فراخ محشية في الفرن



المقادير

فرخة متوسطة ـ كوب رز ـ جزر مقطع مكعبات ـ بطاطس مسلوقة نصف سلقة مقطعة مكعبات ـ بصلة كبيرة مقطعة صغير ـ 2 فص ثوم مقطع صغير ـ 2 بصل اخضر مقطع حلقات ـ البهارات المستخدمة للخلطة ( ملح ـ فلفل ـ قرفة ـ بهار فراخ ـ زنجبيل مطحون ) ـ البهار للفراخ ( صويا صوص ـ بابريكا ـ ملح ـ فلفل ـ قرفة )



طريقة عمل الحشوة

اولا احضر حوالي كوب رز ( انا باستعمل بسمتي ) و اسلقه

اجيب البصل اقطعه مش افرمه و معاه بصل اخضر و ثوم و اشوحهم في زيت زيتون لحد ما البصل يصفر و بعدين احط عليه الصنوبر لحد ما يبتدي يحمر اضيف الزبيب و اقلب

اكون مقطعة بطاطس و سلقاها نصف سلقة و اقطع الجزر مكعبات و اضيفهم على البصل و الزبيب و الصنوبر و اقلب و اضيف الملح و الفالف و البهار لحد ما يدبل الجزر شوية و بعدين احطهم على الرز و اقلب و انا باضيف في الخر صويا صوص لقيت طعمها حلو اوي بيها

اجيب الفرخة و انضفها كويس و اعمل خليط من الصويا صوص و الملح و الفلفل و القرفة و البابريكا و ادهن بيها الفرخة من جوة و من برة و بعدين ابتدي احشيها بالرز من جوة و من تحت الجلد و احطها في صينية محطوط عليها ورق فويل من تحت و احطها في فرن حرارته 220 و بعد ربع ساعة احطلها نصف كوب ماء و افضل اتابعها من فترة للتانية و بتقعد في الفرن ساعتين

و بالهنا و الشفا


كتف ضاني في الفرن
المقادير
فخدة او كتف ضاني
بصل و ثوم مفروم ناعم اوي ـ ثوم صحيح
خل ابيض ـ صويا صوص بسيط ـ عصير ليمونة
بابريكا ـ ملح ـ فلفل ـ زنجبيل ـ قرفة ـ بهارات فراخ ـ كاري ـ كركم ـ روز ماري
الطريقة
باجيب المقادير كلها ما عدا الفخدة طبعا و الثوم الصحيح و اخلطها مع بعض كويس
اجيب الفخدة و اعمل بيها فتحات بالسكين و اغرز الثوم الصحيح فيها
بعد كدة احط الخليط ده عليها من فوق و من تحت و في الفتحات
اغطيها كويس بالفويل و اسيبها طول الليل في التلاجة
احطها في الفرن بالفويل لمدة حوالي اربع ساعات و في اخر نصف ساعة اشيل الفويل علشان الوش يحمر
و بالهنا و الشفا


تكرار
استيك بانيه بصوص المشروم
المقادير
نصف كيلو لحمة استيك ــ مشروم حوالي اربع حبات كبار ــ بصلة صغيرة ــ 2 كوب كريمة لباني ــ معلقة دقيق

خلطة الاستيك عبارة عن
كوب و نصف لبن ـ معلقتين زيت زيتون ـ بيضتين ـ عصير ليمونة ــ ملح و فلفل و بهار زي ما تحبي ــ معلقتين خل ابيض ــ 2 ثوم مبشور او مقطع صغير

او ممكن كمان خلطة تانية
كوب زبادي ــ ثوم ــ بهار ــ خل ــ ليمون ــ ملح و فلفل ــ 2 بيضه

احط الاستيك في الخلطة اللي فاتت لمدة ساعتين و بعدين احطه على طول في خليط من الدقيق و البقسماط الناعم عليهم البهارات بتاعتهم
احمر الاستيك و احطه على جنب

لعمل الصوص
اجيب معلقة سمنة او زبدة واسيحها و اجيب البصلة اقطعها حتت كبيرة نسبيا و اقطع المشروم معاها و اشوحهم شوية في السمن
بعدين اجيب معلقة الدقيق احطها عليهم و اقلب شوية و بعدين احط الكريمة و الملح و الفلفل و ممكن شوية قرفة
اسيبها تغلي شوية و اعمل السمك اللي احبه يعني لو عايزاها سميكة ازود دقيق و لو عايزاها خفيفة ازود ماء او لبن

طريقة تانية للصوص
ملعقة زبدة اقطع عليها بصلة قطع صغيرة و احمرها في الزبدة لحد ما لونها يحمر
اكون مقطعة المشروم و احطه على البصل و اقلب لحد المشروم ما يدبل خالص
اروح حاطة عليهو الكريمة اللباني و اسيبهم يغلوا
لو عايزاها سميكة شوية احط عليها ملعقة دقيق و برده اخليها تغلي

بعد كدة احط الاستيك البانيه في الطبق و اصب عليه من الصوص
يتقدم معاه بطاطس او مكرونة بصوص المشروم مع سلطة خضراء
( انا عملت معاه رز بالخضار كان حلو اوي)
و بالهنا و الشفا
الله يعطيك العافيه

وننتظر المزيد


الساعة الآن 06:18 .