السلام عليكم حبيباتي..
يا بنات أنا عندي فستان زفافي تصميم دار أروشي..جميرا..
ومحد لبسه غيري، يعني ملبوس مرة وحدة فقط..
بس المشكلة، إني سافرت بعد زواجي على طول مع زوجي لبريطانيا، والفستان ظل معلق بدون استخدام أو عرض
لفترة طويلة (سنتين تقريبا).. الحين بعد ما استقريت في البلد مرة ثانية عرضته على أكثر من حرمة من اللي يأجرون فساتين أفراح..
وكلهم قالولي نفس الكلام.. "الفستان قصته رائعة وحلو، بس مشكلته إنه عليه فراشات وهالشي مش مطلوب كثير ولا عليه طلب"..
فيعتذرون لي ويرفضون بكل ذوق يعرضون لي الفستان للإيجار أو البيع..

المهم..
اللي عندها مصلحة في الفستان، يعني اللي عندها مشغل ممكن تزيل الفراشات وتركب على الفستان شي ثاني، أو مجرد تزيلهم فيصير موديله بسيط وكلاسيك ومطلوب..
بوصف الموديل بالتفصيل،، وللي عندها اهتمام تشوفه ممكن أصوره وابعث لها الصورة..
هو فستان بسيط أبيض ثلجي، له رقبة مرتقعه (هاي نك) من الشك على شكل شبك، الاكمام قصيرة (صينية)..
فالصدر والاكمام والرقبة والظهر من النص لين فوق عبارة عن شبك مشغول تطريز يد ناعم ولامع..
الفستان مخصر ويوسع من الخصر وتحت (A cut), ذيله قصير..
منثور على الفستان من الرقبة لين أسفل الخصر فراشات dragonfly مجسمة (بارزة)..
والطرحة (كل الشغل فيها)، عبارة عن تول طويل (طول الفستان من ورا) منثور عليها بالتدريج نفس الفراشات البارزة (من فوق خفيف ويتدرج لحد ما يزيد عددهم في نهاية الطرحة)..

الفستان راقي جدا باللبس خصوصا مع إضاءة العرس اللي تبرز الفراشات أكثر.. ولكن للأسف، مر عليه وقت وما استفدت منه مع إنه مكلف كثير..

عموما.. اللي تشوف لها مصلحة فيه، سواءاً تبغي تأجره أو تعيد صياغته وترجع تبيعه فعلى الرحب والسعة..
وللصور أو أي تفاصيل ثانية عن سعر التكليف وغيره ابعثيلي على الخاص (أنا طالبة فيه ربع قيمته في حالة البيع).. لأني بس أبغي حد ثاني يستفيد منه بدل ما هو عندي كذا، وأنا ما عندي أي خبرة في التفصيل أو الأجار ولا لي وقت للمتابعة صراحة!
يا ريت اللي عندها مصلحة فيه أو تعرف حد ممكن يبغيه، أنا أفضل إني أبيعه لأن مافيني على الاجار وصدعته، بس بعد إذا حد حاب يأجره ما عندي مانع..
على فكرة أنا من الامارت..

وسلامتكم



الساعة الآن 02:27 .