انا اللي قلت بودي ابوي مستشفى الأمراض النفسية

السلام عليكم ، لكل عضوه تهجمت علي بموضوعي السابق
ابي اقولها انا تحملت من ابوي هذا الكثييير وبالعكس كنت في كل مره اسامح واسامح ارهبني وزرع فيني الخوف في طفولتي حبسني وماخلاني احتك بااحد كان يضربني ضرب مبرح وكان حتى يخوفني يمسكني من رجل وحده و وينزلني بره الطاقه وجسمي كله بره وانا اصيح وابكي وهو يضحك كنا اذا جينا وحنا صغار نتكلم معاه كان يتريق علينا ويستهزي فينا لين صرنا مانحب نجلس معاه وكان يشتري لأخوي هدايا انا ماعمره شرى لي شيء كان يعطيني مصروف للمدرسة ريالين وكنت اذا اشتريت فيها اسكريم بريال كان ياخذه مني ويرميه مع طاقة السيارة وهو جديد وكنت انقهر بصمت و بسادس كان يصرخ علي قدام صحباتي عند باب المدرسة والبنات يطالعون كنت بذا العمر اذا اشتريت شيء انا نفسي فيه زي مثلا دقه كان ياخذه مني وقدام حارس المدرسة والبنات يرميه في الأرض ويصرخ علي يلا روحي رديه !! وكان يضربني بالسلك ضرب مبرح ع كل جسمي وحتى وجهي بسبب او بدون سبب ولما صرت بالمتوسطة كنت اذا تأخرت في المدرسة عشان المعلمه اخذت من وقت الأنصراف كم دقيقة عشان تكمل درسها وكذا كان يصرخ علي ويضربني بالشارع < كثيير سواها فيني ، كنت اذا جيت اتروش وقعدت 10 دقايق كان يفتح باب الحمام علي واقوم انا اتغطى بأي شيء ومن كثر ماصار يسوي كذا صرت أنا اخذ احتياطي -كان يضربني كل يوم كنت اذا ضحكت يوم اقول في نفسي الأيام الجايه راح تبكين كثيير ، كان يضرب فيني يضرب فيني بسلك المكنسه او خشبه او اي شيء لين اطيح في الأرض واصير مقدر اتنفس وامي تتفرج ومابيدها شيء وانا اقول ي امي ابغى اموت ما اتنفس ، وانا عندي ربو ، حتى برا ماسلمت منه حتى في بيت الله الحرام ماسلمت منه كنت امشي بالحرم وراه يعني مو سابقته وهو يقول ليش تمشين كذا بشويش قام ضربني بقوه ع ظهري ودفني بقوه قدام الناس وانا كبيره ومتغطيه والناس يطالعون حتى لما جاء واحد اتقدم لي وانا ماابغاه قال الحرمه مالها عندي كلمه وقال البسي عشان النظره قلت ما ابغى اشوفه قام ضربني وضربني لين جيت زي الذليلة ، حرمني من كل شيء ،كنت اتمنى اشياء بسيطة وانا صغيرة كنت اتمنى اروح الملاهي زي صديقاتي وهو كان مايودينا لين مره امي ودتنا مع اختها وكنا مانلعب كثيير عشان امي مامعها فلوس وحتى هم ياكلون اللي نفسهم فيه وحنا لا امي كانت تقولنا انتم جيتم تلعبون ماجيتم تاكلون ،ابوي هذا من كثر ماكنت اطلبه وهو يرفض طلباتي ويقبل من اخوي صار عندي قناعه ان هذا ماينفع معه شيء ابد ، فصرت دايم ساكته ومااطلب منه شيء زي اخواني - كانوا اخواني يطلبونه يزيدهم ريال وانا ماكنت اطلب كان يطلبون هدية اذا نجحوا 50 ريال وكذا وانا ماكنت اطلب لأنه كسر بخاطري كثيير وانا صغيره ،، ب 3 متوسط امي قالت فصلها مريول محد يلبس مريول جاهز بالمتوسطة وفصلي لأنه فصل لأخوي طبعا ب 60 ريال وكان الخياط لما يسألني كيف تبين المريول كان يزعل ويصرخ علي قدامه لا مو كذا فصله كذا - كأنه هو اللي بيلبس المريول مو انا! ، المهم ع كثر ماضربني ونقص من قدري قدام اخواني والناس كنت اسامحه ع طول وماازعل و ولا اغلط عليه !!!!! 
الى انا صار عمري 20 وهو مازال يضربني ويحرض اخواني الصغار يضربوني ويقول حاولي تمدي يدك وتشوفين كيف بسوي فيك !! وانا ساكته وصابره صبر الجبال لين مره كلمت زوجي وانا عندهم وكنت ابغى دواء لولدي لأنه تعبان قال لي زوجي روحي الصيدلية مع اختك قلت طيب وشافنا وحنا طالعين مع الباب وقال وين رايحين قلت الصيدلية قام بنفسه هو جاء معانا ويوم رجعنا ضربني وضربني قال تطلعين بدون اذني ها ؟!!!! قمت ولأول مره زي المجنونه اسبه واصرخ عليه انا زوجي سمح لي ي كل- وقمت تفلت عليه من بعيد وطلعت الم 20 سنه ذاك اليوم 
قلت له انت ليس تسوي فيني كذا ليش تبغى تدور معي المشاكل ان حبست نفسي بغرفه لحالي وبعدت عنك تجي تختلق المشاكل عشان تمد يدك علي ..
المهم من بعد ذي المشكلة كرهته كره مو طبيعي وصرت احس نفسي ماقدر اسامحه وبعد 5 شهور سامحته وبعدها مرض اخوي ، نفسيا ، اخوي اللي يلعب معي و يشاكسني و قلبه علي ، اخوي اللي كان يزعل ومايتكلم كان يكتم بقلبه
كان اذا تأخر للساعه 12 كان ابوي يطرده بره البيت كان يقوله انت مكانك البيت مع الحرمه ياحرمه فاهم وهو ساكت
كان اذا جلس مع الرجال يقومه يقوله روح عند امك ليين بعدها انفجر وصار يصرخ ع ابوي وللأسف بعدها عرفنا انه مرض نفسيا ابوي يقول فلان ماكان كذا كان دايم ساكت اكيد فيه عين اكيد فيه مس المهم اخوي هذا طاح صاير مجنون ، ايه مجنون ويقول ابوي هذا ماله علاج غير الموت! ! الله يموته هو ونفتك منه الله ياخذه المجرم الظالم مافي قلبه رحمه ولا شفقه قلبه اسود هذا مو ابو مستحيل فيه اب كذا. !! المهم انا قاعده اجمع فلوس عشان اعالج اخوي رغم ان الظالم تاجر وعنده فلوس مالها اول ولا تالي ..