Analysis Services
السلام عليكم ورحمه الله وبركاته
الله يخليكم عندي استفسارات كثيره عن الاسهم وانا توني مبتدئه لكن متحمسه للاسهم
وليه فتره وانا اشتري كتب واذاكر كأني لسه ادرس
انا عارفه انه اسئلتي تافهه لكن خذوني على قد عقلي وردو علي الله يجزاكم بالجنه
اول شيء كثير منكم شرحتو كثير من المؤشرات وانا فهمتها اللهم لك الحمد
لكن ماحد شرح المؤشر الرئيسي ماني فاهمه فيه شيء يعني وش معنى كسر حاجز نقطه رقم معين ومتى اعرف انه مرتفع طبعا بالارقام واقصى حد للارتفاع كم ونفس الشيء للانخفاض والارقام هاذي عباره عن ماذا يعني من وين جات ياليت شرح مفصل الله يوفقكم يارب بالامثله

ثانيا00اسمع كلمه كسر الهاي او الهاي الجديد من هذول القوم ماعليه عارفه انكم بتضحكون علي بس ابغى اتعلم

ثالثا00 كيف يعني السوق يصحح وكيف اعرف اذا السوق فيه سيوله ولا مافيه

رابعا00اسمع عباره انه السوق السعودي لايسمح بالزياده اوالخساره اكثر من 10% ياليت تشرحولي بالامثله الحسابيه سواء زياده او خساره وش معنى الناس تشتري على نسب اوقفل النسبه
خامسا00 وش معنى السوق في مرحله جني ارباح وكيف اعرف ومتى اعرف انه السهم انخفض بسبب جني الارباح
سادسا00 وش معنى عباره السهم مضغوط او فيه ضغط عليه
سابعا00 هل ممكن نكتتب لاحد بكرت العائله بدون توكيل منه سواء على النت او البنك
والله يجزاكم الف خير للي يرد ومايحرمكم يارب من الاجر
17-11-1426 هـ, 09:05 صباحاً
 

لا توجد تقييمات لهذا الموضوع

يمكنك البدء بإعطاء تقييم عبر الضغط على النجوم أدناه:
5
4
3
2
1
هلا اختي ندونه

وحياك الله ولاتياسين ترى كلنا في الهوى سوا...عموما انا ماراح اتفلسف لاني انا بعد مازلت مبتدئه بس بافيدك باللي اعرفه ولو فيه زياده بيفيدونا باقي الاخوات والاخوان...مشكورين...

،،،،،وش معنى كسر حاجز نقطه رقم معين ومتى اعرف انه مرتفع طبعا بالارقام واقصى حد للارتفاع كم ونفس الشيء للانخفاض ؟؟؟

من خلال اغلاق المؤشر يتحدد نقاط دعم ومقاومه لليوم التالي...ونقاط الدعم لو كسرها المؤشر بمعنى انه لو وصل لها ونزل كمان معناه راح ينزل زياده بعد...ونقطة المقاومه لو كسرها المؤشر وتعداها معناه راح يطلع اكثر...وطبعا مافي اقصى وادنى حد للارتفاع والانخفاض هذا كله يعتمد على الطلبات والعروض والسيوله بالسوق...

،،،،،،،،، الهاي؟؟؟

معناها high بالانجليزي ...وهي ارتفاع ...يعني اعلى سعر وصله هالسهم يسمى هاي...

والتصحيح....اللي يكون فيه السوق نازل شوي...لان بعض الاسعار متضخمه فتعود لاسعارها العادله او الطبيعيه نوعا ما...

وكيف اعرف اذا السوق فيه سيوله ولا مافيه؟؟؟ طبعا هذا تشوفينه بشاشة مباشر فوق ...القيمه او السيوله وجنبها رقم بالمليارات هذا هو السيوله...

