السلام عليكم و رحمة الله و بركاته

هذه بعض الملاحظات والاسباب التي جعلتني و غيري أن نبتعد عن الشراء من المنتدى

1- عرض بضاعه ناقصه, يعني مثلا عرض بضاعه للبيع بذكر بعض المواصفات و بدون صور ,

يعني وحده تعرض جلابيه للبيع و تكتب 20 سطر وصف, بس بدون صوره مافي احد بيشتري جلابيه!!

مثال اخر, ان تكون البضاعه بدون سعر!! و هذا للاسف تقريبا 50% من الاعلانات نفس الشي.





2- حب و تعمد التاجرات الى عدم ذكر السعر, و تخلي الكل يطلب السعر على الخاص

يعني ماعرف ليش المذله, الوحده تدخل موضوع و تحصله أكثر من 10 صفحات و كل الردود ( ارسلي الاسعار على الخاص ), البائعه الصادقه تكتب السعر في نهاية الاعلان.



3 - خوض بعض التاجرات بيع أكثر من نوع, يعني مثلا تشوفين اليوم وحده تبيه ادوات تجميل, و بكره عقار, و بعده فتره عندها ملابس, و اخر شي أسهم دانه غاز!!

يا بنت الحلال مايصير تبيعين كل شي في نفس الوقت, تخصصي في شي واحد و ابدعي فيه و بتحصلين رزقك ان شاء الله و لا تركضين خلف 20 نوع عشان ماتضيعين بينهم, يقول المثل صاحب بالين كذاب.



4- الدعايه الغير لائقه, و خاصة في التوقيع!!
كثير من البنات تخلي التوقيع مالها عباره عن دعايه لبضاعتها, طبعا هذا من حقها بس مب تنشر مووع كامل في التوقيع!! يعني لو تكتب سطر و تضع رابط أو أككثر للموضوع يمكن يكون مقبول, بس للاسف في بنات ينزلون 3 أو 4 صور و 6 اسطر بالخط الكبير في التوقيع بس!! ه1ه بروحه نص صفحه, و لا تحصلينها ما خلت موضوع الا دخلت و شاركات و كتبت ( بالتوفيق حبيبتي ) بس عشان الكل يشوف دعايتها.

غير هذا كله في بنات الله يهديهن, يوم تسوي طلبيه أو اي من بضاعتها تروح تنزل موضوع جديد, و يكون اسم الموضو‘و شوفوا طلبية فلانه و علانه, يا بنت الحلال هذا شي تسوينه في الموقع الخاص بك مب في قسم الاعلانات!!



5- المبالغه في عنوان الموضوع, خاصة العناوين الطويله التي هي عباره عن قصه و ليس عنوان لاعلان !!


******

لا أقصد الاهانه لاي عضوه في المنتدى مع احترامي للجميع, والله من وراء القصد.
السلام عليكم و رحمة الله و بركاته ...

بصراحه النقاط إلي كاتبتنها حلوه و هذي وجهة نظر إن شاء الله محد يزعل .. و حبيبتي لو قان في قوانين تمنع هذا الشي جان محد سوا جي .. و مافي حد بيخالف بس ماشي قوانين

الغاليه بس هذا مب معناه ما تشترين أو تبتعدين عن الشراء من القسم كاامل !!!
فستان بنوتـــــــــــ ـه (( سنتين ))
والله صدقتي خصوصاً بسالفة التواقيع !!
و سالفة السعر .. مدري ليه تحرج نفسها و ترسل رسايل لمليون وحدة اكثرهم يسألون فضول ؟
و فيه ناس مو مسجلين و ناس يخجلون يسألون .. يعني لو شافوا السعر مناسب من اول مرة عجبتهم الشغلة و شروها .. مو بعد ماترسل يطنشون !


كلامج صح
100%100

والله يوفق الجميع
هلا وغلا وموضوعك حلو وهادف .

