الحكيمه تدخل

بنات نفسيتي تعبانه في الحضيض
قصتي من اول زواجي الى يومنا هذا بحاول اختصرها
تزوجت وحيد اهله..ماشرطت بيت مستقل غباء مني..ظنيتهم اهل طيبين ..لكن للاسف
اكتشفت انهم يبون خدامه لهم ..يبون اطبخ لهم غداء وعشاء وقهوة عصر...مشيت الدنيا..وقلت بطلب قسم الرجال يكون شقه لي ويبنون مجلس رجال برا ف الحوش..تفاجئت بنوبة الغضب وتلفظو علي وقالو تسكنين معنا او اطلعي من بيتنا..وزوجي ساكت ضعيف خايف يفتح فمه بكلمه ينضرب
طلعت..ورحت للجيران..اهلي بديره ثانيه. ..استحيت ورجعت لبيتهم من البكره..تمسكت بموقفي واصريت اخذ لي بيت استقل فيه واخذ راحتي مثل اي متزوجه..بعد كر وفر وافقو وطلعت بقسم الرجال...قام ابو زوجي وشال الباب اللي بيني وبينهم..وكأنك ي بو زيد ماغزيت..جالس قبالت شقتي يراقبني وين رحت من زارني ...طلعو متسلطين جبارين لسانهم وسخ..لو اطلع اتمشى او اتفسح بدون اذنهم زعلو على ولدهم..ليش ماخبرتنا يمكن نروح معكم
اروح للسوق ف الشهرين مره..انتي خسرتي ولدنا..
انجبت بنتي البكر وزادت المعاناه او تبكي قامو يدعون علي ويلعنوني
حملت بولدي..وتعبت نفسيتي اكثر..تركو بيتهم وجلسو عند غرفتي..غداء وعشاء وقهوة عصر...وفوق هذا كله بعيده عن اهلي..وي ليت نفوسهم زينه..ابكي كل ليله ع مخدتي..وش اشكي لزوجي السلبي الضعيف..اقول اهلك غثيثين ونفوسهم شينه وكاتميني اليوم كله جلابيه وطرحه على راسي..سكت وتعبت نفسيتي وولدت ولاده مبكره وجبت ولد مريض بالتوحد..وي ليت خففو عني مصابي..راحو يتشمتون فيني ويقولون تستاهل
وحملت ببنتي الثانيه وضيقو علي اكثر..تعبت من الوحم حتى الماء ما اشربه وبس اطبخ لهم وانا ساده خشمي..ويشوفون تعبي ولا همهم..اخذت شنطتي قلت برتاح عند اهلي..يومين وجاء ولدهم الخبل واخذني غصب عني ..كنت مابي المشاكل واهلي مايبوني ارجع له..وي ليتني سمعت كلامهم...لما دخلت بيتي ماحد قالي هلا..على طول سب وشتم بلعت موس وطحت ع فراشي...وبعد اسبوع تلفظت علي امه...وتفلت بوجهي..ليش ماطبختي الغداء اليوم جمعه..يجي الشايب مايلقى الغداء وش نقول
اخذت شنطتي ورحت لا اهلي عيالي اخذوهم مني9شهور ماشفتهم حتى خلصت الاربعين .ورجعت لهم
تزوج ابو زوجي واخذ بنت ماشي حالها...ام زوجي جات بعفشه وسكنت عندي بغرفه الضيوف...والباب اللي كان بيني وبينهم صار جدار وتسكر للابد..قلت توه يتسكرهالباب..الراحه حرام علي وحلال عليك...المهم حمدت الله اني افتكيت من وجهه..وافتكيت من فطوره وقهوته كل فجر
ام زوجي وقحه مريضه تكره امي..لانه الوحيده اللي ترد عليها وعلى باطلها..ضيقت علي عيشتي..بالنقد والاستهزاء..نواياها خبيثه...تدخل بتربيتي لا ابنائي..حتى لو اضربهم ع خطاء فادح تدعي علي وتتلفظ علي

بنات
هذا شي قليل من حياتي معهم
زوجي بعد زعلي الاخير..حاول يراضيني..شراء لي ذهب..سفرني..غير اثاث البيت كله..طبعا زعل ابوه وقال ماتستاهل تضيع فلوسك عشانها
زوجة عمي الجديده كل طلباتها اوامر تغير بالاثاث تتمشى ..تروح وين ماتبي ماحد يسألها وين رايحه...وكل مصاريفها على زوجي. .بحكم ان ابوه عاطل وماعنده الا الضمان الاجتماعي..بس هي الكينق وماحد يرد لها كلمه
انا بالاعياد اطبخ الذبايح واستقبل الضيوف وانظف مجالسهم..هي ماعمرها ساعدتني او وقفت معي..هذا غير الغيره اللي ماليه قلبها علي دايم تقلدني بمشترياتي..واثاثي حتى لو كان بايخ

اهلي زعلانين مني وخصوصا ابوي...من بدايه زواجي خبرته على اللي اشوفه منهم..وكيف انهم منعو زوجي ياخذلي شقه جنب جامعتي عشان اكمل دراستي..وتكفل ابوي بدراستي ومصاريفي ..وزوجي مستريح عند اهله....
الان وبعد 10سنوات صرت انسانه مريضه متبلده..امه تتلفظ وتبربر علي بس اناظرها واسكت..تحرجني قدام ضيوفي تتلفظ علي اضحك ضحكه غبيه..
صار معي اورام بالغده الدرقيه مع ان الهرمون سليم..يسألني الطبيب انتي متعرضه للصدمه نفسيه..قلت كل يوم صدمه وضغط نفسي رهيييب طوال 10سنوات


شرحت لكم مختصر حياتي...
والان قررت اطلب من زوجي...يتزوج علي..ويجيب زوجته الجديده مكاني عند امه
وانا بطلع بشقه ايجااار بعيد عنهم..وماعاد اشوفهم ولا يشوفوني
طوال هالسنين كل ما هربت لا اهلي ياخذون اولادي مني واجلس بالشهور ما اشوفهم..عشان كذا ما اقدر اطلب الطلاق
زوجي سلبي ضعيف شخصيه..لو ينطق بكلمة الحق..كان هانت مشاكلي

شوركم حبيباااتي...هل تفكيري سليم يتزوج علي ..مقابل اني اطلع من حياته هو واهله الى الابد


واسفه اسفه على الاطاااله..الموضوع مصيري