ضايقه فيني الدنيا دعواتكم لي

ضايقه فيني الوسيعة
مااقدر اتكلم عند احد بهالكلام ومالقيت الا هالمكان أصب قهري فيه
انا متزوجة من واحد حالته ميسورة في بداية الأمر، وشوي شوي حالتنا في تدهور مع غلا المعيشة ومتطلبات الحياة
تصدقون اني عند اهلي لي شهوووور والسبب ماعندنا نسكن بيت :(
كنا ساكنين في شقة اقل من عاديه كانت وسخة وقديمة وغير مريحة وكلها حشرات
صبرت وتحملت ووعدني يغيرها وكل مرة نروح ونشوف ونأمل وفي الأخير يجدد العقد لما أهملت البيت وخليته على وساخته ورحت لاهلي وصارت بيننا مشكلة وفرغ الشقة وسلمها والحين هو بمكان وانا بمكان لنا شهور ولا ادري وش مخطط له او وش ناوي يسوي
المشكلة ان راتبه جدا معقول لكن كله ديون وقروض ونقعد لآخر الشهر ماعندنا شي
واللي قاهرني بالموضوع كللللله انه قريب ماخذ قرض حول الميتين ألف والله العالم وش مسوي به سألته ونشبت له ليش ماخذه قال لي شي كأن أحد صاب علي مويه حااااارة من كثر ماانقهرت قال لي:
معطيه واحد فزعه!! طيب وانا؟ وبنتك؟ والبيت؟ اتشحذه ياخذ قرض عشان نسكن مكان محترم ومريح يقول مااقدر وراح ياخذه عشان واحد ، انا بصراحه شكيت انه ماخذه لأبوه او لأهله بس ماقال لي.
والحين بس يعطيني مصروفي اللي ماادري انا اسدد فيه حق جوالي والا اتقضى لنفسي والا لبنتي والا متطلبات الحياة.
هو الحين ماعنده مصاريف بيت ولا شي بس هالمصروف يعطيني وخلاص مدري وين يروح باقي راتبه ومستحيل يكون يجمع عشان البيت وطبعا اهله مايقصرون ياخذون منه ويعطيهم مع انهم مو محتاجين ابد ابد ماشاء الله ويدرون عن حالته ووضعه لكن الله المستعان.
قبل فترة قلت له لنا شهور ماطلعنا خلنا نطلع ونتعشى بمكان قال ماعندي الميزانية محدودة!! رغم اننا بأول الشهر قلت في نفسي اذا محدودة على مطعم وشلون بتجيب لي بيت، لا وطموحي بعد على شغاله لاني حامل وتعبانه واحتاجها ولو كنت اعرف عن هالحال ماكان فكرت بالحمل والحمدلله على قضاءه وقدره اذا طفل واحد صعبه معيشتنا كيف بطفلين.
ادري كلامي ملخبط بس انا منقهره لاني ماكنت كذا كنت مدلعه في بيت اهلي واغلب اللي اتمناه يتوفر لي عشان كذا حسيت بالفرق!
وألحين صرت أغااااار انا اللي ما عمري غرت من احد صرت اغار من كل اللي حولي من لبس وكشخة وماركات وطلعات واللي تجدد أثاث بيتها واللي تصلح جوازها بتسافر وانا حتى بيت ماعندي
تصدقون ان كان عندي شنطة أنجنيت على ماشريتها وبعتها للحاجة عشان بس ما أحسس أهلي اني ماعندي شي والله ان امي كل شهر تطلب من ابوي يعطيني تقول شكل رجلها مايعطيها لانها شايفه حالتي وطبعا ارفض آخذ شي عشان كذا صرت ابيع ما ودي اضيق صدر اهلي على حالتي ودايما اهلي يسألوني عن السكن واصرفهم واقول انا حامل وتعبانه وقايلتله مانبي نسكن الحين لأني والله ماشكيت لهم حالي ولا يدرون اننا مانقدر.
صرت اقتصد بكل شي واشتري ارخص الاشياء كله عشان اوفر والحين مقبلين على عطلة ومناسبات وطلعات والحالة صعبة هذا غير مقاضي البيبي والنفاس و و و و الخ.
ادري بتقولون هو وينه وليش ماتروحين عنده هو ساكن عند اخوانه بشقة وصعب اني اصير معه.
استغفر الله والله أحيانا افكر بالطلاق بس اقول حرام يابنت احس اني قليلة خاتمة لو سويتها
مررره مقهووورة على وضعي
ادري بتنطون لي وتقولون احمدي ربك احسن من غيرك ومن هالكلام
الحمدلله الف مرة
بس هالفترة حسيت اني خسرت اشياء كثيرة دراستي بالانقلش ودراستي بالماجستير اللي ياما تمنيت انقبل وانقبلت وصارت ظروف واعتذرت وماقباوه وانطوى قيدي وكنت موظفة وتركت الوظيفة بسبب مديرة ظالمة حسبي الله عليها. والحين حامل ووحم وهرمونات وضيقة صدر واكتئاب والشياطين راكبه راسي وفيني وسواس وخوف من شي معين وكثير تصير لي نوبات هلع أحس كلللل شي تجمع علي . يمكن كل اللي ذكرته بعينكم تافه جدا لكن مايحس بالنار الا واطيها.
الله يرزقني الوظيفة بالراتب الزين وكل محتاج ومحتاجه ياااارب
الحمدلله على كل حال
اللهم لك الحمد كما ينبغي لجلال وجهك وعظيم سلطانك
اللهم إني أعوذ بك من زوال نعمتك وتحول عافيتك وفجاءة نقمتك وجميع سخطك
ربي اشرح لي صدري ويسر لي امري
اللهم لا تسلط علينا بذنوبنا من لا يخافك فينا ولايرحمنا

أرجو عدم التجريح بالكلام ولا ابي منكم غير الدعاء وجزاكم الله خير
وصلى الله على نبينا محمد وعلى آله وصحبه أجمعين.