رابعا00اسمع عباره انه السوق السعودي لايسمح بالزياده اوالخساره اكثر من 10% ياليت تشرحولي بالامثله الحسابيه سواء زياده او خساره وش معنى الناس تشتري على نسب اوقفل النسبه؟؟؟

من هيئة السوق الماليه السعوديه حددت ان اي ارتفاع للسهم يكون 10 % فقط...والنزول 10% فقط مايتعداها وهذي نعمه الحمدلله...وارتفاع السهم على حسب كمية الطلبات والعروض ...والنزول ان البيع متسارع وقوي...والناس جالسه تصرف اسهمها...

وش معنى السوق في مرحله جني ارباح وكيف اعرف ومتى اعرف انه السهم انخفض بسبب جني الارباح؟؟؟

هذي حاجه تقريبا تصير كل يوم....يرتفع السهم ومن ثم ينزل شوي ...لان فيه جني ارباح يعني الناس اللي شرت الحين تبيع ولما يرجع يرتفع معناه الشراء عاود من جديد وهكذا...

وش معنى عباره السهم مضغوط او فيه ضغط عليه؟؟؟

هذا الشي تلاحظينه برضو من خلال شاشة مباشر ...من كمية الطلبات ...ومن ثبات السعر وانه يتراوح في اسعار قريبه من بعض معناه انه في مرحلة ضغط وتجميع الناس جالسه تشتري وبكميات كبيره...وغالبا مثل هالاسهم تنضغط يومين ثلاثه ومن ثم تنفجر وترتفع واحيانا نسبه...

هل ممكن نكتتب لاحد بكرت العائله بدون توكيل منه سواء على النت او البنك؟؟؟
اعتقد لو من النت الشخص صاحب المحفظه اذا كان هو نفسه ولي الامر اللي معاه كرت العايله ايه ممكن عن طريق النت او البنك حتى لو بدون موافقة بقية العايله...لان الكرت باسمه يعني مايحتاج موافقة ابنائه او زوجته لانهم مضمومين معاه...

ولو يبي يكتتب بكرت عايله ثاني اعتقد لا لازم من البنك فقط...

اتمنى اكون وفقت في الاجابه...ولو غلطت او قصرت اتمنى احد يصحح لي عشان الكل يستفيد ...والله يوفقنا جميعا...
17-11-1426 هـ, 09:27 صباحاً
 
http://forum.hawaaworld.com/showthread.php?t=426435

شوفي هالموضوع عن نقاط الدعم والمقاومه

اكيد راح يفيدك لانه افادني جدا...
17-11-1426 هـ, 09:41 صباحاً
 
الله يوفقك ياام بسام ويرزقك ربي من غير حساب بصراحه هذا الشيء المتوقع من منتدى رائع زي منتدى حواء
بصراحه افدتيني كثير وخصوصا المؤشر لكن انا مااعندي مو قع مباشر انا اشوف من موقع تداول وبعدين اختي الرابط اللي حطتيه اخت رغد حاطه صوره اول مره اشوفها وين الاقيها
بالنسبه لعمليه تصحيح السوق مافهمت ياليت احد يوضحها اكثر
وسؤالي عن نسبه10% انا ابغى الطريقه كيف وهل نسبه التغير الموجوده في تداول
هي المقصودة با10%
بالنسبه لكرت العايله القصه انه خالة زوجي ارمله وتبي زوجي يكتتب لها بالرغم انه
عندها اولاد كبار لكن هم خارجين من كرت العايله لهم بطاقات وهي تبي تعرف تقدر تكتتب باولادها اللي خارجين من الكرت رغم انهم ماعندهم حساب لكن الاب المتوفي له حساب يعني تكتتب فيهم على اساس حساب ابوهم
ومشكورين يالغاليين
17-11-1426 هـ, 10:49 صباحاً
 


الساعة الآن 04:25 .

تنبيه: كل ما يطرح من مشاركات في موقع عالم حواء يمثل رأي كاتبه فقط ولا يمثل رأي إدارة الموقع.
© 1998-2017 Hawaa Forum, Co.‏