امتداد لموضوع بوكك كم فيه؟

لسلام عليكم ورحمه الله وبركاته

لفت نظري موضوع بوكك كم فيه والمعظم عندها القليل،،

فحبيت انزل الموضوع كن باب حب لاخيك ماتحب لنفسك ،، لانو كنت مثل المعظم انفق مافي الجيب يأتيك مافي الغيب فالنتيجه انبسط بالمال كم يوم او بنزله وحده و اتنين للمول واخلصهم ،، واظل باقي الايام بلا مال او مال قليل ،،

بس الحين تغيرت نظرتي للمال وطريقه صرفه بالتالي حالت الماديه افضل،،

بنات حبيباتي صراحه المفروض كل وحده يكون ف بوكها ع الاقل 300 لو مانتي موظفه او نقول لو ماعندك مشاوير ،،،

في حلقه ف خواطر هالسنه تتكلم عن ثقافه الاستهلاك،،، صار الناس بس تبي تروح تشتري ، يكون عندك ملابس واكسسوار ومكياج بس كذا صرنا نروح المولات والاسواق ونقول:لو عجبنا شئ نشتري |!

هاذا شئ خاطئ حبيباتي ،،لانو بيجي يوم تحتاجي فيه المال ،، وتندمي انك انفقتيه ،الاحد مابيعرف ظروفه،،ك

حابه اكلمكم عن امي الله يحفظها ،،
لانو هي الي كانت توجهني وتنصحني ،، هي موظفه وبراتب عالي ،،لكن من صغرنا ، نلعب ف المراجيح ،، ومره بالشهر نروح بالملاهي تلعبنا وتحدد لنا عدد الالعاب ،، وحتى الايسكريم وهالامور ماكانت كل ماطلبنا شئ نفذته ،، بالخرجات نجيب مسكراتنا والقهوه والشاهي معنا ،، ماكانت تدللنا زي الحين ،، وطبعا ايسكريم بسعر معقول مو بالايسكريمات الغاليه زي باسكن روبنز ،،


حتى بملابسها ،، ملابسها ب 40 و60،، ماتحب المولات واصلا الماركات خدع،، بلوزه ساده فيها زينه بسيطه ب 150! ليش ،، جد بنات تحسو كاننا نهتم ان الشئ ماركه اكثر من جماله ،،! انا اعترف ماهو كنت كذا !


وحتى ساعاتها ب 200 و300 ،، وتقولنا في موظفات معها يشترون الساعه ب 13 الف عشان يتفاخرو فيها ونقولي بصدمه انو بنهاية الشهر او حتى نصه يصيرو يتسلفون من بعض! ويكون ماعندها حتى سعر التاكسي! معقوول!

اتذكر مره رحنا الحرم المكي برمضان وكنا بالفجريه ننتظر الاذان ،،الاقي معظمنا حنا تشتري دونات واكلات مو طيبه.!! واشوف الهنديات معاهم الفواكه يتسحرون فيها| ! وفي جنسيات اخرى تعمل لها سندويش جبنه ،، اما امي الحبيبه كانت تعمل لنا ساندويش تمر،، صرنا بهالعصر لما نخرج لازم ناكل من برجر ولا كنتاكي ولا كودو وماكدونالدز وكلها وجبات مدمره للصحه واسعارها مرتفعه ،،يعني البرجر الواحد ب 20 ريال لو كان وجبه وتخيلي انتي طلبتي لنفسك ولﻷثنين من عيالك فتصير 60 ريال،، ولو فرضنا انو بتطلبيلهم 3 مرات بالشهر فتصير 180 والميه والثمانين ذي لو حوشتيها لمده سنه بس تصير فوق الالفين!

والله انو ماذقت كنتاكي وكودو وهالمطاعم الا لما كبرت ،، لانو امي كانت تنفر من اسعارها وامي اقتصاديه زليست بخيله ،، كنا نعم ناكل من برا بس شاورما مثلا وللايسكريم من بقاله بريال او ريالين :-)

النتيجه لو سألنا عن حال الاسره لما تقرر انو تبني او تشتري بيت العمر،، لاااازم هالقرض! مو كده ؟الا مارحم ربي طبعا،،
بس امي بدأت ع فكره براتب بسيط ويزيد مع السنين ،،ماشاء الله تقولي عمرها بحياتها ماتدينت دين ولا تسلفت من احد ،، واشترت سيارتها وشقتها وارضها وبيتها من تحويشتها الي بتحوشها من سنين طويله ،،

وكانت دايم تقولي يابنتي لما يكون معاكي فلوس فهاد امان ،، مثلا لو ضرب كفر االسياره وانتي وولدك وتحتاج ع الاقل 200 ووك ماعنده وانتي بس عندك 50 ولا 10 ريال ف بوكك وش حتسوي؟

وحتى الكوفيهات تركتها ،، او اعمله من بيتي واصلا صرت اتمشى بحدايق او بالبحر ومعانا اشياءنا واكلنا ونقنقتنا وصرنا نعمل زي الهنود نجيب الفواكه ناكلها ع البحر هههه
وايضا مابحرم نفسي اكيد ،،لز رايحه مول وشفت سينابون اشتريه بس اشتري الصغير وحبه وحده او لو كنت جيعانه اشتري من المطاعم بس ما اخليها شئ واااجب لازم اروح اشتري ايسكريم باسكن وفاست فود وكوفي واشتري اي شئ ،، وحتشوفو كيف تتحسن حالتكم الماديه :-)

بالعكس صرت اصرف الي احوشه ف شئ افود ،زي انو عملت كيراتين لشعري :-)

وف بوكي عندي 1700 ريال وانا طالبه جامعيه مو موظفه ناشاء الله،،
اتمنى تفكرو ف كلامي ،،

والخلاصه ،، لاتحرمي نفسك بل اصرفي بذكاء ولشئ يستحقه ان تدفعي مال من اجله ،،

فكرو ف كلامي والله يوفقكم:-)