يزاج الله خير اختي الغلا عالموضوع
وكلام صحيح 100%
وهاي الصفات اللي المفروض التاجر المسلم يتصف بها

انا البضايع اللي اعرضها كلها من مواقع وأعرض مواصفاتها بدون مبالغة فالمدح والعضوة اللي يعيبها شي منها تشتري والأكثرية تطنش الموضوع
بس اكثر المواقع اللي اشتري منها تكون مواقع راقية
يعني يعرضولج الصورة فالموقع وتوصلج البضاعة مثل الصورة بالضبط
يعني الحمدلله تكون على مستوى
بس بالنسبة لنقطة التغليف اللي ذكرتها خوخه بصراحة انا ماقدر اسويها
لاني في مدينة تعتبر من أغنى مدن العالم
وكل شي يكلف فيها
وفوق هذا عمولتي تعتبر ولا شي في لندن
يعني العمولة اللي آخذها عالطلبية الوحدة اتييب سندويشتين فلافل بس!!! اتخيلي خخخ
والله صدق
يعني لو رحت بعد اشتريت تغليف وصندوق وغيره وزينت عز الله تم شي من العمولة
وفوق هذا كل التزيين اكيد بيختبص فالبريد فوق وتحت


في شي أبغا اتكلم عنه وهو الإخلاص في العمل
وإنا نحرص على إتقان العمل
يقول عليه الصلاة والسلام: (إن الله يحب إذا عمل أحدكم عملاً أن يتقنه) أو كما قال عليه الصلاة والسلام

بالنسبة لي شخصياً (الله يعينكم عالقصة <<<<<< اتحملوها)
اتعاملت ويا عضوة من فترة قريبة الله يسامحها
طلبت منها صندوق هدية حق عروس وطلبت منها اتزينه
هي بضاعتها ماشاالله روووعة فمواضيعها والكل يمدحها ويمدح البضايع
وانا نفسي كنت متخبلة على بضاعتها
ودوم امدحها جدام ريلي واقوله انا خاطري اشتري منها اشياء واايد
بس يوم طلبت منها تغليف الصندوق بميزانية انا عطيتها إياها
ووافقت واتفقنا بالتيلفون -للأمانة هي دقتلي لندن- المهم اتفقنا على طريقة التزيين وقلتلها ابا نفس اللي فالصورة بالضبط
وقالت بحطلج جي وجي وبزينه بكذا وكذا تمام؟ قلتلها هي عادي
حتى اذكر قالت بحط فراشات قلتلها لا مابا ذوات ارواح زيني بورود
وقالت لا انا اقص راسها ويتم بس جناحاتها قلت اوكي
وسالتني اذا اباه على مفتوح او مسكر فقلت ابا التزيين مفتوح بس بحيث اني اقدر اسكره عقب
بس للأسف ان هالكلام ما اتوثق فالرسايل
المهم واتفقنا عالشكل النهائي للتزيين وقالت يبالي اربع ايام اشتغل فيه
قلتلها اوكي بعده وقت انا مابرجع البلاد الحين
باقي شهر
لاحظي انه كان باقي شهر
وطرشت اخوي على طول يحول لها الفلوس
ورحت البلاد وانا اتحراها خلصته وكلمتها وذكرتها بطلبيتي وعرفتني
واتفقت معاها على مكان اروح واعطيها الهديه اللي بتغلفها بعد وبتحطها داخل الصندوق المزين
ورحت واتفاجات انها تتحراني وحدة ثانية طالبة منها غرض ثاني
ففهمتها مرة ثانية اني ابا الصندوق
وقالت مب مشكلة انا بغلف الهدية وبحطها فالصندوق و"باجر" بطرش الصندوق لج
فقلت اوكي
عقب ما افترقنا اتفاجأت باتصالها وتقول انتي كيف تبين التزيين؟ مفتوح ولا مسكر؟؟؟؟؟
يعني اتخيلي ماكانت مزينتنه لين الحين وبطرشه باجر!!!
وهي فالبداية قالت يبالي اربع ايام اشتغل فيه
وعقب طرشتلي الصندوق ويا التكسي يزاها الله خير وعطت التكسي نوله
بس وصلني الصندوق مغلف من برع!!! (والتزيين من برع كان مثل الشريطة العودة حلو ومقبول شكله لان الصندوق من برع مو محتاج تزيين أصلا) ومسكر بحيث انه مايتبطل الا إذا قصيتي هالشريطة !!!!! <<<<< هذا وانا طالبة تزيين على مفتوح!!
المهم اشتغل عندي الفضول وحبيت اني اطمن كيف التزيين من داخل
قصيت الشريطة بطريقة اني ارد الصقها عقب وما يبين
وفتحت الصندوق
واهني كانت الصدمة القاتلة
التزيين الله لا يراويج
لا يمت للصورة باي شكل من الاشكال
وجي اتحسين انه أي كلام يعني حتى التور نفسه مب مرتب ومب مشتغلة فيه بذمة
وفيه ثلاث وردات كبار وماشي غيرهن وربي شاهد علي والصور عندي
وكم خرزة وشوية خيوط ليف تحت
لا والطامة انها فاتحة علبة صابون على شكل ورد كنت انا حاطتنها ويا الاغراض،،، وملصقة وحدة من الصابونات فوق عالخيش وطالع شكلها عنقااااااش من الخاطر
لان لونها مب راكب عالتزيين ابد
انزين يلست ادور وين الكرستالات؟ وين الفراشات؟ وين الخرز الباقي؟ وين باقي الزحمة اللي في صورتها؟؟؟؟
والله اني اتغصصت من الخاطر واشوي بصيح
ومب باقي شي عالعرس يومين او ثلاث بس!!!!
اتصلت بها وقلتلها الصندوق مب مثل ما اتفقنا
قالت لااااااااا الغالية انتي الميزانية اللي عطيتيني ماتساعد اني ازيد اكثر عن جي!!!!
وشي ناس دافعين جي وجي وانا سويته وااايد احلى<<<<< حسيتها قوية عين

