زوجت زوجها وصبرت فكان جزاءها؟؟؟؟؟؟؟

نقلا عن اخت في احدى المنتديات اعجبتني فنقلتها لكم..

اكيد كل اللى هيقرأ العنوان هيستغرب ولما هتقرو الموضوع هتستغربو اكتر
انا نفسى مستغربه من نفسى

الموضوع بيبدأ من 15 سنه كنت انا بنت لسه مخلصه ثانويه عامه وحلوه ومؤدبه وكل الناس بتشهد بأخلاقى وجمالى
كان لينا جارنا مخلص كلية تجارة محترم متدين ابن ناس ومن عيله
اتقدملى واهلى اترددو شويه وبعدين قالو جواز البنت ستره
طيب والجامعه يا بابا ؟؟ قال لو جوزك عاوزك تدرسى ادرسى
المهم جه البيت واتخطبنا واتكلمنا فى موضوع الدراسه قالى لو عاوزه تكملى كملى وانتى فى بيتنا عادى انا مش ضد التعليم بالعكس بحب البنت المثقفه
واتخطبنا 8 شهور بالظبط وف التاسع اتجوزنا وكنت انا بدأت سنه اولى ودخلت كلية آداب وهو ساعدنى كتير لحد ما خلصت الاربع سنين وكانو كلهم بجيد جدا وامتياز والحمد لله
فات على جوازنا خمس سنين وفى حاجه مهمه ناقصه ,, الاطفال
مفيش حمل ونروح للدكاتره يقولو مفيش مشاكل عندك ولا عنده المشكله كلها ان جيناتكم مش متوافقه يعنى هو يخلف من غيرى وانا اخلف من غيره لو ربنا اراد
المهم فاتت كمان سنتين وانا ع الحال ده سبع سنين بصلى وبدعى ربنا يقر عينى بطفل وفكرت اتبنى طفل قالى مربيش عيل مش من صلبى
قولتله اتجوز ولحيت عليه كتييييييييييييييييييير اوى وهو كان الموضوع ع باله بس كان بيرفض استحياء منى لانى انا اللى عرضت عليه
المهم شهر فى التانى فى التالت قالى ماشى بس انتى اللى تختاريهالى حزينة ومكسوفة
قولتله حاضر ومن عنيا
وفعلا بدأت ادورله على عروسه تكون بنت حلال واعرف اعيش معاها لانها كانت هتتجوز معايا فى نفس الشقه يا خبر
اهـ فى نفس الشقه
لا وفى الاوضه اللى جنبى كمان
لغاية ما لقيت بنت تقريبا كانت قدى فى السن بس لسه مكانش حصلها نصيب روحتلهم البيت وفاتحت اهلها وفكرونى مجنونه فى الاول بس شرحتلهم الوضع واد ايه انا بحبه وعاوزاه سعيد وعارفه انه نفسه يبقى اب عشان كده هاجى على نفسى واخطبله
طبعا طلبو مهله يفكرو وفى الوقت ده امى وامه وابويا وابوه كانو مهاجمينه بشده ازاى يعمل كده .. انا الحمد لله حمايا وحماتى بيحبونى يمكن اكتر من امى وابويا كمان وراضيين عنى وربنا يخليهوملى ويخليلى امى وابويا
وكان كله بيقولى يا قساوة قلبك تخطبى لجوزك بالسهوله دى
بس مكانوش حاسين بالنار اللى مولعه فيا
المهم الناس وافقت واتخطبو واتجوزو فى اقل من شهرين
وتخيلو يوم الفرح كأنه كان فرح ابنى لبست واتمكيجت ورقصت فى الفرح وانا بصرخ من جوااايا بس مبينه للناس كلها انى فرحانه
وروحم هما ع البيت وقعدت عند امى اسبوعين وبعدين روحت بيتى وبعد 10 شهور شرف اول طفل
ربنا يخليه ويبارك فيه يارب
عاملت امه بما يرضى الله وهى كمان حبتنى عشان عاملتها كويس وعاملت ربنا فيها ولما ولدت شيلتها هى وابنها فوق راسى وحماة جوزى كانت مبتقوليش غير انتى مش بنى ادمه زينا انتى اكيد ملاك .. من معاملتى لبنتها والله ما بشكر فى نفسى
المهم فاتت 3 سنين وحملت تانى وجابت بنوته زى القمر وبردو شايلاها فى عينى وعيالها بيقولولى يا ماما انا وهى
وفى خلال ال7 سنين اللى اتجوزو فيهم دول ربنا العالم محصلش بينا اى مشكله ولما كانو بيتخانقو كنت انا اللى بصلح بينهم..

لغايه من سنه بالظبط حصلت مفاجأه محدش كان مصدقها واولهم انا
تعبت جامد روحت للدكتوره .. انتى حامل ّ!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!
بتهزرى يا دكتوره ؟!!
والله حامل وفى شهرين
ضرتى فرحتلى ومكانتش مصدقه ان بعد السنين دى كلها ربنا يكرمنى بحمل
وانا ماشيه مبنطقش
معيطتش .. مضحكتش .. مطلعتش اى رد فعل
لغاية ماروحت اول حاجه عملتها اتوضيت وصليت ركعتين شكر لله وبكيت فيهم بحرقه عمرى ما بكيتها قبل كده
ياااااااااااااااااااااااااه يارب اد كده انت كريم وجميل ومبتبخلش على حد ابدااا بطلب يطلبه منك
مهما طالت المده .. 15 سنه من يوم ما اتجوزت وانا بدعى ربنا يرزقنى بطفل
الدكاتره كلهم قالولى مفيش امل بينكم بس الامل فى الله وحده
وجوزى جه وهى قالتله لقيته داخل والفرحه هتنط من وشه وعمال يبوس فى ايدى ورجلى ويقولى ربنا كريم
وعدت بالظبط سبع شهور ونورت حياتى بنتى التالته .. عندها 6 شهور دلوقتى وبتتربى وسط اخواتها اللى بيحبوها وبيخافو عليها

خلاصة موضوعى انى بقول لكل واحده متأخره فى الحمل متيأسيش ده ربك كبير اووووووى وبيعطى كل محروم وبيدى كل سائل حاجته
بس انتى متمليش من سؤاله ولازمى على صلاتك واستغفارك
مبقولش رحى اخطبى لجوزك لو عندك مشكله .. اصل مش كل ضره هتكون زى ضرتى فى اللى هتخرب عليكى وتخرجك من البيت اللى انتى دخلتيها فيه
بس الحمد لله عشان انا كنت بتقى ربنا دايما فى كل حاجه وامى وابويا راضيين عنى بعتلى اللى زيى واللى تخاف رنبا وتتقيه ورزقنا احنا الاتنين بزوج صالح

ربنا يرزق كل البنات بزوج صالح تقى يخاف الله ويرزقهم بالذريه الصالحه اللهم آمين
ويعطى كل مشتاقه الحمل السليم المعافى منقول