ابوي متزوج مسيار

السلام عليكم جميعاً واخيراً تفعلت عضويتي ،
حبيت اشاركم بمشكلتي او بالاصح مشكلة (امي)
امي معلمة ومتدينة وجميلة ما شاء الله تبارك الله
وكل اللي يشوفها يحسب انها اختي هي مو كبيرة مرة عمرها في الاربعينيات وتهتم بنفسها قص وصبغات وكذا ،،يعني الحمدلله مو ناقصها شي
بس للاسف اكتشفت قبل فترة ان ابوي يكلم وحدة
ويراسلها ع الواتس والغريب ان هذي اللي يكلمها حافظة قران !!وكبيرة وعندها احفاد ومااظلمها لكن هذا اللي شفناها من محادثاتهم كانت تكلم ابوي وهي ما زالت ع ذمة واحد قبلة وكمان متزوجته مسيار
لكن كان معلقها وكان تشتكي لابوي منه وانها تبي تتطلق ،عشان تاخذ ابوي امي لمن كشفت ابوي واجهته وندم ووعد امي انه يقطع علاقته فيهاوحلف لها وراح جاب لها ذهب وراضها وقال لها ماابغى احد يدري ،،امي طيبة و ع نياتها مرة رضيت وسكتت بس ظلت شاكة وكانت تدعي ربي انه يكشفه لها هي وبس وسبحان الله فتحت جواله وشافت رقم واحد باسم رجال بس المكالمات تكون متاخرة وابوي مو النوع اللي يسهر ،،وطلعت اسم صاحب الرقم وطلعت هي نفسها بس للاسف هالمرة طلع متزوجها مسيار..فعلاً الرجال مالهم امان اللي يشوف ابوي واخلاقه واهتمامه في امي ما يصدق انه يفكر يتزوج عليها ،،واجهته امي واعترف انه متزوجها مسيار بس اللي يقهر انه متمسك فيها ويقول ما راح يتركها عشان ما يظلمها ،،قلت لامي لازم تكونين قوية ويكون لك ردة فعل قوية لان تهاونها المرة الاولى هو اللي خلاه يتمادى،،وحلف امي ع المصحف انها ما تقول لاي احد وامي يا قلبي عليها ما تدري وش تسوي لا تقدر تروح لاهلها ولا هي قادرة تجلس في البيت ،،وامي قلبها طيب كلمت هذي الحرمة قلت لامي ليش ما هزأتيها قالت امي ما تدرين يمكن تكون طيبة ونتعرف ع بعض ويرتاح صدري ويمكن تشوف اسلوبي معها محترم وترحمني وتخليه يا حياتي ياامي مرة بريئة ،،الحين امي طلعت من البيت واستأجرت لها شقة وابوي مرة مهموم ومتضايق لدرجة مو قادر يجلس في البيت واحياناً يجلس يبكي ويترجاها ما تخليه بصراحة عجزت افهمه دام انه يحب امي لهالدرجة ليش مو راضي يترك هالحرمة متمسك فيها رغم انها في مدينة بعيدة وابوي ما يسافر كثير يعني اغلب علاقتهم مكالمات ،،
ابي رايكم امي تتعذب قدامي ومو عارفة كيف اساعدها خصوصاً ان مااحد يدري غيري والله اخاف عليها من كثر ماهي كاتمة بصدرها ،،وهل يجوز انها تضغط عليه انه يطلق هذي الحرمة والا يعتبر ظلم لاني كل مااقول لامي اطلبيه يطلقها تقول امي ما يجوز اطلب طلاقها ☹̵̵،،بس والله شي يقهر امي ساعدت ابوي في كل شي وضحت عشانه وياما اخذت قروض له ،، اتمنى الرد منكم الله يجزاكم خير .