ومن أهم النقاط إللي لفتت نظري وصرت انا أصلحها وهي عدم ذكر السعر ؟؟؟ انا اول موضوع نزلته بعالم حواء ذكرت السعر وكتبت , وماعدى اقل من اسبوع إلا ألقى بالنت كذا وحده تبيع نفس غرضي وكاتبه عليه لا تشتري حتى تري طريقتنا او أسعارنا ؟؟ يعني بعض التاجرات الله يهديهم تحب تخرب على غيرها وتنزل من بضاعتها حتى لو بريال عشان تجذب المشتريين لها , لذلك بموضوعي الجديد ماكتبت الأسعار إبتعاداً عن المقارنه والمنافسه الغير شريفه وحتى لو وحده تبي تنافس راح تستحي تقول انا أرخص من فلانه هذا دليل إنها أرسلتلي , هذي وجهة نظري يمكن غلط او صح بس هذا أسلوبي والمهتمه صدق راح تتعب نفسها وترسلي وإللي عرضي يناسبها راح تسجل وياكثر إللي سجلوا عشان يشترون فقط , صدق إن العمليه متعبه لاني كل مادخلت ألقى مليون رساله إرسليلي الأسعار عالخاص , ومهوب كلهم جادات لكن تظل أفضل من إن أحد يحاول يخرب مشروعي مع إن الأرزاق بيد الله ولكن لكل شيء تأثيره .


النقطه الثانيه إن بعض العضوات تدخل جميع المواضيع وتقول بالتوفيق , لي وجهة نظر من هالناحيه , اول موضوع صلحته بحكم إن بعض العضوات الله يهديهم مش البعض والله تقريباً الكل يصلح أب للموضوع وعيني عينك للرفع مع إنه نوهو عنه بالمنتدى إنه ممنوع مفروض كل موضوع ياخذ حقه فكنت لما أشوف عضوه كاتبه لي كذا أستانس منها ابطل أحرج نفسي وأرفع الموضوع بنفسي , وعمري ماحاولت أرفع موضعي الخاص حتى لو بأساليب ملتفه , وأستغرب من ببعض التجارات المحترمات المعروفات لما تصلح هالحركه , انا لو بنت طلبت مني أقولها شيكي عالخاص صدق إنه فيه نوع من الرفع لكن مطلوب وأحطهم كلهم برد واحد مو مثل البعض كل يوم ترد على وحده الله يهديهم بس , وانا صرت اعتمد اسلوب بالتوفيق حبيبتي عشان أرفع مواضيع البعض او أنشر موضوعي من خلال الرد.


ومثل ماقالت الأخت Guesss , إن بعض العضوات يرسلون بالخاص أنا ضد التطفل على خصوصيات الغير , لكن الله أعلم ببعد تفكير التاجره ويمكن موضوعها مافي أحد شافه من كثر الرفع يعني لو كان في قانون مشترك ماكان في كل هالتجاوزات .


المبالغه في عنوان الموضوع هذا راجع لها , وهذي الشطاره بالتجاره مهوب الكل يملك نفس الحصيله اللغويه او حتى نفس الأسلوب بجذب الإنتباه يعني العنوان بكل موضوع راجع لصاحبة الموضوع .

صحيح تذكرت شغله , بعض التاجرات تكثر من المشاركات واغلب مشاركاتها غير هادفه والبعض ماشاء الله عليهم أحياناً يخالفون بالرأي أو تذكر رأيها بصراحه ماتعتمد النفاق عشان تروج لمشروعها وأحياناً تنزل مواضيع حلوه وهادفه والمشتريه الذكيه مفروض تميز وكلاً له عقله ولازم الواحد يحرص قبل الشراء ويتأكد من اخلاق البائعه وأسلوبها بالتعامل , والحمدلله ما أمدح نفسي لووووووووول مافي ولا رد لي سخيف او اقل من عادي وخاصه بركن المكياج والعطور لانه مجالي كل وحده تطلب شيء أرد عليها برد يطيب الخاطر , وأحياناً تضطرين للمجامله وتقولين يسلمو او تعلقين عالموضوع هذا شيء مطلوب اما تكون جميع مشاركاتك على هالمنوال بصراحه مهب حلوه بحق اي عضوه .

يمكن أطنبت شوي بالحديث او مصختها , بس حبيت ابين وجهة نظري وأفضفض <=== محد يعطيها وجه هههههههههههههههههههه .

للجميع عيوب وحتى انا فيني عيوب , بس الأعتراف بالحق فضيله

وبالتوفيق للجميع إن شاء الله , وشكراً للأخت أفراح امه على طرح هالموضوع للمناقشه .


الساعة الآن 06:37 .