القياس وتشوفين التصوير بوضوح ؟

تعبت نفسيا معهم وقفت هاليومين الى ان ارتب افكاري واحط قوانين



والي يغبن قبل فتره وحده خذت غرض وماناسبها الحجم قلت لها اسفه انا ماارجع ولا ابدل لاني وضحت كل شي بالتفصيل الممل وأكدت عليك اكثر من مره لو فيه عيب ابشري بكل شي يرضيك مبلغك يوصلك بدون ماترجعين القطعه

بعد كم ساعه رجعت ترسل لي القطعه رديئه!!

من اجمل القطع واكثرها طلب تقول عنها رديئه قسم بالله بكيت قهر وغبنه الهدف ترجيع الفلوس باي طريقه كانت

وين كانت عيونها لما شافت انها صغيره ما انتبهت انها رديئه الا بعد ما قلت لو فيها عيب مالك الا الي يرضيك والله حرام الي يصدق منهم ويخاف الله يستغفلونه


اي وحده تلقى لو عيب صغير فورا اسالها وش الي يرضيك مهما كان العيب تافه وبسيط عشان ابري ذمتي

بعضهم ترفض رفض تام اني ارجع فلوسها او حتى اعوضها وتقول مايستاهل

وبعضهم اسوي لهم خصم بقيمه القطعه متى ماحبت

من الامثله زبونه عندي قالت وحده من تسكيرات الحلق مو موجوده قلت لها امريني بالي يرضيك وفعلا عوضتها بخصم بنفس قيمة الحلق متى ماحبت بدون ماتطلب البنت كانت جدا ذوق ورفضت في البدايه ..

زبونه ثانيه لقت واحد من الازره لونه باهت شوي ومو واضح على كلامها فورا سألتها وش الي يرضيك وفعلا عوضتها بنص قيمة القطعه مع احتفاظها فيها


لكن القياس مااعتبرها عيب اتحمله انا لاني اوضحه بالتفصيل ليش الوحده تتعجيز تاخذ لها متر وتتأكد !

اتمنى اخواتي التاجرات تفيدوني بخبراتكم مع التعامل مع بعض البنات
لاني فعلا عاجزه عن التعامل مع بعضهم واكتفي بحسبي الله ونعم الوكيل


ماادري هل اطنش ولا ارد وتنتهي مهمتي بتسليم الطلب ؟

لكن مايطاوني قلبي لاني مااحب احد يزعل مني او اظلم احد ,

خاصه بعض البنات ترسل بالحاح شديد وترجي وانا وقتها انحرج وماادري اوفق ارجع لها لكن بداخلي احس بظلم وقهر بعد تعبي معها

اقبل ارجع القطع !! هذا الشي بيسبب لي تعب اكثر وبفتح باب انا في غنا عنه واغلب هالفئه ماراح ترضى تدفع للمندوب مره ثانيه يعني بتحمل خساره وتعب

وفوق هالشي انا مااقبل اعرض شي مستعمل او ملبوس حتى للقياس اتمنى كل قطعي تكون نظيفه من كرتون الشحن الى الغرفه الي مخصصتها لشغلي الى التغليف فورا

عشان اظمن سلامتها ومايجيني كلام في بضاعتي

اخاف اقبل اني ارجع وترجع لي القطع حالتها حاله ويخرب شغلي وسمعة شغلي بسبب التبديل والترجيع والمشاكل والحوسه الي بتجي من وراه

مدري هل استمر على سياستي وضميري مرتاح لاني ما ظلمت احد ووضحت كل شي با ادق التفاصيل تأدوني ؟!

اتمنى تفيدوني بتجارب وخبراتكم حبيبات قلبي واكون جدا شاكره لكم

لاني محتاجه احد فعلا يوجهني

مشروعي ناجح بفضل ربي زبوناتي عددهم كبير الحمدلله بمده قصيره ما ابي يكون هالامر سبب في ايقافي لمشروعي

اهلين اختي
الله يوفقك ويبارك لك في رزقك

انا حلمي افتح مشروع يدر علي بس مابعد كتب الله لي نصيب

انا ممن رأيي
ان تكتبين لي شروط البيع وشروط الاستبدال والترجيع
ولما تطلب منك زبونه تتأكدين منها انها قرت الشروط ولما بعدين ترجع تقولك اي شي قولي لها اني سألتك عن الشروط وووضحت موافقتها عليه
واذا اصرت الزبونه وضحي لها مشكله المندوب واذا عندها استعداد تدفع له مره ثانيه
اقتباس مشاركة  (سلمى11)
اهلين اختي
الله يوفقك ويبارك لك في رزقك

انا حلمي افتح مشروع يدر علي بس مابعد كتب الله لي نصيب

انا ممن رأيي
ان تكتبين لي شروط البيع وشروط الاستبدال والترجيع
ولما تطلب منك زبونه تتأكدين منها انها قرت الشروط ولما بعدين ترجع تقولك اي شي قولي لها اني سألتك عن الشروط وووضحت موافقتها عليه
واذا اصرت الزبونه وضحي لها مشكله المندوب واذا عندها استعداد تدفع له مره ثانيه


واياك حبيبتي الله يرزقك من واسع فضله

حبيبتي انا قبل اعتمد طلبها اسألها مره ومرتين جبتي متر طابقتي القياس عليك بالمتر
ومع هذا تقول ايه مناسب وابيه ومقاسي و و الخ


واذا وصلها قالت لا مانفع ما جاء علي
انااعتبرها اخلت بالشرط وما ظلمتها اذا رفضت ترجيعها

انا مشكلتي لو وافقت ارجع وابدل الناس مو كلها نفس بعض في الامانه
وحنا نشوف المحلات احيانا نشتري قطع ونلقى فيها روائح او شعره او ريحه عطر
بسبب التبديل والترجيع


انا لوقبلت بالتبديل والترجيع ووصلتني قطعه حالتها مثل ماوصفت فوق بضطر ما ابيعها ابدا لو بعتها بكون خسرت زباين مهمين لي وبشوه سمعه مشروعي وممكن ينقال اني ابيع ملابس مستعمله !


لذا انا اجتهد بكل طاقتي اني اوضح كل شي قسم بالله اني اتعب بالشرح والرد ع الاستفسارات مهما كانت صغيره ويضيع من وقتي ساعات في التصوير والرد ومتابعه الطلب ومع هذا القى فئه لا مباليه تبي تاخذ وترجع وتبدل على هواها
اجل افضل شيء انك تحطين شرط يمنع الترجيع والاستبدال بشكل نهائي أذا لم تأخذ الزبونه مقاساتها بشكل صحيح

وخلاص اصري علي رأيك انتي ماظلمتي احد وهذا كان من شروط البيع وهي وافقت عليه
والحمد لله ان الزرق بيد الله سبحانه مو بيد عباده
وبما انك امينه ومخلصه في عملك وبضاعتك لا تهتمين بها الفئه المحطمه
-------------


الساعة الآن 09:13 .