والله حرااام انا محددة الميزانية وياها قبل ما نتفق على التزيين
يعني لو انها قالتلي من البداية ان هالميزانية ماتساعد على تزيين اكثر عن جي ماكنت بكمل وياها
والله العظيم مادري كيف اتحملتها وهي تتكلم

يعني بعد عشان ما اظلمها قالت طرشيلي اياه مرة ثانية وانا على الزحمة اللي عندي والشغل اللي علي بزيدلج تزيين اكثر <<<<<<< بس عقب شو؟ خلاص مافي فايدة الحين. وماشي وقت أصلاً
وقلت فخاطري فوق هالخساير والتعب والروحة والردة من امارة للثانية مرتين
فوق هذا بعد اطرشه حقها وتزيد وردتين الصراحة مايسوى علي
وعطيت العروس وهو جي وانا كلي قهر وصدمة وحسرة وفوق هذا ريلي قال: هاييلة ربعج اللي تمدحينهم! تستاهلين
والله اني متحسرة اني اتعملت وياها مع ان البنات يمدحون بضاعتها وهي صدق يعني انا اشهد ان بضاعتها راقية لكن المشكلة الكبيرة تكمن في عدم اتقان العمل
يعني لو اهتمت اكثر بطلبيتي ورتبتها بشكل حلو ماكنت بقول اللي قلته
انا قلت ماعليه يمكن عشان عندها معرض فهاك الوقت وكانت مشغولة ماحصلت فرصة
بس بعد ارد واقول ان طلبيتي مثلها مثل غيرها من الطلبيات المفروض تعطيها اهتمام ولا يعني عشاني محددة ميزانية صغيرة اعتبر فقيرة وما استاهل انها تسويلي سالفة
والمفروض انها تلتزم بالاتفاق اللي انعقد وخلص
وهذا حق من حقوق المشتري

طولت عليكم وايد أدري
سمحولي بس والله مب قادرة انسى الصدمة اللي انصدمتها وماحبيت اضيج عليها بكلامي لها مباشرة بس ان شاء الله تشوفه وتحط فبالها هالنقطة المهمة

ألا وهي إتقان العمل
24-11-1426 هـ, 04:38 صباحاً
 
هي صح نسيت اشكر اختي جبال وسهول على إضافتها المفيدة
يزاج الله خير حبوبة
والله يبارك فيج
عقلية واعية ماشاء الله عليج
24-11-1426 هـ, 04:39 صباحاً
 
والله اختي الغلا المفروض تصير هذا الأشياء

وشكرا على موضوعج ..
24-11-1426 هـ, 07:59 صباحاً
 
موضوعج يا في الصميم ..والله خذت شي من المنتدى وانغشيت فيهو ويوم كتبت ..على اني ماذكرت اي اسم انحذف الموضوع لانه استوى نقاش حاد بين التاجرات والعضوات ..

بس الأغلبية ولله الحمد يبيضن الويه ..واخلاااااااااااق ماشالله عليهم ..وامانه
24-11-1426 هـ, 08:09 صباحاً
 
اقتباس مشاركة  (جنااااان)
الغالية
انا ما بزعل اذا وحدة قالت لي دخونج ما عجبني، لكن بزعل اذا اتهمتني بالغش لمجرد ان هالشي ما عجبها، والمفروض ان اي تاجرة ما تزعل من الزبونة اذا قالت لها والله هالشي ما عجبني لكن في نفس الوقت ما تقول الزبونة والله هالتاجرة غشتني لأنها باعتني دخون وما عجبني.

اذا انا قلت للزبونة ان علبة الدخون هذي فيها 100 جم بينما يكون فيها50 جم ولا 70 جم هني يعتبر هذا غش.

لكن مسألة ان يعجبها او ما يعجبها هذا راجع للأذواق الشخصية، وممكن اللي ما عجبها يعجب غيرها ولولا اختلاف الأذواق لبارت السلع.

كلامج صح مية بالمية

يعني حرام إنه وحدة تقول إنه انغشت ليش لأنه ريحت العطر أو الدخون ما عجبتها
وأنا مرة اشتريت عطر فراش للعرايس من تاجرة مشهورة ومعروفة بالمنتدى
وتبيعه غالي بعد ، ويوم وصلني وشميت الريحة ريحته خاااايسة تقولين غرشة سنت مخلوطة بماي ورد ريحته حامضة ماأعرف كيف
حتى ريلي لاعت جبده من شم الريحة على الفراش وخلاني أبدل الفراش
ومع ذلك ما تكلمت عنه ولا خبرت حد عنه ولا اتهمتها بالغش
ليش لأنه وايد بنات في المنتدى يمدحونه وعايبنهم
والتاجرة لما مدحتها لأنه ذوقها تشوف إنه ريحته خنينة

ولول اختلاف الأذواق لكسدت الأسواق
24-11-1426 هـ, 08:25 صباحاً
 


الساعة الآن 02:43 .